فيسبوك فألبوم فتعليقات فعفن

فيسبوك - البوم صور - عرض أزياء - بنات محجبات تدبير منزلى - ياااى يع إيه الإخيه ده

ماسورة تريقة

فاتوحة قلة أدب

1- احترموا نفسكم

2- البنات دى مبسوطة وفرحانة، انتوا اللى عندكم صراصير فى دماغكم وفيران فى أرواحكم

3- مفيش واحدة فيهم طلبت من جنابك تغيرى من ارمانى وبرادا اللى بتلبسيهم عشان تلبسى زيهم

4- زعلانين على صورة مصر والذوق العام؟ لو حضرتك مش بتروح وتيجى فى مصر، أحب أعرفك إن ده منظر بيحبه ناس كثير فى مصر. مايعجبنيش أنا شخصياً بس فى ناس كثير يعجبها اوى كمان

5- زعلانين على الحجاب؟ محدش قال لحضرتك تلبس حجاب كده. أما أنت تبقى تتحجب أبقى ألبس لبس يليق بتعاليم دينك وسيب مخاليق ربنا ينبسطوا

6- منكادين إنهم اتكرموا؟ هم ماتكرموش فى الريفييرا، هم اتكرموا فى مكان اغلب الناس اللى فيه فعلاً شايفينه حاجة لطيفة

7- البنات دى فخورة بنفسها، بشكلها، بأنوثتها، بشغلها، وواقفين وبيدلعوا للكاميرا وفرحانين. يعنى لو حضرتك صعبان عليكى إن المصريات مكبوتات مقهورات ماعندهمش ثقة فى نفسهم، حضرتك بتعليقاتك السمجة بتساعدى فى كده

8- لما بنشوف أى فيلم عربى أنا باستاء إنهم بيجيبوا الممثلات اللى مفروض من شرائح مختلفة بيجيبوهم لابسين نفس اللبس ونفس تسريحة الشعر كلهم.

فى أذواق مختلفة

ستات ورجالة. وعلى فكرة أى واحدة من دول لما بتتخطب، بتبقى عاجبة خطيبها وشايفها عروسته الحلوة.

فى ناس كده، بيحبوا الدرجات دى من الألوان، وبيحبوا الصنادل اللى بتلمع، اللى بتبين صوابع رجليهم المكلبظة من كثر الوقفة عليها لإنهم مش هوانم، بيحبوا يجيبوا شعرهم على جنب وفى كثير منهم لسه بيثبت قصة الشعر بجليتر ولسه منهم بيعمل قصة الشعر دواير ويثبتها ع الراس.

آه

معلهش وهم بيكبروا افتقدوا وجودك المهم والمفيد عشان ترتقى بذوقهم. هم آسفين

اتلموا بقى

هو مفيش اى ريحة تربية خالص؟

محدش فيكم مرة اتريق على حد فى الشارع وامه قالت له عيب؟

محدش فيكم اتكلم بعلياء على حد ثانى فأبوه قال له بأمارة إيه يا أهطل؟

ماشمتوش ريحة التربية خالص؟ نهائى؟

انتوا شايفين وشوش البنات؟ دى بنات مصريات من الأقاليم، بيعملوا وقفات وحركات قدام الكاميرا وفرحانين، وانتوا بجد عندكوا الجرأة انكم تكونوا بالسماجة دى؟

انتوا للدرجة دى معفنين من جوا؟ عفن ... حاجة اتسابت فى الهوا لما عفنت، ده اللى موجود جوا ارواحكم. تخيلوها كويس ... جوا صدر كل واحد فيكم فى رئتين وقلب والعفن معشش فى كل حتة.

رابط للألبوم