Tuesday, April 26, 2011

الاتحاد النسائى المصرى مش بتاع نوال السعداوى



نريد أسرة ديموقراطية لا سلطة مطلقة فيها لأى فرد الأب أو الأم أو غيرهما

كلام حلو اوى. مكتوب فى تعريف صفحة على الفيسبوك اسمها الاتحاد النسائى المصرى. بس عليه صورة نوال السعداوى!!! طب يعنى منين مفيش سلطة مطلقة لفرد و منين صورة الاتحاد النسائى هى صورة فرد؟؟ هو اتحاد نوال السعداوى مثلا؟؟

احنا خلصنا من صورة مبارك و مراته فىكل حتة عشان تطلع لنا صور ناس تانية بقى؟؟ مش حتخلص من موضوع تأليه البشر ده؟؟




فين صور المصريات المشاركات فى الثورة؟ زى ما عملت صفحة ائتلاف نساء الثورة؟ فين صور نساءمصر؟ فين صور شهيدات الثورة؟ مش من قلة يعنى!

بعدين ليه نوال السعداوى؟

دلوقتى مفروض اننا على كل خلافاتنا و اختلافاتنا الفكرية و المذهبية متفقين على مصلحة عامة اكبر و هى مصلحة البلد و بنحاول نشتغل سوا للمصلحة دى. و انا واحدة من الناس احب جدا اكون جزء من اى كيان يهدف لانصاف المرأة و مساعدتها فعلا. لكن فى فرق بين انى اشتغل مع حد انا مختلفة معاه, و انى اشتغل فى انى احقق رؤية حد انا مختلفة معاه. لأة بقى!

مضى عهد احتكار الرؤى. و مضى عهد احادية القرار. و مش من المفروض ان كيان بالحجم ده تحتكره ست واحدة و تربطه باسمها. خصوصا اما تشوفوا الصفحة الخاصة باتحاد نساء مصر فى المانيا اللى برضه بيسوق نفسه فى الاعلام الغربى بصور نوال السعدواى. نعم؟؟ نعم يعنى؟؟

لا بقى. انا ست فى البلد و احب ان الاتحاد النسائى المصرى مايكونش بتاع نوال السعداوى. انا ماعرفش هى شخصيا تعرف الموضوع ده ولا هو ناس بتحبها و واخداها مثل اعلى عاملينه. بس معلهش يعنى الحركة دى فى حاجات كتير اوى مرفوضة.

و تانى

الاتحاد النسائى المصرى مش بتاع نوال السعداوى

9 comments:

Emtiaz Zourob said...

والله يا ايمان انا مش عارفة ليش مابحبهاش خالص لله في الله .. أفكارها غريبة عن مجتمعنا .. هي حرة في رأيها وعقليتها لكن هي لا تمثلنا لا من قريب ولا من بعيد ..

دمت بخير

Kem said...

هو بصى يا ايمان انا مع انى مبحبهاش خالص بس شهادة حق اللى عمل الصفحة و هو صديق عزيز عليا اسمه عمر احمد هو اللى عمل البيدج بعد ما اتفق مع نوال السعداوى و حط الصورة بس عشان يبين ان نوال السعداوى من المؤسسين لكن انا برضة مبحبهاش و مش مقتنع ان الستات لازم تتكتل كده انا مقتنع ان حقوق المرأة هترجعلها كامل و مكمل لما حقوق الشعب ترجع

Mecha said...

انا كمشروع مرأة في طور التكوين... مش بحب نوال السعداوي نهائيا و ارائها مرفوضة بالنسبة لي... و ان تكن هي احدى الؤسسات للاتحاد يظل السؤال اشمعنى هي اللي صورتها ترفع كرمز للتعريف؟؟
لو المؤسس كان عايز يبين انها جزء من الكيان ببساطة يكتب ده في تعريف الصفحة. مش على راسها ريشة و لا هي بتمثلني الحقيقة.
ايوة انابرضه بقول
"الاتحاد النسائى المصرى مش بتاع نوال السعداوى"

Unknown said...

وجع البنفسج

لو على قد انها مختلفة و كلنا بنشتغل سوا ماشى
بس ما تمثلناش
و على فكرة حتى لو اى ست, فما بالك بيها

اغانى الشتاء:
الفكرة انى مقتنعة بالتكتل خصوصا دلوقتى
و حقوق الست مهدورة بشكل عام للأسف اكتر من الراجل بكتير
الراجل حقوقه كمواطن مهدورة
الست حقوقها الانسانية عشان ست متاخدة بالاضافة لانها مش مواطن اصلا عشان يبقى له حقوق

Unknown said...

ميكا

تعريف الصفحة. مش على راسها ريشة و لا هي بتمثلني الحقيقة.

بالضبط كده. انتى بمنتهى اللباقة لخصتيها كويس اوى

Kem said...

طيب ما عندك الشباب حقهم مهدر عارفة خصوصا اللى فى سن المراهقة زى حالاتى و الاطفال عموما ماهو الراجل بيظلم الست عشان شايفها اضعف منه و الام مبتسمعش ابنها عشان شايفة ان هى الكبيرة و انه ميقدرش يقول لأ و هكذا انا شايف ان الحل ان لما الشعب عموما ياخد حقوقه و يتخلص من العقد كله هيبقى تمااااااام

Sally Alhak said...

Sally Alhak:
ايمان, أنا بشتغل فى الأتحاد النسائى المصرى الى أحنا لسة بنحاول نأسسة و نرجعلة الحياة تانى فى مصر زى ما هدى الشعراوى أسستة و عملت شغل هايل , أحنا مش بنحاول نعمل نوال السعداوى الرمز و هكذا, كل الحكاية أن د.نوال السعداوى هى صاحبة الفكرة و هى أم روحية لينا , و زى ما أتكلمنا عنها فى صفحة الأتحاد, أتكلمنا عن كتاب نسويات من النراث و من المعاصرين و عن مدونين نسويات شباب و عن الشهداء!

Anonymous said...

الحقيقة أن اللذي وضع هذه الصورة هو أحد الأدمنز و قد قمنا بوضع صور نساء أخريات من فترة بعيدة و يمكنكم التأكد بالانفسكم. الحقيقة و بعد الثورة أكتشفنا كلنا أننا سطحيين يعني أنا مثلا مش ممكن اقول ما بحبش الاخوان المسلمين و اسكت و يعني ايه ما بحبش الاخوان المسلمين هما مش مستنيين حبي لهم لكن ممكن اقول لا أقبل فكر الاخوان المسلمين فيما يخص المرأة و ذلك للاسباب 1، 2، 3

أشطر حاجة نجح فيها النظام السابق هو تشويه سمعة الناس اللذين لم يرضخوا له و هذا أحد الاسباب التي تدعوا الي معرفة د. نوال عن طريق كتباتها و التفكير فيما تريد ان توصله.

الرسول عليه الصلاة و السلام قال اطلبوا العلم حتي لو في الصين التي كانت أن ذاك ملحدة و ابن رشد و هو ايضا هاجمه الكثيرون عندما سؤل عن فلسفة اليونان قال أخذ ما يتفق مع شريعتي و اترك ما لا يتفق معها...

و محمد عبدة ذكر ان سبب انهيار الحضارة الاسلامية هو الجمود الفكري و ليس اي شئ اخر و هناك فيديو يشرح متي انهارت الحضارة http://www.youtube.com/watch?v=noHbcmfoYHg&feature=player_embedded

Anonymous said...

الاتحاد النسائي مش بتاع نوال لكن بتاع اي ست عايزة تناضل من اجل المساواه و الي مش عايز حر ارجو انكم تشاركوا بارائكم في هذا الاستبيان
https://docs.google.com/spreadsheet/viewform?formkey=dF9oZjdKbUlhX1MxSEdhYzJYbS1QdGc6MQ