Sunday, November 21, 2010

بلبل حيران ... النخلة اطول ولا القطر اوسع؟

من كم يوم فى العيد, و زى اى مواطن مصرى اصيل, رحت السينما. فيلم "بلبل حيران"
رحت الفيلم عشان كنت مكتئبة جدا و مخنوقة, و تقريبا رحت غصم و اقتدار من اختى ... المهم انى ماعنديش مشكلة اروح فيلم لاحمد حلمى, بالعكس, انا بقيت باحترمه جدا.
افلام آسف على الازعاج و كده رضا و الف مبروك افلام حلوة اوى و عجبتنى جدا. عسل اسود خالص نهائى, بس ده مش موضوعنا.
المهم دخلنا الفيلم فى سيتى ستارز, و زى كل سينمات مصر فى العيد, السينما عبارة عن ملاهى و عيال بتزن و بيلعبوا استغماية. كان فى طفلة جنب اختى ما سكتتش 5 دقايق على بعض اما كان فى لحظة كنت هامسكها انط فى كرشها بس اختى قالت لى "دى طفلة صغيرة يا ايمان"


المهم ...
بعد اسم احمد حلمى, الاسماء كانت كده: زينة ... ايمى ... شيرى
you’ve got mail افتكرت ميج ريان فى فيلم
“'Hi! I'm Kimberly!' 'Hi! I'm Janice!' Don't they know you're supposed to have a last name? It's like they're an entire generation of cocktail waitresses!"

نهايته ... الفيلم بدأ بايمى الدكتورة ذات التخصص الفريد: "عظام و علاج طبيعى" ماعرفش عملتها ازاى دى, و بعدين اكتشفنا ان تفاصيل شغلها كدكتورة اغرب و اغرب... دكتورة بتغسل السنان و تحلق و تلبس العيانين" ... هايل هايل!
الفيلم فى المجمل كان ممكن يعجبنى و يضحكنى. و الفكرة العامة انا شخصيا موافقة عليها جدا. فيلم لطيف و خفيف, و اهم حاجة فيه انه مش بطىء. مازهقتش و انا قاعدة يعنى, بس برضه اتنكدت, ليه؟ بعدين
باختصار (الكم سطر دول فيهم حرق لاحداث لو حد بيزعل من كده) احمد حلمى مهندس ديكور طاقق بيدور على شريكة حياته بالمسطرة و المنقلة. احتار بين النقيضين (زينة و شيرى) و انجذب لمميزات كل واحدة اللى كانت بتعالج عيوب التانية.
انجذب لجنان زينة, البنت المستقلة اللى بتاخد كل قراراتها بنفسها (و ساعات كمان قراراته) و مش بتغير عليه. البنت اللى شغلتها هى الحاجة اللى بتحبها (عزف الهرمونيكا) و اللى حياتها كل يوم فيها حاجة جديدة.  البنت اللى بتجرب كل حاجة و عايشة فى الدنيا بتخاطر و تنط (حرفيا, الهواية بتاعتها كل اسبوع هى القفز بالمظلات) الحاجة اللى بتبسطها... انبهر بيها و حس معاها انه "عايش" و "مبسوط"
بس اتخنق من صحابها و الظيطة بتاعتها ... امتى؟ اما قابل شيرى, البنت المصرية الاصيلة, اللى اول مرة يقابلها كانت و هى بتعيط عشان هو كرئيسها فى الشغل انتقد شغلها و ماعجبوش. البنت الاعتمادية, اللى حتى اما بتتوه بتكلمه عالموبايل فى الشغل عشان يقول لها تعمل ايه. و اللى اصلا كان عندها سواق عشان ماتسوقش, و ماتعلمتش سواقة غير لما هو قال لها و علمها. البنت اللى ماتعرفش اصلا تاخد قرار, الغيارة القماصة اللى فى كل خطوة فى خطوبتها مامتها معاها فى الصورة بالكامل. و طبعا هوايتها (الطبيخ) اللى بيه بتسعد الراجل اللى معاها و هو استمتع جدا باحساس انها محتاجاه دايما اللى ارضى غروره تماما ... استمتع معاها  و حس انه "راجل" و "محبوب"
و فى الآخر قال لايمى الكلمة المهمة جدا "اللى نص الناس فى السينما لا سمعوها ولا فهموها" ... قال لها:
"ينفع تسألى حد النخلة اطول ولا القطر اسرع؟ طبعا لأ ... و لو حاولتى تجاوبى مفروض تقولى (البحر اوسع)"

الى واخداه على الفيلم هو تمثيل زينة ... يا ناس الست دى تشتعل اى حاجة غير التمثيل و تريحنا بقى. انا بقيت حاسة و الله فى احيان كتير انها بتمثل علينا مش لينا, بتشتغل نفسها مش بتمثل. و كنت متغاظة جدا لان الدور بتاعها كان خامة حلوة اوى لو بنى آدمة بتعرف تمثل كانت اديته عمق اكتر بكتير.
و كمان الحبة اللى فى الآخر لو كانوا اطول كان بقى احسن, كانوا ممكن يستثمروا التريك بتاعت انهم بيشتغلوه دى احسن من كده و كانت هاتطلع منها كوميديا موقف حلوة كتير
طب انا زعلت ليه بقى؟
حاجتين:
اولا التلطيش ... ايوة. احمد حلمى فى مشهد كان هو و شيرى مستخبيين من زينة, ضربها بالقلم تلات مرات و الناس بتضحك!!!
حد يفهمنى ليه الضرب بيضحكنا! ما هو طول ما المشهد ده عادى, عمرنا ما هنخلص من المصيبة دى
الضرب مش عادى .. مش عادى .. مش عادى
مش ممكن ابدا يعنى!!
النقطة التانية ... سعادة البطل كان كل ما يفسخ خطوبة يقول للبنت "انا راجل ماعنديش مشكلة, لكن انتى ست و لو اتجوزنا و اتطلقنا هاتبقى مطلقة و ده مش لقب سهل ابدا. اهه تبقى مفسوخة احسن ما تبقى مطلقة"
ايه و البنى ده؟ احنا ليسة بنقول العك ده فى افلامنا؟ انتوا عارفين كم بنت صغيرة و مراهقة كانت بتشوف الفيلم ده؟ كم واحدة مخطوبة شافت الناس بتضحك اما احمد حلمى الكول ضرب خطبيته؟ كم ست متنكدة من جوزها شافت حضرته بينكت على لقب مطلقة؟
انا ليسة هاتكلم اكتر فى الموضوع ده عشان انا اصلا عايزة افهم ازاى مؤلف الفيلم كتب الكلام ده و ليه. بس قلت اديكم فكرة

انتوا ايه رأيكم؟ عندى حق ولا مزوداها؟

29 comments:

Anonymous said...

احمدك يارب لقيت حد غيري بيقول الكلام ده الناس كانت فكراني مجنونه ومتجنيه عالفيلم
قولتي كل اللي كان محشور في ظوري الصراحه

Unknown said...

لا ماتخافيش ... المجانين اللى زينا كتير
اصلا ليسة هاقلب على محمد دياب فى بوست خاص بيه لوحده
ان شاء الله
هع هع هع

Anonymous said...

بالاضافة للكلام النتي قلتيه (which i totaly agree with)أحمد حلمي أول مرة يضيف السفالة في افلامه. كان فيه كلام كتير خارج.

Shimaa Gamal said...

و الأخ الحيران إختار مين فى الأخر ؟
مين النموذج اللى السيد المؤلف قرر إنه نموذج البنت اللى كل البنات تمشى عليه؟

Unknown said...

استنى عليا بس
فى حاجة اسمها يقول "محتاجة شفط من تحت" على شيرى؟؟
باحضر انا بوست فى كل ده

Unknown said...

لا الاخ المؤلف بيقول لنا ان كل بنى آدم حالة خاصة لوحده و ان المقارنة بين الناس عبط ... انا متفقة معاه فى دى

Shimaa Gamal said...

طيب الحمد لله إنه بعد العك ده وصل رسالة كويسة
بس يا رب تكون وصلت

Unknown said...

مانا باقول لك. ساعة ما قال السؤال الفلسفى ده, اللى المفروض الدرس المستفاد من كل الفيلم, الناس كانت فصلت بقى خلاص
الضحك خلص و كده
فاهمة قصدة؟

آخر أيام الخريف said...

و الله ده نفس توقعى يا ايمو عشان كده ما دخلتش الفيلم .... و انا كمان ما عجبنيش عسل اسود :)))))

كل عيد و انتى طيبة يا قمر :)))ادخلى ابن القنصل هيعجبك

Mohaa kotb said...

بصي انا هوضحلك بس نقطة الالفاظ والحاجات الخارجة دي ببساطة لان حلمي خايف من مكي وطبعا انتي فاهمة فلازم يعمل كده عشان يشد جمهوره وجمهور مكي اما بقي بالنسبة للفيلم عموما انا شايفة كويس مع اني حاسس اني شوفت التيمة دي ميت مرة بتاعة ماينفعش تقارن وكده

Unknown said...

و انتى طيبة يا خريف
شكرا لتعليقك الظريف

قطب انت عندك حق, بس بصراحة هو لو هايحاول انه يعمل كده فى الآخر هايخسر الاتنين
لانه هايخسر نفسه و هويته الفنية
قرف والله

Nihal Fares said...

معاكى جدا.. الفيلم كات سقيل اصلا و مضحكش غير قليل اوى الباقى كله ايفيهات ألشة و قليلة الأدب و الناس بتضحك معرفش على ايه.. و فى الأخر فضل على حاله بيبص للى مش عنده

iHibo said...

قرأت نقد الفيلم

يقال ان الفيلم هو بداية سقوط احمد حلمي
والله اعلم

Kontiki said...

و الله يا منوش مش بحترم اى فيلم عربى من بعد سينما الخمسينات و الستينات اللى هى اسماعيل يس و شكرى سرحان و كمال الشناوى و يوسف و هبى و نجيب الريحانى و كدة الا قلة قليلة نادرة جدا جدا المهم عرضك للفيلم جميل و نقدك لة فى محلة وخصوصا فيما يخص زينة :) اما شيرى و سوسو و غيرهن فمش كل من سيحت شعرها و وقفت قدام الكاميرا بقت ممثلة :D
ارجوكى يا ايمان بطلى تدفعى فلوس فى السينما المصرية ارجوكى احنا كدا شركاء فى الجريمة :)

Unknown said...

Nihal Fares:

انتى كمان عندك نقطة مهمة اوى: انه رغم اتن هدف الفيلم فى الاصل كويس, لكن العرض التجارى افقده المعنى ده
عندك حق تماما

هيبو:
ماعتقدش ان الامر كذلك
و الا طب امال عسل اسود ايه بقى؟ ده فيلم عبيط اصلا فى رأيى
هو بس عمل شوية اخطاء ثقتى فى احمد حلمى بتخلينى عندى امل انه هايصلحها ان شاء الله فى الفيلم اللى جاى

Unknown said...

Kontiki:

زى ما قلت فى البوست, انا بقيت باحترم احمد حلمى, لحد دلوقتى الف مبروك فيلم هايل جدا فى رأيى, و كده رضا
المهم ... انا دخلت الفيلم فى ظروف معينة جدا انتى عارفاها كويس
اهه اى محاولات

Anonymous said...

الاهم يا ايمان اننا نسال كام سؤال رخم

مين المنتج ؟
مين المؤلف ؟
ايه هو اهدف من عمل فيلم سطحي زي ده؟

هل نشر ثقافة غريبة عنا؟
هل اشاعة مفاهيم تهدم اخري و قيم ؟
ليه ندفع من جيوبنا فلوس لتفهاء زي دول في الاخر ما فيش منهم موقف واحد له شكل وطني الا من رحم ربي.

اسئلة كتير لن ليس لها عندي سوي اجبة واحدة.

انه يجب علينا ان ننتقي ما نشاهد و ما نقر و ما ناكل
كي لا تؤثر علي ما نكتب

معاكي الف حق

Anonymous said...

Eman, you are absolutely right.
There are hostile remarks gainst women in the movie, that are invisible to the mainstream viewers, because people are used to them...
We have met at the workshop today, where you mentioned networking with some celbrities from the film branche, please do..
ask for some funding, activate stars, and mobilize them, you can establish a media monitoring. These discourses have to banned and shunned form public life..
I also suggest music lyrics (Tamer Hosny for example: stalking a girl from Adab or Tegaret Ain Shams, or other incidents).
- Hanan

الشاطر حسن said...

الأبنة/ثورة البنفسج
كلامك معقول جدا
ولكن سينما هذه الأيام للإضحاك فقط وتضيع الوقت
تقبلي تحياتي

كتب عربية said...

هههههههههههههههههههههههههههههههه
انتى غريبة اوى اوى اوى مش الكلام اللى فى الفليم ده بيحصل ولا ده كلام افترى ؟
مهو هو الكلام ده موجود فعلا يبقى انو الراجل بيسيب ويخطب كذا بنت عاتى يعنى لية بقى زعلانين انا عندى فكره بدل متجهمى الفليم هجمى الواقع

Unknown said...

مواطن غلبان

انا مش فاهمة تقصد ايه بالمفاهيم الغريبة و زى ما قلت فى البوست
انا مش باتفرج على افلام عربى بشكل عام لكن باحترم احمد حلمى و خاب املى فيه فى الفيلم ده

Unknown said...

Hanan

Thanks a lot for your support. It really means a lot
and I am trying to take it seriously to contact artists who can participate in this

Unknown said...

الشاطر حسن
والله مش كلها لكن للأسف اغلبها


كتب عربية
لا مش فاهمة
اولا انا مش باعمل حاجة غير انى بهاجم المجتمع قولا و فعلا
ثانيا انا ماتكلمتش عن اللى بتقوله لان ايمى كمان كانت بتتنقل بين العلاقات يعنى مالهاش دعوة براجل و ست
وبعدين مانا شايفة ان الاعلام له دور كبير فى مقاومة و تقويم المجتمع مش تخريبه
ولا ايه رأيك؟

kholy said...

مل تعليقاتك سليمة بس الناس هنا بتاخد الفيلم على إنه فيلم , محدش بيبص للرسالة اللي وراه و ما إلى ذلك , كان في فيلم قديم مشهور أوي بتاع يحيى شاهين و مش فاكر مين البطلة لما كانت أمه ماري منيب و صاحبه عبد المنعم ابراهيم , المهم كان بيقول مينفعش يكون في أي علاقة بين الراجل و الست قبل الجواز راح صاحبه قايل له ايه الكلام الفاضي دا , لو واحد رايح يشتري جزمة بيجربها الأول !!!! و فضلت الناس تتفرج عليه سنين و محدش بياخد باله من الكلام دا
الناس محتاجة تلاحظ البلاوي اللي بتحصل بجد , زي هنيدي لما كان بيتباهى إنه عشان ميقفش في الطابور في ديزني قعد في كرسي المعاقين و خلى مراته تزقه و لما دخل قام مشي قدام الناس و الجمهور في البرنامج بتاع هالة سرحان كان بيضحك و لا كأن في حاجة مخجلة اتقالت

Unknown said...

استاذ خولى

منين بتقول الناس محتاجة تاخد بالها و منين بتقول لى ان انا باركز فى كلام مش هو اللى الناس بتاخد بالها منه؟

يعنى مش فاهمة عايزنا ناخد بالنا ولا ماناخدش؟

انا شخصيا شايفة ان تأثير السينما قوى و مهبب و عميق

Akram Gamal said...

ايه يا ايمان يا بنت النكد ده
ههههه
انصحك نصيحه متدخليش سينما تانى و انت متنكده
انا كنت بقرأ كلامك و حاسس ان هيطلعلى من الشاشه ديب اسمه ايمان هياكل وشى
(حرام عليكوا بقا .... ارحمو نفسكوا)
بس كده ...شكرا

Unknown said...

اهلا ملاك
شكلك راجل
عشان كده شايف الكلام زيادة
انا يمسكك راجل اقوى منك بالقلم و الناس تتفرج عليك و تضحك ابقى احكى لى حسيت بايه

AyA said...

من أسوأ افلام أحمد حلمي!... قلة أدب اوفر في فيلم تصنيفه عائلي!.. استظراف كتير.. ملل رهيب.. قصة مافيش وتمثيل بارد من الجميع باستثناء مشاهد نادرة متفرقة في انحاء الفيلم لا تتعدى دقيقة متهيالي لو جمعناها.. والاسوأ ان الفيلم بيكرر نفسه على اساس اننا ما ملناش من الملل فبيكرره عشان يتأكد!!!...

بالمناسبة.. شميتي ريحة أحمد مكي في الفيلم؟... متهيالي الفيلم ده بيمثل "بانك أتاك" من أحمد حلمي في مواجهة مكي

Mohamed Abdellatif said...

طريقة التخلص من حشرات الفراش يعدّ التخلص من حشرات الفراش صعباً، وذلك لأنّها بارعة في الاختباء وتتكاثر بسرعة، كما أنّها تقضي وقتاً طويلة في بيوضها قبل أن تفقس وتكون ذات مناعة ضدّ كافة طرق الإبادة، ممّا يعني أنّه يجب القيام بأكثر من محاولة للتخلّص منها.

بعد التأكد من وجود حشرات الفراش في المنزل يجب البدء بمرحلة منعها من الانتشار أكثر، ويمكن القيام بذلك عن طريق:
تغليف أيّ غرض يخرج من الغرفة التي وجدت بها حشرات الفراش في كيس بلاستيكيّ لمعالجته، وفي حال عدم القدرة على علاج الغرض يجب تركه جانباً لفترة من الزمن للتأكّد من موت حشرات الفراش النشطة، وقد تطول الفترة لتصل إلى السنة. إفراغ كيس المكنسة الكهربائيّة بعد كلّ استخدام. عدم التخلّص من قطع الأثاث التي يمكن معالجتها، تكسير قطع الأثاث التي لا يمكن معالجتها والتخلص منها حتى لا يأخذها شخص آخر، ويعاني من نفس المشكلة.

شركة مكافحة النمل الابيض ببريدة
شركة مكافحة النمل الابيض بالدمام
شركة مكافحة النمل الابيض بالجبيل
شركة مكافحة النمل الابيض بمكة