Saturday, July 2, 2011

مطلوب مصرى -- مش مطلوب زعيم


كانت ممكن تكون هايلة لولا:

1-
الكلمات مش دايما واضحة
2-
مفيش ستات فى الكليب غير بنتين فى آخر لقطة
3-
مرفوض "مطلوب دكر" دى
هو احنا مش هبطل الغلطات دى بقى؟ بعدين هى ليه الفرق اللى من النوع ده, لازم تغنى بنبرة الصوت دى؟ زى ما يكون فى هوا فى التسجيل. ليه مش بيغنوا بصوتهم عادى؟ و ليه بيحصل كتير انه يكون صعب الواحد يفهم بيقولوا ايه؟

و ليه اللى بيغنى فى الكليب مبوز و بيلعب فى مناخيره كل شوية؟


ثم ان والله نفس اللى قلناه فى كليب صوت الحرية برضه اما طلعوا بنت فى آخر الكليب و بنت فى نصه ... يا جماعة والله البلد دى فيها ستات. موجودين فعلا يعنى. و كمان موجودين – و مؤثرين – فى الثورة.
انتوا يعنى مش واخدين بالكم منهم عشان بتغضوا البصر؟ كتر خيركم برضه

غير ان كفاية بقى علينا فكر الزعامة و الريادة و الكبس ع الانفاس ده. احنا عايزين مصرى يستوظف رئيس جمهورية لمدة 4 سنين و احتمال نجدد له العقد بتاعه. بس كده
لا زعيم ولا قائد
ارحمونا بقى من اللى انتوا عاملينه ده. محسسنى ان البلد لو كل حاجة فيها زى ما هى بس عندنا ريس خلاص مش مشكلة. عاملين زى المتطلقة المجنونة اللى ماشية مهروشة فى الشارع هتموت و تجيب اى راجل تروح بيه للجيران. يعنى انا بقالى 4 سنين بكتب للستات ماتبقاش كده, يقوم الشعب كله رجالة و ستات يتعدى؟؟ نصيبة ايه دى يا ربى!!
 
و اكيد مش "دكر" ... ايه التعبير المستفز ده؟؟  ما تقولوا مطلوب بلطجى احسن. اهه ع الاقل بلطجى دلوقتى بقيت كول و بنحب نقولها على نفسنا.
يعنى عنصرية و سماجة كمان؟
يع يعنى!!


الرحمة يا رب من فرق "عايشين دور الاجانب" دول

و آدى لينك الفيديو من الفيسبوك عشان اتشال من اليوتيوب 


https://www.facebook.com/video/video.php?v=237250099636094




6 comments:

Noha Saleh said...

حاولت اشغل الفيديو عندك ماشتغلش
دورت عليه فى اليوتيوب كمان مش موجود

Unknown said...

عدلتها اهه
حطيت لينك من الفيسبوك

Kem said...

بصى اولا صوت الحرية كان فيه بنات كتير
مش كان فى اورطة مزز ماسكين يافطة طويلة مكتوب عليها فى كل شارع فى بلادى صوت الحرية بينادى ؟؟
اتفق على الاعتراض على زعيم دى بس ممكن اصلا يكونوا مش عارفيين يعنى ايه زعيم , انتى عارفة بقى ثقافتكم بلبيسى :)
انا كمان بستغرب ليه بيغنوا كده :)))
انا عجبتنى صوت الحرية اوى لكن دى لحنها بس هو اللى حلو
تصدقى ممكن اكتب اغنية مطلوب موظف :))
انا اكرم النجدى على تويتر لو مش عارفة ان ده انا لحد دلوقتى :))

Unknown said...

ههههههههههههههههههههههههههههههههههه
والله انت سكر

لولا انك استخدمت لفظ انا مش بحبه اوى
بس دمك سكر والله

ماعرفش العالم دى بتعيش الدور ليه كده
ما يغنوا عادى

Kem said...

انا بقوله لاختي و احيانا لماما عادي :(()))

Unknown said...

هههههههههههههه