Wednesday, March 14, 2012

احترام الجامعة يعنى الأستاذ يشتم براحته

انا مش هاتكلم ولا اعلق على المساخروالمهازل اللى فى الموضوع ده دلوقتى. هاسيبكم مع شهادة صاحب الشأن حاليا وتعليقى بعدين.
وصاحاب الكلام هو صديق وزميل و مدرس مساعد بقسم العظام جامعة عين شمس و هو الدكتور مصطفى عشوب

بسم الله الرحمن الرحيم

خلصت عمليات في التخصصي في حدود الساعة الثامنة و النصف و اخذت سيارتي و اتجهت الي باب المستشفي و بعد تخطي باب الحوادث و امام الجامع بالضبط التليفون رن , وقفت علي جنب علي اليمين عشان اطلع التليفون من جيبي و اشوف مين قبل ما اطلع في الشارع , و لان الشارع في المكان ده ضيق و بيعدي عربية رايح و عربية جايه فقط , و كان فيه عربية جاية في وشي و انا بطلع الموبايل , طلعت و قبل ما ارد جت عربية بسرعة من ورايا بتقلب في نور و اديتني النور العالي فطلعت ادام شوية عشان اعدي العربية اللي ورايا و مشكلها مستعجل و مش مستنية العربية اللي جاية الناحية التانية

الموضوع كله مخدش اكتر من خمس ثواني في الواقع و فعلا العربية اللي ورايا عدت من جنبي لحد ما اصبحت بموازاة عربيتي فوقفت جنبي و قاللي راجل جواها الركنة هنا غلط و زعق و قال وهوا بشوح بايده في حدة روح اقف في اي حتة تانية , قلتله انا واقف ثواني حضرتك و حضرتك عديت خلاص اتفضل , قاللي لا متقفش غلط , انا بشتغل في المستشفي دي , و حندهلك الامن فقلتله اندهله , راح وقف ادام عربيتي بالضبط بحيث انا مقدرش امشي دلوقتي غير لو رجعت بضهري و نزل الراجل اللي في العربية يزعق في وسط الشارع و ينده الامن اللي واقف علي البوابة القريبة اللي علي بعد اقل من عشرة متر تقريبا

الراجل اللي نزل من العربية بيزعق و متعصب جدا و بيندهلي الامن و قافل الطريق علي عربيتي دلوقتي و مازالت انا عاذر تصرفاته لانه ممكن يكون قريب عيان او في جه يزور عيان خصوصا اننا كنا في اواخر وقت الزيارة تقريبا , بس الراجل نزل و جاب الامن من ايده و وقف جنب عربيتي و انا لسه جواها و عايز امشي و هوا دلوقتي اللي بقي قافل الطريق عليا , الاستاذ جه و هوا بيزعق و يقول في وسط الطريق تعال شوف البلطجة و قلة الادب بتاعت الاستاذ ده , و هنا اضطريت اقوله و انا مازلت في العربية اللي يقول كده يا استاذ هوا اللي بلطجي و قليل الادب , كان الرجل في الخمسينات من عمره و في حالة عصبية شديدة و عالي الصوت جدا , فرد عليا و شتمني باهلي مما استفزني لاني اتشمت ادام كل الناس و في طريق المستشفي من واحد ماعرفوش ولا يعرفني بسبب تافه جدا في رأيي

شتمني الراجل اللي واقف بره العربية باهلي فرديت عليه الشتيمة باحسن منها , فعاجلني ببوكس شديد في وشي اطاح بالنضارة من علي عيني و ساب اثر بعد كده علي مناخيري نتيجة الضربة , الراجل واقف علي باب عربيتي المقفولة علي شمالي و جنبه فرد الامن الغلبان بتاع التخصصي و انا لسه جوه العربية و بعد ما شتمني باهلي و رديت الشتيمة فاجئني بالوكس في وشي و كان لابد ان اخرج من العربية لادافع عن نفسي ضد المعتدي عليا

انا دلوقتي من غير نضارة بزق الباب بمنتهي القوة و بحاول افتحة و الراجل اللي واقف بره مع فرد الامن بيحاولوا يزقوا الباب عليا و ميطلعونيش فضلت ازق لحد مقدرت افتحه و طلعت من الباب و بعدت الراجل اللي ضربني بالوبكس في وشي بايدي من جنب عربيتي بقوة فاتزحلق و وقع علي الارض , , هنا كانت الناس بدأت تتجمع علي الزعيق و الخناق فجم و فصلونا بعيد عن بعض , فراح الاستاذ اللي كان ضربني بالوبكس بسرعة علي عربيتي و انا واقف وسط الناس بعيد عنها و دخل عربيتي و اخد المفتاح من الكونتكت و بعد و اتجه لعربيته و طبعا لما انا شفت كده رحت بسرعة ناحيته و شديت المفتاح من ايده و ميداليته اتكسرت طبعا و اخدت المفتاح منه و هوا بيهددني بالسجن و البوليس و الشرطة العسكرية

الناس فرقونا عن بعض تاني و بالصدفة احد الدكاترة يعرفني و اتضح انه يعرف الراجل اللي ضربني كان معدي فجه يسأل فيه ايه يا عشوب و سأله فيه ايه بس يا بيه , هنا بدأت افهم ان الراجل اللي ضربني ده استاذ عند زميلي في القسم و هوا كمان فهم اني دكتور في المستشفي , الراجل اللي شتمني و ضربني ده طلع استاذ دكتور ايمن شعيب استاذ جراحة القلب و الصدر

في اللحظة اتغير الكلام و بدأ التهديد اللي بالبوليس و الشرطة العسكرية يبقي بحاجات تانية خالص , التهديد بقي بالرفد من الجامعة فجأة , التهديد باني ابقي في الشارع و انه حيوريني و انه بدأ يتكلم في التليفون و يتصل برئيس الجامعة و مدير المستشفي و المدير المناوب و ناس كتير قوي و انا واقف بين الناس حوالينا مش فاهم اوي لسه ايه علاقة الناس دي كلها بالموضوع و ازاي ظهرت لهم فجأة بالصدفة علاقة و الموضوع اتحول من خناقة في الطريق بين اتنين سايقين و بقي زي ما سمعت منه و هوا بيتكلم في التليفون عن هيبة الاستاذ و اعتداء اعضاء الهيئة المعاونة علي الاساتذة و ضياع هيبة الجامعة و حاجات كتير بالشكل ده

كان رئيس الحرس وصل طبعا و مجموعة كبيرة من الامن و بدأنا نتحرك ناحية مكتب رئيس الحرس و الناس كلها حواليه و بتحاول تهدي في دكتور ايمن و انا ماشي لوحدي كده وراهم و سامع مكالمات التليفون بكل المسؤلين و غير المسؤلين في الجامعة و زعيق و تهديدات ليا طول الطريق
وصلنا مكتب رئيس الحرس عند ريسيبشن المستشفي و دخل دكتور ايمن و قعد جوه و جابوله بيبسي و ميه و انا واقف بره مستني و سامع المكالمات المستمرة و الكلام اللي بيتقال عليا و ازاي انا دمرت سمعة الجامعة و بوظت السينيوريتي بتصرفاتي دي

مش حطول عليكوا اكتر من كده , استاذ دكتور علاء فايز رئيس الجامعة استدعاني لمكتبه انهارده و اكد لي انه مكنش يحب ان الموضوع يوصل لكده و انا حكيت لسيادته الموضوع زي ما حكيتهلكوا كده و اكدتلوا ان مش شايف علاقة الجامعة بالموضوع لعدم معرفتنا احنا الاتنني ببعض قبل كده اساسا فانا معرفش انه استاذ عندنا و هوا ميعرفش اني مدرس مساعد في قسم العظام و دكتور علاء قاللي انه حيتكلم مع دكتور ايمن و يشوف الموضوع حيخلص ازاي و اكدت لدكتور علاء في النهاية التزامي بقراره باعتباره رئيس الجامعة و باعتبار فرق السن و الوظيفة بيني و بين دكتور ايمن شعيب حتي لو هوا اللي شتمني في الاول او ضربني

بعد شوية طلعت تاني و عرفت انه دكتور ايمن قدم استقالته لحين انتهاء التحقيقات بادانتي و رفدي او توجيه اللوم و الجزاء لي و الا فهو متمسك بالاستقالة و ادلي دكتور ايمن باقواله امام جهات التحقيق في الجامعة ثم ادليت انا باقوالي

و في النهاية اؤكد علي الاتي :

اولا لا يوجد اي علاقة لهيئة التدريس او الجامعة من وجهة نظري في خناقة بين سيارتين علي اسبقية المرور في شوارع التخصصي و الموضوع يخضع للبوليس العادي

ثانيا علاقة الجامعة بالموضوع قد تنتج لو كان هناك اي سابق معرفة او عداوة شخصية او علاقة من اي نوع بيني و بين دكتور ايمن شعيب او لوحدث هذا الموضوع لخلاف له علاقة بالجامعة مثل التدريس او مؤتمر او غيره او كنا في قسم واحد مثلا

ثالثا الاحداث لم تحدث في غرفة العمليات مثلا او العيادة او كنا نرتدي اي زي مميز للدكاترة او كنا شخصيات معروفة , انما الاحداث حدثت بين اتنين سايقين عربياتهم و خارجين من التخصصي و ميعرفوش بعض في وقت الزيارة و الاحتمال ان يكون الطرف الاخر من الزيارة او اهالي المرضي الساعة تمانية و نص مساءا اكبر نظريا بكثير من ان يكون استاذ في احد الاقسام

رابعا هل المطلوب اذا اتخانقت مع اي حد لاي سبب لو كسر عليا بالعربية مثلا او خبطلي الفانوس او غيره ثم نزل و شتمني و ضربني بالبوكس و انا جوه العربية اني اسأله الاول : هوا حضرتك عضو هيئة تدريس ولا لا ؟!!

خامسا تحقيق العدالة المطلقة بين الطرفين يستدعي معرفة من بدأ الاعتداء اللفظي و الشتيمة و من بدأ بالضرب و من نزل من عربيته و توجه للطرف الاخر داخل عربيته بعد ان تعداه و كان ممكن يمشي خلاص لانه خلاص عربيته هيا اللي بقت ادام

سادسا تحقيق العدالة المطلقة يكون بتوصيف الحدث كما ينبغي له فلو حصلت خناقة مثلا بين استاذين بره الحرم الجامعي بسبب امتحانات الطلبة مثلا فهو شئ يخص الجامعة و ينبغي التحقيق فيه و يختلف تماما عن حدوث مشكلة لاسبقية المرور بالعربية بين اتنين اول مرة يشوفوا بعض خالص حتي لو المشكلة دي كانت في شوارع التخصصي

سابعا لا افهم قيام دكتور ايمن شعيب بتقديم استقالته حتي انتهاء التحقيق بالنتيجة التي يريدها الا بوسيلة للضغط علي جهات التحقيق و التأثير علي سير التحقيقات

ثامنا و اخيرا احترم جميع اساتذتي في قسم العظام و جميع الاقسام و احترم الاكبر مني سنا و احترم الاقدم مني وظيفة و اجل كل من علمني شيئا و اثق حتي الان في تحقيق العدالة و احارب من اجل حقوقي و ارفض اي اعتداء لفظي لاهلي او تعدي بالضرب عليا من اي شخص و ارفض الكذب و ارفض تغيير الاقوال و اصل لاخر مدي للدفاع عن نفسي و كرامتي و وظيفتي و لا اخشي الا الله

اللهم ارنا الحق حقا و ارزقنا اتباعه و ارنا الباطل باطلا و ارزقنا اجتنابه

مصطفي عشوب

مدرس مساعد عايزين يرفدوه من قسم جراحة العظام

2 comments:

faissl said...

ما طبيعي جدا الكلام ده، إذا كان احترام الداخلية يعني الداخلية تبلطج براحتها واحترام القضاء يعني القضاء يظلم براحته..!

شمس النهار said...

هي دي بلدنا
السمك الكبير عايز ياكل السمك الصغير
بس ربنا موجود