عن اسطورة الطب ووهم الأطباء

ايام ما كان ربنا بالينى بالتكليف فى الحكومة كنت متعينة فى محافظة غير محافظتى بس فى نظاق القاهرة الكبرى ومفروض اركب مواصلات واروح كل يوم وآخد نوبادجيات لحد 8 بالليل فى الصحراء و مش ممكن اقفل الباب عليا انا والممرضة واحنا فى وسط الصحراء لوحدنا من غير امن بأساسى مرتب 92 جنيه، ولو رحت ال22 يوم عمل بتوع الشهر وماتأخرتش ولا حاجة يبقوا 270. 

وانا باستقيل الدكاترة يقولوا لى الوظيفة والمستقبل والكادر ان شاء الله هيحصل. لحد النهاردة مفيش كادر وبيشتغلوا اشباه دكاترة بملاليم فى مقابر متهالكة اسمها مستشفيات وزارة الصحة ومستنيين الكادر والمرتب يزيد. مرة باقول لزميلى والله احنا الغلط. لو وزارة الصحة لقيت فى سنة كل المكلفين بيستقيلوا ومفيش عبيد غصب عن ام اللى خلفوهم هيضبطوا الدنيا ويعدلوا المرتبات والتدريبات، لكن الناس ساكتة وحاطة جزم فى بقها وعايشة فيلم انها دكاترة، لأ وزعلانين من ظروفهم الصعبة

والقطاع الخاص مش احسن، فى سنة اشتغلت فى مركز كبير للعدسات فى مصر. الشيفت كانت 8 ساعات ب25 - اه والله العظيم - وجهاز امضاء الحضور والانصراف لو سجل تأخير 5 دقايق بيتخصم 5 جنيه، غير انى لو نسيت اكتب فى الايصال عدد 2 عدسات كذا كذا + علبة، لو نسيت (+علبة) دى انا يتخصم منى 5 جنيه والممرضة يتخصم منها 5 جنيه وكأنى ممكن احط العدسات فى قرطاس. وكل ده وسكتت، جه اول الشهر باسأل على القبض يقولوا لى لا قبض شهر 4 تاخديه 25\5. ليه ان شاء الله؟ اهه هو النظام كده. طبعا مشيت، مدير الفرع اللى كنت فيه اما كلمنى سألنى مشيت ليه وقلت له رده كان "ماهو ده النظام علينا كلنا" وكأن دى مشكلتى فى الحياة انكو قررتوا تنازلوا عن حقوقكو وطول الشيفت تغنوا اغنية المظاليم. مدير الافرع كلها بقى اما كلمنى الدكتور المحترم اللى ربنا جاد عليه بيه هو انه قال لى لو محتاجة فلوس دلوقتى اديكى زى ما اكون بشحت من الست الوالدة.

الكلام ده كان فى 2008 وفى وسط ده كله حصلت 6 ابريل، واللى عليهم فى المركز 6 ابريل فشلت والحمد لله مفيش اضراب، ونافوخى كان ساعتها هيضرب، واتأكدت ان الحمد لله الدكاترة فى مصر يستاهلوا كل اللى يجرى لهم

قابلت دكتور كان زميل ليا فى المركز فى 2010 واحنا بنمتحن الماجستير وسألنى مشيتى ليه، قلت له الأسباب وقلت له انتو اللى غلطانين انكو قابلين الوضع ده وبعد كده بتشتكوا، قام بعين مفنجلة كده قال لى "لأ ما هم خلوا الشيفت ب50 جنيه"

ربنا ياخدنا من الكوكب ده عشان انا والله العظيم تعبت

العيانين متخيلين الدكاترة دول عبيد عندهم اشتروهم بالطشف اللى دفعوه وكائنات غير بشرية لا بياكلوا ولا يشربوا ولا بيتجوزوا ولا عندهم عيال وكمان من اثرياء القوم معاهم مال قارون مش مستنيين فلوس

والدكاترة اغلبها عالم تنابلة اتربت تحفظ المناهج زى الحمير وياريت مصدقين انهم حمير لأ كمان مقتنعين انهم فلتات بشرية ماحصلش زيهم عشان جابوا مجموع ولا بياخدوا مرتب عدل ولا بيتدربوا فى تخصصاتهم صح ولا بيمارسوا الطب اصلا ومش عاجبهم اوضاعهم بس مش عايزين يغيروا هم حاجة

بحاول اشوف حكمة فى انى موجودة على كوكب الأرض فى كل ده مش لاقية. ارحمنا يا رب برحمتك الواسعة