Tuesday, June 29, 2010

اما الادب (البناتى) يعلم البنات الادب

خبر اللهم اجعله خير, سمعت من فترة عن ما يسمى بالادب البناتى. و قعدت يا ربى اقول يعنى انا منهم ولا انا ادب عوانيسى وبعد ما ربنا يصلح لى حالى هابقى ادب ستاتى ولا هايجرى لى ايه! بس عادى ما حطيتش فى دماغى ... اكتر من كده و ربنا بيزيح ... هم بس يبقى يبصوا على بطاقة الانثى و يحددوا بقى (بناتى – عوانيسى – مطلقاتى – ستاتى )
المهم
شفت لقاء ل2 من نجمات المجال ده.
هو بس اولا الاستاذة رحاب وضحت ان الاصل فى الموضوع انه "ادب نسوى" و ان دى حدوتة جديدة, بس انا ماعرفش هم 15 بنت صغيرين يعنى نزلوا كتب؟ 15 دى جات منين؟
مش اشكال ...لحد اما جينا عند الدقيقة 3.35 و هنا الزعل بقى
بنات مين اللى (بيستفزوا) انهى رجالة عشان تتكلم؟ يعنى ايه بقى ؟؟ لا افهم. و المذيعة يا عينى تحاول تقول و عينيها نفسها تقول "هو احنا ناقصين كمان الستات تقول كده" .. يييييييى البنات البنات!!
طب معلهش بقى. مالكاتبة نفسها لابسة احمر نارى , مافى رجالة ممكن تشوف "مستفز" كفاية للمعاكسة؟ و حسب دليل مصطفى حسنى لكيف تكون متحرشا, الكمام كانت ماسكة على الدراع كمان.
و ايه مش لايق على بعضه دى؟ يعنى انتى اللى هاتحددى لايق ازاى؟ انا واحدة بحب البنفسجى بجنان .. و بلبسه مع كل الالوان .. آه, باطقم بنفسجى مع اسود و ابيض و احمر و اصفر و اخضر كمان ... و بيبقى لايق عليا و بابقى مبسوطة ... لو حد مش شايفه لايق من حقه يعاكسنى عشان استفزيته؟
و ايه موضوع الجامعة معروف لها لبس ده؟ فى واحدة ممكن تلبس الجينز و واحد يعتبر ده قمة الفجور. و فى واحد تانى اى واحدة مش محجبة هى دعوة للمس و واحد تانى شايف ان المحجبة لو مش لابسة حجاب صحيح ممكن يبقى استفزازها اكتر من الغير محجبة. و فى انسان شايف ان المنتقبة اللى لابسة عباية مخبياها دى قمة الاثارة و الساسبنس!
ثم ان والله العظيم فى ناس مش مسلمة فى الدنيا ... نعمل فيهم ايه دول؟
احنا مش هانخلص بقى من عقدة الذنب و معاملة الرجالة على انها كائنات لا حول لها و لا قوة دى؟ لا يا ستى ... فى حاجة اسمها ضبط النفس, و احترام الناس, و احترام الاختلافات, و الاذواق.
ماهم بيسافروا فى كل حتة و بيشوف الستات على كل شكل و مش بيستجرى يقول لواحدة كلمة و لا يبرق فى مش عارف ايه بتاعها.
و بمناسبة برا, ايه موضوع التحرش و الاغتصاب بيحصل فى كل حتة ده؟ نظلم بتحصل فى احسن العائلات يعنى؟؟
يعنى لو الستات فى نيبال اما بيركبوا مواصلات الرجالة بيمدوا ايديهم على ركبهم يبقى خلاص المصريين عادى؟
المتحرش مذنب لانه التحرش ذنب, و انا مش مفروض امشى حسب مفهوم اى حد عن الزى المناسب للمكان و الزمان غير نفسى. المجتمع اللى فيه عشرات الملايين من الناس عمره ما هايتفق على حاجة و احنا عارفين كده كويس.
انا اللى مدايقنى فى كل ده انه كلام من بنات. لو رجالة عادى, مانا باسمعه منهم كل يوم, انما اما البنات تقوله يبقى فى حاجة مش تمام.
و اما ييجى من كاتبة اول كتاب ليها عن ظاهرة التحرش يبقى فى ازمة. انا نفسى الموضوع يبقى بعيد عن الشخصنة, انا حطيت الفيديو عشان يبان كلامى رد على مين لانى بارد على الكلام ده بالذات مش الشخص.

9 comments:

Mo-ha-med said...

اولا انا مش عارف اشوف الفيديو - بيقولي
This video has either been removed from Facebook or is not visible due to privacy settings.
لو عندك رابط علي يوتيوب او حاجة؟
اما بالنسبة للمعاكسة - قالموضوع بسيط جدا.

ما هو الأخ اللي بتقولي عليه ده انه بيسافر و بيشوف ما هو عارف انه لو قالها بخ الناس هتعامله باحتقار و غالبا هيبلغوا الشرطة و هيترمي في السجن. غير موضوع أخلاق الموضوع وجود العقاب هو العنصر الأساسي للردع.

و حيث اننا بلد هبلة و بتلوم البنات عشان الرجالة وسخة، فواضح ان شعبنا الأبي الهمام مش هيبصله بقرف. و حيث ان الشرطة في خدمة نفسها و مش عايزة وجع دماغ يبقى نعطي النساء امكانية تطبيق العقاب بنفسها.
يعني كل بنت تشيل معها ال"سبراي الفلفل" المؤلم ده و ترشه في عين المتحرش و تعميه. و لو عايزة تغزه مطواة انا موافق برضه. :)

ان الأوان اننا نبطل نحاول نبرر وساخة عقلية الرجل المصري (لأ و نلوم الضحية، يا فرحتنا بينا) و نخليه يتعلم الأدب بالجزمة اذا لزم الأمر!

Asmaa Gamal Abdelnasser said...

لا كلام بعد كلامك يا ايمان انا اضربلك تعظيم سلام وشابوه احترامل لى وجهة نظرك طبعا
انا كل كلمه قلتيها بجد كان نفسي اقولها ...
واضيف شي انا احترم اجتهاد الاشخاص فى وجهة نظرهم لكن اما تكون وجهة النظر مرفوعه باسم جنس البنات يبقى ده تعميم والتعميم جهل واجحاف ايضا اضافه ان وجهة النظر اما يكون فيها اتهام لبعض الناس بشكل او باخر تبقى كارثه لان مش من حق حد مهما كان يشير لغيره باصابع اتهام وخصوصا ان فى النقطه دي سابت الجانى الحقيقى وقالت ان هوه الى مجنى عليه يعنى يا حرام المتحرش غصب عنه شاف حته لحمه بغض النظر لابسه طويل ولا قصير واسع ولا ضيق بحجاب ولا لاء وهوه غصب عنه اصلها استفزته بكونها جنس مختلف عنه ؟؟؟
انا لا ادين الكتاب لانى مقرتهوش ومينفعش احكم على شي معرفوش انا برد على وجهة النظر الى صرحت بيها كاتبه هذا الكتاب فى الاعلام الموضوع مش شخصنه للكاتبه ولا للكاتب لاء الموضوع لى وجهات النظر الى بتنشر من غير اى وعى فى الاعلام فقد تكون دعوه لبعض المتحرشين انهم على حق واما نتكلم هيردوا هؤلاء المتحرشين مستشهدين بكلام الكاتبه بقولهم وشهد شاهدا من اهلها ....

Asmaa Gamal Abdelnasser said...

انا معاك فى موضوع العقاب يا محمد بردوا وكمان بره الى قالوا التحرش والاغتصاب بيحصل بره فبره المغتصب او المتحرش بينول جزاءه وعقابه فورا وعلى على فكره فى احصائيات بتاكد ان مصر من اكثر الدول فى قصه التحرش اضافه وده طبيعى طول محنا عندنا ناس بتبرر حاجه زى كدا ومش اى ناس لاء دول بنات بيبرروا لمتحرش ..

sadek said...

جميلة يا (ايمان) بس اعتراضي الوحيد ان مش مشكلة الكلام ده يطلع من بنات...لأن وجهات النظر ملهاش جنس أو تحديد...في رجالة مقتنعين تماما بحرية البنت في اللبس و العيشة زي ماهما عاوزين...وده مش معناه أنهم أنفصلوا عن الرجالة مثلا... فمايمنعش أن يبقى في ستات مثتنعة بمبدأ معين لأنهم شايفينه من عنيهم...حتى او المبدأ ده في ظلم أو تحيز للرجالة

ده اعتراضي الوحيد...ويارب ماكنش ضايقتك أنا بس بقول وجهة نظر

لسة كتاباتك جميلة جدا وبتشدني لحد اخر سطر

صادق

Shimaa Gamal said...

LOL @ daleel mostafa Hosni lel ta7rosh
la foda fooky ya benty.

And I can't see the video, so if there is another link please share it.

As for the ideology, fa no comment.
walahy ma fi 7ad gayeb el setat wara ella el setat nafsohom

Kontiki said...

يا منة افهميها بقى مفيش اطهر ولا اشرف ولا احسن ولا اصدق ولا انضف ولا ادب ولا اكثر ايمان وعفة من الرجل المصرى و اى غلطة او تحرش او اغتصاب او عدم احترام للانثى فى الطريق العام او كل واحد ينصب نفسة القاضى العدل على البنات وهى ماشية وشوف دى لابسة اية وشوف دى صدرها اية وشوف دى بتبص اازاى اة يبقى هم بيعملوا كدا عشان نتحرش بيهم والبنات الغلطانة والرجالة هم اللى صلى الله على ميتنهم وسلم بلا قرف ولما بنات يطلعوا يلكوا رغم ان الفيديوهات معرفتش اشوفها مش موجودة و يدعموا الكلام عادى متستغربيش زى اليمن كدا لما طلعوا المنقبات يتظاهروا عشان حقوق المرأة المسلمة فى الزواج وهى 8 سنوات عشان دى الشريعه بلا قرف مجتمعات عربية تجيب الهم و تقصف العمر ربنا يطلعنا منها .
وحشتينى يا ست :)

Eman Hashim said...

اولا معلهش على موضوع الفيديو بس الخصوصية بتاعت الفيس بوك مانعاه و بحاول الاقيه من مصدر تانى على النت


Mo-ha-med

عندك حق مية فى المية.الرادع جزء كبير من الحل خصوصا للدمغة اللى مش هاتفهم او على ما تفهم تكون عكننت لها على كم ست فى السكة
السبراى الفلفل ده جامد اوى
انا بافكر فيه بجدية. و الامور وصلت معايا انى عشان احتمال انزل بليل شغل اجيب العصاية الكهربة دى كمان
بلا قرف

Eman Hashim said...

انا هاخد تعليق اسماء و ارد بيه على تعليق صادق:
وجهة نظرى فى نفسى انا حرة فيها تماما
انما انى اتهم ضحية بالذنب ... دى مش وجهة نظر ابدا

فى حاجة فى الدنيا اسمها "لبس مستفز"؟ ما هى معايير هذا اللبس المستفز؟
و يعنى ايه مش لايق على بعضه ولا على المكان و الزمان؟ مين اللى حدد الليقان ده؟

اما ان ده رأيها و هى قالته قحقها محفوظ فيه
لكن تتحمل رد فعل كلامها و تمنه لانه كلام فيه قدر كبير من الظلم

Eman Hashim said...

شيماء: اه والله يا بنتى ... حاجة متعبة
انتى فينك صحيح؟ مختفية كده

كونتيكتى :)

انتى وحشتينى اكتر والله
عايزة اشوف بحر اسكندرية بقى

المهم ... صح, انتى كلامك صح. مفيش اطهر و لا اعف من الراجل المصرى فعلا
انا ازاى فكرت فى كده؟ اخس عليا