Monday, May 30, 2011

يافطة فى ميدان قالت كل الكلام


الراجل ده لخص كل اللى ممكن احب اقوله فى كم بوست فى يافطة اربع سطور



بجد بجد ... احييك من قلبى, و ان شاء الله هنكمل
افتكروه و انتوا بتفكروا تقلبوا ع الثورة و على ناسها

Thursday, May 26, 2011

مش حلو كده يا جيش ... مش حلو خالص


و احنا عملنا ثورة و شوفنا اللى شوفناه عشان الناس يتقبض عليها عشان بتوزع منشورات وبتعلق بوسترز؟؟
ايه يا جيش؟ ليه كده؟ كويس يعنى اللى هيحصل دلوقتى؟؟

انتوا ليه مش قادرين تفهموا 

و اهو العالم ع الفيسبوك عمالة تحط البوستر صورتها, و البوستر اصلا نزل على جوجل ايميجدز خلاص, و ناقص يتعمل تى شيرتات, فى ايه؟ ده انتوا كده شهرتوه اكتر

و اهه البوستر اهه بقى





و ميعادنا بكرة ان شاء الله 

اسماء المساجد والكنائس التى سيتم الخروج منها يوم الجمعة 27 مايو


منقول من صفحة الثورة التانية:

الزمان: وقت صلاة الجمعة و بعديه المسيرات
المكان:
أسماء المساجد والكنايس التى سيتم حشد منها

محافظة القاهرة
مسجد عمر ابن الخطاب- جسر السويس / مسجد ميدان المطرية – المطرية / مسجد الخلفاء الراشدين – مصر الجديدة مسجد الأستقامة بميدان الجيزة /مسجد مصطفى محمود فى المهندسين /مسجد النور وكنيسة السيدة العذراء بالعباسية مسجد رابعه العدوية وكنيسة القديسة العذراء والقديس اثناسيوس مدينة نصر /مسجد عمر مكرم فى التحرير مسجد المراغى فى حلوان / مسجد الفتح فى رمسيس / مسجد الحصرى فى 6 اكتوبر /مسجد الحسين الازهر مسجد السلطان حسن العتبه / الرفاعى فى السيده عائشه / مسجد الخزنداره وكنيسة الانبا انطونيوس شبرا مسجد حسين صدقى ومسجد الاوقاف وكنيسة العذراء بالمعادى
مسجد يوسف الصحابى بميدان الحجاز مصر الجديدة/جامع عمرو بن العاص
((التجمع فى ميدان التحرير))

محافظة الأسكندرية
مسجد القائد ابراهيم وكنيسة المرقصية بمحطة الرمل /مسجد شرق سيدى بشر /شارع المعهد الديني و شارع 45
التجمع في حديقة الخالدين أمام مسجد القائد ابراهيم لأسباب طرحناها على الصفحة

محافظة السويس
مسجد الاربعين / مسجد سيد الغريب / مسجد السيد حمزة محافظة

محافظة المنيا
مسجد الفولى
مسجد عمر بن الخطاب.
.مسجد صلاح الدين

محافظه الدقهليه
مسجد النصر

محافظة اسيوط
مسجد السلطان الفرغلى / مسجد خشبة / مسجد الهلالى

محافظة سوهاج
مسجد العارف بالله السوهاجى
مسجد الشهيد

محافظة الغردقة
مسجد الناصر

محافظة بورسعيد
مسجد السلام

محافظة الشرقيه
مسجد التوحيد فى بلبيس مسجد كفر الحوت فى فقوس
مسجد الفتح بالزقازيق والتجمع بميدان التحرير فى الزقازيق ايضا 

محافظة الغربية
مسجد الاحمدى مسجد السيد البدوى كنيسة مارى جرجس
المنصورة مسجد الموافى /مسجد المصطفى / الجمعيه الشرعية / مسجد النصر ((التجمع عند مبنى المحافظه))
مسجد قادوس بالمحلة الكبري

محافظة الاسماعيلية
مسجد ابو بكر الصديق
مسجد المطافىء

محافظة الفيوم
من مسجد عبد الله وهبي
والتجمع فى ميدان السواقى

محافظة قنا
مسجد سيدى عبد الرحيم .
. ومسجد ناصر .
. ومسجد ابو بكر الصديق 

محافظة أسوان

مسجد الحاج حسن
ومسجد عبد الرحيم بالنفق



مصدر الصورة : من هنا

Tuesday, May 24, 2011

بدالات لعجلة الانتاج

دلوقتى احنا فى وقت مهم و حيوي في البلد. و مش سر ان فى قطاعات كتيرة متأثرة اكتر من غيرها. بقالى حبة حلوين أنا بفكر في الموضوع ده – زى كل الناس – و حاولت أشوف حلول و لو مؤقتة, و قلت أشارككم و أخد رأيكم فيها.


الاول: تطبيق الحد الاقصى للأجور فى كل قطاعات الدولة.

مش العمر كله, لحد ما الدنيا تستقر على الاقل و نكون اتناقشنا بقى فى الموضوع ده باستفاضة. بس حاليا مش منطقى ابدا ان فى ناس فى قطاعات من الدولة بياخدوا المرتبات الهلامية اللى بياخدوها دى.
اول فايدة طبعا هى ان كده تطبيق الحد الادنى للأجور مش هيكون ازمة اطلاقا. و احنا عارفين ان ده كان – و لا زال – مطلب من اهم مطالب الثورة فى الاساس. مش مقبول ان العامل يكون عنده 32 سنة و عنده بنت و بيشتغل 16 ساعة فى اليوم عشان ياخد 130 جنيه, و كمان مدير المصنع بياخد الارقام الفلكية اللى بياخدها دى.
ثانيا اعتقد ان الميزانية بتاعت كل قطاع هيكون فيها فائض يسمح بحاجات كتيرة بقى تنفع البلد كلها.



الثانى: البورصة

عشان نبقى واضحين, انا معلوماتى عن البورصة لا تتعدى فيلم وول ستريت و مسلسل تريدارز لو حد عارفه اصلا. بس الفترة اللى فاتت كان فى كلام عن موضوع البورصة ده كتير.
دلوقتى اللى فهمته, ان الاسهم دى زى السيدز بتاعت التورينت كده. و ان الخوف الاكبر فى ظل الاسعار الرخيصة, ان الاجانب يشتروا كتير و بالتالى اغلب الملاك يكونوا مش مصريين. غير ان فى خوف تانى ان كل واحد يخاف يخسر جامد و يبيع اللى معاه برخص التراب, و فى الآخر البورصة تقع.
الفكرة ببساطة هو ان كل واحد فينا يقدر, يشترى اسهم فى اى شركة مصرية بمية جنيه مش اكتر. بس على شرط ... ينساهم.
كأنهم راحوا. هم مش هيروحوا ان شاء الله. و محدش عارف دول فى سنتين مثلا ممكن يبقوا ايه. بس برضه بلاش عشم فى انهم هايبقوا ملايين و الكلام ده. كأن مفيش المية جنيه دى اصلا.
ده: هيساعد فى ان الملاك يكونوا مصريين, و يكون فى شراء كتير, و يساهم فى ارتفاع السعر لو حبوا. و كله لمصلحتنا مفروض ان شاء الله



الثالث و الاهم: السياحة

طبعا مش محتاجة كلام ان السياحة مضروبة بالنار حاليا. بس ليها حل ان شاء الله.
الفكرة باختصار هى ان احنا فى اواخر مايو اهه, و طلبة الجامعة قربوا يخلصوا ... هنعمل لجان شعبية لحماية السياحة
يعنى ايه؟
يعنى طلبة كليات سياحة و فنادق و اداب آثار و لغات و السن, و غيرهم من اللى ممكن اصلا يحبوا يشتغلوا فى السياحة بعدين, يقسموا بعض مجموعات و يروحوا كمجموعة لشركة سياحة من اللى موجودين فى مصر.
يكون معاهم اثبات شخصية و دليل ان هم طلبة جامعة و ممكن كمان يقسموا بعض بالغات.
و الشركة تعلن عن رحلاتها و فيها صورة للمجموعة دى على انها مجموعة شباب مصر اللى هترافقهم طول الرحلة لحمايتهم و العمل على راحتهم ... من الآخر هندلع الزباين, و ده مش عيب.
و بعدين انا طول عمرى نفسى افهم المنطق فى عدد البشر اللى بتدرس لغات فى مصر, اهم جه وقتهم.
مثلا مجموعة من 8 طلبة و طالبات من آداب ايطالى يتصوروا سوا, و تتعمل حملة اعلانية صغيرة من شركة السياحة موجهة لايطاليا باللغة الايطالية مش انجليزى.
هنا الطلبة دول طبعا مش هياخدوا فلوس, بس الشركة توفر لهم الانتقال و البيات و لو امكن الفطار, و فى الآخر ياخدوا شهادة خبرة معمولة للمشروع ده مخصوص.
الطلبة دى هتستفيد بالكوم على فكرة, خبرة فى التعامل مع الاجانب, و ممارسة حقيقية للغات, و احتكاك بمواقف, و مين عارف يمكن يتعرفوا على ناس مفيدة ليهم فى الشغل ... دنيا بقى
بس يكون فى قانون او يمضوا على تعهد ان مفيش حد يتهبل فى يفكر انه يتجوز واحدة من الاجنبيات ... مش عايزين هبل!
و الشركة هتستفيد اوى طبعا لان شغلها هيمشى بدل ما هو واقف, و لو اول رحلة نجحت هتجيب اللى بعدها.
و الناس اصحاب المشاريع الصغيرة فى كل مكان هاتزوروه, هيبيعوا بقى للاجانب و الدنيا تمشى.
بس يبقى دور اللجنة اللى معاهم حمايتهم بجد من طمع البياعين و التحرش و الشحاتين و الكلام ده.

الحملة دى ممكن لو عملناها صح تنفعنا اوى. و الناس نفسها تتفرج على مصر و دنيا مصر بس خايفين. تخيلوا اما نعمل الحملة دى باسم اننا بنقوم بلدنا و محتاجينكم معانا و هنحميكم و نبسطكم كمان؟
اعتقد انها ممكن اوى تقوم حاجات كتير فى البلد ان شاء الله

و احنا هايبقى لنا دور قوى فى انها فعلا تكون "حملة قومية" و الانترنت كله يتكلم عنها بقى.
الموضوع ده هيقوم مش بس السياحة: السياحة و الفندقة و البيع و الشراء و الدعاية و الاعلان و مواقع على النت لشركات السياحة باعلانات عليها و بروشورات بقى لكل رحلة و طبعا كل المواطنين اللى فى البلد اللى هنروحها حيخش لها كتير اوى


و مصر سياحتها مش بس شرم و الغردقة. انتوا عارفين لو حبينا مثلا نضبط رحلات للسويس, المكان اللى شهد كفاح بطولى ايام الثورة؟ او المناطق المنسية فى مصر زى الواحات البحرية و سيوة؟ على فكرة الاماكن دى مش غالية اصلا يعنى الرحلات مش هتكوت مكلفة, و ناسها فعلا هيستفيدوا اوى, و الشركة حتعمل اسم

والله لو حطيناها فى دماغنا هتبقى جامدة جدا



ايه رأيكم فى الافكار دى؟

ليه ننزل يوم الجمعة 27 مايو؟

Monday, May 23, 2011

عن المجلس العسكرى



طول عمرى من الناس فى البلد دى اللى عمر ما كان ليهم اى نوع من انواع الدعوة بالجيش. ماعرفش اى حاجة عنه غير المعلومات العامة يعنى, حتى ماعرفش كل الاسلحة و اسماءها.

اما حصلت ثورة تونس, اتوسمت خير فى الدنيا بشكل عام. و اما كنا بنتسحل يوم 28 كنت باقول – زى كل الناس – هو فين الجيش؟


و انا فى شارع القصر العينى يوم 28 بليل, و الضرب بقى من فوق و من قدام و ورا, و عربيات تجرى ع الناس, و قناصة تموت فى ناس وسطنا, و دخان, و مصابين ... شوفنا شوية دبابات بالوان كده فى الاول و فرحنا, قلنا الجيش جه و معانا.
طلع الحرس الجمهورى داخل الميدان من كل الشوارع عشان يحمى المبانى الاستراتيجية اللى فيه. وقتها كل اللى فهمناه ان دبابات الجيش دخلت الميدان و الداخلية ليسة بتضرب فينا.
فى مننا وقتها قالوا "هو الجيش مع الداخلية ولا ايه يا جدعان؟" ... بصراحة شديدة جدا, انا كنت واحدة من الناس اللى رفضوا يصدقوا ده.
و مفيش بعدها بمدة قليلة اوى, كانت دبابات الجيش داخلة الشارع, و الناس بتتشعلق عليها, و بيحيونا بعلامة النصر, و بيضحكوا فى وشنا
بس مش هانسى برضه وشوش اللى جم فى الاول, كانوا مش مستوعبين ان الموضوع للدرجة دى, ناس بالكوم بيتحاموا فيهم بعد ربنا, واقفين لأسفل و اقذر انواع العنف. رجالة و ستات بيقعوا ع الارض و يقوموا.
انا فاكرة فى نص الانفعال, جريت فى نص الشارع على دبابة و بصيت فى عين العساكر اللى فيها و بقيت بشاور على اتجاه الداخلية و بنط لفوق و بأعلى حسى بازعق و اقول لهم "بيضربونا ... بيضربونا" و مش هنسى نظرتهم ليا, كانوا فعلا فيما يقرب للصدمة.
و بعدها كنا طبعا فى حرب الشوارع بتاعت الساعات الاولى من 29 و احنا بنجرى من امناء الشرطة اللى بسلاح و البلطجية و الحرامية اللى بيسرقوا, و وصلنا فى جاردن سيتى لكم دبابة كده. كنا اربعة, سلمنا على افراد الجيش اللى موجودين – انا مش باعرف الرتبة من اللبس و كده فماعرفش هم كانوا ايه – المهم بصيت لواحد باين عليه انه كبيرهم و قلت له "انتوا كنتوا فين؟" رد عليا و قال لى "انتوا مش طلبتونا؟ ادينا جينا" رديت عليه "ربنا يخليكوا لينا"

و بعدين ايام الاعتصام, و حكايات ايام الاعتصام
و شفيق, و الضرب اللى هم ضربوه فينا عشان شفيق
و ايام تشيلنا و ايام تجيبنا
و ناس تنضرب فجأة بالمولوتوف فى عزب و عشش و شهاداتهم تقول ان الجيش هو اللى ضرب, و اعتصام يتفض بالضرب و البلطجية فى حماية الجيش, و انتهاك لحرم الجامعة و ضرب للطلبة المعتصمين و الاساتذة, و اعتقالات!!!! ايوة اعتقالات ... و محاكمات عسكرية, و الطلبة المعتصمين يتفصلوا من الجامعة .... و غير كده من اللى كلنا عارفينه


انا قصدت اكتب الكلام اللى فى الاول مش عشان ارضى حد او اسبق بكلام كويس عشان اقول اللى انا عايزاه. انا قصدته عشان دى حقايق, حقايق انا شفتها و عيشتها مش حد اللى حكى لى عنها. و عشان دى حقايق انا فاكراها و مش هانساها ان شاء الله


انا مش نازلة يوم الجمعة عشان اقف ضد الجيش, و لا عشان اشتم فى افراد. انا نازلة لانى شايفة ان الحال مش نافع

-اباطرة الفساد استغلالا للقانون و ثغراته و متاهات الادلة و التحقيقات بيطلعوا واحد ورا التانى, فى الوقت اللى فيه شبابنا بيتقبض عليهم لأى سبب و فى تلات ايام اهاليهم يلفوا وراهم فى النيابات العسكرية يلاقوهم اخدوا احكام عسكرية لا جدال فيها ... ينفع؟

-الصوت السلفى ايا كان هو مين و من فين, خرجت الامور عن السيطرة  عليه لدرجة ان يتم التعدى على حرمة الكنيسة و ده بيسخن النيلة الفتنة اكتر و اكتر, و برضه مش هننسى ان كنيسة اطفيح اتهديت ببلدوزر قعد يهد فيها حيطة ورا التانية قدام الكل ناس و جيش و عادى .... ينفع؟

-دلوقتى مفيش اى نوع من انواع الاساس و الضوابط اللى يتبنى عليها الدستور. يعنى مش ممكن نسيبها للبرلمان القادم سايبة لحد ما نلاقيه عامل لنا دستور يلعب فى مواثيق حقوق الانسان و قوانين المواطنة ... ينفع؟

-طارق كامل وزير الاتصالات السابق جاله قرار بالعلاج بالخارج على نفقة الدولة اللى كل شوية يقولوا ماعهاش فلوس خلاص – الخبر غير مؤكد - ... ينفع؟

-جمال مبارك بتتحفظ التحقيقات معاه واحد ورا التانى ... ينفع؟

-سوزان قال ايه عايزة تمشى فى حوار قال ايه رد الفلوس ده ... ينفع؟

- اهم من كل ده بقى:
التحقيقات مع افراد الداخلية المتهمين بقتل الناس يوم 28فيها مماطلة غريبة و مستفزة, يا عالم دى ثورة, يعنى كان ممكن اوى العالم دى بالذات بالاسم كده تتعدم فى الميادين العامة. وائل الكومى ده مثلا مش هنرضى باقل من انه يتعدم فعلا
و كمان اهالى الشهداء بيتضغط عليهم و بيتهددوا و بيقولوا لهم خدوا فلوس و اخرسوا ... بذمتكم انتم ينفع؟
ربنا ما يورينا تانى اللى حصل يوم 28, بس والله اللى شاف مش قادر ينسى, و لا قادر يستوعب يعنى ايه الناس دى ماتتحاسبش ... والله ما ينفع!


يا سعادة الجيش : انت كتر الف خيرك اوى لحد كده, و متشكرين. بس فعلا الموضوع دلوقتى خارج سيطرتكم تماما, فعلا مش عارفين تلموها, و هو مش دوركم اصلا انكم تلموها. خلاص بقى, متشكرين لحد كده و يا ريت نحاول محاولة تانية بما تقتضيه تداعيات المرحلة الحالية ... مجلس رئاسى مدنى مؤقت

المجلس ده هايبقى مطالب قدامنا ب
1الغاء حالة الطوارىء
2قانون ممارسة الحقوق السياسية
3الافراج التام عن كل المعتقلين
4المحليات و المحافظات



يا ريت بقى نخلص من الحدوتة دى بسرعة لان فعلا كده مش نافع, و فعلا فى قطاعات فى البلد حالها مش ماشى, و امان الناس مش قد كده حتى لو بيتدلعوا, اهم بنى آدمين و لهم حقوق.
البلد واضح جدا يعنى انها فعلا دلوقتى مش ماشية زى ما اى حد عايز خالص
نعمل ايه؟ نجرب حاجة تانية. حتى لو المجلس الرئاسى مش مثالى, اهى محاولة جادة لتحقيق مطالبنا الشرعية اللى مفيش بديل عن تحقيقها مش عشان اى حاجة غير انها اساسيات لبداية حياة عدلة.

يعنى احنا حاليا فى موقف المتدبس ... حتى اللى فى الناس كان مش عايز ثورة و ماكانش معانا, اعتقد انه عارف ان مفيش بديل خلاص عن اننا نكمل... مفيش بديل

يمكن انا عايزة اكمل من غير ضغوط, بس اهه بحاول اشوف كل الاراء



عشان كده من الآخر باقول شكرا للمجلس العسكرى و يا ريت – لو انت فعلا يعنى كده – تحمى القورة و تعمل على تنفيذ مطلبنا

و الا انتوا عارفين ... احنا خلاص وحشنا الغاز و الحمد لله ربنا مقوينا و معانا


شكرا و سلامات


Sunday, May 22, 2011