Thursday, October 28, 2010

اهلا يا شقيقة

طلع ليا قرينة لبنانية. اسمها ياسمين على. و زى ما ليا يوميات العانس الحقود, هي عزباء في صور.
هع هع هع ... ربنا يزيد و يبارك. فكوا من العناوين و اقروا الكلام, اللى عاجبنى هو الفكرة, الفكرة اللى دافعت (و بدافع)عنها دايما. الجواز من احلى الحاجات في الدنيا و حلال ربنا, بس اما يبقى جواز عدل و مناسب, مش يبقى عشان ماينفعش غير كده, و عشان الواحدة تلاقى عدلها (زى ما تكون هي مايلة أصلا) و لا عشان أحسن ما تبقى عانس!

“المشكل إنو ما عم بيشوفوني إلّا كـ“غير متزوجة“، هويتي مختصرة بهل كلمتان. كل شي معقول يكون إنسان، كل التنوع اللي ممكن يكون في, مش مهم و أصلا ما همهن يشوفو”. أنا لست من هنا ويحكمون عليّ… أتصور ما يمكن أن يكون وضع النساء غير المتزوجات اللواتي ينتمين إلى هذه المنطقة.

ههههههههههه. معلهش يا بنتى. بتحصل فى احسن البلاد .
نقول ايه؟ نصيب. نصيبنا نسمع الكلام العجي ده!

ده حتى سواقين التاكسى بيسألونى مش متجوزة ليه !!! اه والله
لأ ولا اللى تعمل نفسها ناصحة و بتراعى مشاعرى و تقول لى "اكيد انتى اللى بترفضى اللى بيجولك و اهلك و بيطلبوا كتير" و مفيش مانع من "مع انك قمر و عسل والله -بنظرة بجد صعبانة عليا)"
عادى عادى ... انا بقيت عادى على فكرة, الكلام ده جرعة كوميدية يومية


وحشتني العانس الحقود والله و انا باقرا كلام ياسمين. أهلا بياسمين و بكل ست مفتحة عينيها و مخها.

8 comments:

على باب الله said...

في حاجة واحدة مش ممكن نختلف عليها و هي أن سواقين التاكسي بيسألوكي مش متجوزة ليه لأن قلبهم عليكي

Kontiki said...

cool gedan
new member @ Z club :)

Kontiki said...

المشكلة فى الرجالة اللى ندل و اللى لا مؤاخذة انتى فاهمة و اللى تحبية يديكى الطرشة و يعمل مش فاهم حاجة بت ميتين كلب :D

آخر أيام الخريف said...

ثقافة المجتمع ككل محتاجة تتغير مش الرجالة بس ولا الستات بس

Unknown said...

على باب الله:
قلبهم علىا على اساس ايه بس؟ انا الفضول و انهم بياخدوا بالهم هو اللى انا مستغرباه

Unknown said...

كونتيكتى:

حبيبتى انتى يا فاهمانى بالاوى
بس شوفتى ياسمين؟ فرحانة بيها اوى انا
ههههههههههههههههههه

اخر ايام الخريف: طبعا المجتمع كله مش الرجالة بس, و الكلام فعلا كان على الاتنين

Unknown said...

أولا
أحب أعلق على كلمة عانس كلمة صعبة و مفيهاش أي نوع من مراعاة المشاعر
ثانيا
هوا فيه فكرة ممكن تكون غلط في تفكير مجتمع كامل أنا كراجل ممكن تكون فيه حاجات كتيرة في الحياة أخدتني من غير التفكير في موضوع الجواز و بعد كده لاقيت نفسي وحيد فمعنى كده إن أنا عانس ممكن يكون كان إهتمامي أناني كتير بس كنت بعمل كل ده عشان مستقبل أفضل و لما فكرت أتجوز كانت المشكلة سنك كبير طيب ما هو لو مفكرتش في المستقبل الأفضل كانت المشكلة هتبقى معيش أي حاجة للجواز حليت مشكلة بمشكلة تانية مكانتش في الحسبان خالص و برضه المجتمع يبصلي بنظرة مرتحلهاش ده غير طبعا كلام يجرح كتير

Unknown said...

اولا انا خلفت بكل الملل انى باتريق على الكلمة مش باقولها بجد
فى واحدة فى الدنيا هاتبقى مقتنعة بالكلمة و تقولها على نفسها بالذمة؟؟

و انا معاك طبعا ان مجتمعنا مفترى فى البص على الغير متزوجين
بس ده نظرا لان المتجوزين تقريبا من كتر النكد اللى هم فيه بيحقدوا علينا اننا مش بؤساء زيهم
اه والله باتكلم جد