Friday, June 10, 2011

الفيديو القنبلة ... الحرس الجمهورى و المؤامرة ... و حقيقة موقعة الجمل


الفيديو القنبلة ... السبق اللى مفيش زيه ... حصريا!!!

الكلمات دى – اللى فقدت معناها تماما – استخدمت فى فيديو على اليو تيوب لمقطع من برنامج الناس بوك – اسم سخيف اوى على فكرة – لهالة سرحان.

الفيديو مفروض يعنى بيكشف عن فضيحة غير مسبوقة فى فيديوهات فيها معلومات حصرية ملهاش بقى مثيل فى الدنيا.

الفيديو اهه. استئذنكم تشوفوه للآخر لو امكن.


شوفتوه؟


الفيديو من الآخر قلب المواجع, و فكرنا باللى مش عارفين ننساه اصلا.

و المؤامرة, و الجريمة الوحشية, و الخيانة.

و الحرس الجمهورى اللى تآمر ضد شعب مصر يوم موقعة الجمل!!!!!

المشكلة مش فى اى حاجة غير انه بيقول كده و هو جايب صور فيديو فيها الشرطة العسكرية! هههههههههههه

طب يعنى عايز تضحك علينا ماشى بس مش بالوضوح ده!
لأ و ايه؟ "و هأقدم بلاغ ضد رئيس الحرس!!!" .... لا يا راجل؟!

هو اصله حاجة من اتنين:
-يا فاهم و قاصد يلفق و يكدب علينا لأى سبب بقى,
-يا مش فاهم و طالع فى التليفزيون يفتى فى الجيش و اسلحة الجيش و نحاكم مين و الكلام ده كله.
و الحالتين صراحة عك رسمى.

و استنوا قبل اى قفز لأى استنتاجات. ده منظر الحرس الجمهورى:


شايفين اى خوذة حمرة؟ لأ
عشان الحرس مش بيلبس الخوذة الحمرة دى خالص ولا بيريه حمرة - بيريه ده اللى هى البرنيطة بتاعتهم دى.

واضح طبعا انه غير المنظر اللى فى الفيديو خالص. مش شبهه حتى!!

و ده منظر الشرطة العسكرية:


و ده منظر شرطة عسكرية فى وسط سلاح تانى من الجيش. شايفين الاحمر؟
الخوذة - هى مش موجودة هنا - و البيريه, و الكتافة --- كله احمر

هو اصلا ده اللون بتاعهم, مفيش حد تانى عنده احمر كده.





و ده منظر الشرطة العسكرية و هى بتفض اعتصام التحرير يوم 9 مارس بالقوة



و ده منظر رامى المطرب الشاب ايام الاعتصام, و بعد ما الشرطة العسكرية – ربنا يكرم اصلهم كده – قبضوا عليه و ضربوه و سففوه التراب و كهربوه



يعنى مشكلتنا بأى حال من الاحوال مش مع الحرس اصلا. لو انا فاكرة صح, احتكاكنا الوحيد حتى الآن مع الحرس كان يوم 11 و 12 فبراير اما روحنا نعتصم قدام القصر, و لو برضه انا فاكرة صح الحرس ماعملش حاجة لحد... مش كده ولا فى حاجة انا مش عارفاها؟
و قبل ما حد يقول انى بدافع عن "الجيش" و الكلام ده, انا بدافع عن حقنا فى اننا نجيبه من اللى خده مننا. مش نروح لواحد مالوش دعوة و نمسك فى رقبته, و فى الآخر نزعل اما نلاقى مفيش حاجة حصلت.

و هالة سرحان دى ايه دى كمان؟ طب انا ماعرفش فى يونيفورم الجيش و كده مش بافتى و باسكت و اسأل قبل ما انطق ... انتى ايه بقى؟؟ مش باين مفروض انك الاعلامية اللى مش عارف ايه؟ للدرجة دى مفيش اى مجهود للتأكد من المادة المعروضة و المعلومات اللى بتطرحيها للناس؟ و قبل ما حد يقول لى كان على الهواء و هى ماتعرفش, مش قد الهوا خلى برنامجك تسجيل يا استاذة. مش حتتهد الارض لو قلتى ماعرفش على فكرة.
و مين الاستاذ اللى طلع يفتى و يخبط و يرزع على الترابيزة و يحاكم و يتحاكم ده؟ مفروض انت ليك مصداقية بعد كده؟؟ ده حقوقى بقى يقعد فى ندوات و يفتى و احنا ناخد كلامه بقى بالذمة؟؟
هو احنا هنفضل كده مش حاسين بقيمة الكلمة اللى بتطلع من بقنا و حجم المسئولية بتاعتها؟؟


و معلهش بقى عتب ع الجيش: ما انتوا السبب!
اه
ما انتوا اللى اخترتوا تستخبوا تحت الارض محدش يعرف عنكم حاجة مننا و خليتوا اولا فى حاجة اسمها "احنا" و "انتم", ماحناش واحد. و ثانيا سامحين بقى لكل واحد يطلع يعبط بأى كلام و يهبل و يتهم.
ده انا حاولت الاقى صورة تانية للحرس الجمهورى ماعرفتش, زى ما يكون انى اعرف لبس الحرس الجمهورى ده كده انتهاك للسرية الحربية
انتوا ناقصين اتهامات؟ ده انتوا منظركم الحمد لله مش لطيف خالص اصلا!
مش كفاية خيبة املنا فيكم؟
ده انتوا كنتوا الامل اللى عندنا بعد ربنا فى وقت من الاوقات, و انا كنت فى التحرير اما حد يقول كلمة عليكم ادااااافع, و اقول الجيش المصرى لأ!
آدى الشرطة العسكرية خليت شكلكم نيلة خالص. الا بصحيح هم الشرطة العسكرية دول بيتدربوا فين؟ شكلهم كده كانوا بياكلوا من ساندويتشات الداخلية و هم فى المدرسة.
ده انا بقيت كل ما اعدى على اشارة من اللى فيها كابينة شرطة عسكرية و جواها عسكرى واقف, قلبى ينقبض زى الداخلية بالضبط!
لا شوفوا لكم حل فى الشرطة العسكرية دول بسرعة لو سمحتم.
و انا لو من الحرس, ارفع قضية على عمنا ده هو و طنط هالة, خليهم يتعلموا يفهموا الاول بيقولوا ايه قبل ما ينطقوا.


نبجى بقى للى حصل يوم 2 فبراير:
اللى حصل فى موقعة الجمل ده من الآخر ان المصريين كانوا بيتقتلوا لمدة 48 ساعة متواصلة بوحشية و تقريبا كله كان بيتفرج!
آه كان عشمنا فى الجيش كبير
و اه مانعرفش فى اختصاصات الجيش و تفاصيله
بس الموضوع مش محتاج اصله, ناس راكبة مش عارف ايه و داخلة بسيوف و كرابيج و سلاح ابيض على عزل نايمين ع الارض و اطفال و ستات!!!
ايه؟
محتاجة مهارات تكتيكية دى عشان تتفهم؟
محتاجة خبير لوجيستى عشان يحلل و يفسر و يدى اوامر؟؟

دى عاملة بالضبط زى كده اما اكون ماشية فى الشارع معدية قدام مبنى جيش و الحراسة بتاعته قدامه و واحد ييجى يتهجم عليا, يغتصب و يقتل ... و الحراسة بتتفرج عشان مفيش اوامر!!!
ماشى انت ممكن دفاعك انه مش اختصاصك و مفيش أوامر, و كلامك فيه منطق مريحك و مقبول عند كتير
بس ماتستناش انى مش هانسى فى يوم البنى آدم فى الاول و الآخر اللى قعد يتفرج عليا, و العسكرى المتدرب اللى معاه سلاح اللى "اختار" يتفرج.
من الآخر كده ... احنا خاب املنا فيكوا!


و متشكرين على كده

و احفظوها بقى: خوذة حمرة = شرطة عسكرية = عدو

2 comments:

AZ said...

يابني الفيديو ده مايسواش تلات تعريفه اساسا...انت شوفتي الراجل وهو بيقدم الفيديو؟
قالك انا جايب معايا ٧ مقاطع...وهاله سرحان عملت نفسها متفاجئه قال يعي متعرفش وورونا الفيتيونات يا كماحه!
وهوب تفتح الفيتيون تلاقيه متمنتج هههههههههههههه
وانتي عارفه المونتاج يا ابلتي زي تريلر الفيلم كده بيرمي في حته وتلاقي الفيلم مالوش دعوه بأي حاجه....والراجل يقولك الكاميرات علي التليفزيون من بره وتلاقي لقطه من فوق كوبري اكتوبر
وحزين اوي ان التليفزيون ن جوا فيه ٨٠٠ كاميرا مراقبه مع ان طارق نور كان عنده في مبني شركته القديمه كاميرا في كل مكتب وواحده صحبتي اتقفشت بترقص وكانت ناسيه وطارق نور كان عنده كلاينت وهزأها :D
الراجل سمعته لعي حد علمي كويسه بس كونه يبقي يطلع مع الوليه دي شبهه في حد ذاته...لحد اما اشوف السبع مقاطع انا ولا كأني شوفت حاجه ومش هقعد احلل اساسا حرس جمهوري ولا شرطه عسكريه...ماحنا شوفنا بعينينا مين كان واقف عند المتحف والدبابات كان شكلها ايه اللي وسعت السكه للجمال

الحرس الجمهوري في اي حته وظيفته يحمي المنشأه مش ينظم المرور ال الشارع..يعين هتلاقيه عند التليفزيون واقف علي الرصيف ولو شاف كائنات فضائيه ماشيه في الشارع مش هيتحرك ادام مش بتهجم عليه...بخلاف ذلك بقي الشرطه العسكريه بتتعامل

انا مش فاهمه فعلا ايه موضوع الحرس الجمهوري بينظم مرور الجمال اللي اتلزقت علي الفديو واللي كانت بتتقال في الحلقه :D

مدونون بلا قيود said...

بعد التحية ..
تم اضافة مدونتكم هذة الى ـ مدونون بلا قيود ـ
وسوف ننشر مواجز وروابط لكل تدويناتكم خلال نصف ساعة من نشركم لها
.
http://facebook.com/modawenon
http://twitter.com/modawenon
http://modawenon.tumblr.com
http://paper.li/modawenon/1307225574
http://entaked.blogspot.com
.
ولكم فائق الحرية و الاحترام ,,,
FAQ. للإستفسار http://may23.tumblr.com/