Monday, October 24, 2011

مصابى الثورة - نقلا عن فاطمة عابد

الموضوع منقول من عند فاطمة عابد, و حبيت انقله لأهميته القصوى
يا ريت اللى يقدر يعمل اى حاجة يعملها



 
تحديث :
تقريبا قدرنا نوفر كل كمية الدواء المطلوبة .. هنروح يوم الاربع الساعة 12 الضهر مركز تأهيل القوات المسلحة بالعجوزة خلف مستشفى العجوزة عشان نزور المصابين ونسلم المستشفى الدوا اللي جبناه ..لو في أطباء يحبوا يجوا معانا يتطلعوا على حالة المصابين يكون عظيم.. اشوفكم كلكم هناك :) اشكركم جدا جميعا بجد

بدون مقدمات عاطفية وهدخل في الموضوع على طول
مصابي الثورة احنا مقصرين في حقهم بدرجة كبيرة جدا الا قلة قليلة لسه بتسأل عليهم وبتشوف احتياجاتهم وبتدور عليهم على قد ما يقدروا
كان نفسي مانحتاجش نعمل مبادرة او نستنى مبادرة وكل واحد فينا من نفسه كان يخصص نص ساعة كل اسبوعين لمصاب من مصابي الثورة ..بس واضح ان الدنيا تلاهي والمشاكل كتير والناس مشغولة في حاجات لا تقل اهمية عن الموضوع دا
انا بشكل شخصي مش شايفة ان ليا دور في الفترة القادمة وموضوع الانتخابات اللي داخلين عليه ..وبما اني فاضية نسبيا دلوقتي فمش شايفة حاجة اهم من مصابي الثورة
في مركز تأهيل العجوزة ..دا مركز تأهيل تابع للقوات المسلحة خلف مستشفى العجوزة .في مركز التأهيل دا في 10 من مصابي الثورة المصابين بشلل بدرجات مختلفة
بيتعاجلوا على نفقة القوات المسلحة في الحقيقة بس في استشاري مهم زارهم من فترة ووصى بدوا اسمه cerebrolysin
الدوا دا بيعمل حاجة اسمها nerve regeneration
وبيفرق جدا جدا في حالة المريض
في ناس تبرعت بعدد من علب الدوا قبل كدا وبعد شهرين من العلاج حصل الاتي :
محمد سمير بدأ يحرك رجليه
تامر بدأ يمشي على عكاز
محمد ربيع داخل يعمل عملية قريبا وفرصه في الشفا ارتفعت جدا بسبب الدوا
رندا ابتدت تتحرك
رشا ابتدت تحس برجلها
الموضوع ايه بقى..ان المستشفى لا تتكفل بتمن الدوا وخارج ميزانية العلاج المخصصة .اعتقد معتبرينه دوا رفاهية مادام هما بيعملوا العمليات اللازمة وبيعملولهم التأهيل
الدوا تكلفته مرتفعة جدا ..زي ما قلنا هم 10 مصابين..كورس العلاج 8 اسابيع ..كل مريض بيحتاج 6 علب في الاسبوع وعلبة الدوا ب 150 جنيه ..اعملوا انتو الحسبة :)
عندي امل نقدر نوفرلهم علب الدوا ..احنا مش قليليين لو كل مجموعة اشتركت في علبة واحدة اعتقد اننا هنقدر
المجموع 480 علبة بس بسببهم ممكن ناس مش قادرة تمشي تقدر ترجع طبيعية
العلب نقدر نسلمها في ادارة المستشفى ..عند مدام اميرة مديرة مكتب مدير المستشفى دكتور رضا ويتم تبليغهم ان دا لمصابي الثورة
الاهم بقى من دا كله ..مصابي الثورة بيسألوا ..هو الناس فين !ماحدش بيزورنا ليه!



No comments: