Sunday, February 6, 2011

الموقف الحالى


سلامات يا مصريين

بصوا ... هاحكى لكم بعدين عن اللى فات ان شاء الله. اصلى هعيش عمرى كله احكى تقريبا. المهم اللى جاى.
قبل اى كلام, عشان فى عالم غاوية دراما مالهاش تلاتة لازمة ... انا باتكلم بصفتى الشخصية عن رأيى الشخصى و كلامى لا يعبر عن فئة او مجموعة او حركة او اجندة من اى حجم او لون. و كلامى ده اجتهاد شخصى, يا ريت اللى شايف ان فى حاجة غايبة عنى يقول لى و يفهمنى لو سمحتوا.

بقالى يومين بافكر, احنا بنعمل ايه بالضبط؟ ايه اللى لما يحصل هانسيب التحرير؟ - لاون انا مش عايزة اسيبه اصلا, ده انا هافضل عمرى كله ابوس فى الارض دى – المهم ... ايه الخطوات؟

سألت مجموعة من الناس بشكل شخصى بارتاح لهم و باثق فى رأيهم. و قعدت اقرا فى الدستور بتاعنا. بالمناسبة اللينك اهه, و حاولت اشوف اى ريحة اعلام محترم بيتكلم عن الموضوع. اكتشفت ان المزنق فى المحاور دى:

1 الرئيس قفط هو من له صلاحية تعديل الدستور حسب الدستور الحالى
2اى بدائل سواء نائب الرئيس او المحكمة الدستورية العليا او الجيش مالهمش الصلاحية دى
3ده معناه ان اى حكومة ايا كانت من غير رئيس الجمهورية بالدستور الحالى هاتفضل بنفس الدستور لحد سبتمبر
4من غير الغاء قانون الطوارىء و بدون اشراف قضائى على الانتخابات, و بالمنظر اللى شوفناه يوم الاربع, اى انتخابات هاتتعمل وش هاتتزور
5بقاء الرئيس عامل لنا حساسية لانه ممكن جدا اوى خالص يرجع فى كلامه قشطة و يقول لك شعبى محتاجنى غير ان الحقيقة ان الموضوع بقى فيه دم

و عليه, فاحنا قدامنا سيناريو من تلاتة:


السيناريو الاول:
1الرئيس حسنى مبارك بالاسم كده يدى صلاحيات تعديل الدستور للاستاذ عمر سليمان
2الاستقالة او التنحى ايا كان اسمها بقى
3الاستاذ عمر سليمان يلغى قانون الطوارىء و يعدل بالاشراف القضائى على الانتخابات غير التعديلات التانية بتاعت مدة الرئاسة و مراتها
4حل مجلسى الشعب و الشورى
5انتخابات برلمانية جديدة و حكومة جديدة
السيناريو ده معناه اننا خلاص هنفضل على دستورنا و هنقوم ببعض التعديلات فى مواده, و طبعا يوفر لنا استقالة الرئيس


السيناريو التانى
1الرئيس حسنى مبارك يقر بالتعديلات بنفس الترتيب
2 و يحل المجلسين و تقوم الانتخابات و يستمر حتى نهاية ولايته
طبعا هنا فى عدم ثقة فى ان ماتطلعش مظاهرات من اياها و يرجع عشان خاطر شعبه الحبيب الحبوب المهاود


السيناريو التالت ... انسف حمامك القديم
1احنا ثورة يعنى عايزين دستور جديد
2لجنة الحكماء تقوم بالحكم لحد فترة الحكومة الانتقالية ما تخلص
3خلال الفترة دى يبدأ تفصيل دستور من اول و جديد
ده معناه ان فى جهات رسمية زى الوزارات و كده هاتتهنج حبة و ده على انه اوشن موجود لكن اعتقد انه مش قابل للتحقيق بجد نظرا كمان لطبيعة الشعب المصرى الذكورى الابوى اللى لازم يبقى عنده راجل حاكمه يقول له بابا


الفكرة بقى مش فى انهى منهم احسن, الفكرة ان ولا واحد من دول اتاخدت خطوات حقيقية لتنفيذه. الهتاف الرئيسى فى الثورة دى كان ايه؟ الشعب يريد اسقاط النظام ... النظام ليسة موجود. ييجى واحد يقول لى عايزة ايه بعد ماتعين نايب و اباطرة الحزب استقالوا؟

اقول لك ... عايزة حاجة بجد مش كلام

اولا ... عايزة الغاء لقانون الطوارىء عشان انام متطمنة ان النشطاء مش هايتقبض عليهم و نقعد بالتلات ايام مش عارفين هو ولا هى فين. ده احنا كلنا اتصورنا بدل الصورة الف. و مسير الداخلية تنزل, ماهم مش هايجيبوا موظفين من اول و جديد ... و اللى يقول لى ما هو استاذ احمد شفيق تعهد هاقول له "فين وائل غنيم؟" ... اثق فيه ازااااااى؟؟


ثانيا ... عايزة استقالة و محاكمة وزير الاعلام. على الكذب و الافتراء. يعنى كله كوم, و ان الكدب لحد النهاردة شغال كوم تانى. اخرتها الشهداء دول تقول عليهم قابضين؟ دول زى الورد. انا تقول عليا و على اللى زيى بنات مشكوك فى سلوكهم عشان بنبات فى الميدان؟ الستات دى اشرف ستات و قطع لسان اللى يتكلم على ستات مصر. توصل الجرأة للتمثيليات الواضحة و انك تحاول تقوم اهلى عليا و تحاول تكره جيرانى فيا؟ بالكذب؟؟ ازاى اثق فى النظام و الوزير ده ليسة موجود؟ و ايه معناه انه ليسة موجود؟؟
و اه على فكرة, اسامة الشيخ اللى ليسة قايم يفتكر يستقيل النهاردة احب اقول له "مايخيلش علينا" يعنى لو دى حركة عشان تمسكها بعد الفقى احب افكره اننا - رغم انكوا ناسيين ده - اذكى من كده


ثالثا ... عايزة اعتذار رسمى للشهداء و شكر لاهاليهم و مراسم رسمية لتكريمهم, و اقترح ان يكون ليهم نصب او تمثال فى ميدان التحرير

اهى دى خطوات بجد بقى, و ساعتها "ممكن" "نبدأ" نثق فى اى حد. انا فى التحرير قاعدة فى اأمن مكان فى مصر الحمد لله و ادينا مستنيين "خطوات" مش "كلام و وعود"


و بكرة ان شاء الله قداس الاحد فى الميدان. و زى ما حمونا و احنا بنصلى الجمعة, هانحميهم و هم بيصلوا الاحد ... و الشعب يريد اسقاط النظام

13 comments:

alirbidi said...

و الشعب يريد إسقاط النظام

دكتور محمد said...

Hello,

After all the respect.
Our revolution is not the violet revolution or lotus one.

It is the revolution of dignity, blood.....
These names are the American code names for the Balcanic revolution.
25th Jan revolution is an Egyptian revolution... not American.

Sorry for the long comment.

Convey my deepest regards to my brothers in El-Tahrir Square.

Eman Hashim said...

مين اللى قال انى قلت على ثورة 25 انها بنفسجية؟؟ انت مش عارف حاجة و بتهاجم؟؟
ثورة البنفسج ده اسم مدونتى الاصلى, و بقالها اكتر من سنة بالاسم ده
فى ايه؟؟

Kontiki said...
This comment has been removed by the author.
Anonymous said...

أنا معاكي يا ايمان في كل كلامك ..

بس عارفة ايه المشكلة .. ؟؟

ان وجود البنات والستات في الميدان .. ممكن يكون نقطة ضعف المتظاهرين .. اللي يمسكوهم منها.. ويستغلوهم..

يعني ممكن يؤذوكم عشان يضعفوا المتظاهرين..

Aya said...

أنا معاك في كل كلمة وان كنت هاضيف حاجة هو ان بس في سيناريو رابع -قريب منهم- وبرضه مافيش حاجة منه اتنفذت, السيناريو اللي اقترحه فرغلي هنا:
http://dostor.org/art/news-and-variety/11/february/5/35926



..............
أنا بس عندي تعليق جانبي على التعليق اللي قبلي... يعني مشكلة الثورة دلوقتي بقى البنات؟.. بجد؟
:D :D :D :D :D

عامة اطمن او اطمني, البنات اضافو للثورة ما اضعفوهاش, .. وكان منهم ناشطات وشهيدات ومحتجات ومتظاهرات وطبيبات متطوعات... البنات اضافو للثورة بكل شكل ممكن, الكلام اللي بتقوله او بتقوليه في وقت زي ده -من وجهة نظري- فعلا مايصحش! ايا كانت نيتك..ـ

AyA said...

@ Kontiki
مش عيب ماتكونش فاهم, في النهاية طبيعي ان الشعب كله مش خريج اقتصاد وعلوم سياسة (ده على فرض ان خريجيها فاهمين).. بس اللي مش فاهم يقرا كلام اللي فاهم, يعني لو انت -فرض جدل برضه- معتقد ان ايمان مثلا مش متخصصة في السياسة ودي مشكلتك مع رايها يبقى اقرا لحد متخصص, اقرا لهيكل اقرا لفهمي هويدي اقرا للصحفيين المحترمين زي ابراهيم عيسى وبلال فضل ... اقرا!.. اقرا اقرا, ماتهاجمش بغباء وانت مش فاهم ولا بتحاول تفهم وتعتقد ان رايك لمجرد انه رايك يبقى صح! ماهو ده اللي احنا معترضين عليه اصلا على مبارك ونظامه وحكومته وحزبه!.. أنا احترم رايك لو احترمت رايي لكن انك توصف المحتجين بانهم صيع وعواطلية يبقى فين احترام الراي الاخر؟؟؟... أنا مش هناقشك في اهمية الثورة ولا في اللي حققته ولا في اللي استجاب ليه مبارك من مطالبنا ومطالبهم ولا اللي نفضله من المطالب لاني مش معقول هشرحلك كل ده في رد واحد, لكن خليك مختلف عن الحزب الوطني واحترم الراي الآخر وفي نفس الوقت اقرا عشان تفهم اللي حواليك وتكون راي محترم واعي, مش عيب انك تاخد معلومات طبية من طبيب زي ماهو مش عيب تاخد معلومات عن السياسة والدنيا حواليك من ناس محترمين مختصين زي هيكل وبلال فضل وفهمي هويدي وابراهيم عيسى وكتاب وسياسيين كتير ممكن توصل لمقالاتهم من جوجل

ملحوظة: أنا كررت اسماء الكتاب دول مرتين لان مع رد زي بتاعك لا استبعد انك ماتكونش سمعت عن كتير منهم
!!

Eman Hashim said...

انا بطلت كلام خلاص
الرد على كلام مجهول الهوية كان يوم 28 و باقى الايام
فى الشارع
فى الميدان

Grakollo said...

بصراحة أنا مع فكرة إنسف حمامك القديم ، نظام مالهوش كلمة أثق فيهم إزاي ، يعني لما قاموا بإنقلابهم الشهير مش إتبعوا برضه فكرة إنسف الحمام حتة حتة جه الوقت لتغيير الحمام كله

Grakollo said...

أه نسيت أرد على الأخ كونتيكي أنا شايف إنك وطني جدا و مخلص لبلدك بص هقولك نصيحة إنت تسافر وراهم تجيبهم و تيجي إيه رأيك و لما ترجع و معاك إلي هربوا ربنا يسهلها أوك

Eman Hashim said...

بس يا جراكللو
الاختيار ده لو كانت الثورة دى بقائد, و بالتالى القائد ده يمثلنا و الكلام ده
لكن الوضع الآن مختلف

Kontiki said...
This comment has been removed by the author.
Eman Hashim said...

رأيك انتى حرة فيه ايا كان
و كلامك هايفضل موجود

انك تكتبى حاجة عندك فى مدونتك ولا اكاونت الفيس بوك بتاعك حاجة, و انك تيجى تعلقى على كلامى فى مدونتى و تتهمنى بالعمالة و الخيانة و الارهاب بعد ما حصل لى انا و الكل يوم الجمعة و يوم الاربع
يبقى شكرا

كلامك بيتولن و بيتغير و كل يوم نغمة و الاعلام بيوديكى و يجيبك عشان مانتيش واقفة على ارض صلبة ثابتة