Showing posts with label المرأة المصرية. Show all posts
Showing posts with label المرأة المصرية. Show all posts

Tuesday, June 12, 2012

بداية الحل ... من عندِك


عارفة ان فى يوم زى النهاردة كتير هايتكلموا عن التحرش و اصله و فصله، وانا نفسى اتكلمت عن ده قبل كده فى يوم سابق للتدوين عن القضية
انا اللى حابة اتكلم عنه النهاردة هو ردود افعال الستات اللى بتتعرض لتحرش
ﻻنى بصراحة شايفة انها بتساعد اساسا على انتشار الظاهرة اكتر واكتر
طبعا مفيش داعى اننا نقول اننا مجتمع بيلوم الضحية ﻻننا عارفين ده كويس، وان لحد دلوقتى المجتمع بمرضاه مابيصدقوا يلاقوا فضيحة عشان يمسكوا فى العنصر النسائى اللى فيها و يبهدلوها وينسوا تماما انها كانت فى الفضيحة دى مع راجل برضه
بس ماشى
دلوقتى انا اتربيت فى دنيا – زى كل البنات – ان البنت المتربية المحترمة ماتردش على اى معاكسة خالص، والنصاحة والثبات الانفعالى هم انى اعمل وﻻ كأنى سمعت حاجة
وبعدين فى الجامعة عرفت ان البنت المتربية المحترمة لو سمعت لفظ كده وﻻ كده ﻻزم تعمل مش واخدة بالها عشان لو خديت رد فعل يبقى هى بقى تعرف الكلمات دى منين و ايش افهمها الكلام ده اصلا؟
يعنى م الآخر المتربية المحترمة دى كائن غلبان عيبط شكله حلو مغلوب على أمره معتدَى عليه للأبد


فى سنة 2010 كنت بدأت أغضب جدا من الموضوع لدرجة انه بقى صعب عليا انى اعمل مش واخدة بالى ... لحد ما بقيت باتعمد انى "اطارد" المتحرش بعينى، ابص عينى فى عينه و بصتى اللى هو "نعم؟، عايز ايه؟" كتير منهم كان بيعمل لى اللى هو "نعم انتى؟" وكأنه هيخش خناقة عشان اخاف انا، لكن هو كان بيعمل كده عشان اصلا خايف ومتلخبط من رد فعلى وبيعوض بكده عشان يخلَّص الموقف لصالحه، و فى اللى كان بيضحك و يمشى عشان يدارى احراجه
بعد كده بقيت باطلع صوت .. حسب الموقف
يعنى لو استظرف و قال حاجة و هو ماشى جنبى، ارجع له خطوتين وابص فى عينه واقول له "نعم؟" بجعير كده... اللى يقول لى ماقولتش حاجة، واللى يقول لى خلاص ويبتسم، نسبة قليلة منهم كانوا بيتأسفوا طبعا، والنسبة الأغلب كانت بتقول لى "حد جه جنبك؟ انتى مجنونة وﻻ ايه؟" ﻻن ده خط الدفاع الأخير بقى طالما مش مكسوفة و مش مقهورة و مش هاممنى يبقى انا لا متربية وﻻ محترمة .. يبقى أنا أكيد مجنونة
الأول كنت باسكت ﻻن كمان فى المرحلة دى غالبا الناس بتكون اتدخلت، لكن بعد كده بقيت ارد و اقول له "آه مجنونة ماتعاكسش بقى عشان المجانين كتروا فى الشارع" 
 اللى ﻻزم اقول له ان الناس ف المرحلة دى عمرهم ما بيتدخلوا ضد الست ... لكن ده موضوع ليسة جاية لكم فيه


بعد كده بدأت – ومن قبل الثورة والله- المرحلة الجديدة … مرحلة سلمية سلمية هههههههههههه
الراجل اللى بيهدى بعربيته جنبى و ليسة هيعاكس، مش بيلاقى غير انى باوطى ادور على طوبة فى الارض ارميها عليه... اه والله
لحد دلوقتى انا ماعملتهاش فعلا ﻻنهم بيخافوا و بيجروا ههههههههههههههه
اللى بلاقيه قدامى بقى …....... طوب رمل طين اى حاجة
مرة كنت واقفة وورايا عربية فاكهة قمت ماسكة برتقانة، والراجل جرى بسرعة، و الفكهانى بقى يقول لى جدعة
ومرة تانية مسكت زلط كتير صغير و حدفته ع العربية وهو بيجرى بيها وكان فى كناس فى الشارع بقى ماسك المقشة وهوش بيها كده عليه انه يمشى ههههههههههه
خليه بقى يروح ﻻمه وﻻ مراته يشرح لهم ايه اللى بهدله و بهدل عربيته كده
والموضوع بعد كده تطور الى كمان مساعدة الستات فى الشارع. لو لقيت بنت بتتعاكس و مش عارفة تعمل ايه، ازغر للى بيعاكسها. هو فى اللحظة دى بيتأكد انى مجنونة فعلا..بس الميزة ان الناس فى مصر بيخافوا من المجانين
ليسة من اسبوع، كنت باجيب حاجات للبيت والساعة كانت بعد 11 بالليل، طبعا فلتات الزمن هاتقول ايه اللى منزلنى 11 بالليل و استاهل اللى يجرى لى عشان هم ورثوا الشارع و بقى بتاعهم لوحدهم تقريبا
انا كنت هجيب حاجات من المحل اللى ورا بيتنا على طول … المهم اخدت بالى من بنتين واقفين كل واحدة حاطة مناخيرها فى كتف التانية و مش عارفين يروحوا فين و شابين فى عربية ماسكينهم آخر سفالة بقى، يادوب شافونى قدّموا ناحيتى سنة عشان يجوا لى .. قالوا يمكن المحجبة يبقى فيها الرجا الليلة دى
ليسة باوطى اجيب الطوبة كانوا جريوا بالعربية … صراحة الطوبة كانت كبيرة اوى ههههههههههه
…
اللى عايزة اقوله ان جزء مش هين من اسباب انتشار الظاهرة دى هو ان الستات بتسكت
فى اغلب الاحيان كمان البنت مجرد ما تبدى جدية رفضها للى بيحصل مش بتستنى تعمل حاجة،والناس حواليها بيكونوا على طول معاها و فى صفها
و على فكرة مهما كانت عاملة فى روحها ايه
يعنى حتى لو فى بيقولوا المجتمع بيلوم البنت على لبسها، هتلاقيهم بيساعدوها تنط فى تاكسى وﻻ حاجة عشان يخلصوها و يخلصوا منها، طبعا ده مش صح بس برضه مش معنى انهم مش عاجبهم لبسها – وده مش من حقهم – انهم هايقولوا تستاهل التحرش
الفكرة كمان ان فى كده حاجة -غلط-فى دماغ الناس انهم يخافوا يتدخلوا ﻻتطلع تعرفه
صحيح هو مش معنى انه يعرفها انه من حقه يتحرش بيها، بس دى ليسة مرحلة متأخرة ع الناس
الى اقصده ان كتير بيبقوا شايفين اللى بيحصل و متغاظين بس خايفين تكون واحدة مبسوطة انها بتتعاكس،وﻻ دى طبيعة عملها وﻻ أى تفسير فى دماغ الناس التعبانة بقى، فأهم شىء محتاجين نبقى فاكرينه انك مش مفروض تخافى الناس هاتقول عليكى ايه ﻻنهم فى اغلب الاحيان – وطبعا مش كلها – بيبقوا هيطقوا من اللى بيعاكس (اللى فى دماغهم صايع عايش على فلوس امه و فلتان) اكتر ما هم هايطقوا منك (عشان بنت ماشية لوحدها فى الشارع والله اعلم ﻻبسة ايه) اه بجد
سيبك من كل ده
احساسك اما بتاخدى رد فعل بيبقى مختلف تماما
اولا الاحساس بالمهانة بيروح تماما و بتبقى زى اللى كان فى خناقة 
ثانيا ردود أفعال الرجالة اللى بيرتبكوا من ان ست واجهتهم و بصيت فى عينيهم فى اغلبها يفطس من الضحك 
 ثالثا بعد شوية الرجالة هاتبدأ تحفظ ان الشارع بقى مليان ستات "مجانين" من اللى بيرفضوا يتعاكسوا دول و هتبقى انتى جزء من كسر الدايرة بدل مانتى جزء غير مباشر من اسباب انتشارها
و على ما تيجى بنتك هاتكون الحكاية اختفلت، وهايكون ان شاء الله رجع الشارع ﻻيسمح بالسلوك ده
وهيكون ابنك فهم ان ده اصلا منافى للرجولة و يتكسف يعرف اشكال من اللى بتعمل كده

صدقينى … البداية من عندِك انتى

Monday, October 3, 2011

سلامات اكتوبر


سلامات
شهر أكتوبر هو الشهر اللي اختارته الأمم المتحدة لهدف التوعية بالعنف المنزلي (أو الأسرى) ضد المرأة.
خلال الشهر إن شاء الله, هانشر هنا و في باقي المدونات, و على كل اكاونت عندي معلومات, و أرقام, و فيديوهات, و حكايات عن العنف المنزلي ضد المرأة.
يا ريت لو حاجة لفتت نظركم تنشروها و تساعدوا في وصولها للجميع, صدقوني الكلمة بتأثر أوى



Monday, June 20, 2011

التحرش من البيت ... اول الحدوتة


-->


ازيك يا ايفا
اصل ايفا حبيبتى ربنا يخليها لى فكرتنى فى وسط اليوم الامور ده انى ماينفعش اعيش دور المخنوقة النهاردة بالذات.


من ساعة ما عرفت موضوع يوم التحرش وانا بفكر اكتب فى اليوم ده مخصوص بوست واحد ازاى, مش هاينفع ... ده موضوع ممكن اعمل له مدونة لوحده!


نيجى لأصل الحدوتة ...


بيسألونى كتير اشمعنى يعنى حوار "العنف – الاسرى – ضد المرأة" ده اللى واجعة دماغك بيه وشايفاه هو يعنى الضمان الوحيد لحياة افضل للناس جميعا مش الستات بس.


هحكى لكم قصدى. الموضوع وما فيه, انى شايفة ان مناهضة العنف داخل المنزل ضد المرأة هى السبيل الوحيد الممكن واقعيا لتجنب اى وكل مشكلة بتتعرض لها المرأة فى مجتمعنا, و للناس فى المجتمع ده.


نيجى عند مشكلة التحرش, و اشرح لكم تطبيق عملى حالا


دلوقتى اصلا العنف ده يعنى ايه؟ العنف ده هو كل اذى ممكن انسان يسببه لانسان. يعنى مش بس الضرب المبرح واللمس والسباب وكده. لأ, الامتهان عنف, السيطرة الخانقة عنف, المراقبة والتصنت عنف, السيطرة على الاموال عنوة عنف ... كل واى شكل معاملة غصب عن الشخص او استغلالا لضعفه وعدم قدرته على الرد عنف!


التحرش بقى يعنى ايه؟
التحرش هو التعرض من الآخر ... ايا كان شكله
يعنى اى نوع من انواع التصرفات اللى يتحط فى خانة ما هو عكس "سيبها فى حالها" هو تحرش. سواء كان كلام او لمس او نظرات او اى شىء من ذلك.


ايه العلاقة؟


المأساة الحقيقية عندنا فى مصر – واعتقد فى باقى الدول العربية – هى اننا مجتمع مستبيح للمرأة. يعنى عادى اوى ان بنت تتهزأ, منطقى جدا ان بنت تتكسر مقاديفها, مش غريب اطلاقا ان تتهز ثقتها فى نفسها.


جاوبونى كده:


- ينفع البنت اللى اتربيت فى بيت بتتلطش فيه "التلطيش العادى ده" فى الرايحة و فى الجاية, انها فعلا تغضب لو واحد فى الميكروباص مد ايده على فخدها؟
هى بتدايق, بس رد فعل الاول الطبيعى عندها بيكون سكوت, مش انفجار لانتهاك حرمة جسدها. و ده بيولد عند اللى عمل فيها كده نوع من انواع انه "العادى" مش اشكال.


-ينفع بنت اتشتمت اما اتردمت شتيمة من ابوها و اخوها و عمها على انها "ست" و لازم ماتجريش ولا ماتقعدش كده ولا ماتلبسش كده ... انها تصوت و تلم الناس على واحد قرر انه يعلق بصوت مسموع على صدرها؟
برضه هتدايق, لكن اللى بيحصل انها فى الاساس متعودة ان فى حد بيبص على تفاصيل جسمها اولا, و انه مش شىء غريب خالص انها تسمع الفاظ بذيئة ثانيا.


- هل متوقع من واحد اتربى فى بيت الست فيه امه اللى بتتشتم عشان نسيت تجيب الملح, و اخته اللى بتاخد قلم على وشها عشان ردت رد "مش عاجب باباها" و هى "بنت" و طبعا "البنت لازم تكون مؤدبة" ... ينفع ده بذمتكم من جواه فعلا يحترم الستات؟
لو هو ربنا رايد له خير, ممكن لو حاول و قرا و فهم, احتمال يتغير. بس الغالب انه هايبقى من جواه "مستهين" بالمرأة, و لو احسن من كده, هايبقى بيتعامل كويس بس الاصل عنده ان المرأة اقل. و الاحسن اوى يعنى, اللى هاتلاقيه بيصارع نفسه فى ده طول الوقت.
و طبعا هنا ماقصدش ان كل الرجالة لازم يبقوا حاجة من دول




الفكرة فى مجتمعنا فعلا هى ان المرأة "شىء" مش انسان. و قبل ما تقولوا لى بطلى كلام جمعيات حقوق المرأة ده فكروا فى الكلمة لمدة عشر ثوانى.




ما هو لو الراجل فعلا متربى على ان الست بنى آدم زيه, مستحيل "يقدر" يجيب عينه ناحيتها. اللى بيعمل كده بيبقى مستبيح الشىء ده, مستهون بيه و مستضعفه, مستقل بيه و شايف انه – عشان راجل – فهو من حقه يطلع بنظره خارج مجال البصر العادى و يبص على صدر واحدة معدية فى الشارع, و من حقه انه "يبقى له رأى" فيه.




كل ما راجل بيعمل عملة من العمايل دى, اوتوماتيك باتخيل امه فى البيت!
- اللى بيبص عليا من تحت و انا نازلة من الميكروباص اكيد امه ست اتعودت تتحنى فى بيتها عشان الدنيا تمشى.
- اللى بيبص لواحدة من فوق لتحت و يقول اى كلمة و هو بيضحك, ده امه ياما قبلت ان ابوه يتريق على جسمها و يدايقها و هى ساكتة.
 - كل واحد بيقف لى بعربيته و يقول لى تعالى, عينى على طول بتتصور ابوه و هو قاعد بياكل و امه بتخدم عليه و هو بيشخط فيها و يهينها, و يضرب اخته عشان غرفت الطبق مليان و اتدلق منه حبة.
- كل سواق ميكروباص بيقعد يعلق على كل ست هو معدى جنبها, و كل ست ركبت بعد ما تنزل, باعرف على طول ان امه و اخته و مراته و بنته اتبهدلوا شتيمة ... و سكتوا و قبلوا.




دى بقى النقطة ...


"سكتوا ... و قبلوا"




* انتى ممكن تكونى ماخترتيش اهلك و لا البيت اللى اتربيتى فيه, بس تقدرى تختارى بيتك و التربية اللى هتربيها لعيالك
* انتى ممكن تكونى مش هاتعرفى تغيرى تربية رجالة بالكوم فى البلد, لكن تقدرى تكبرى ابنك فى بيت الست فيه بنى آدم له احترامه
* انتى جايز ما تقدريش تغيرى صورة المرأة فى ذهن كل الرجالة, لكن تقدرى تربى بنتك "محترمة" من جواها و هى هتجبر الكل يحترمها.




لو كل ست فينا فكرت فى الموضوع انها فى ايديها تربى راجل واحد و ست واحدة – لو يعنى خلفت اتنين – على كده, صدقونى هتتحل!


بس عشان تعرفى تعملى كده لازم من الاول تشغلى مخك و انتى بتتجوزى.
اللى يعاملك وحش مايستاهلكيش
اللى يهينك لا يمكن يكون بيحبك, "الراجل" – مش اى كائن آخر – اما بيحب بيبقى عايز الست تبقى هانم. اصلها بالعقل كده, اما هى تبقى هانم, يبقى هى متجوزة مين؟
اما بتقبلى الاهانة قدام عيالك بتكسريهم ... ايوة ... افهمى بقى!


تانى


اما بتقبلى الاهانة قدام عيالك بتكسريهم!


غير كده هنفضل نعانى و نصرخ و نصوت بعلو حسنا "والله بنى آدمين" و محدش حيدرى بينا.





Thursday, April 28, 2011

طب و ليه جر الشكل ده؟

مظاهرة ضد قوانين سوزان مبارك للأسرة

تظاهر العشرات من المتضررين من قوانين الأسرة أمام نقابة الصحفيين، مساء اليوم، مطالبين بإلغاء قوانين الأسرة التي وضعتها سوزان مبارك، ومنها قانون الرؤية والحضانة والاستضافة، ووصفوها بأنها باطلة ومخالفة للشريعة وفقًا للمذاهب الأربعة، وأدَّت إلى إفساد الحياة الاجتماعية في مصر.

المصدر: اخوان – الشر برا و بعيد – اون لاين

همممم ... شكلكوا كده ناويين ع الشر, و مش حتجيبوها لبر

ليه كده طيب؟ و اما تزعلوا الستات يبقى كويس؟

ده اول امبارح الموضوع اتطرح فى منشية ناصر, والله ما تعرفوا الستات قالوا ايه! ده فى منتقبة حاليا بتحضر اليفط!!

نتكلم جد شوية ... بلاش

يعنى حقيقى بلاش

مش كويس علشانكوا

بصوا ... احنا فضلنا فترة طويلة فى حياتنا عندنا كمية مهولة من الفجوات مش الثغرات القانونية فيما يتعلق بالاحوال الشخصية. و فيـــــــــــــــــــــــــــــــــــن, بعد عذاب سنين بدأ الموضوع يتحسن شوية. و قدرنا نوصل لمرحلة ان القوانين بدأت تبقى نوعا ما احسن, لكن المشكلة فى تطبيقها.

خلينا نتكلم كده بالراحة. قانون الحضانة مثلا: عايزين ايه؟ هو لما بنقول حضانة الطفل لامه, بندى امه جايزة ولا بندى الطفل حقه؟ ما هو لو على الجميع, الكل نفسه العيال تعيش مع الاتنين ... لكن خلاص, الطلاق حصل و خلصنا. العيال بقى اللى انتوا جيبتوهم يعيشوا سعداء بيكم و بسبب وجودكم دول, حيعيشوا فين؟

مش القانون بيقول لو الست اتجوزت, الحضانة بتنتقل لامها؟

عايزين ايه؟ عايزين طفل عنده 7 سنين يعيش مع مرات ابوه و امه عايشة على وش الدنيا؟؟ انتوا ايه فى ايه؟؟ مالكوا؟؟

يعنى انهى اقرب لطبيعة الكون؟ انه يعيش مع امه و يشوف ابوه ولا العكس؟

7 سنين؟؟ 7 سنين يا ناس؟؟ يعنى فى تانية ابتدائى؟؟ يعنى ما شاء الله. كوكتيل بقى من فقدان الامان على عدم الثقة بالنفس, على حبة مشاكل سلوكية كده لانه عايز يلفت النظر, على شوية عنف و عدم تركيز فى الدراسة من كتر الخوف اللى جواه.

مش كفاية ان احنا ليسة عندنا الطلاق الغيابى؟؟ يعنى الست لا بيها ولا عليها تلاقى ورقة طلاقها جاية لها كده فى ايد واحد ماتعرفوش؟

انتوا ماسمعتوش عن هبل اسمه انذار الطاعة؟؟

مش القانون فى الاصل - و المبنى على الشريعة - يلزم الزوج و المأذون بان الزوجة تعرف بان جوزها اتجوز واحدة تانية؟؟ تعرفوا القانون ده بيتم التحايل عليه ازاى من قبل الاتنين؟؟
ليه الست ماتكونش توقيعها بالعلم و الموافقة شرط عشان جوزها يتجوز واحدة تانية؟؟
مش ده شرع برضه؟؟

انتوا فتحتوا على روحكوا فاتوحة و الله مانتوش قدها 

ما تستهدوا بالله كده

بعدين ارحمونا بقى من تمحيككوا فى الدين ده! كأن الدين ده نزل بس عشان نشوف ننكد ع الستات ازاى و نقهرهم. والله الدين مش كده, و الاسلام بالذات مش كده.

طلعونا من دماغكم

و طلعوا فكرة انكم حتستخدموا الدين حجة عشان تنكدوا علينا عيشيتنا بيها. لأ ... لأة!

الدين ده بتاعنا زى ما هو بتاعكوا, و عشاننا زى ما هو عشانكوا

و مش موجود عشان تقعدوا انتوا تنكشوا فى اشباه احاديث مشكوك فيها و تلوين كلام عشان تكسبوا مواقف شخصية لاهدافكم.

نفسى انسان بس يقول لى جابوا منين حوار 7 و 9 سنين اللى بيقولوا عليه فى الشريعة ده؟؟ انهى شريعة؟؟
شريعتكوا انتوا!

شريعتكوا اللى ماكانش فيها خلع ايام ما كانت المطالبة بيه موجودة. شريعتكوا اللى كانت عايزة الست تفضل عايشة مع راجل بالعافية بس عشان ما يبقاش للست حق الكلمة فى حياتها! انتى هنا بتاعتى, و انا اللى اقول امتى تمشى

الستات هتعرف تفك من جوازة مش عاجباها من غير ما تتذل للراجل؟؟؟ يا خراشى!!! واااااسلامااااااااه
بصوا ... حقولها لكو تانى و اجرى على الله: بلاش معانا احنا اللون ده, تراجعوا

مش حلو صدقونى

و عشان بس الامور تبقى واضحة, حتعملوا مظاهرة فيها 20 راجل ولا 200, ربنا ما يوريكوا بقى زعل الستات اما يتفقوا ع الرجالة. هو انا اللى هقول لكم؟؟ ههههههههههههههه

هى بس الميزة الوحيدة, ان دى احتمال تكون بداية نهاية التواجد الحقيقى للاخوان و الجماعات فى مصر ههههههههههههه

تخيلوا كده الستات فى منطقة ما يعرفوا الحوار ده, و ييجى بعد كده اخواننا المسلمين – بسم الله الرحمن الرحيم – يعملوا مؤتمر شعبى فى المنطقة دى .... ههههههههههههههه يا حلاوة!!


بلاش ... عشان العروبة بقول لك بلاااااااااااش