Tuesday, January 19, 2010

بين حروق المرأة و تحويرها

فى كده شوية ستات لطيفة عليهم كلام (لطيف) برضه لازم الواحد يخبط فيهم كل فترة.
انا مش مؤمنة بحوار حقوق المرأة ده
انا يا بنتى نفسى اقعد فى البيت ... شغل ايه بس؟
البنت اصلا مش محتاجة كل التعليم  و النحرة الكدابة دى
بصى تتعلم آه لكن عادى يعنى عشان يبقى معاها شهادة , انما مش شغل بقى و الكلام ده. اهى شهادة و السلام
بصى كل حركات تحرير المرأة دى فى الآخر ضريتها مش نفعتها يعنى

عارفين دول بيفكرونى بأيه؟ أنا ... آه والله ... مش انا عقبال عندكم كده عملت ريجيم جامد و خسيت بقى و بتاع؟ تخيلوا كده حد ييجى يكلمنى فى ان فى ناس فى الدنيا دى مش لاقيين ياكلوا. و بيناموا جاعنين , و ان فى اسر بالنسبة لها تلات وجبات ده حلم بعيد المنال. اقوم انا اتشملل و ارد:
"أكل ايه بس؟ بلا تخمة كده! ده انا بافطر بيضة مسلوقة واحدة و لو اتعشيت اصلا بيبقى زبادى دايت دانون مش انجوى عشان اخف. و اللحمة كترها بيتقل كده ... بعدين ايه التفكير اللى على طول فى الأكل ده؟ هم المصريين كده , دايما مخهم فى الأكل, حتى كل مناسباتهم أكل"

اهم الستات اللطاف اياهم دول بيعملوا كده. تبقى الست اهلها ربوها احسن تربية. محدش جه جنبها عشان بنت. و تعليم و اتعلمت احسن تعليم, و شغل و بتشتغل , و مكانة علمية و مجتمعية و فلوس و قدرة و تمكين حقيقيين.

تقول الست لازم تقعد فى البيت و هى على درجة وظيفية عالية جدا. ممكن تكون مديرة فى شغلها ولا استاذة فى الجامعة و بتقول كده. و مرتبها اصلا بتجيب بيه سودانى لقطط الشارع مش محتاجاه مثلا.
تيجى فى كل مناسبة تهرينا كلام من عينة ان تمكين المرأة بالتعليم و الوظيفة ظلمها و هى تبقى ناظرة مدرسة او وكيلة فى وزارة التربية و التعليم.
انتوا عارفين انا كم مرة فى ال11 سنة تعليم فى المدرسة اسمع مدرسة ولا موجهة تقول كده قدامى؟ اما كنت بابقى مش فاهمة! لأ و دول بقى يا عينى ما كانوش بيطيقونى انا و اللى زيى – البنات الشاطرة – و كانوا بيعاملوا الطلبة الولاد معاملة عجيبة ... بحسهم بيتمسحوا لهم كده !

و الحكاية ممكن يبقى فيها منطق لو دول محتاجين المرتب او الوظيفة لأى سبب. بس لو هو ده فعلا السبب فى انها بتشتغل, ماكانتش تاخد رد الفعل اللى بتاخده لو زميل راجل ليها اترقى ترقية هى شايفة انها من حقها ... بتتحول الى وحش كاسر , و ممكن تاكل اى حد قدامها !!

طب ايه بقى؟ ...   هى الثورة !!
ه


4 comments:

مصرية said...

الثورة انك تحاربي عشان الحاجة اللي انتي مؤمنة بيها .. وتكوني مقتنعة بيها مهما الناس قالولك .. اعتقد ان ستات كتير من اللي بيشتغلوا مقتنعين بإن العمل عبادة لكن مش مستعدين يحاربوا علشانه .. ومش بقول كلهم بس كتير منهم كده .. يعني لو واحدة جالها عريس جاهز من مجامعيه وطبعاً عاوزها تقعد في البيت عشان الست لازم يكون كل طموحها في بيتها مش مهم في أحلامها مش مهم أي حاجة كان نفسها تحققها .. دي ست يعني تقعد في البيت تربي العيال .. ولأن البنت مش عاوزة تخسر العريس اللقطة ده ولأنه الزمن بتاعنا قل فيه الرجالة العاقلين زي ما البنات العاقلين قلوا برضه تلاقيها بتتنازل عن كل حاجة عشان سواد عنيه .. اللي يضحك بقى ان بعد الجواز كل طرف فيهم بيشتكي من التاني .. الراجل بيشتكي من الست الزنانة اللي طلباتها كتير ومابتعرفش تعامله كويس .. والست بتشتكي من الراجل العصبي عديم الإحساس والرومانسية واللي برضه مابيعرفش يعاملها كويس وتلاقي وشهم مكشر وببوز شبرين وتلاقيهم بيكرهوا اليوم اللي اتجوزا فيه .. بس مش مشكلة أهي الحياة ماشية .. انا بقى عندي سؤال الناس الشواذ في الحياة زي الراجل اللي عاوز ست عاقلة يتكلم معاها ودول بقوا قليلين قوي والبنت اللي عاوزة راجل يحترم عقلها قبل أي حاجة يعملوا ايه ؟ !!!

Humman being said...

ايمان مبروووووك البلوج الجديد.... بس ليه انتى لغيتى البلوج التانى؟؟؟؟

Unknown said...

شيماء : البلوج القديم ليسة موجود
بس مرحلة و دلوقتى فى مرحلة جديدة
مش هافضل طول العمر فى نفس القالب .. ولا ايه؟

Unknown said...

يا مصرية
فى ستات الظروف بتسمح لهم بفرص فى حياة كويسة كتير. بس خراب التربية الذكورية جواهم موجود.

هى من جواها مواطن درجة تانية عشان ست ... مهما عملت بقى و لا انرقيت و لا اتعلمت ولا ولا

من جوا مش قادرة ( و فى احيان كتير مش دريانة )انها تتخلص من ده

هى ناظرة مدرسة آه ... بس جواها ست مش من حقها تتعلم

و دول بقى فى تربيتهم لعيالهم سواء ستات او رجالة بيبقوا مصايب

ربنا يستر