Thursday, February 11, 2010

و نعم الصحافة

مساء الخير. مش مقتنعة انا بمساء الخير اللى تتقال و الشمس طالعة بس هم بيقولوا بعد 12 الظهر يبقى مساء الخير و الساعة دلوقتى 2 و حبة.
المهم ...
فاكرين حوار غشاء البكارة الصينى؟ اما اتقال ان الصين عملوا غشاء بكارة صناعى للبنات عشان يحلوا المشكلة بتاعتهم؟ طب فاكرين الكلام و ردود الافعال و النكت و البلوجات و الصحفيين و العواميد اللى اتكتبت فى الموضوع ده؟
مش كل ده طلع اشتغالة؟ آه والله
الحكاية كلها منتج معمول من زمان. جات اذاعة هولندا عملته خبر ساخن و سبق صحفى. و بعدين ذى بريس السورية عملته حملة ضد شرف البناويت العرب. و اليوم الفاقع خلتله مستثمرين بيفكروا فيه و انه هايبقى بحوالى 83 جنيه. لأ خيال جامد و ابداع حقيقى
المهم فى الليلة دى, كان فى صحفية اسمها اميرة الطحاوى بتشتغل فى اذاعة هولندا القسم العربى و قالت لهم- قالت للاذاعة يعنى- يا جماعة فى لبس و الكلام ده مش مضبوط
تصرف الاذاعة؟ التجاهل ثم التهديد ثم الرفد! ايون
اما قالت الحق و رفضت الكذب اترفدت
و افكرة مش بس فى الخبر و صحته من عدمها. الفكرة فى السياق المتعمد فيه الاساءة. يعنى ايه "الصين اللى بتجيبلنا السبح و سجاجيد الصلاة و الطرح دلوقتى هاتجيبلنا اغشية البكارة الصناعية"؟ و الكلام اصلا غلط فى غلط

عشان اما اقول لكم ان الصحافة فى مصر بقى فيها كتير قاعدين فى بيوتهم بيعملوا من مواضيع و جروبات الفيس بوك اخبار ابقى مش ببالغ. اميرة دلوقتى مرفودة من مكان عملها و مانعين عنها حقوقها المادية و الأدبية

و كل ده عشان قالت لأة

اميرة نفسها كتبت كل التفاصيل بالروابط و التفاصيل و التواريخ هنا. يا ريت نعلى صوتها و نوصل قصتها للكل. اذا كنا بنلوم اللى بيسكت على سكاته , يا ريت نساعد اللى بيتكلم. 
انشروا المواضيع فى كل حتة. عرفوا الناس حقيقة اذاعة هولندا القسم العربى و رد فعلها تجاه نشر خبر كاذب عندها. فين الامانة الصحفية؟ فين احترام القراء؟ فين احترامهم لنفسهم كاعلاميين؟ كان ممكن يطلعوا منها ببساطة و دون احراج نفسهم و يقولوا الموقع ضرب و الخبر اتنشر غلط. كان ممكن يعملوا اى حاجة ... اى حاجة. لكن انهم يرفضوا التوضيح و التكذيب و يتكبروا يعترفوا بالغلط و كمان يرفدوا اللى قالت لأ ... يبقى تهريج رسمى
و باقى الكذابين ما يستاهلوش بصراحة كلام ... عشان قد ما هم غلطانين انهم بيكدبوا , كل واحد بيفتح صفحاتهم و يقرا كلامهم و يزود فى عدد زوارهم و بالتالى اعلاناتهم , هو كمان مسئول.

اميرة رافعة قضية على الاذاعة . و الموضوع شكله مش هايعدى ... يا ريت اللى يقدر يساعد اميرة يساعدها



http://kashfun.blogspot.com/2010/02/blog-post_8358.html



سلام عليكم 

7 comments:

Anonymous said...

لكي نرد على هذا الكلام لفارغ ونساند أميرةالطحاوي لابد ان نرسل اعتراضنا للاذاعة الهولندية وسفارة مصر في هولنداوسفارة مصر في هولندا وهيئة الاستعلاماتوالخارجية المصرية والخارجية الهولندية وهذة هي ايميلات هذة الجهات




هيئة الاستعلامات والمكتب الصحفي للاذاعات الاجنبية

feedback@sis.gov.eg

وزارة الخارجية المصرية
Contact.Us@mfa.gov.eg
Info@mfa.gov.eg

السفارة المصرية في هولندا
Embassy of the Arab Republic of Egypt

ambegnl@online.nl

السفارة الهولندية بالقاهرة
السفيرة
Ambassador: ms. drs. S.B. Blankhart
kai@minbuza.nl
مديرة اذاعة هولندا
Yvette.Turlings@rnw.nl

الخارجية الهولندية:
http://www.minbuza.nl/en/The_Ministry/Contact_the_Ministry/Contact_us/General_questions_and_comments

مصرية said...

أيوة في عيب كبير في الصحافة بس العيب الأكبر في الناس اللي بتصدق أي حاجة

Eman Hashim said...

Anonymous:

انا آخر معلوماتى انه جارى العمل على تحضير صيغة
انا لولا انى باكتب بالعامية و ماليش فى الفصحى خالص كنت حاولت اعملها

عموما اول ما تجهز اكيد ان شاء الله هاحطها مع العناوين اللى حضريتك ضفتيها ( او ضفتها)و شكرا جزيلا

Eman Hashim said...

مصرية: عندك حق
احنا كمان بنزيط لأى حاجة
الحمد لله

Sharm said...

فعلا ناس مش محترمة

لازم الكذب عشان تستمر في العمل

Eman Hashim said...

شرم: مش لازم ولا حاجة ان شاء الله. ربنا موجود. بس اهم حاجة ان احنا كناس بلاش نيأس و نفضل نحاول و نعافر

قلم جاف said...

انتي مسمياه اليوم الفاقع.. أنا مسميه اليوم الساقع.. ودة أول اختلاف ما بيننا في وجهات النظر! :)