Wednesday, February 3, 2010

تانى عمل المرأة

آه ... شوفتوا ... ليسة فى 2010 بنتكلم فى عمل المرأة ... نهايته
النهاردة  مش عايزة ادافع عنه ولا اعدد فى مميزاته زى ما ممكن البعض يتخيل, انا باكمل البوست السابق الخاص بالظلم الواقع على بعض الستات – بمشاركتهم -. و بالذات الظلم المادى.
و هنا انا باتكلم عن بعض المقولات اللى بتلزم الست العاملة بالمشاركة المادية فى مصاريف البيت.
اولا: من الأساس كده ... فى الجواز, مفيش حاجة اسمها صح و غلط. فى حاجة اسمها خق الانسان فى الراحة طالما مش بيفرضها على حد. قصة بقى الشغل صح ولا غلط مالهاش مكان هنا.
يعنى ... واحد مش مرتاح ان مراته تشتغل , متجوز واحدة مش عايزة تشتغل ... انا مالى انا؟ فين مشكلتى انا؟
لكن ... الغلط الواضح و اللى بيجيب مشاكل كتيرة, هى ان واحد فعلا مش مرتاح للموضوع ده يروح يتقدم لواحدة بتشتغل و يقول لها " اعملى حسابك مفيش شغل بعد الجواز"
هنا الغلط
المهم ... كل ده ممكن نبقى نهريه كلام و مناقشة بعدين و نختلف او نتفق ... انما بقى النموذج اللى فعلا مأساة حقيقة و عيبة فى حق الانسانية مش الرجولة بس هو اللى بيقول الآتى:
"انا اصلا مش مقتنع بانك تشتغلى , لكن طالما هاتشتغلى يبقى تحطى من مرتبك فى البيت"
او
" انا مش عايزك تشتغلى . لكن هاسيبك مقابل انك تشاركى معايا فى المصاريف"
احم احم ... انت مدرك انت كده بتقول انت ايه؟ انا مش هاقدر اقولها .. بجد شكلك وحش اوى يعنى .. مش حلوة فى حقك ... يالهوى!! " انا هاسيبك تنزلى مقابل الفلوس؟؟؟ يا عينى على الرجالة

و فى نوع تانى الذ بقى ... بيقول ايه؟
" ماهو لما هى تشتغل عدد الساعات دى , هاتقصر فى حقوقى كزوج تجاهى و تجاه البيت ... يبقى مفروض انها تحط فلوس فى البيت"
يعنى مثلا بتشترى رضاك بالفلوس؟؟ لا والله مش فاهمة؟؟ يعنى انت شايف انه فيه تجنى على حقك لكن عندك استعداد تعمل نفسك مش واخد بالك لو هى (شافتك بقرشين)؟
ده بجد فى رجالة عادى كده بتقول الكلام ده؟
بعدين ايه نوع التقصير اصلا؟ عشان مثلا لو بتشتغل و اتأخرت فى الغدا عشان السكة كانت زحمة و هى راجعة ؟
انت فعلا عايزها تشترى سكاتك بالفلوس عن مطالبتك باللى اصلا مش من حقك؟ آه ... نرجع تانى نفكر اللى ناسى ... اعمال المنزل مش فرض على الست , مفروض الراجل لو يقدر يجيب شغالة يجيب و لو مايقدرش يساعدها و هى بتعمل الباقى فضل من عندها و ليها اجر عليه ان ماكانش فى الدنيا يبقى الاخرة ان شاء الله.
الستات مش شغالات يا اساتذة ... و انتوا مش بتتجوزوا عشان يبقى عندكم شغالات ببلاش و كمان لو بيشتغلوا تفرضوا عليهم يدوكم فلوسهم ... الست اما بتعمل لجوزها اكل يبيبقى عن حب و مراعية و تعبير عن حبها ليه و رغبتها فى انها تاخد بالها منه و تهنيه زى ما هو مهنيها و مدلعها و واخد باله منها و من حالها ... لكن مش ابدا عشان هى خدامة

عيب ... آه والله عيب, عيب يبقى عينك على فلوس مراتك ... و عيب اكتر تغير قناعاتك و مواقفك لو الموضوع فيه فلوس ... و وحشة اوى فى حقك اما مدى استفادتك المادية يكون شرط اساسى فى تحديد موافقك من الاشياء , و خصوصا لو مع مراتك

الرأى مش عيب طالما الانسان مش بيفرضه على حد. لو انت ضد الموضوع براحتك زى ما قلت قبل كده , لكن عيب اوى انك تقول لمراتك – ايا كانت الصيغة – انك هاتوافق على انها تشتغل مقابل انها تحط من مرتبها فى مصروف البيت

13 comments:

sadek said...

3gbany fekret 2l mdwana 2l gdeeda..2na 3aref 2nny2 adeem shwya bs mafeesh kda bein 2l 2s7ab...lessa kol mrra btshdeeny b2sloobek geddan...w lessa ba7ebb taree2t tafkeerk...
2lmoshkela 2nny ba7ess b3d 2y maqal btktbeeh 2nny 3awz 2a2ol 7aga mohema 3n 2l mawdoo3 w m3rfsh 2eh:)...bs fel 2a5er bla2eeki 2olty kol 7aga..w 2y 7aga b3d kda btb2a mlhash lazma:)...
f baktafy b2nny 2a2ol 2nty kateba ra2e3a:)...

Mohamed El Kortbi said...

Saidaty, Yajib 3la Azzawj an ytakkafala bi3ailatihi wa an yassrifa 2layha wa lakin , in lam yakon mad7oulohoo kafiyan famina al ihssane an toussa2idoho Zawjatoho biridaha !

salam

ثورة said...

أعرف واحده خطيبها السابق قالها الكلام ده
طالما الست هتشتغل فكده هتاخد من وقت البيت يبقى المفروض تشارك في المصاريف
:)

و عشان كده و عشان أسباب تانية كتير
بقى دلوقتي خطيبها السابق
:)

رجالة آخر زمن يا بنتي

Eman Hashim said...

قديم ليه بس يا صادق؟ دى بقالها شهر بس :)
انت عارف ان كلامك بيعجبنى و برضه مش باعرف اقول حاجة بعديه غير متشكرة اوى

Eman Hashim said...

محمد القرطبى (اتمنى الهجاء بالعربية يكون صحيح) كلامك جميل و انا موافقة عليه تماما مية فى المية. و اتمنى الجميع يرى الامور بنفس وضوحك و سلامك مع نفسك
و شكرا لتعليقك ... اتمنى اشوفك تانى ان شاء الله

Eman Hashim said...

ثورة:
الف حمد و شكر انه سابق
بلا سابق بلا لاحق

و بلاش رجالة دى. انا باتعب والله اما يتقال رجالة على دول. يا واقعة سودة يا ناس

دول كانوا بيعملوا فى الافلام البطل بيشحت و لا يمكن ياخد من فلوس حبيبته , دلوقتى بقى يقعد فى بيت اهلها يشرط عليه تحكمه فى مرتبها

يا عينى عالرجالة
سيبك انتى ... خلينا احنا فى الثورة و شد الشعور اما نقرع
ههههههههههههه

Shimaa Gamal said...

والله الراجل اللى بيفكر بالطريقة دى يثبت المثل الحكيم ، القوالب نامت و الإنصاص قامت

و الله الكلام ده بيحرق دمى ، المشكلة إن الرجالة ، و أنا هنا مش بعمم و لكن النسبة فى إزدياد ، فاكرين إن ده حقهم

فاكرين إن عقد الجواز ما هو إلا عقد عبودية ، و للأسف فى ستات كثير فاهمة كده مع إنه عقد شراكة .

Kontiki said...

ازيك يا منة
والله يا منة هى مش مشكلة شغل وفلوس بس
طب خدى التقيلة يا دكتور
:)
طالما انك بتشتغلى ومتعودة على الشغل يبقى لما نتجوز و تقعدى فى البيت حتزهقى و بالتالى حترجعى تشتغلى تانى وانت بتقولى كدة دلوقت مش عاوزة اشتغل بعد الجواز عشان تمشى الامور و تتجوزى وبعدين ترجعى زى ما كنتى
انا عاوز واحدة بتعرف تعمل تريكو ومفارش وتشغل وقتها بخياطة السرما
ولما تزهق متعقدش على النت تمسك المصحف تقراة وحتى لو الانترنت جزء من صميم شغلك حاليا فعادى تشوفى الكمبيوتر تدورى وشك وتمسكى القران تقرية وفى حدود الشغل بس تستخدمى الانترنت مؤقتا لحد ما نخلص من هم شغلك دة

وحياة العيش و الملح حصل و واقعى

خدى دى كمان
الشغل يعنى تبتسمى للناس و تضحكى معاهم و تتعاملى معاهم اون لاين وتجاملى وتاخدى هدايا ولو رمزية تقديرا لعلمك
ودة كلة اسمة سفالات وشغل جمالات
وانا عاوز واحدة متجاملش تراعينى فى كل حاجة تراعى ان فى راجل فى حياتها
السؤال
لما الحياة الاجتماعية و المهنية للبنت تتلخص فى كلمة مجاملات و سفالات
يبقى مين الصح
لما تبقى رجولتة ملخصة فى بنت مكلفتة مغطاة الشعر بغير ارادتها عشان الناس متبصش على حتة اللحمة بتاعتى
ويبقى شغلها او اى علاقات اجتماعية ناتجة عن الشغل سفالة وقلة ادب و عدم تقدير له
يبقى العقلية دى تتوصف باية
يبقى مش مشكلته الشغل وفلوس الشغل مشكلتة مفهومة لكونة راجل
هو اية
اصلا الطبيعى المشاركة اكل وشرب و نوم وفلوس
فلما يناقش مبدأ الشغل يناقش حاجات تخص الشغل مش مشاركة الفلوس لان اصلا المبدأ المشاركة مش بالتحكم او المساومة سيبتك تشتغلى يبقى تدفعى
او سيبتك تشتغلى
يبقى تبقى زى الغراب فى مكان شغلك ولا كلمة ولا مجاملة ولا ذوق مع حد لدرجة انك تخسرى عملاء ونجاح عشان يحس هو ان رجولته لا تمتهن

الفكرة فى عقلية تركيبتها عفنة
تقبلى مرورى يا صديقتى

Eman Hashim said...

شيماء جمال:

ضحكتينى والله يا بنتى . هى فعلا كده
و حكاية البنات اللى فاهمة غلط دى كمان كارثة. ابو ده مجتمع ظالم من اوله و اخره. و ابو ده جهل و كسل. لو اى بنت فتحت المصحف ( طالما مهتمة تطيع الكلام اللى فيه) و قريت شوية و هاتعرف اللى ليها و اللى عليها
و للمرة السبعمية فين الأهل؟
كل ده عشان خايفين البنت تعنس؟
يقوموا يعملوا فيها كده؟

Eman Hashim said...

اهلا يا كونتيكى يا جميلة
مرورك دايما طبعا مرحب بيه
و اللى بتقوليه هو تمن بتدفعه اى بنت صريحة مع نفسها و مع اللى بيتعامل معاها

المشكلة زى ما قلت, مش فى واحد عايز زوجة بشكل معين, لان كل انسان طالما بيسعى فى الحلال من حقه يدور على اللى يريحه
الفكرة فى تفكير ان الراجل من حقه يفصل الست على مقاسه

واحد خاطب واحدة مش محجبة و عايزها تتحجب بعد الجواز
و واحد خاطب بظلة الجمهورية فى السباحة عايزها تنسى المية بعد الجواز
و واحد عايش فيها دور رجل الاعمال و خاطب بنت فى ثانوى ولا اولى جامعة عشان يضمن انها ماكلمتش رجالة غير اخوها و بعدين عايزها تعيش فيها دور زوجة الدبلوماسى اما تتجوزه

الفكرة كلها فى الشفافية ... فاكرة بوست الشفافية؟

http://3anes.blogspot.com/2009/12/blog-post_12.html

مش هانخلص طالما ان احنا صرحة يا صديقتى
:)

مصرية said...

يا ايمي المشكلة مش في الراجل .. المشكلة في ستات كتير بترضى بالوضع ده

Eman Hashim said...

ايوة يا مصرية عندك حق
ماهة الظلم طرفين ظالم مفترى و مظلوم سايب خقه
و برضه تربية خليت البنات لا يعفروا ايه حقوقهم و لا يتعلموا يطالبوا بيها

FEM4Ever said...

Eman, cool blog :)

Gals... I just want to get one thing clear, I'm confused....

You DON'T expect women to help out with money at home???? I mean, the whole essence of equality is equal rights and responsabilities.
His money is yours --and vice-vera-- We as strong willed, open-minded, free females should not expect 'special treatment': you know, the I-am-equal-to-you but when I work I don't use my money expect to buy candy cane and ,ake up!
"Sharing is caring" as Winnie The Pooh says,
Wala 2eh ;)