Tuesday, March 9, 2010

انا مش كابتشينو ... انا ايمان

اول مرة اروح جمعية من جمعيات حقوق المرأة كان من كذا سنة و كان عرض لفيلم و بعدين مناقشة. اول كلمة اتوجهت لى كانت:

"يعنى مؤمنة بحقوق المرأة و محجبة؟"
انا: آه ... و ليه لأ؟
الحجاب ده ضد حرية المرأة
بس انا محجبة بمزاجى و بيتى مش كل اللى فيه محجبات
مفيش ست ابدا خاتتحجب بمزاجها, انتى مضحوك عليكى
-------- 

من وقتها بقيت "المحجبة":
 
فى مناقشة عن اوضاع الحريات فى مصر,كنت باقول رأيى الشخصى,طلع لى واحد بسؤال
لا ... بس انتى كده مش ليبرالية بقى . انتى على كده يسارية سلطوية. عشان بتحطى مصلحة "الجماعة فوق الفرض"
------

بعدها غرفت انى "يسارية سلطوية ذات ميول ليبرالية"

--------

بتحصل كتير انى كل ما اقول حاجة يترد عليا "آه آه مانتوا الدكاترة لازم تعملوا كده"

"دكتورة"

--------

فى تعليق على المدونة,واحد كتب ما معناه انى مفيش حاجة اسمها الست زى الراجل و ان "الست" لازم تعرف حدودها, و كرر لى ان الست المستقلة دى بيطلع لها شنب و ان "انتوا يا فيمينيست" اخرتكوا زيفت ان شاء الله.

و مرة فى الشغل زميلى بصبح عليه ... لقيته بيرد "صباح الخير يا ست الفيمينيست"

و زودوا عندكم "فيمينيست"
----------

يعنى بقدرة قادر, انا بقيت عاملة زى كوباية الكابتشينو ... طويلة ولا قصيرة,بنكهة ايه.بكافيين ولا لأ, برغوة ,بكريمة, فى مج او كوباية بلاستيك.

لأ!!

انا مش ست مسلمة محجبة يسارية سلطوية ليبرالية اشتراكية دكتورة مدونة فيمينيست سمراء قصيرة و شعنونة ... انا كل الحاجات دى و اكتر ... انا بنى آدمة ... و اسمى ايمان!

28 comments:

Mo-ha-med said...

صديقتي المسلمة المحجبة اليسارية السلطوية الليبرالية الاشتراكية الدكتورة المدونة الفيمينيست السمراء القصيرة و الشعنونة..
:))))))))

فيه ناس (كتير) عندهم العالم كله لازم يتحط في قوالب... كأنهم لازم يحطوا الناس في صناديق واضحة التعريف و محدودة العدد، و السبب بسيط و هو ان تعددية الأفكار و الاراء و الأشكال و الألوان أمر مخيف بالنسبة لهم. الناس عتندهم تنقسم الى يا دوبك بضع فئات و طبعا كل فئة افتراضية من دول بييجي معاها كل الافتراضات الممكنة عنك بناء على ولا حاجة.
و ده آخراً بيسهل لهم عملية تقسيم الناس الى "معايا" أو "عليُ" بشكل مبسط ان لم يكن بدائي..

الناس دول لا مفر من التعامل معهم احيانا، بس متعة الموضوع تكمن في نظرة العيل التايه على وجوههم لما يكتشفوا ان افتراضاتهم عنك كانت غلط و انك لا تصلحي لأي من قوالبهم السخيفة...!

ansana123 said...

عاشت الأسامى
ياأنسانة ياإيمان

bastokka طهقانة said...

و ماله هو الكابتشينو وحش
دي حتى كباية على الصبح كده تبقى اخر مزاج
انا مؤمنة اني مزيج من المعاني اللي بعضها متناقضة و ده طبيعي
بس كنت عايزة اسأل سؤال بيني و بينك يعني اية لبرالية؟اوعي تطلع حاجة عيب
ما ليبرالي الا عدوينك يا اختي


اوروفوار

مصرية said...

انا معاكي يا إيمي أنا كمان مش مقتعة إن في حاجة اسمها الراجل راجل والست ست .. المرأة إنسان حدث أنها امرأة والراجل انسان حظه الحلو انه حدث انه رجل في مجتمع ينظر للرجل على أنه ملاك لا يخطيء أبداً

محمد ربيع said...

يلا يا محجبة، هو انتي عايزة تمشي في الشارع كده من غير تسنيف، لازم تتسنفي

Unknown said...

Mo-ha-med

" بس متعة الموضوع تكمن في نظرة العيل التايه على وجوههم"
ده حقيقى و ان كان ساعات فى منهم اللى بيرفض الاعتراف بده و بيتحول الى خبير هايعلمنى اصول الاشياء ... و ممكن جدا الاقى نفسى عندى ازمة هوية كبيرة كمان
:D
دى اول مرة تعلق هنا , انا مبسوطة بجد :)

Unknown said...

ansana123
تعيشى و تسلمى :)


bastokka طهقانة

هو فى احلى من الكابتشينو؟ بس فى البنى آدمين يعنى
انا مدمنة كافيين على فكرة و اعجبك ... و ما تسألينيش انا عن معانى الكلمات عشان انا عمرى ما فهمت و لا شكلى حافهم تقريبا
بس لحد اما نفهم, بلاش تقوليها قدام الناس لا تطلع قلة ادب بجد
هههههههههههههه

Unknown said...

مصرية
و يا سعده يا هناه لو راجل مسلم بقى
يا سلااااااام ,كده يبقى من حقك يملك العالم و يتحكم فى العباد

Unknown said...

محمد ربيع

شفت الفجر؟؟ عايزة امشى كده من غير ما حد يسنفنى
بنات آخر زمن بقى
آدى اخرة تعليم البنات و الانترنت و اليو تيوب

Unknown said...

عارفة يا ايمان، امبارح كنت لسة بتكلم عن الstereo-typing
بجد من اكتر الحاجات المستفزة، بس دول مجرد ناس بيسهلوا على نفسهم، مش عايزين حتى يتعبوا عشان يفهموا

Alkomi said...

لا سمراء

خير ان شاء الله

Lasto adri *Blue* said...

كلنا ايمان
:D

غلبان said...

شوفي ياست الكل
لازم اولا يكون فيه راجل وتكون فيه ست
بالله ليكي الدنيا تمشيمن غير الحنان والجمال والانوثه
نقدر نعيش ازاي بالخناشير بس
بس ف نفس الوقت كل واحد له حقوقه واحترامه
وبرضه لازم كل واحد تكون له افكاره
وبرضه منحولش نوزع الاتهامات يمين وشمال
ماشي يادكتوره

Unknown said...

asmaa

حقيقى هى فى قدر استسهال
و فى قدر غباء.انا اسفة انى اقول كده
بس فى ناس مش قادرة تستوعب ان البنى آدم ككائن اكثر تعقيدا من انه يتصنف كده

Alkomi:

سمراء و افتخر ... ههههههههه

Unknown said...

ايوة كده يا ايماااااااان .. هههههههههههههه

غلبان:

فى فرق بين متساويين و متطابقين

الراجل و الست طبيعة طبعا انهم مختلفين,بس هم متساويين
فاهم قصدى؟

Anonymous said...

راقتني كثيرا حكاية فيمنيست ومحجبة ازاي دي، تذكرني بمرة فتح حوار ديني لا أذكر محتواه، فقلت رأيي، واذا بواحد يقول لي: الله؟ انت مش ناصري ويساري؟ بتتكلم في الدين ليه أمال؟
مع النضج الفكري ندرك أننا لسنا كائنات أحادية العنصر، بل أكثر خلق الله تركيبا وتعقيدا، وكل منا كما قلت نسيج وحده، فلا يمكن التعميم على الطبيبات ولا الحقوقيات ولا المحجبات ونفي صفة بإثبات صفة أخرى
بوست لطيف وعميق

Unknown said...

الخلط الفظيع بين الحاجات و تصنيف الآخرين دي اخطاء مجتمعية
يعني الناس طريقة تفكيرهم لازم تتغير و تبقى واسعة شوية
تصنيف الناس غلط
البني آدم كوكتيل من حاجات كتير
ممكن ماتلاقيش حاجات فيه
بس هتلاقي فيه حاجات تانية و كتيرة و متناقضة جدا ..
خلقة ربنا بقى !!

AyA said...

موضوع التصنيف موجود في كل بلاد العالم, بس في مصر زيادة بجد, يعني مثلا في امريكا بيصنفوا مثلا عربي واجنبي, اسود وابيض, فقير وغني حتى... انما في مصر الناس عندها أحكام مسبقة لكل صفات الانسان الممكنة, طويل قصير تخين رفيع أبيض اسود اسمر (كل درجة ليها معاملة) من كلية عملية ولا نظرية وبرضه كل كلية ليها معاملة وليها ناس اول ماتقولي اسم كليتك ادامهم كانك شتمتي السيد الوالد!.. وآخر تصنيف اكتشفته حديثا كان بناءا على لفة الطرحة!!!!! آه والله يابنتي كل حاجة في بلدنا ماتستغربيش!

ربنا يهدي الجميع قبل ما نبدأ نولع في بعض!

قلم جاف said...

ربنا يبعدك عن كل الناشطين والاعتصاميين والسياسجية والمفقرين والموصقافين ..الناس دي بتشكك أي حد في نفسها .. وممكن توهمه إنه على رأي "بلال فضل" إخوان حزبوطني.. ويمكن يطلعوكي أول أهلاوية زملكاوية في التاريخ!

Unknown said...

انونيماس:

مع النضج الفكري ندرك أننا لسنا كائنات أحادية العنصر، بل أكثر خلق الله تركيبا وتعقيدا،

كلام صحيح جدا. اتمنى ان اللى يفهموه يزيدوا.
بس المشكلة بتكون فى اللى ليسة ما وصلوش للدرجة دى من عدم الاهتمام بتصنيفات الغير و تعريفاته. مش معايا ان ده ممكن يكون فخ للكتير من الاصغر سنا و الاقل خبرة؟ لانه بيحصرهم فى قوالب هم ممكن يكونوا ليسة مش مدركين كل جوانبها و بيتم استغلالهم بيها.

انا فى رأيى ان ده هو العنصر الرئيسى اللى بتنجح بيه بعض التنظيمات و الاحزاب فى اتستقطاب الشباب الصغير و استغلالهم فى الوقوف اما المدفع
ولا ايه رأيك؟

Unknown said...

قهوة بالفانيليا:
اولا اهلا بيكى يا غالية:)
و معلهش انى اتأخرت فى ردى عليكى بس متهيألى انتى واخدة بالك انى بعيدة بقالى فترة عن كل حاجة

كلامك على قصره و بساطته لكن لخص الموضوع: "خلقة ربنا" اللى لو كل بنى آدم رضى بيها و حبها هانوصل للثقة بالنفس المفقودة عندنا دى

اشكرك على ردك اللطيف

Unknown said...

اية:
سمعت انا حوار لفة الطرحة دى
انا ممكن آخد فكرة عن البنت من لبسها بشكل عام بس مش اكتر من كده

و فعلا فى كل البلاد فى مرض التصنيف ده انما مش زى عندنا نهائى
عندك حق يا بنتى

Unknown said...

قلم جاف:
هههههههههههههههههههه
انا ضحكت ضحك من تعليقك
مسخرة :)

جامدة اوى اول اهلاوية زملكاوية دى. و الموصاقافين دول ربنا يبعدهم عنى و بيعدنى عنهم
الحمد لله انا بطلت الكلام ده من كتير
و حقيقى ارتحت

أحمد عبد الحميد said...

و آخرة الحدوته ايه؟؟

طلعتي بني آدم كويس ولا وحش؟؟!!

Unknown said...

على حسب انهى تقييم؟

حـــنــظـــلـــة said...

بس متنسيش تجيبي معاكي التدوينة على القبر، علشان يوم القيامة تعرفي تردي السؤال

Unknown said...

هى لو انا فاهمة صح, كل حاجة بتروح مع الواحد اصلا. محدش بينقى ياخد ايه و يسيب ايه
و لو انا برضه فاهمة صح, اللى بيحاسب ربنا مش بنى آدم

بس هو يعنى ايه لازمة كلامك ده اصلا؟ مش شايف انه مش فى مكانه؟

Unknown said...

VIMAX