Showing posts with label مدينة نصر. Show all posts
Showing posts with label مدينة نصر. Show all posts

Thursday, March 31, 2011

آخر تطورات مدينة نصر


مبسوطة اوى

فادى عمل ميل جروب و كل اللى ادونى ايميلاتهم بيتضافوا عليه
و ريما عملت صفحة ع الفيسبوك اهو اللينك بتاعها خشوا عليه
و د.سمر المنوفى وفرت مكان لو حبينا نتقابل عشان نتكلم

ناقصنا بس ننزل اعلان فى الوسيط مطلوب مرشح برلمان و يبقى كده تمام

حاجة كمان. يا ريت اللى يعرف اسماء اعضاء الحزب الوطنى اللى فى الدايرة اللى ممكن يرشحوا نفسهم يقول لنا عشان نعلم عليهم بدرى بدرى. انا شخصيا ماعرفش اى حاجة عن الموضوع ده

والله حاجة تفرح الحمد لله.

احنا دلوقتى مستنيين الميل جروب عشان نعرف بعض, و كمان يا ريت كله يبقى فى الصفحة.

سلامات

Tuesday, March 22, 2011

شباب مدينة نصر و مصر الجديدة ... كله يرفع ايده



تحديث: يا جماعة اللى يرفع ايده بيعت لى ايميه عشان نعمل جروب 

سلامات

بصوا ... مش عارفة اقول ايه. انا حاليا فعلا مش فاهمة حاجة. و مش عارفة ايه حوار الاعلان الدستورى ده اصلا. و لا كده يبقى انهى انتخابات الاول و لا امتى. عادى بقى, مسيرنا نفهم فى يوم من الايام.

اهم حاجة الاستقرار و ان البلد ماتروحش للمجهول!!!!
ده غير ان الجيش مهم اوى انه يمشى بسرعة طبعا!!!!

انا مش هدايق نفسى خااالص, ولا انتوا تدايقوا نفسكوا. احنا بس مطلوب مننا حاليا اننا نتجمع كده عشان اغلبنا بيحاول يعمل اى حاجة بشكل فردى, خصوصا اللى زى حالاتى و مش اعضاء فى اى حزب و مش ناويين يعملوها حتى الآن.

شباب مدينة نصر و مصر الجديدة يا ريت يرفعوا ايديهم هنا. و الميل بتاعى موجود. و نكون على اتصال ببعض. الدايرة دى انا شخصيا ماعرفلهاش مرشحين مش اخوان و مش وطنى. و ده هياخد مننا وقت. ان شاء الله هاننزل اعلان فى الوسيط نطلب مرشحين برلمان عن الدايرة بس يعنى احنا الاول نتجمع. و بعدبن ندور على مرشح و بعدين نشتغل على اننا نعرف الناس بيه. بس يا ريت يعنى مش مرشح محدش عارفه خالص خالص يعنى. يعنى يا ريت حد اسمه مألوف على الاقل. و اهم حاجة انه يكون معروف بالنزاهة عشان دى هاتبقى اهم كارت هانلعب بيه مع الناس.

خلينا خطوة خطوة بس و نشوف هانعمل ايه سوا

بس عشان تبقى الامور واضحة. انا مش باعمل حزب ولا حركة ولا ائتلاف ولا اختلاف ولا اى بتنجان من ده. ولا انا شخصيا يا اى طموح سياسى فى زعامة من اى نوع. كل الموضوع انى امبارح باتكلم مع الناس عندنا فى المنطقة و على تويتر, اخدت بالى اننا مستنيين بس حد يعمل المبادرة الاولى. آدى المبادرة اهى.

حاجة تانية مهمة, زى ما قلت انا مش باشتغل فى السياسة بأى شكل, يعنى مش لازم برضه يكون ناس بتشتغل فى السياسة. بس ناس من الدايرة مهتمة و نفسها عضو الدايرة مايكونش من حرامية الوطنى ولا الاخوان.

و اول ما نبقى بس لاقيين بعض, نبقى نتفاهم عايزين نعمل ايه.


و اما نشوف اخرة البلد دى ايه


سلام