Tuesday, February 16, 2010

موبايل ... بيضة ... و مخدة



عارفين الفيديو ده؟
انا عارفة انه قديم. بس شباب التويتر الله يسامحهم بقى فكرونى بيه تانى, بعد ما قضوا يوم كامل بيتكلموا عنه و نقلوا العدوى للفيس بوك. كان لازم اشوفه تانى و اتنكد بيه تانى.
طيب واحدة واحدة كده ... هو مستفز على كذا مستوى. مش بس عشان المعنى المقصود المباشر و الدعوى لهيئة الأمر بالمعروف و النهى عن المنكر, لأة ... هو مستفز بالرموز اللى استخدمها. ابطال الاعلان ده تلاتة:
موبايل ... و بيضة ... و مخدة (او مخدات)
الموبايل – رمز المعاكس الشرير بتاع الغاب طويل الناب
البيضة – عفاف الفتاة الهشة الرفهيفة
المخدة (او مخدات) – هيئة الأمر بالمعروف و النهى عن المنكر. ممكن كمان يكون قصدهم المخدة الحمرة نهى عن المنكر و البيضة امر بالمعروف! (باهزر)

المهم ...
- عفاف الفتاة الهش الرقيق ده بجد يغيظ. لان النتيجة الوحيدة للمنظر ده هو التعامل معاهه من هذا المنطلق, كائن اقرب ما يكون للخطأ و القيم داخله (كالفضيلة و العفة) هى اشياء قابلة للكسر, لازم نحسس عليها لا تقع تنكسر ميت حتة بشكل لا يمكن اصلاحه بعد كده.
- الموبايل اللى اصبح رمز لكل ما يمكن يحطم عفاف البنوتة الغلبانة الضعيفة و شرفها الرقيق.

اولا هو مش الراجل كمان عنده عفاف و فضيلة؟ هو مش فى ستات بتعاكس؟ ثانيا مين اللى قال ان العفاف كقيمة منفصلة بذاتها؟ العفاف مرتبط بمفاهيم كتير تانية و بالتالى هو اعمق من انه يترمز له بالشكل ده. لانه مش بس بيقلل من قيمته لكن كمان بيسطحه.
كان ممكن يكتبوا فوق البيضة (العفاف) بشكل عام. و فوق الموبايل (المعاكسة) برضه بشكل عام. على الأقل عشان يكون فى انصاف.
بس للأسف الانصاف مش هو الهدف. الهدف هو تأصيل كل فكرة اخلت الراجل من المسئولية فى الخطأ و تحميله بالكامل للست. و الهدف التانى هو التأكيد على فكرة التعامل مع الأنثى طول حياتها كقاصر لو سيبناها بوحدها حاتبهدل الدنيا, و محتاج وصى دايما تعرف تعيش متزنة. و الهدف التالت هو غرس عدم السماحة و الغاء مساحة حق البشر فى الخطأ و التجربة و تحمل مسئولية الاخكاء و التعلم منها.
هى مفيش عندها مخ يفسر الصح من الغلط ... لأ.
هى اضعف و اجهل من انها تعرف الغلط و تقول له لأ.
هى ( و بس هى ) لو سيبناها لنفسها من غير (مخدات) هاتنزل على الأرض تتفشفش ميت حتة.
- و المعاكس (حسب الاعلان) ده عادى جدا! مفيش اى ريحة عتاب عليه. مفيش اى فكرة عن محاولة او الرغبة فى ردعه. طب لو الحكاية بالرمزية دى, ليه مايكونش فى شاكوش مكتوب عليه هيئة الأمر و النهى دى و يقوم الشاكوش نازل على الموبايل مكسره؟ كنت هاعترض برضه, بس على حاجة تانية خالص. بس على الأقل كان الاعلان بقى منصف و متسق. انما كده مش معقول ... الراجل ده عادى, يعاكس يعمل اللى يعمله, راجل بقى , براحته.
انما الرك على الست هى اللى تقول لأ... فى مصر بيقولوا هى اللى شجعته. و فى السعودية بيقولوا كانت لازم تسمع كلام الهيئة!

آخر و اهم حاجة فكرة المخدات. سؤال:
هل الأمر بالمعروف و النهى عن المنكر هم فقط الاساليب المتاحة للانسان عشان يكون عنده اى فضيلة و يحافظ عليها؟
هل وظيفة الآمر و الناهى (فقط) هى حماية المجنى عليه – بحبسه – من غير لو و عتاب الجانى؟
هو انا مش ضد فكرة القوانين و تفعيلها كأسلوب مدنى للحفاظ على حقوق البشر و السيطرة. لكد انا ضد الترهيب و الارهاب الفكرى اللى بيخللى الانسان عايش شكله صح بس زى الحافظ و مش فاهم, هو مش بيقول للغلط لأ عشان عارف و مقتنع انه غلط, لأ ... عشان خايف من العقاب (بس). ده مع العلم ان دايما هايكون فى ناس ده الحل الوحيد معاهم. و هم على كل القوانين دى و برضه مبهدلين الدنيا.

هى بس ان شوية ناس يلموا بعض باى شكل للمة دى و يقرروا يتعاملوا مع النس من منطلق (بابا و ماما), من حقهم تمام تحديد مساحة الصح و الغلط.
و عادى يفرقوا بين العيال
و عادى يحددوا كل موقف و التعامل ماه على حسب تقديرهم هم الشخصى
و عادى ان يكون رد الفعل الوحيد معاهم هو كلمة واحدة ... حاضر

بصوا ... هو اعلان مقرف كله على بعضه من الآخر كده. ايه العك الأزلى ده؟

15 comments:

Zezo said...

قال يعني الاعلان ده هوا اللي هيعدل المايلة بعدين لو المنطق ان البنت زي البيضة تتكسر ومترجعش تاني يبقا كل واحده مطلقة او ارملة تتعمل اومليت ياعالم يااوملييييييييييييت

Unknown said...

مانا مش فاهمة فعلا. حاجة تفقع المرارة بجد

mohamed said...

الفكرة ان التكنولوجيا هتطلع البنات من الصندوق اللي حابسنها فيه ..فبيحلوا انهم يرعبوها ويلغوا نتيجة الانفتاح دا

Unknown said...

طب و الانفتاح ده مش هايضر الراجل بنفس الطريقة؟ ولا هو كائن محصن؟ و لا هو فوق الغلط؟
بعدين تانى ... هى الست هاتفضل تتعامل العمر كله زى القاصر اللى محتاجة حد يحميها من شرور المجتمع الخارجى؟

Kontiki said...

ازيك يا منة
والله لما شفت الاعلان قلت كلمة من 3 حروف
بصى هو اصلا وجود هيئة للامر بالمعروف و النهى عن المنكر شىء لا انسانى الفضائل بتتربى بالحرية جوة الاسرة و المجتمع الانسان يعمل الصح لذاتة و بيتجنب الشر لان من جواة اتربى ان دة غلط منافى للقيم السليمة انما لما البشر يتربوا على الخوف من هيئة و جلاديها يخافوا من انسان تانى ذو سلطة و الله اعلم قد يكون هذا الانسان المعين حامى حمى الخلق انسان فاسد يبقى الوضع غلط ولا انسانى
عموما انا بتكلم على مستوى هيئة الامر بالمعروف فى السعودية
واللى حاولوا يطبقوة هنا فى مصر لما الداخلية تنزلت ناس رمضان اللى فات تلم الفاطرين طبعا وانت ست العارفين واضح تاثير مشايخ الفضائيات على المجتمع اية
اما الموبايل وعلاقتة بانسان الغاب فيسعدنى و يشرفنى انى ازف لك هذا الخبر السعيد انه تم بحمد الله خطبة انسة زميلة فى العمل منقبة حيث وجد الخاطب ان هذه الانسة تكتمل فيها صفات العفاف حيث انها لا تملك موبايل ولم ولن تمتلك موبايل فى حياتها الا عن طريقة حيث تم تسجيل نمرتة هو فقط علية ( على يدىىى ) وكمان ابوها رجل حمش لا يملك جهاز تليفزيون فى بيتهم وكذلك الفتاة تحفظ اناشيد اسلامية وتجيد البامية
:)
اصبرى بس على مجتمعنا كمان 3 سنين بالكتير وانتى ختلاقى مندوبين الهيئة على كل باب وفى جيب كل واحد صك من شيخ انه مسلم فاضل على خلق
تقبلى مرورى يا صديقتى
:)

Unknown said...

الفكرة مش فى شكل اللى بيقول الكلام يا بنوتة. الفكرة فى المعنى اللى متأصل من زمان

يخرب بيت كده
انا اكتر حاجة مدايقانى التعامل المستمر مع الراجل على انه كائن غلطه قشطة و احنا اللى لازم تتخذ معانا كل الاجراءات اللازمة

ابو كده يعنى

مصرية said...

يا بنتي الراجل ده كائن ملائكي لا يخطيء أبداً!

mohamed said...

فكرتني بمقولة للكاتبة كريمة كمال
كانت بتقول أن لو البنت بقت مسئولة عن حماية نفسها هتعرف ازاي تحميها وتحافظ عليها .. أنما طول ما المجتمع بيحط قيود عليها تحت مسمى الحماية وأن الحفاظ عليها مسئولية الأخرين هي هتعرف ازاي تهرب من القيود دي وتعمل اللي هي عايزاه

AHMED SAMIR said...

هههههههههههه
على الرغم اني راجل فيسبكاوي و تويتراوي قديم الا اني بأشوف الفيديو دة للمرة الاولى
بس بجد
لا تعليق

Unknown said...

مصرية:
طبعا يا بنتى . بس ماتقوليش كده كتير احسن هايفتكوكى بقى غيرانة منهم و حاقدة عليهم
هههههههههههههههههه

Mohamed:
هايلة المقولة اللى انت مختارها دى
و حقيقى معبرة جدا عن الموقف اللى احنا فيه
و انا مبسوطة ان فى رجالة قبل الستات مقتنعين و مؤمنين بالكلام ده

Unknown said...

Ahmed Samir:

مش كده برضه؟ ماهى الحاجات دى بتلاقيها طلعت فى يوم مالوش ملامح كده
على بختى و بختكوا بقى كنت موجودة على النت
هههههههههههه

AyA said...

بغض النظر عن فكرة الهيئة أو ماتمثله الهيئة او افكار الهيئة.... الفيديو في حد ذاته كده متخلف
!!!!!!!!!!!!!!!!!!!!

يعني ماشي احميها ووعيها وكل حاجة, وبرضه تفهم البهيم التاني ان مخه ده مش عشان يملا فراغ جمجمته وخلاص لا ليه لازمة برضه, بس مايقولش ان لو حبت مرة او اتجوزت يبقى خلاص البيضة اتكسرت!!!
:D :D :D :D :D :D :D :D
سيبكي انت :-) ربنا يهدي الجميع


أحكيلك حاجة تحرق دمك؟ بكمالة الهم بقى
:D :D :D :D :D
كان حد كاتب في موقع أو مدونة من كام يوم, بيحكي عن واحدة بتوعي بناتها انهم مايدوش قلبهم لحد أبدا حتى لو كان زوجها, لغاية ما تتأكد !!!!

نو كومنت

Unknown said...

الاهلم يا اية ... قال ازاى الواحدة تتأكد؟ و لا سابنا كده فى اثارة؟
بلا وكسة

AyA said...

:D :D :D :D :D :D :D :D :D :D :D

لا لو سمحتي يا ايمي, فيه طريقة تتأكد بيها بس هبقى أقولهالك بعدين
:D :D :D :D :D :D :D :D

هما متوقعين ان مثلا هيبقى فيه بادج في خد العريس مولود بيه مثلا مكتوب عليه اسم بنتهم ؟!!!!!!!! يعني فعلا لا البنت هتعرف الغيب كمستقبل ولا هتعرف الغيب انها تقرا افكاره ولا هتعرف حتى مستقبلها هي وهل مشاعرها أو حتى صفاتها هتتغير بعد كده ولا لا!.. يعني مثلا الخطوبة معمولة علشان الاتنين يتعرفوا على بعض ويشوفوا هينفعوا مع بعض ولا لا, والله نفعوا كويس مانفعوش يغور! لكن بمنطقهم يقولك دي اتحسبت علاقة طب الصح من وجهة نظر سعادتك ايه؟ مايردش رد ليه معنى!, يعني هل الحل انها ماتتخطبش قبل ما تعرف الغيب اللي هي عمرها ماهتعرفه! ولا ماتتعرفش على اللي هتتجوزه, ونعمل جواز كده خبط لزق واياكش تولع؟ ولا نعمل خطوبة ويتعرفوا على بعض ولو نفع نفع مانفعش يتجوزها يومين وبعدين يتطلقوا واهي كده تبقى اتجوزت مثلا؟

الاجانب بيعملوا فترة "موف ان" قبل الزواج عشان يتأكدوا انهم هيستحملوا العيشة مع بعض!!! احنا مابنطالبش بكده طبعا بس بنقول ربنا عرفوه بالعقل سيبوهم يتكلموا سيبوهم يعرفوا بعض.....

بلا وجع دماغ على رأيك :-) أماأروح أتفرج على ستار أكاديمي لحسن منسوب التفاهة عندي انخفض بعد قلبة الدماغ دي
:D :D :D :D :D :D :D :D

Unknown said...

ستار اكاديمى؟؟؟؟
يا خبر اسود ... هى حصلت؟ لا انا كده قلقت عليكى بجد

طب اما ترجعى لينا كلام سوا. و عايزياكى تبى تقرى البوست اللى بعد ده بتاع الست القاضية
عشان الموضوع ده شكله مش حايهمد اصلا