خبر اللهم اجعله خير, سمعت من فترة عن ما يسمى بالادب البناتى. و قعدت يا ربى اقول يعنى انا منهم ولا انا ادب عوانيسى وبعد ما ربنا يصلح لى حالى هابقى ادب ستاتى ولا هايجرى لى ايه! بس عادى ما حطيتش فى دماغى ... اكتر من كده و ربنا بيزيح ... هم بس يبقى يبصوا على بطاقة الانثى و يحددوا بقى (بناتى – عوانيسى – مطلقاتى – ستاتى )
المهم
شفت لقاء ل2 من نجمات المجال ده.
هو بس اولا الاستاذة رحاب وضحت ان الاصل فى الموضوع انه "ادب نسوى" و ان دى حدوتة جديدة, بس انا ماعرفش هم 15 بنت صغيرين يعنى نزلوا كتب؟ 15 دى جات منين؟
مش اشكال ...لحد اما جينا عند الدقيقة 3.35 و هنا الزعل بقى
بنات مين اللى (بيستفزوا) انهى رجالة عشان تتكلم؟ يعنى ايه بقى ؟؟ لا افهم. و المذيعة يا عينى تحاول تقول و عينيها نفسها تقول "هو احنا ناقصين كمان الستات تقول كده" .. يييييييى البنات البنات!!
طب معلهش بقى. مالكاتبة نفسها لابسة احمر نارى , مافى رجالة ممكن تشوف "مستفز" كفاية للمعاكسة؟ و حسب دليل مصطفى حسنى لكيف تكون متحرشا, الكمام كانت ماسكة على الدراع كمان.
و ايه مش لايق على بعضه دى؟ يعنى انتى اللى هاتحددى لايق ازاى؟ انا واحدة بحب البنفسجى بجنان .. و بلبسه مع كل الالوان .. آه, باطقم بنفسجى مع اسود و ابيض و احمر و اصفر و اخضر كمان ... و بيبقى لايق عليا و بابقى مبسوطة ... لو حد مش شايفه لايق من حقه يعاكسنى عشان استفزيته؟
و ايه موضوع الجامعة معروف لها لبس ده؟ فى واحدة ممكن تلبس الجينز و واحد يعتبر ده قمة الفجور. و فى واحد تانى اى واحدة مش محجبة هى دعوة للمس و واحد تانى شايف ان المحجبة لو مش لابسة حجاب صحيح ممكن يبقى استفزازها اكتر من الغير محجبة. و فى انسان شايف ان المنتقبة اللى لابسة عباية مخبياها دى قمة الاثارة و الساسبنس!
ثم ان والله العظيم فى ناس مش مسلمة فى الدنيا ... نعمل فيهم ايه دول؟
احنا مش هانخلص بقى من عقدة الذنب و معاملة الرجالة على انها كائنات لا حول لها و لا قوة دى؟ لا يا ستى ... فى حاجة اسمها ضبط النفس, و احترام الناس, و احترام الاختلافات, و الاذواق.
ماهم بيسافروا فى كل حتة و بيشوف الستات على كل شكل و مش بيستجرى يقول لواحدة كلمة و لا يبرق فى مش عارف ايه بتاعها.
و بمناسبة برا, ايه موضوع التحرش و الاغتصاب بيحصل فى كل حتة ده؟ نظلم بتحصل فى احسن العائلات يعنى؟؟
يعنى لو الستات فى نيبال اما بيركبوا مواصلات الرجالة بيمدوا ايديهم على ركبهم يبقى خلاص المصريين عادى؟
المتحرش مذنب لانه التحرش ذنب, و انا مش مفروض امشى حسب مفهوم اى حد عن الزى المناسب للمكان و الزمان غير نفسى. المجتمع اللى فيه عشرات الملايين من الناس عمره ما هايتفق على حاجة و احنا عارفين كده كويس.
انا اللى مدايقنى فى كل ده انه كلام من بنات. لو رجالة عادى, مانا باسمعه منهم كل يوم, انما اما البنات تقوله يبقى فى حاجة مش تمام.
و اما ييجى من كاتبة اول كتاب ليها عن ظاهرة التحرش يبقى فى ازمة. انا نفسى الموضوع يبقى بعيد عن الشخصنة, انا حطيت الفيديو عشان يبان كلامى رد على مين لانى بارد على الكلام ده بالذات مش الشخص.