Saturday, December 24, 2011

شيكا


محمود عمران عبدالمجيد – الشهير بشيكا – اتخطف شارع محمد محمود الخميس الساعه 2 ظ ومش موجود في س 28 ولا أي قسم حسب كلام العش.

دى صورة بطاقته
 

شكله ياي و شعره مش شيك و منظره يخوف و مش من هيليوبوليس ولا ساكن فى الدريم زعبولة هاوس.
شيكا طالب فى كلية حقوق, و اخوه لاعب فى الجونة, و هو فى الالتراس وايت نايتس.

بنى آدم يا معدومى الاحساس. مصرى من اللى تشوفوه راكب القطر و مستنى المينى باص.
فاكريننا هنخاف اما تلمونا و تخطفونا؟

حسبى الله و نعم الوكيل

و على فكرة... شيكا ده لو واحد عمل حاجة ضد القانون, يبقى يتقبض عليه بأمر من النيابة, و يتحقق معاه برضه فى النيابة, و يتحجز و يتحاكم و انشالله يتسجن 50 سنة ولا ياخد اعدام حتى
بس بالقانون... مش خطف
ايه؟ مش هاتلايموها بقى؟ ناويين على ايه؟ مين بقى اللى بيشعلل؟ مين اللى عايز الدم يفضل يغلى و الشباب تفضل غضبانة؟
مش كفاية البيوت الحزانة؟ مش كفاية الامهات الثكالى؟ كمان بيوت فيها ام دلوقتى هاتتجنن على ابنها مش عارفة هو فين ولا جرى له ايه؟
حسبى الله و نعم الوكيل ... حسبى الله و نعم الوكيل

2 comments:

مونتي بوكيه ورد said...

الله عليكي عجبتيني بجد وثورة البنفسج رائعه منك واكيد هشارك برأيك في برنامجي يارب ينجح

Unknown said...

يا رب يخليكى يا مونتى
و يا ريت تبقى تبعتى رابط للبرنامج او تقولى لى اتابعه ازاى
متشكرة اوى