Monday, July 4, 2011

مبادرة امسك اوشااااعة



بقالنا فترة طويلة متبهدلين من موضوع الكلام على تويتر اللى مش باين له لا اول من آخر و مش عارفين نصدق مين فين ازاى. و اللى لفت نظرى للموضوع ده من زمان كان مهند فريد.

و اول امبارح فى ورشة عمل عن التدوين و المش عارف ايه, مدون ارمنى اسمه هايك يا عيني كان هيتجنن من  المصداقية الصفر اللى موجودة حاليا.

غير ان بسم الله ما شاء الله عليه المنسق اللى جه من شبكة رصد كان فخور اوى و هو بيقول ان اخبارنا أحيانا تعتمد على الاشاعات لكن إحنا بنحاول نتأكد --- لأ برافو!

النهاردة بقى, و أثناء اللى كان بيحصل في التحرير, و اللى سموه ناس تويتر ب "موقعة الكنكة" لقينا الموضوع كبر, و وصل لان شخص يدعى خالد اندبح في التحرير ... يا سلااااام؟!!
و "قالوا" انه في مستشفى المنيرة, راحت رنيم نزلت مستشفى المنيرة مالقيتش حاجة. و اللى يوقل انه كويس بس مدبوح, و اللى يقول انه بس مطعون, و اللى في احمد ماهر, و اللى في الفرنساوي

اتنرفزنا طبعا. و بعدين طارق شلبي طاح بقى و قال الكلام ده:




فانا لميت كل ده فى فكرة كده. و هى نوع من انواع الرقابة الداخلية مننا فينا على الاخبار اللى بتنتشر على تويتر, عن طريق الاصرار اننا تنعرف المصدر بتاعها, و اللى يطلع بيقول اشاعات نجرسه و نشاور عليه عشان الكل يعرف انه اوشاعتاجى – على رأى احد الاقتراحات على تويتر – و اعتقد دى تكون بداية كويسة.

الهاشتاج احنا عملنا تصويت صغير كده, و كانت الاختيارات رسيت يا اما تويت رومر, يا اما اوشاعتاجى
#twitrumor and #Osha3tagy
و اختارنا تويت رومر - و اللى كان من اقتراح امين اللى عايز جايزة هههههههه -  عشان هينفع عربى و انجليزى و كله

نيجى للخطوات:
دلوقتى مثال: "النور قطع فجأة فى شارع محمد محمود"
يبقى نقل الخبر على تويتر:
1يا اما واحد هناك مصور صورة و حاططها على تويتر
2-يا اما واحد هناك (فى الشارع نفسه مش فى باب اللوق) و بيتويت من الشارع على مسئوليته
3-يا اما واحد كلم اخوه اللى هو عارف انه فى الشارع و قال اخويا بيقول لى كده و يتحمل مسئولية الكلام


و يا ريت مانزعلش من بعض فى الكلام ده. و بلاش حوارات انا اقول اللى انا عايزاه ما تنزلوا تشوفوا بنفسكم يعنى, القصة مش كده. الموضوع ان انتشار العك على تويتر زاد اوى مؤخرا و فى حاجات ماينفعش.
يبقى بعد كده, اللى يقول خبر يقول مصدره عشان المصدر يتحمل مسئوليته. و يا ريت كلنا نشارك فى ده. و محدش يعمل ري تويت لحاجة من غير مصدر عشان هو كده بيساهم فى انتشار اشاعة.


يا رب

5 comments:

مدونون بلا قيود said...

جميل قوى ..
لكن لازم نراعى ان من اهداف الاوشاعجى انه يتشهر والناس تشاور عليه

Eman Hashim said...

طيب نعمل ايه
انت عندك حق

بس هنعمل ايه؟

شوارعي said...

كلامك مهم جداً وضروري وخصوصاً في ظل أجواء السخونة اللي مش عاوزة تبرد دي، بس التنفيذ والتحقق من جدية أو صدق الخبر صعبة جداً...هو فكرة فانتازيا شوية ومش عارف سهل تطبق ولا لا...أنا للأسف خارج مصر وأقدر أساهم بس بالفكرة والكلمة...المهم لو تقدروا تشوفوا من كل منطقة أو حي واحد يكون مسؤليته التأكد من أي خبر يقع في إطار المنطقة المحيطة به ممكن تكون طريقة، طبعاً الشخص ده هيكون بدوره له معارف وأصدقاء يقدر يعرف منهم صدق المعلومة أو كذبها وهكذا ،أنا عارف إن الدائرة كبيرة ومش سهلة بس ممكنة بشوية ترتيب ونظام...أسف على الإطالة ...تحياتي

Eman Hashim said...

هى الفكرة فى ان الحدث غالبا بيبقى فى بؤرة معينة و الدنيا بتبوظ بسرعة فى كل حتة

يعنى وقت حادثة 28 يونيو. كان فى احداث كبيرة فى شارع محمد محمود و فى جوا الميدان غير اللى فى قصر النيل. كده يعنى

فكرتك عن المناطق هايلة
و هضمها دلوقتى

شوارعي said...

أقولك على فكرة تانية تبان عبيطة بس هي من منطلق ودواني بالتي كانت هي الداء ...إذا كان معروف إن البلطجي بيشتغل عشان الفلوس هل ممكن الحكومة تعلن إن أي بلطجي يبلغ عن مؤامرة هياخد مكافأة يعني فلول الوطني بيدوهم فلوس علشان يبلجوا ويثيروا شغب!!! لا تعالوا انتو يا حلوين اللي هيبلغ عن مؤامرة ولا مصيبة هنديلوا بونبوني ومصاصة...هل ده ممكن ولا دي تخاريف لاسعة...شكلها تخاريف مش كده؟!