Sunday, March 6, 2011

من داخل مبنى مباحث امن الدولة


سلامات يا مصريين

امبارح كان من اسعد أيام حياتنا فعلا. ألف مبروك للكل

امبارح تم الحمد لله سقوط مبنى مباحث امن الدولة بمدينة نصر – عاصمة جهنم بالشرق الأوسط – و هحط لكم لينك الصور و الفيديو لما دخلت القاهرة اليوم. 

اليوم ده كنت ايحة انا و محمد المصرى و ليليان وجدى نجيب اكل لبقية الناس, و يادوب رجعنا كان الاقتحام بدأ, اديت اكياس الاكل لست ماعرفهاش قدامى و زعقت لها و انا بجرى بنمرة موبايلى عشان تخليه معاها. و احنا جوا كلمتنى و اخدت نمرة امينة زكى صاحبتنا عشان تاخده منها, قبل ما تمشى اديت الاكل لست تانية اللى اديته لراجل تانى. الراجل ده بقى بيكلم امينة يقول لها "ايوة يا مدام, انا معايا الاكل اللى انتى جايباه لبنتك اللى فى امن الدولة" هههههههههههههه
النهاردة الضهر, لقيت الست اللى اديتها الاكل بتطمن عليا انا و صحابى. يا جماعة البلد بجد بقيت حلوة اوى, انا حقيقى فرحانة فرحة مش طبيعية. الحمد لله يا رب يا كبير يا كريم اوى.



و على فكرة, انا باقترح ان المكان ده يتحول الى بيت شباب للشباب و المدونين و النشطاء. و يبقى مركز لمؤتمرات حقوق الانسان و حرية الرأى و التعبير كلها. نياهاع هاع هاع هاع


ده لينك البوم الصور

و ده لينك الفيديو:




تحديث: شكرا طارق عمرو


الله يخرب بيوتكم

6 comments:

AyA said...

ملفات الكنايس وملفات للمدونين !!!... ده مش امن دولة ده دولة كاملة لوحده بتتجسس علينا !!! ده جهاز قمع الدولة!!... انا حتى لاحظت ان عددهم قل على النت واللي بيشتمو قلو كتير وبعدين لاقيت وائل غنيم كاتب نفس الكلام في تويتر!!!.... السؤال بقى, هما ليه قررو يحرقو ويفرمو كل الورق ده اول ما سيادة الشفيق مشي؟

ربنا يحميكي لمصر ياايمي ^_^ انت وكل الشباب اللي شارك في الثورة دي

Nesrine said...

Emoz..can I share it??

Eman Hashim said...

طبعا
يا ريت يا نسرين لو سمحتى

Eman Hashim said...

اية
هم بقى اسمهم جهاز قمل الدولة
اما نشوف اخرتها فى الموضوع ده ايه
احنا مستنيين قرار وزير الداخلية بحله يا رب ان شاء الله

hima said...

كل يوم اسمع حاجات غريبة
مش عارف كنا عايشين ازاي
وهانقدر نتخلص من الورم ده أزاي

Eman Hashim said...

اما نتخلص من الجهل يا هيما
مالهاش حل تانى