Showing posts with label الاخوان المسلمين. Show all posts
Showing posts with label الاخوان المسلمين. Show all posts

Friday, November 18, 2011

سميرة





بصوا ... انا مش عارفة انطق اصلا

انا ماعرفش اى عذر ولا منطق فى عدم مساندة البنت دى. عيب نقول كلام من عينة الفضيحة و الكلام ده.... عيب اوى!

هو الشرف و الصح و الحلو انها تسكت عن اللى اتعمل فيها؟

عايز تفهمنى ان انت لو حد انتهك عرضك هاتسكت؟ بجد؟ هتحط جزمة فى بقك و تخرس؟

و لو انت يا سيدى فعلا مش قادر و غصب عنك خالص برضه مش هاقول فيك كلام مش كويس ... بس البنت اللى زى الفل دى ربنا مقويها و بتحاول اهى بكل اللى تقدر عليه... ايه بقى؟

بذمتكوا مش فخورين بيها و بموقفها؟ مش بتفكروا دلوقتى لو انتوا مكانها هاتقدروا تقفوا و تقولوا كده بجد ولا لأ؟

ده انا من كم يوم بس اتهزقت فى بلد غريبة و شايفة ده قمة الاهانة يعنى و كاتبة بدل البوست تلاتة فى مدونتى و لحد دلوقتى ماعملتش حاجة فعلا تذكر.

البنت دى ماينفعش نسيبها ... ربنا يحاسبنا جميعا والله.

سيبكوا من السياسة, و من الانتخابات, و من التليفزيون و التوك شوز... البنى آدمة دى لازم نسادها

حقها علينا على فكرة مش تعطف مننا
كل واحد فينا ربنا هايديله عمر, هايشوفها فيه... عشان سكتنا.
الدنيا دوارة... و مسيرك تحتاج المساعدة زيها.... و لو ماساعدتهاش دلوقتى, مش هاتلاقى اللى يساعدك و يساعد ولادك.
اوعى تفتكر انك احسن منها, او انك لو عيشت فى حالك و ما عملتش مشاكل مش هاتشوف مصيرها.
الاهانة اللى شافتها لو ماقومناش عليها, هانشوفها كلنا
ربنا كبير اوى... هانشوفها فى نفسنا, فى ولادنا, فى بلادنا.
مش هاينفع نسكت... مش هاينفع!!



مش مهم هاترشح مين, ولا مش عايز اصلا
مش مهم نازل بكرة ولا خايف من الاخوان
مش مهم احلامك و طموحاتك... حياتى و حياتك و حياة ولادنا كلنا فى خطر لو سكتنا على اللى حصل للبنت دى
مش شعارات... فعلا مش هاينفع
ولادنا حايتهانوا و هانسكت و ان كان عاجبنا


انا عارفة ان فى كتير خايفين على مستقبلهم يضيع مع كل دوامة السياسة دى. و فى كتير تايهين مع الاحداث و خايفين اعمرهم يتسرق و يلاقوا نفسهم قعدوا يلفوا حوالين نفسهم من غير اى حاجة ما تتعمل. والله عارفة و حاسة بيكوا.
ما انا معكوكة فيها زيكوا بالضبط
على فكرة انا مش طالبة جامعة ليسة بتجرب الدنيا و تستكشف فى رحلة البحث عن ذاتها
انا عارفة ان العمر غالى, و ان جيلنا فيه جزء كبير خايف يضيع مع كل اللى حاصل ده. و عارفة ان فى بال كل واحد فينا السؤال بيرن "يا ترى بفايدة؟"
فاهمة والله و مقدرة

ملعون ابو السياسة
محروق الاعلام
ياكش تولع اليفط و البانرات و المنصات
كل ده بيروح و بييجى ... الا ده
علمونا فى بلادنا ... كله الا الشرف!!

----
و قبل اى حد ما ينط بتفكيره, المساعدة دى لها عشرميت شكل. يعنى لو لأى سبب مش بتنزل مسيرات محدش قال ان كل حاجة المسيرات. و ماتسألنيش انا اعمل ايه, خش على الصفحة بتاعتها على الفيسبوك و تواصل معاها و شوف هى محتاجة ايه انت تقدر تعمله و اعمله لها.
مش كل حاجة فى الدنيا يا مظاهرات يا فلوس.


و انا ليكوا عليا كل ما اعرف حاجة هاقول لكم على طول ان شاء الله. 

بس اعملوا حاجة. مش هاينفع نسكت فى دى

Tuesday, October 25, 2011

حكمة العام


فى تونس, حكومة بن على منعت الحجاب بالعافية ... اول ما حصلت ثورة, البنات لبست الحجاب و اتصورت بيه فى بطايقها


فى مصر, قانون الطوارىء اللى كان مانع اى تظاهر سلمى, دلوقتى عندنا كل يوم ما لا يقل عن 10 تفاعلات بين تظاهرات و اعتصامات و اضرابات


فى ليبيا, اول قانون صدر بعد تحريرها هو اباحة تعدد الزوجات

الدرس؟
 
الكبت و التجريم و المنع من غير فكر يواجه لا يؤثرون اطلاقا
التغيير يأتى بالعمل الشاق المستمر لسنوات.
 

من يريد ان يكون جزءا من التغيير يبدأ بنفسه و بما يستطيع ان يستمر فى اعطاءه لسنوات طوال, اما من ينتظر جنى الثمار السريعة فسيعلم انها فقاعات وهمية لا تنم عن اى حقيقة.

انا باقول ده لنفسى و انا بانادى بقانون تجريم اغتصاب الزوجات
و باقول ده لنفسى و انا بانادى بقانون تجريم عنف الآباء على الابناء
و باقول ده لنفسى و انا بانادى بتجريم العنف ضد المرأة بشكل عام, و المنزلى او الاسرى بشكل خاص

القانون لازم يحمى ... بس لازم معاه جيل يعلم و يربى

Monday, October 3, 2011

اقرار

أقر أنا كاتب (ة) هذه السطور أن الأحزاب التي تتحاور وتوقع اتفاقات مع المجلس العسكري أو أي جهات أخرى لا تمثلني بأي شكل من الأشكال، وأنه من الثابت تاريخيا أن قادتها كانوا متحفظين على ثورة 25 يناير في بدايتها وكانت لديهم رغبة كامنة في التهدئة وإنهاء الثورة حتى يبقى النظام السابق كما هو مقابل عمولة سياسية.

وبخلاف أنهم لا يمثلونني أقر أنهم ليسوا محل ثقة لتوقيع أي اتفاق شرف من أي نوع. مَن الذي سيحترم وثيقة كهذه؟ الليبراليون الذين لم يحترموا «نعم» التي قالها الشعب؟ أم الإخوان الذين تركوا شبابهم يواجه الموت في التحرير مع شباب الثورة وذهبوا للجلوس مع عمر سليمان والتفاوض حول جزء من التورتة؟ أم السلفيون الذين نقضوا الاتفاق ورفعوا علم السعودية في التحرير؟ (الإخوان والسلفيون الذين يقبلون الآن ما يرفضونه بقوة خلال الأشهر الماضية لوجه المناصب لا لوجه الوطن)، أم السيد البدوي الذي أغلق جريدة «الدستور» على نفقته الشخصية لصالح النظام؟ أم موسى مصطفى الذي استولى بالبلطجية على حزب الغد من أيمن نور في أثناء وجوده في السجن؟

وأنني أرفض أن تمنح جهة ما صكوك الرضا والتأييد المطلق للمجلس، وأقر أنني كمواطن مصري غير راضية عن أداء المجلس العسكري لعجزه عن إدارة شؤون البلاد اقتصاديا وأمنيا وسياسيا، وأخيرا مهنيا، حيث فرض على مهنة الصحفي وجود رقيب عسكري على الصحف يمنع ويصادر، وبوجود وزير إعلام يغلق قنوات ويهدد أخرى باقتراب إغلاقها، إلى جانب ترهيب و ترويع النشطاء و المدونين و التصيد لتدويناتهم و مشاركاتهم على شبكة المعلومات كحجج للقبض عليهم و ترويعهم من التعبير عن رفضهم لأداء المجلس العسكري.

ولذلك أعتبر وثيقة الرضا باطلة شكلا وموضوعا، وأنني أرفض اعتماد أي وثيقة تحدد مصير البلد دون أن أُستفتى عليها، وأقر أنه من هذه الساعة، وحتى لحظة وقوفي أمام صندوق الانتخابات، لا يوجد أحد يتحدث باسمي أو نيابة عنى، لا مجلس ولا حزب ولا ائتلاف ولا منظِّر سياسي ولا ضيف في برنامج، وأحذّر كل من يستخدم كلمة «الشعب» في التفاوض أو عرض المطالب أو التأييد أو إصدار البيانات أو التنقيط في أي فرح من الزج باسمي في سياق الكلمة دون تصريح كتابي منى، وعليه إذا ما استخدم كلمة «الشعب» أن يقول "ما عدا إيمان هاشم و....."  كل من يضع اسمه في هذه المساحة الخالية.

الموقع أدناه:
إيمان هاشم