Thursday, April 14, 2011

كانت حتتفتح دماغى النهاردة


رايحة اشترى الجرنال من محطة مترو حلون,الست تقولى:جنيه و ربع
قلت لها الجرنال مكتوب عليه جنيه
تقولى انا بجيبه بجنيه من واحد بيجيبه م الموزع
قلت لها خلاص هاتيه م الموزع
هو بيجيبهولى من التحرير. منين من التحرير؟ من الميدان. منين من الميدان. ماعرفش بيجيبه منين . طب يا ستى ماتكدبيش بقى, ما تسعى فى رزقك زى كل بياعين الجرايد و تجيبيه من الموزع و بيعيه بتمنه
الناس:دى غلبانة و بترضع عيل,حرام عليكى يعنى ع الربع جنيه
ارد يا جماعة انا على مبدأ انى اجيب الحاجة بتمنها
ماحنا بقالنا 30 سنة بنتسرق جاية دلوقتى تتكلمى؟
شوية و واحد مسكلى طوبة و هى كده و ان كان عاجبك
شاب جاى واخد موقفى اتخانقوا سوا و طلع من تحت الارض 2 جيش,والبياعين اتلموا عليا
عيل بتاع 15 سنة بيدينى ربع جنيه.ابسمت له و قلت انت فاكر انى باتكلم ف الربع جنيه؟
قال لى امال ايه؟ قلت له فى مبدأ انى اشترى الحاجة بتمنها




على فكرة محطة مترو حلوان عبارة عن كارثة فعلا و بقالى فترة باعدى عليها وواخدة بالى و انا شخصيا ساكتة. و بحمل نفسى المسئولية انى حتى باتكلم دلوقتى لما انا كنت مضرورة, رغم انه وضغ غلط شايفاه من الاول

محطة مترو حلوان كارثة

6 comments:

Anonymous said...

اعتقد ان الجيش كان فض البياعين من قدام المحطه النهاردة للمرة التالته وكان فى ظباط واقفين هناك قدام المحطه

Unknown said...

لا الكلام ده مش صحيح
انا باعدى هناك كتير و الوضع كارثة على طول

mahmoud said...

حمدلله عالسلامة..محطة مترو حلوان من زمان وهي مرتع للبلطجة والتهليب وعاملة زي السوق العشوائي ..أنا بكره اروح لواحد صاحبي في حلوان بسببها..بس أحلى حاجة اللي حاول يفتديكي ويدفعلك الربع جنيه..هي دي مجدعة الشعب المصري

Reham said...

يا شيخة حقك مجاش ع الربع جنيه وبعدين دى ست غلبانة كنت اعتبرى بجنيه الجرنال وربع جنيه صدقة ويبقى بثوابه كبرى دماغك المرة الجاية عشان ترتاحى الشعب محتاج 50 ثورة مش واحة بس

KEBLAWYAT said...

موضوع المبدأ ده فعلا مش مفهوم لكثيرين

بس مين اللى مسك الطوبه ده ..

يعنى بياع زميل ؟ ولا حد تبعها ؟ ولا احد الماره اللى تعجب من موقفك الغريب ؟

Anonymous said...

مدونة اكثر من رئع