Showing posts with label سينما. Show all posts
Showing posts with label سينما. Show all posts

Sunday, November 21, 2010

بلبل حيران ... النخلة اطول ولا القطر اوسع؟

من كم يوم فى العيد, و زى اى مواطن مصرى اصيل, رحت السينما. فيلم "بلبل حيران"
رحت الفيلم عشان كنت مكتئبة جدا و مخنوقة, و تقريبا رحت غصم و اقتدار من اختى ... المهم انى ماعنديش مشكلة اروح فيلم لاحمد حلمى, بالعكس, انا بقيت باحترمه جدا.
افلام آسف على الازعاج و كده رضا و الف مبروك افلام حلوة اوى و عجبتنى جدا. عسل اسود خالص نهائى, بس ده مش موضوعنا.
المهم دخلنا الفيلم فى سيتى ستارز, و زى كل سينمات مصر فى العيد, السينما عبارة عن ملاهى و عيال بتزن و بيلعبوا استغماية. كان فى طفلة جنب اختى ما سكتتش 5 دقايق على بعض اما كان فى لحظة كنت هامسكها انط فى كرشها بس اختى قالت لى "دى طفلة صغيرة يا ايمان"


المهم ...
بعد اسم احمد حلمى, الاسماء كانت كده: زينة ... ايمى ... شيرى
you’ve got mail افتكرت ميج ريان فى فيلم
“'Hi! I'm Kimberly!' 'Hi! I'm Janice!' Don't they know you're supposed to have a last name? It's like they're an entire generation of cocktail waitresses!"

نهايته ... الفيلم بدأ بايمى الدكتورة ذات التخصص الفريد: "عظام و علاج طبيعى" ماعرفش عملتها ازاى دى, و بعدين اكتشفنا ان تفاصيل شغلها كدكتورة اغرب و اغرب... دكتورة بتغسل السنان و تحلق و تلبس العيانين" ... هايل هايل!
الفيلم فى المجمل كان ممكن يعجبنى و يضحكنى. و الفكرة العامة انا شخصيا موافقة عليها جدا. فيلم لطيف و خفيف, و اهم حاجة فيه انه مش بطىء. مازهقتش و انا قاعدة يعنى, بس برضه اتنكدت, ليه؟ بعدين
باختصار (الكم سطر دول فيهم حرق لاحداث لو حد بيزعل من كده) احمد حلمى مهندس ديكور طاقق بيدور على شريكة حياته بالمسطرة و المنقلة. احتار بين النقيضين (زينة و شيرى) و انجذب لمميزات كل واحدة اللى كانت بتعالج عيوب التانية.
انجذب لجنان زينة, البنت المستقلة اللى بتاخد كل قراراتها بنفسها (و ساعات كمان قراراته) و مش بتغير عليه. البنت اللى شغلتها هى الحاجة اللى بتحبها (عزف الهرمونيكا) و اللى حياتها كل يوم فيها حاجة جديدة.  البنت اللى بتجرب كل حاجة و عايشة فى الدنيا بتخاطر و تنط (حرفيا, الهواية بتاعتها كل اسبوع هى القفز بالمظلات) الحاجة اللى بتبسطها... انبهر بيها و حس معاها انه "عايش" و "مبسوط"
بس اتخنق من صحابها و الظيطة بتاعتها ... امتى؟ اما قابل شيرى, البنت المصرية الاصيلة, اللى اول مرة يقابلها كانت و هى بتعيط عشان هو كرئيسها فى الشغل انتقد شغلها و ماعجبوش. البنت الاعتمادية, اللى حتى اما بتتوه بتكلمه عالموبايل فى الشغل عشان يقول لها تعمل ايه. و اللى اصلا كان عندها سواق عشان ماتسوقش, و ماتعلمتش سواقة غير لما هو قال لها و علمها. البنت اللى ماتعرفش اصلا تاخد قرار, الغيارة القماصة اللى فى كل خطوة فى خطوبتها مامتها معاها فى الصورة بالكامل. و طبعا هوايتها (الطبيخ) اللى بيه بتسعد الراجل اللى معاها و هو استمتع جدا باحساس انها محتاجاه دايما اللى ارضى غروره تماما ... استمتع معاها  و حس انه "راجل" و "محبوب"
و فى الآخر قال لايمى الكلمة المهمة جدا "اللى نص الناس فى السينما لا سمعوها ولا فهموها" ... قال لها:
"ينفع تسألى حد النخلة اطول ولا القطر اسرع؟ طبعا لأ ... و لو حاولتى تجاوبى مفروض تقولى (البحر اوسع)"

الى واخداه على الفيلم هو تمثيل زينة ... يا ناس الست دى تشتعل اى حاجة غير التمثيل و تريحنا بقى. انا بقيت حاسة و الله فى احيان كتير انها بتمثل علينا مش لينا, بتشتغل نفسها مش بتمثل. و كنت متغاظة جدا لان الدور بتاعها كان خامة حلوة اوى لو بنى آدمة بتعرف تمثل كانت اديته عمق اكتر بكتير.
و كمان الحبة اللى فى الآخر لو كانوا اطول كان بقى احسن, كانوا ممكن يستثمروا التريك بتاعت انهم بيشتغلوه دى احسن من كده و كانت هاتطلع منها كوميديا موقف حلوة كتير
طب انا زعلت ليه بقى؟
حاجتين:
اولا التلطيش ... ايوة. احمد حلمى فى مشهد كان هو و شيرى مستخبيين من زينة, ضربها بالقلم تلات مرات و الناس بتضحك!!!
حد يفهمنى ليه الضرب بيضحكنا! ما هو طول ما المشهد ده عادى, عمرنا ما هنخلص من المصيبة دى
الضرب مش عادى .. مش عادى .. مش عادى
مش ممكن ابدا يعنى!!
النقطة التانية ... سعادة البطل كان كل ما يفسخ خطوبة يقول للبنت "انا راجل ماعنديش مشكلة, لكن انتى ست و لو اتجوزنا و اتطلقنا هاتبقى مطلقة و ده مش لقب سهل ابدا. اهه تبقى مفسوخة احسن ما تبقى مطلقة"
ايه و البنى ده؟ احنا ليسة بنقول العك ده فى افلامنا؟ انتوا عارفين كم بنت صغيرة و مراهقة كانت بتشوف الفيلم ده؟ كم واحدة مخطوبة شافت الناس بتضحك اما احمد حلمى الكول ضرب خطبيته؟ كم ست متنكدة من جوزها شافت حضرته بينكت على لقب مطلقة؟
انا ليسة هاتكلم اكتر فى الموضوع ده عشان انا اصلا عايزة افهم ازاى مؤلف الفيلم كتب الكلام ده و ليه. بس قلت اديكم فكرة

انتوا ايه رأيكم؟ عندى حق ولا مزوداها؟

Sunday, January 31, 2010

ولاد العم .. و ليلة الغم


الجمعة 27 نوفمبر 2009

اول امبارح لقيت دعاء اختى بتقوللى نروح فيلم ولا العم . قلتلها ده ايه ده؟ قالتلى شريف منير و كريم عبد العزيز و منى زكى ... و اخراج شريف عرفة ... و مو سيقى عمر خيرت
مش تقولى كده من بدرى

آه .. انا ممكن اروح فيلم عشان اسمع مزيكته
المهم

الفيلم ده زى افلام كتيرة مصرية . بيعانى من المشكلة الازلية فى السينما بتاعتنا و هى فقدان المصداقية تماما اللى بيخلينا طول مدة الفرجة مدركين تمام الادراك ان احنا بنتفرج على فيلم. صعب اوى انك تحس بالقرب من شخصية فى فيلم مصرى - الا فيما ندر- و الاسباب هاحاول اقول اجزاء منها فى الفيلم ده .. بس تحذير, اللى بيتدايق من حرق الاحداث يستنى لحد اما يشوفه

اولا:

رسم الشخصيات

دور سلوى بطلة الفيلم اللى لعبته منى زكى . هو اكتر دور اتقالت عنه تفاصيل . طفولة و تعليم و نشأة. و مع ذلك لم تراعى التفاصيل دى نهائى. ازاى؟
مفروض الست دى بنت مصرية يتيمة الابوين اتربيت و عاشت فى الزقازيق و اخدت دبلوم تجارة و اتجوزت و قاعدة فى البيت بتربى العيال.
منى زكى معمولها مكياج و شعر مالهمش اى علاقة بالناس دى
اللبس اللى هى لابساه طول الفيلم لا يمت بصلة الى الطبقة دى من المصريين
لهجة منى زكى قاهرية مية فى المية
طريقة حركة الايدين و الالفاظ المستخدمة هى طريقة منى زكى نفسها مش سلوى

دى كلها مش غلطات منى زكى طبعا. فين عمو المخرج؟ فين اونكل الاستايليست؟ راح فين الاخ اللى كاتب الحوار؟

الست دى مفروض عاملة زى بياعات المحلات و الكوفيرات و الممرضات و النوع ده من الناس. اكيد انا مش باقلل منهم اطلاقا طبعا. بس ما ينفعش مثلا اما تروح فرح تبقى عاملة مكياج ناتيوريل بالمنظراللى كانت عاملاه فى مشهد الفرح فى الفيلم ده مثلا .. دول بيرسموا عينيهم بالكحل بخط لبرا. و بيجيبوا قصة طويلة على جنب وشهم. و عادة يميلوا الى الاكسسوار الكبير الظاهر و بيحطوا مونيكير غامق فى صوابع رجليهم اللى بتبقى تخنانة من كتر ماهم دايما واقفين على رجليهم بشاشب كعب عالى فالوزن دايما متركز اكتر حاجة على صوابع الرجلين - اكيد مش هاتخن صوابع رجليها عشان الفيلم بس انا باضرب مثل - . و بيلبسوا صنادل و شباشب .. مش بيحبوا الجزم الا فيما ندر. بيلبسوا شباشب فضى و دهبى و بنطلونات جينز بورد بترتر من تحت

فى مشاهد كتيرة لها فى البيت . الست دى فى بيتها و هى بتغسل المواعين بتبقى مشمرة كم الجلابية ام حمار مخطط اللى بسبعة جنيه و نص لحد كوعها و دراعها كله جوا الكوباية و قامطة شعرها لفوق و بتمشى تانية دراعها عشان ماينقطش مية و بتنشف ايديها فى الجلابية.
الناس دى ليهم الفاظهم و ( التضجينة) فى الكلام بتاعتهم.

فى اللى ممكن يقول انى بافرض ستيريوتايب. و فى اللى ممكن يقول ان التفاصيل دى مش بتفرق
انا ممكن اقول ان التفاصيل دى فى رسم الشخصيات هى اللى بتخلينا نصدقها

ولو قلنا مثلا ان مفروض زوجة صاحب الشغل هى اللى جابتلها الهدوم ..اول الفيلم منى زكى ماشية فى بور سعيد بفستان قصير لا يمكن بنت من الخلفية دى هاتتمشى مع جوزها فى الشارع بيه حتى لو مش محجبة. و حتى لو حصل .. مش الموديل ده. الحاجات اللى زى دى هى اللى بتخللى المشاهد مدرك تماما طول مدة الفيلم انه بيتفرج على منى زكى ... انا دايما فاكرة ده
يا جماعة انزلوا الشارع شوفوا الناس عاملة ازاى

------------------------
كريم عبد العزيز هو كريم عبد العزيز .. نفس المشية . نفس الكليشيهات .. نفس حتى طريقة الهزار. و طبعا ليسة للأسف ماتخلصش من عقدة السبع رجالة و لازم يضرب نص الفيلم

و نفس المشكلة .. علاطول فاكرين ان احنا بنتفرج على كريم عبد العزيز
ده انا جاية باحكى لماما بعد الفيلم علاطول .. نسيت اسم شخصية كريم عبد العزيز فى الفيلم كان ايه . و لحد دلوقتى مش فاكراه

------------------
يمكن الوحيد اللى بيعرف ينسينا هو مين هو شريف منير . اللى مش ناقص انا هاقول عليه كلمتين . شريف منير فعلا كل اللى محتاجه مخرج بيفهم . و هو هايقوم بالباقى

ثانيا
الحوار تانى .. لأ الحوار كان فعلا فيه مشكلة . اللى كاتبه فعلا ماحاولش يتعب نفسه شوية
القضية اللى بيتكلم فيها الفيلم مهرية كلام. و اى جملة هاتتقال قدام المشاهد هاتبقى غالبا خلاص فاقدة معناها من كتر ماتقالت.
اول واحد طلع فى فيلم و قال ( فلسطينى استشهد) قلوبنا اتخلعت معاه
تانى واحد بكينا
تالت واحد اتعاطفنا
النهاردة بقى .. "طيب نعم يعنى؟ ماشى ماحنا عارفين"
كتابة الحوار كانت عشان تخرج من النمطية دى كانت محتاجة تتكتب بشكل مختلف تماما لان انا شخصيا كنت حاسة انى عمالة باقرا مدونين بيردوا على بعض مش حدوتة و شخصيات بتتحاور

ثالثا

الترجمة العبرى ... انا ماعرفش عبرى . بس كذا مرة كنت حاسة ان فى اشتغالات بتحصل . و المشاهد المصرى اتعلم الحوار ده من ايام اوشين المسلسل اليابانى الشهير .. اما كان الممثل ينتع قلبه كلام اربع دقايق و الترجمة تقول ( حسنا)
بس برضه هاسأل الاول . الوحيد اللى اعرفه بيعرف عبرى هو استاذ نائل الطوخى .. يا ريت لو شاف الفيلم يقولنا.

رابعا
ماتخشوش عش الدبابير لو مش قده .. ماتفتحوش حوارات دينية و تحكوا فى التاريخ و بعدين تقفلوها بسطحية و نظام ياللا بقى خش نام عشان المدرسة بكرة
الدين و التاريخ ماينفعش فيهم لا العك ولا الكروتة
و الفيلم عمل الاتنين

بس هارجع و اقولكم ان لو كانت الشخصيات مرسومة صح .. كان الحوار اللى بين عزت و مراته كان بقى منطقى جدا لان المفروض ان الكفة بينهم كعقليات مش متوازنة اطلاقا

ماهو الحوار ده من اهم الحاجات اللى بتقرب الناس من الاحداث ..

خامسا:
انا ماحسيتش تقريبا بالموسيقى الا لما الفيلم خلص. و كنت عايزة اقعد اسمعها بس كان لازم نسيب السينما. استخدامها كان قليل اوى مش عارفة ليه .. يمكن المخرج كان قاصد ده

فى مأساة فى الافلام المصرى او اغلبها و هو النيلة البطىء .. انا دخلت على النت من الموبايل بتاع تلات اربع مرات و انا باتفرج على الفيلم من زهقى .. يا ناس مش كده .. الحياة مش كده

و فى معضلة تانية و هى النهاية اللى لازم تخللى الجمهور يسقف .. يعنى بالذمة النهاية هاتكون ان المصرى هايضرب و يموت فرقة من المخابرات الاسرائيلية؟؟؟ و فين .. جوا اسرائيل؟؟؟؟ الرحمة بقى . كان كفاية انهم يرجعوا و خلاص
لأ و طبعا لازم يولعولنا فيه بجاز
و كريم عبد العزيز يسبل و يقول "راجعين" ... مين دول اللى راجعين؟؟ بتخاطب مين انت و النبى؟
رغم ان انتوا عارفين ان انا شخصيا مثلا باحلم باليوم ده
بس ده حاجة و ده حاجة
--------------------------

انا بقى مبسوطة

-------------------

ان اخيرا اما بنجيب يهود بنجيبهم بيتكلموا عبرى .. و فى ترجمة عربى
لان الموضوع ده بيساعد كتير

ان اخيرا مبنى الخابرات المصرية بقى مبنى نضيف و الناس اللى فيه مش منشية و عاملين زى مايكونوا جايين من متحف الشمع

ان الحمد لله عيشت لحد ماشفت فيلم مصرى فيه ممثل لبنانى بيقوم بدور انسان لبنانى . و طبعا بيتكلم لبنانى



عارفين ايه اروع حاجة فى السينما كفن؟ ان اى حاجة ممكنة
بس ممكنة التنفيذ بحيث ان الناس يصدقوها فيتفاعلوا معاها

اللى بيحصل ان احنا بنتفرج على الفيلم المصرى على انه كارتون .. احداث مش بتحصل فى مصر . و شخصيات ماتعرفش جات منين . و ستات عايزين يتمنظروا بلبسهم و رجالة بجسمها و عضلاتها.
دنيا مش دنيتنا
مثال صغير هو اللهجة .. اى بنى آدم مش من القاهرة انا و انتوا عارفين انه اول ما بيتنفس احنا بنشم انه مش منها .. بيتعرف .. لدرجة ان فى ناس بتبقى هاتتجنن و تعرف مثلا قال ايه عشان يبان عليه.
مصر كشعب فى اختلافات شديدة جدا .. فى اللهجة و اللبس و الكلام و طريقة الماشية
ده البنت ممكن من الطريقة اللى ماسكة بيها شنطتها فى الشارع تعرف حاجات كتيرة عن نشأتها و شخصيتها


دى اكتر حاجة بتألمنى اما باتفرج على فيلم مصرى .. انه بعيد عننا و عن حياتنا و عن دنيتنا و عن مشاكلنا