Saturday, January 1, 2011

اهلاوية و مش مع جمهور الاهلى


عرفت ان فى ناس كده من جمهور الاهلى فى تشجيعهم للنادى الاهلى قرروا انهم "يعايروا" شيكابالا ب "لون بشرته" ... و مش بس كده, كمان قالوا عليه "عبد اسود"
شعبنا المعفن اللى ريحة ناس كتير منه تقلب المعدة قرر انه يقول على بنى آدم انه عبد عشان لون بشرته.

غير انه قلة ادب و انعدام تربية و اخلاق و مش من اى دين فى شىء, كمان مش حقيقى.

الشعب اللى برلمانه مزور و بياكل و بيشرب و بيروح مدارس و جامعات و اشغال هو اللى عبيد
الشعب اللى عشان يعيش و السلام بيبقل الاهانة فى شغله و التحكم من اهله هو اللى عبيد
البنى آدم اللى بيبقبل انه يكون جزء من فساد عشان خايف يقول لأ هو اللى عبد

انتوا مش بتبصوا لنفسكوا فى المراية؟ انتوا شايفين عاملين ازاى؟ كتير من اللى بيروحوا الماتشات لاى فريق اصلا ممكن اوى يكون الجعير فى الاستاد لمدة كم ساعة هو الانجاز الوحيد اللى بيعمله فى حياته. يعنى ضايع و فاشل و مالوش تلاتة لازمة, و كمان بيقول على بنى آدم تانى بيشتغل و بينجح انه عبد ... .... ... ليه يا ماما علمتينى ماشتمش؟ يمكن كانت الشتيمة نفعت

أنا متنرفزة أوى بجد. هطق. متغاظة. إيه النعرة الكذابة دى جيبتوها منين؟؟؟

بعدين هو حد قال قبل كده ان الشعب المصري في المجمل يعنى أجمل شعب و أنا ماعرفش؟ ده كل ما الكاميرا تيجى على الجمهور, نشوف مناظر استغفر الله العظيم. لا شكل و لا حموم ولا هدوم ولا اى منظر, و كلهم من غير هدوم و مناظرهم عار يعنى.

معلهش يا شيكا بالا ... حقك عليا. و أنا أهلاوية و أهلاوية جامدة كمان, و متبرية من الجمهور ده

9 comments:

Noha Saleh said...

متفقة معاكى فى ان عيب اوى ان بعض جمهور الاهلى يعاير انسان بلون بشرته
بس مش متفقة معاكى انك تجمعى بالكلام عن الشعب كله كده...ماينفعش
ثم ان الهدوم او الشكل او المنظر دى حاجة مش بتاعة حد
يمكن الناس اللى بتقولى عليهم دول لا لهم شكل او منظر ظروفهم كده وعلى فكرة متهيألى الناس دى مايهماش لا اهلى ولاغيره بيهمها تجيب اللقمة وتعيش وخلاص زى مابتقولى
على فكرة انا كمان بشجع الاهلى وعيب اللى حصل من شوية تافهين مش وراهم غير الجعير وخلاص على رأيك
بس انا حبيت اقولك رأيى وخلاص

Anonymous said...

الاخت العزيزة ايمان

اريد ان اتواصل معاكى فى موضوع مهم للغاية ومش عارفة وحاولت ادخل على الهتمويل بس مبعرفش استخدمة فايريت لو ليكى ميل تانى غيرة تتوصلى بية معايا تتكتبهولى

وشكرا ليكى

Eman Hashim said...

نهى

اهلا بيكى و برأيك فى اى وقت ايا كان
انتى مش مطالبة ولا متوقعة انك توافقينى فى كل كلمة طبها

انتى لخبطتى الدنيا فى بعضها. انا بكلم بنى آدم عن شكله لانه عاير واحد تانى بشكله
انا مش باكتب عن الناس فى المترو و اقول شكلهم و لبسهم, لو سمحتى اقرى كلامى
انا بارد على اللى كان فى الاستاد و بيتريق على شيكابالا بشكله

فى فرق متهيألى ولا ايه

Eman Hashim said...

انونيماس

طالما بتسأل (او بتسألى) عن وسيلة اتصال اكتر من المدونة مش شايف(ة) انه من المنطقى انى الاقل اعرف انا بكلم مين؟
راجل ولا ست؟
الاسم؟ اى حاجة من دى؟

غير انى ماعرفش ليه مش هوتميل يعنى مش فاهمة

Noha Saleh said...

على فكرة انا ماكنتش بهاجمك
انا متفقة معاكى فى حاجات كتير
بس عاوزة اقولك حاجة بعيد عن اصل الموضوع وبغض النظر عن شيكابالا
مش شايفة ان الناس بقت هايفة اوى انها توجه اهتمامها للكورة
مش شايفة ان فى حاجات كتير اهم من ان الناس تضرب بعض علشان مين الفريق الفايز
بجد انا بزعل اوى لما بشوف كده ولو اتكلمت مش هبطل كلام
على فكرة انا متابعة مدونتك من فترة يعنى مش بدخل انتقد وخلاص:)

وجع البنفسج said...

اختي ايمان / انا سعيدة بمروري على صفحة مدونتك لاول مرة ، وعلى فكرة انا مش مصرية لكن باحب النادي الاهلي كثير وباشجعه ، وما بحبش التعصب الاعمى لفريق معين عن فريق أخر ولا يجوز باي شكل من الاشكال انه حدا يعاير حدا بلون بشرته ،، لكن اختي اسمحي لي بتعليق بسيط ، انتي ليش وصفتي الشعب المصري بشعب معفن ، انا فلسطينية مش مصرية لكن زعلت من هالوصف لاني باحبهم كلهم وباحس انه شعب جميل جدا وبنحسهم اخوة لنا ، اعذريني اذا تدخلت في مدونتك ولكن حبيت امر واعلق .. تقبلي مروري اختي ودمتي بعز

Eman Hashim said...

انا ما قلتش و مافهمتش ان انتى بتهاجمينى يا نهى, انا شفت انك فهمتينى غلط, و كنت باوضح لك قصدى من الكلام
بس مش اكتر

Eman Hashim said...

وجع البنفسج,
اهلا بيكى فى اى وقت. و شرفتينى فعلا بتعليقك
و على فكرة اهلا بكل و اى تعليق
مش لازم تمدحى و توافقى الكلام يعنى
ده رأيك و حقك

اما عن عتابك ليا فى وصفى فللأسف الشديد, بشكل عام ماحناش من الشعوب اللى تقدرى تقولى عليها نضيفة
لى صديق غزاوى اخد صور فى غزة اذهلتنى
المكان فيه حرب و الشوارع نضيفة
احنا مش كده. شوارعنا مش نضيفة و مواصلاتنا مش نضيفة
ادخلى حمام اى مول هاتلاقى مجهود خرافى من الدادات عشان يحيافظوا على نظافة المكان
دى نقطة
النقطة التانية و الاهم هى انى كنت اكتر كمان باتكلم عن جمهور الكورة المجنون اياه
ماحنا بنشوف مناظرهم على التليفزيون
اتمنى تكون وجهو نظرى بانت و اهلا بيكى فى اى وقت

AyA said...

بغض النظر عن اني بأكره الكورة كلها على بعضها كده وخصوصا ان في مصر جاري اختزال الوطن كله في المنتخب... بتحب وطنك شجع المنتخب... مش بتحب وطنك اشتغل او ابني او ثور!... المهم نرجع لموضوعنا... أنا معاكي في مش مع الجمهور الاهلي واللي مش عاجبه لون اللاعب يورينا موهبته العظيمة في الكورة او في اي رياضة والله احنا راضيين ان شاء الله حتى كونكت فور!!!!