على فكرة انتو بيتكو مطبخ

بيت ابويا عبارة عن شقتين مفتوحين على بعض، ولما شطبوها حبوا يكبروا المطبخ شوية وبقى باب شقة من الشقتين بيتفتح على المطبخ والتانى على الريسينشان. وطبعا نظرا للسرعة والعملية والقرب وكده فأغلب الوقت احنا بنتعامل بالباب اللى على المطبخ

 فى يوم زمان كده كنا صغيرين اخواتى فى الاسانسير مع بنت جيراننا وبيتكلموا مع بعض وكل واحدة بتقول هى فى سنة كم فالبنت طلعت اصغر واحدة فى الموضوع فطبعا اتضايقت، واما قالوا لها كمان ان اختهم الكبيرة - انا - فى ثانوى البنت اتقهرت واتغاظت لدرجة انها ماعرفتش تقول ايه فجات وهى طالعة من الاسانسير قالت لاخواتى "على فكرة انتوا بيتكو مطبخ". ه

 طبعا احنا مش ناسيين الموقف وبنفتكره ونضحك كل فترة لان البنت فعلا انكادت ياعينى فردت باللى هى شايفة انه حاجة بقى وطبعا اخواتى قعدوا يضحكوا لان اولا احنا بيتنا مش مطبخ ثانيا حتى لو هى مش حاجة وحشة ثالثا ايه علاقة ده بهم فى سنة كم اصلا

الموقف ده بفتكره كل ما افتح بقى بكلمة عن حمدين صباحى والاقى واحد ولا واحدة يطلعوا لى لسانهم ويبقوا ناقص يعملوا لى فلفل شطة بايديهم ويقولوا لى "يا بتاعت ابو الفتوح". ه

 اولا انا مش بتاعت ابو الفتوح ولا هو من بقية عيالى، ثانيا انا انتخبت مرشح وطلع مقلب عادى يعنى مش قصة، ثالثا وده الأهم عمرهم ما بيردوا على انتقاضى لحمدين نفسه. على الأقل انا عندى الشجاعة انى اعترف انى اخدت مقلب وانى تقديرى فى الشخص كان غلط، مش بكابر واقول كلام طفولى اقرب ما يكون ل "حمدين ده اصله فتى احلامى" متناسية كل مواقفة السياسية فى الفترة اللى فاتت المخجلة واللى ماتفرقش عن اى سياسى مدعى فى مصر

لا تعاكسها ولا تلمسها

مصدر الصورة

لأ صاحب مبدأ صراحة

واللى يغيظ اكتر اللى يقول "طب كويس اهه تقدم، واما يقول له كلمتين احسن مايمد ايديه برضه" على اساس اننا مدينين بحاجة للأشكال الضالة دى ومضطرين ناخدهم واحدة واحدة

االعنف اللفظى عنف برضه، والتحرش بكلمة برضه تحرش - حمادة هلال ستايل - ودى حاجاة عيب نتكلم فيها والله

احنا مش بس بنرجع ورا، احنا بنخترع مستويات جديدة للتدنى

الأساطير بتحصل بجد

السنتين ونص غيروا فى الواحد كتير،وحركوا ثوابت وطلعوا اولويت وطبعا هدوا رموز وكلام كبير من ده، بس اللى ماتغيرش هو الاحساس من نزول الشارع، الوحشة والشجن والنوستالجيا من ايام ناس بتقول عليها اسطورة، وناس بتكذب انها حصلت، وناس زيى عاشوها وكانوا جزء منها.

انا فعلا عيشت ايام ما كنت بنام فاردة جسمى ع الأرض ومحدش بيبص عليا، عشت اليوم الوحيد اللى حسيت فيه انى مش "ست" وهم مش رجالة، اليوم الوحيد اللى كنت فيه "بنى آدم"، وفى يوم 28 كنا فى الجيزة ماشيين وشاب ماشى جنبى لوحده فى المظاهرة واحنا بنهتف ايد واحدة وايدى اتمديت لإيده ومسكنا ايد بعض ورفعناها وهو شىء طبيعى بل وهو الأصل، ولما كان كل شوية راجل مانعرفش بعض يدينى موبايل اكلم مراته او مامته عشان اما تسمع صوت ست ودكتورة هنام فى الميدان تطمئن ان الوضع امان وتقعد توصينى عليه وتقول لى "طيب خلوا بالكو من بعض" وفاكرة ام قعدت تزعق لى وتقول لى "ماتسيبهوش يجرى لوحده ليهم ده مجنون"، فى الأيام دى بس حسيت ان البلد دى بلدى، وقربت جدا من معنى كلمة "وطن"

عارفة ان كتير لا هيفهموا ولا يصدقوا ولا يحسوا الكلام ده، وكتير هيقولوا بتبالغ وعاطفية بزيادة، واللى ممكن يصدق هيقول اهى كانت ايام وخلصت انسيها بقى.
الحقيقة الوحيدة انى ابقى مجرمة لو نسيت الأيام دى، لانها كانت فرصتى انى اعيش واشوف بعينى ان البشر ممكن فعلا ساعات يبقوا بنى آدمين، وان الأمل مش عبط ولا رومانسية، وان فعلا الثورة عقيدة والايمان بيها نعمة. الثورة اللى هى مش الهتاف والغاز والخرطوش، الثورة اللى هى اسلوب حياة وميثاق شرف يخلى المؤمنين بيها اما يلاقوا لهم مكان، يعيشوا فيه اسطورة نفضل نحكيها بمدد الزمن
اللى حصل يحبط وده مش محتاج جدال، بس ماتبخسوش نفسكوا حقها، وماتدوش فرصة لتزوير التاريخ بايديكم، اللى حصل ده حقيقة احنا عيشناها، احفظوها جوا قلوبكم واحكوها لعيالكم واحفادكم ... احنا عيشنا الأسطورة، والأساطير بتحصل بجد

كارول سماجة حرامية

هو انتى ناقصة؟ مش كفاية سماجة، كمان حرامية؟

دى اغنية كارول هانم اللى المفروض انها اغنيتها يعنى

وطبعا اى انسان فى الدنيا دى بيسمع ام كلثوم عارف ان ده لحن المقدمة لأغنية "ليلة حب" اللى هو ايقونة اصلا ومشهور جدا. يعنى حتى جايين تسرقوا طب اسرقوا حاجة دكاكينى مش ام كلثوم ... أم كلثوم يا فجرة!!

آدى اغنية ام كلثوم، زى ما قلت هى المقدمة

   

اكذوبة التعدد وحل مشكلة العنوسة

يعنى العالم دى قارفيننا بحوار ان الستات مفروض يكونوا متفهمين شوية ان التعدد بيحل مشكلة عنوسة الستات عشان يا حرام الستات مش لاقية جواز، طيب وبالنسبة للرجالة اللى مش لاقية جواز – واللى على حسب كل التقديرات اكتر من الستات اللى مش لاقية – دول نعمل فيهم ايه؟

يعنى مش انتوا برضه قارفيننا ان كون الرجالة مش لاقية جواز ده سبب التحرش والمعاكسات والهم ده؟

يبقى مش منطقى ان انتوا تشجعوا على التعدد بقى وانما المنطق هو فى انكم تساعدوا الرجالة والستات اللى مش لاقيين جواز وعايزين يتجوزوا. ده بافتراض طبعا ان اللى بيتجوز اكتر من واحدة ده عايز بس يحل مشكلة العنوسة ويعف اللى مش متجوزة، اهه الثواب هيبقى دوبل يا عم، هتاخد ثواب ست وراجل كمان. طالما معاك تفتح بيت كده كده، ساعد فى ستر راجل وست، وشوف بقى الثواب اللى هتاخده ... لو هى حكاية ثواب وستر ومشكلة عنوسة وكده، مش طفاسة والسلام.

وعلى فكرة انا ماعنديش مشاكل فى الطفاسة، انا مشكلتى فى اللى يستكردنى باسم دينى. يعنى سعادتك طفس ولاقى اللى ترضى مشكلتك انت وهى ماعنديش وقت ليكم اساسا، انما انك تقل لى ان دينى بيقول كده عشان نحل مشاكل مش عارف ايه، وتطالبنى بانى افكر بالطريقة دى وتاخد من الدين غطا للهتش اللى بتقوله، يبقى انت مش بس طفس، انت طفس ومنافق ومدعى، ولو احنا عارفين اى حاجة عن الدين الاسلامى مفروض نبقى عارفين مصير المنافقين ايه.

سلام