Tuesday, January 19, 2010

عايزة اروح درس

اختى الصغيرة بتروح درس تحفيظ قرآن ما شاء الله عليها من فترة و انا صراحة غيرانة منها جدا.

طب ما تروحى ... ايه اللى مانعك؟

المكان: قريب جدا من البيت

الزمان: الاتفاق مع النس هناك و هم مرنين جدا

الفلوس: هو تقريبا ببلاش. يعنى اقل من تاكسى من عندنا فى مدينة نصر لوسط البلد

طب ايه بقى؟

بصراحة ... انا باقلق اروح الاماكن دى. باحس بقلبى مقبوض و بطنى مقلوبة. اول ما بادخل باحس بحاجز بينى و بين الناس. شكلى غير شكلهم و كلامى غير كلامهم, بيستخدموا لغة غريبة ساعات و انا مش اللى هو باتكلم كلام بألفاظ نابية يعنى بس اللى هو كلامنا العادى ده.

اول ما ادخل , الاقى الستات و الرجالة اتقسموا ... انا باتحول اما بيحصل كده! مش عشق فى الرجالة يعنى مانتوا فاهمين اللى فيها. بعدين انا مفروض رايحة اتعلم يعنى مش هاصاحب الناس , فين الاشكال يعنى , مش للدرجة دى! مخى بيقول الكلام ده بس مش مبلوع! و اصلا الفصل مش هو المشكلة الاساسية.

المشكلة فى الفصل هو سببه الاصلى من الاول. و هو التعامل مع الست على انها ضيف فى مكان اصلا بتاع الرجالة. و المأساة فى الستات اللى قابلين ده. هناك الستات بيبقى فيهم ( كسرة) كدهو الرجالة مكشرين. ايه العلاقة بين التدين و ان الست يبقى عندها احساس بالدونية كده؟ و ليه الرجالة لو اتعاملوا مع الستات بيبقى من علياءهم كده؟

انا فكرت فى السبب فى انى باتشال و باتحط اما راجل بيتكلم معايا يكلمنى و هو مش باصص لى. اولا طبعا لانى رايحة اكلمه اتسامر معاه , انا رايحة لضرورة ما. ثانيا انا مش فاتحة زرار القميص و باتمايص , انا باتكلم باحترام و باعمل تقدير للموقف و للانسان اللى باتكلم معاه. ثالثا بقى و الاهم ان فى العادى باقول دايما للراجل اللى عايز يتعامل كده ( وده حقه) بلاش بقى تتواجد فى اماكن فيها ستات و تجبرهم على الاسلوب الغريب ده فى التعامل.

يعنى يبقى بيسيب طب الأزهر و يروح طب عين شمس. و يرشح نفسه فى انتخابات اتحاد الطلبة و اما طالبة تروح تكلمه فى امر من امور الطلبة جوا مكتب الاتحاد يكلمنى بالاسلوب ده عشان هو ضد الاختلاط؟

ما هو مش معقول انا عشان بنت مش مسوح ليا انى اتكلم مع اتحاد الطلبة و انا طالبة.

و مفيش بنات فى الاسر اللى من النوع ده و الاتحاد بيكون ساعتها كله ولاد.

اعمل ايه انا بقى؟

طيب فى الجامعة و الاماكن المشابهة , احساسى بالحق كان بيخللى عندى القوة الكافية انى اعترض على الكلام ده. لكن هناك الوضع مختلف.

كل ما اتخيل انى اروح اسأل موظف ولا شيخ على حاجة و يرد عليا كده على انى طفلة الحشرة ارجع و اقول بلاش احسن... خصوصا انى عارفة انى مش هاسكت!

و الموضوع ده فى اى حاجة ليها طابع دينى. يعنى لازم اقبل انى مواطن درجة تانية عشان اقرب للناس دى؟ انا لحد النهاردة مش قادرة انسى اليوم الاسود اللى دخلت فيه التوحيد و النور!

و المشكلة انى برا الاماكن دى بالاقى نفسى قاعدة فى البيت. ما هو البديل برضه مش مريحنى

I am an outsider on both sides!

طلبت انجليزى معلهش. ممكن تترجم : حاسة بالاغتراب هنا و هناك؟ ممكن.

المهم انى لازم اشوف لى حل فى الموضوع ده ... عشان ده تلكيك صراحة

8 comments:

Sally said...

هى فعلاً تلكيك :)
انا رأيى تروحى ,تجربى لكن مش و انتى بعقلك خبرة سابقه مش لطيفه مع حاجه مشابهه قبل كده مريتى بيها
يعنى روحى بنفس و مستبشره كده و اصبرى شويه متقفليش علطول من اول مره و لا اول اسبوع ,جاهدى نفسك ,و اللى حيساعدك فى كده كلامى السابق ,انك تروحى متوقعه الافضل و بنفس
و هادئه كده
زى ما انتى كاتبه فى عنوان مدونتك الجديده دى و اللى عجبنى قوى كلامك عن السلام النفسى و الثورة الهادئه
على فكره انا ممكن اروح معاكى ..انا بكلم جد ,تعالى نروح نساند بعض كده ..ساعتها و لا حد حيقدر يقربلنا
:D

Eman Hashim said...

ماشى ياختى :)

لا والله مش فكرة مسبقة يا سالى. بس فعلا الحكاية مش سهلة كده
خصوصا انى انا كمان بقيت متحفزة جدا و دى مش حاجة باقولها و انا فرحانة يعنى بس الواقع

و عرضك ده لازم هاستغله
هادور فى الفيس بوك لو بعتيلى رقمك. ماكانش هابعته

Mist said...

:) حبيت كلامك،وحسيت بيه..لأني بأحس بموضوع غريبة في الاتنين دي..ولو بدرجة مختلفة.

عمومًا جربي حاجة زي (دار فجر لتحفيظ القرآن)
عنوانه: الحي الثامن-بعد التوحيد والنور الجديد بتلات عمارات
ورقمهم :
010-9877-372
---
هو مركز في نسبة أجنبيات عالية،وتعليمه جميل..أعرف كذا حد بيعلم وبيتعلم فيه..فعلاً سمعت عنه كلام كتير حلو..ممكن اختلاف الثقافات بيعمل حبة ليونة كده في التعامل وشكل التدين..المهم أنا ما التحقتش بيه،لمشاغل وطوارئ..لكن قريب جدًا إن شاء الله هاعملها :)

Eman Hashim said...

شكرا يا ميست

هو عنوانهم كده شكله هو اللى اختى بتاخد فيه
ده لو كده هاتبقى حتة كبسة ليا!! هههههههههههه

هاتصل و اسأل و ميرسى لرقم التليفون و الاهتمام

AyA said...

معاك حق للأسف :-(
فيه ناس كتير بتشوه مصطلح متدين! وفاهمين الدين باسلوب عادل امام "انهم يدعون الى دين جديد" (بالمناسبة مش عارفة مين الحمار اللي مفهمه ان دين بفتح الياء يعني دين مش سلف!!!) ... المهم، ممكن تحاولي تروحي مرة وتشوفي . .
ومنتظرين تدوينة عن اول درس ان شاء الله :-)

77Math. said...

شوفي حل ثالث، مش لازم يا التحفيظ يا البيت يعني !

Eman Hashim said...

77Math:
طب دلينى يا ستى

Eman Hashim said...

ازيك يا اية
الله يسامحهم و يديهم على قد نيتهم اللى خللوا الدين "مكشر" اوى كده
بس انا عمالة بامخمخ لحل
ربنا يسهل