Monday, June 20, 2011

التحرش من البيت ... اول الحدوتة


-->


ازيك يا ايفا
اصل ايفا حبيبتى ربنا يخليها لى فكرتنى فى وسط اليوم الامور ده انى ماينفعش اعيش دور المخنوقة النهاردة بالذات.


من ساعة ما عرفت موضوع يوم التحرش وانا بفكر اكتب فى اليوم ده مخصوص بوست واحد ازاى, مش هاينفع ... ده موضوع ممكن اعمل له مدونة لوحده!


نيجى لأصل الحدوتة ...


بيسألونى كتير اشمعنى يعنى حوار "العنف – الاسرى – ضد المرأة" ده اللى واجعة دماغك بيه وشايفاه هو يعنى الضمان الوحيد لحياة افضل للناس جميعا مش الستات بس.


هحكى لكم قصدى. الموضوع وما فيه, انى شايفة ان مناهضة العنف داخل المنزل ضد المرأة هى السبيل الوحيد الممكن واقعيا لتجنب اى وكل مشكلة بتتعرض لها المرأة فى مجتمعنا, و للناس فى المجتمع ده.


نيجى عند مشكلة التحرش, و اشرح لكم تطبيق عملى حالا


دلوقتى اصلا العنف ده يعنى ايه؟ العنف ده هو كل اذى ممكن انسان يسببه لانسان. يعنى مش بس الضرب المبرح واللمس والسباب وكده. لأ, الامتهان عنف, السيطرة الخانقة عنف, المراقبة والتصنت عنف, السيطرة على الاموال عنوة عنف ... كل واى شكل معاملة غصب عن الشخص او استغلالا لضعفه وعدم قدرته على الرد عنف!


التحرش بقى يعنى ايه؟
التحرش هو التعرض من الآخر ... ايا كان شكله
يعنى اى نوع من انواع التصرفات اللى يتحط فى خانة ما هو عكس "سيبها فى حالها" هو تحرش. سواء كان كلام او لمس او نظرات او اى شىء من ذلك.


ايه العلاقة؟


المأساة الحقيقية عندنا فى مصر – واعتقد فى باقى الدول العربية – هى اننا مجتمع مستبيح للمرأة. يعنى عادى اوى ان بنت تتهزأ, منطقى جدا ان بنت تتكسر مقاديفها, مش غريب اطلاقا ان تتهز ثقتها فى نفسها.


جاوبونى كده:


- ينفع البنت اللى اتربيت فى بيت بتتلطش فيه "التلطيش العادى ده" فى الرايحة و فى الجاية, انها فعلا تغضب لو واحد فى الميكروباص مد ايده على فخدها؟
هى بتدايق, بس رد فعل الاول الطبيعى عندها بيكون سكوت, مش انفجار لانتهاك حرمة جسدها. و ده بيولد عند اللى عمل فيها كده نوع من انواع انه "العادى" مش اشكال.


-ينفع بنت اتشتمت اما اتردمت شتيمة من ابوها و اخوها و عمها على انها "ست" و لازم ماتجريش ولا ماتقعدش كده ولا ماتلبسش كده ... انها تصوت و تلم الناس على واحد قرر انه يعلق بصوت مسموع على صدرها؟
برضه هتدايق, لكن اللى بيحصل انها فى الاساس متعودة ان فى حد بيبص على تفاصيل جسمها اولا, و انه مش شىء غريب خالص انها تسمع الفاظ بذيئة ثانيا.


- هل متوقع من واحد اتربى فى بيت الست فيه امه اللى بتتشتم عشان نسيت تجيب الملح, و اخته اللى بتاخد قلم على وشها عشان ردت رد "مش عاجب باباها" و هى "بنت" و طبعا "البنت لازم تكون مؤدبة" ... ينفع ده بذمتكم من جواه فعلا يحترم الستات؟
لو هو ربنا رايد له خير, ممكن لو حاول و قرا و فهم, احتمال يتغير. بس الغالب انه هايبقى من جواه "مستهين" بالمرأة, و لو احسن من كده, هايبقى بيتعامل كويس بس الاصل عنده ان المرأة اقل. و الاحسن اوى يعنى, اللى هاتلاقيه بيصارع نفسه فى ده طول الوقت.
و طبعا هنا ماقصدش ان كل الرجالة لازم يبقوا حاجة من دول




الفكرة فى مجتمعنا فعلا هى ان المرأة "شىء" مش انسان. و قبل ما تقولوا لى بطلى كلام جمعيات حقوق المرأة ده فكروا فى الكلمة لمدة عشر ثوانى.




ما هو لو الراجل فعلا متربى على ان الست بنى آدم زيه, مستحيل "يقدر" يجيب عينه ناحيتها. اللى بيعمل كده بيبقى مستبيح الشىء ده, مستهون بيه و مستضعفه, مستقل بيه و شايف انه – عشان راجل – فهو من حقه يطلع بنظره خارج مجال البصر العادى و يبص على صدر واحدة معدية فى الشارع, و من حقه انه "يبقى له رأى" فيه.




كل ما راجل بيعمل عملة من العمايل دى, اوتوماتيك باتخيل امه فى البيت!
- اللى بيبص عليا من تحت و انا نازلة من الميكروباص اكيد امه ست اتعودت تتحنى فى بيتها عشان الدنيا تمشى.
- اللى بيبص لواحدة من فوق لتحت و يقول اى كلمة و هو بيضحك, ده امه ياما قبلت ان ابوه يتريق على جسمها و يدايقها و هى ساكتة.
 - كل واحد بيقف لى بعربيته و يقول لى تعالى, عينى على طول بتتصور ابوه و هو قاعد بياكل و امه بتخدم عليه و هو بيشخط فيها و يهينها, و يضرب اخته عشان غرفت الطبق مليان و اتدلق منه حبة.
- كل سواق ميكروباص بيقعد يعلق على كل ست هو معدى جنبها, و كل ست ركبت بعد ما تنزل, باعرف على طول ان امه و اخته و مراته و بنته اتبهدلوا شتيمة ... و سكتوا و قبلوا.




دى بقى النقطة ...


"سكتوا ... و قبلوا"




* انتى ممكن تكونى ماخترتيش اهلك و لا البيت اللى اتربيتى فيه, بس تقدرى تختارى بيتك و التربية اللى هتربيها لعيالك
* انتى ممكن تكونى مش هاتعرفى تغيرى تربية رجالة بالكوم فى البلد, لكن تقدرى تكبرى ابنك فى بيت الست فيه بنى آدم له احترامه
* انتى جايز ما تقدريش تغيرى صورة المرأة فى ذهن كل الرجالة, لكن تقدرى تربى بنتك "محترمة" من جواها و هى هتجبر الكل يحترمها.




لو كل ست فينا فكرت فى الموضوع انها فى ايديها تربى راجل واحد و ست واحدة – لو يعنى خلفت اتنين – على كده, صدقونى هتتحل!


بس عشان تعرفى تعملى كده لازم من الاول تشغلى مخك و انتى بتتجوزى.
اللى يعاملك وحش مايستاهلكيش
اللى يهينك لا يمكن يكون بيحبك, "الراجل" – مش اى كائن آخر – اما بيحب بيبقى عايز الست تبقى هانم. اصلها بالعقل كده, اما هى تبقى هانم, يبقى هى متجوزة مين؟
اما بتقبلى الاهانة قدام عيالك بتكسريهم ... ايوة ... افهمى بقى!


تانى


اما بتقبلى الاهانة قدام عيالك بتكسريهم!


غير كده هنفضل نعانى و نصرخ و نصوت بعلو حسنا "والله بنى آدمين" و محدش حيدرى بينا.





14 comments:

Noha Saleh said...

طبعا بنى آدمين
لازم كمان يكون فى قوانين رادعة لاى واحد يعاكس بنت فى الشارع علشان يكون عبرة للى يفكر يعمل كده بعده

Evronia said...

تسلم الايادي اللي كتبت، تتلف ف حرير :)

محمود عبد الحفيظ said...

تدوينة محترمة و كلام صحيح ... احييكى

Eman Hashim said...

نهى:
صح كلامك يا نهى
هو العقاب ده هو المهم

ايفا حبيبتى
ربنا يخليكى ليا يا رب

شكرا يا محمود
متشكرة لتشجيعك اللطيف

Monica said...

مدونة هايلة، في الصميم

Eman Hashim said...

Thanks Monica :)

deppy said...

المشكله مش بس السكوت على التهزيق و الحاجات الواضحه الفكره في حاجات بتترسخ جواها انها تستاهل ده. اه و الله
مصدقه ده، و ستات متعلمين و اخر فل.

لما تربي بنتها انها تخدم ابوها و اخوها و هما يخدوا الدلع. و لما تقنع بنتها بواحد متقدملها عايزها عشان تخدمه و شايفه ان ده عادي.

ده مش بس في طبقه سواقين الميكوباصات ده بينقل لاأراديا احساس ان الراجل superior و ان دي وظيفتها في الحياه

و على فكره انا مليش في جو حقوق المرأه ده خالص بس ده ابسط حقوقي كانسان

Eman Hashim said...

ما طبعا!!!
هى المصيبة دى فى كل مجتمعنا مش فى طبقة معينة

و ماله جو حقوق المرأة؟
ماهى متهزقة و متنيلة و لازم ندافع عن روحنا طبعا

الحمد لله رب العالمين

شكرا لتعليقك الرائع و اهلا بيكى

بدر said...

تسلم الايادي
كلام صح

ســـاره الجهيني said...

عجبتني جدا حته بفتكرامه.... بصراحه عجبني

Eman Hashim said...

متشكرة يا سارة انتى و بدر. تعليقاتكم بتفرحنى ببنات البلد الجدعان

shimaa yasin said...

اولا تسلمى وتسلم ايدك ويسلم اسلوبك الرائع .. احنا محتاجين نغير نظرة المرأة لنفسها الاول وبعد كده نظرة الرجل فيها

Eman Hashim said...

ده حقيقى يا شيماء. اما الست صورتها قدام نفسها تتغير كل حاجة هتبدأ تتحل
البداية احنا

sara said...

وجهة نظر محترمة من انسانة تحترم نفسها وبنات جنسها ومجتمعها بالكامل