Sunday, April 17, 2011

صباح عربى جميل حر


يا صباح الحرية يا عرب!

اهدى البوست ده لأحرار سوريا ... يا رب انصر سوريا, سوريا كلها قايمة يا ناس ما شاء الله, ربنا معاهم

و برضه عندهم الاعلام بيقول ان مفيش اى حاجة يعنى دى خناقة اتنين متجوزين على مصروف البيت ههههههههههههههه

و برضه عندهم الوحشية و القهر و الظلم, و فشار الاسد بيفترى, مفيش مشكلة ابقوا انتوا حاكموه بس و احنا نشوف له سرير عندنا فى طرة. مانتوا عارفين بقى ان مبارك هيهيهيهي فى مستشفى السجن دلوقتى و عياله محبوسة ههههههههههههه


اجمدوا!! اجمــــــــــــدوا ... اصمـــــــــــدوا


ربنا كبير اوى, و كبير اوى ع الظلم

و هنفرح بيكم و نهلل لكم قريب اوى ان شاء الله



 
و تحية الى ثوار البحرين الشرفاء. اللى والله لو حد جه ناحيتى بكلمة عنهم, لا حيشوف منى رد فعل مش حيصدقه... شيعة بقى, بوذيين, مش شغلة حد فيكم, بلا بتاع بقى!

شباب البحرين الاحرار اللى واقفين قدام جيش تحالف الهطل الخليجى كله لوحدهم, عشان النظام الامريكى مساند التواجد الخليجى الذليل لهم.

ربنا يبارك لكم والله, و فعلا مقدرة شخصيا صراعكوا اللى حتى الجزيرة بتغطيه تغطية اسوأ من تغطية التليفزيون المصرى الحكومى لميدان التحرير!!

ظلم ... ظلم شديد و متحالفين ضدهم. و بيتعرضوا لابشع انواع العنف.
بس ولا يهمكوا, ربنا معاكم و ربنا اكبر من الكل, و فى الآخر ربنا مع الحق.
نيجى بقى لأعز الحبايب, المظلومة من زمان اوى ... الجميلة فلسطين!

فى ناريخ مهم اوى و هو 15 مايو اللى جاى ان شاء الله. بداية الزحف العربى للأراضى الفلسطينية المحتلة.

آآآآآآآآآآآه. اسرائيل. مش عارفة بقى دى ينفع معاها سلمية ازاى؟

و دى الاعلام بينقى يجيب ايه امتى على قناة ايه, الناس هناك بتموت عادى زى ما احنا بنخش الحمام كده.
والله ما ببالغ, واللى كانوا معايا يوم جمعة الغضب عارفين:

فى كذا لحظة فى اليوم ده, كان كل ما العنف يزيد, و صوت الرصاص, و قناصة من فوق, و غاز من قدام, و مدرعات بتدوس ع الناس. فى عز ما كنت فى وسط ده كله, كنت كل شوية الاقى صوت جوايا بيقول "هم الفلسطينيين عايشين كده بقالهم سنين؟ عادى كده؟ و بينضربوا الضرب ده كله و يقوموا؟ و يموت منهم و الواقع يقوم يكمل؟ قدام ابشع و اقذر و اقسى قوة خسيسة ع الارض؟ لوحدهم؟ عزل؟ اطفال؟ معقولة يا ربى؟!!

اليوم ده مهم اوى يا جماعة

 اتمنى كا واحد من كل بلد يقدر يروح يروح
و عموما احنا شباب الثورة بقى و فاهمين, حتى اللى مش فى الميدان و عايز يساعد ساعد. يعنى مش المرواح الفعلى هناك هو الشىء الوحيد اللى ممكن نعمله. اللى فى ايدينا مش قليل و نقدر نساعد بيه

-انترنت بقى ... انترنت بهبل. 
-الفيسبوك الله يخليهم و يبارك لهم شالوا الصفحة الاولانية للانتفاضة و اتعملت واحدة جديدة, و آدى اللينك بتاعها
-و التويتر لهم فيه هاشتاج اهه  3rdIntifada
-فيديوهات .... شير
-اخبار ... شير و ترجمة, مهمة اوى الترجمة ... لكل لغات الدنيا




يا رب انصر شباب العرب يا رب
 

4 comments:

مصطفى سيف said...

صباح عربي حر
تحياتي لكي
رزق الله اخواننا السوريون الصبر والصمود
واعانهم على اقتناص الحرية من فم الاسد
ونصر الله اخواننا في اليمن و ليبيا وسائر البلاد العربية لينتصر الحق على الباطل والشعوب على الطغاة
اعجبتني طريقة سردك
تحياتي لك

Eman Hashim said...

اشكرك مصطفى على كلامك اللطيف
و ربنا مع كل العرب يا رب
فهو الكريم المجيب الوكيل

يااااااااااااااااا رب

AyA Badr said...

متفقة معاك في كل كلمة, وبغض النظر عن اني مصرية بس "كل العرب اخواني :)".. انا بحيي دعمك للثوار وخصوصا البحرينيين... وحابة اقتبس كلمتك على تويتر اللي عجبتني جدا ,, كانت رد على ادعاءات دعم ايران للثوار في البحرين : نعم؟؟ ما ايران تقول اللى تقوله! يعنى احنا اما ايطاليا تقول انها فرحانة بينا يبقى ثوار مصر مرتزقة ايطاليين؟ده كلام؟

Eman Hashim said...

موضوع البحرين ده مقرف
عالم عجيبة
تحسيهم مش بشر والله