Showing posts with label الاردن. Show all posts
Showing posts with label الاردن. Show all posts

Sunday, November 6, 2011

ما حدث بالاردن ... الجزء الثالث



ما بين اننا كنا كتير و كل واحد عايز حاجة, و البلد غريبة, و زحمة عشان العيد. احنا تهنا و بقينا نمشى فى الشوارع زى المجانين عشان عايزين تاكسى يرجعنا الاوتيل مفيش. و مش عارفين احنا فين ولا نعمل ايه. و محدش من المركز الثقافى البريطانى عبرنا بتليفون يشوفنا فين... اللى هو لو كنا اتسرقنا ولا حصلت لنا مصيبة ولا حد كان حيدرى بينا اصلا. و ماكانوش عارفين ان احنا الاربعة مع بعض.
اخرتها مش لاقيين تاكسى اتحايلنا على عربية تعليم سواقة تودينا عشان الطيارة هاتفوتنا و كتر خيره وافق, و كمان عشان يوفر لنا فى الوقت اخد مخالفة حاولنا نمنعها مع المرور مفيش فايدة. و انا فى العربية كنت انا اول واحدة احاول اوصل للمركز الثقافى لما كلمت الاوتيل و وصلت لمراد و قلت له احنا فين و الموقف سريعا. الكلام ده كان الساعة 5 و 17 دقيقة بالضبط.
على ما وصلنا فى الزحمة و اخدنا شنطنا و رحنا المطار كانت الساعة بقيت 7 و نص و دخول الطيارة كان قفل 7 و ربع!!
نتحايل بقى و نعمل اللى نعمله مفيش. رحنا نسأل فى مكتب الملكية الاردنية – اللى تذركتنا تبعها – قالوا مفيش تذاكر لحد بعد العيد... انا سمعت الكلمة دى من هنا و بدأت اعيط. و شوفنا واحد مش معانا مصرى و برضه فاتته الطيارة فشركة السياحة اللى هو تبعها حجزت له نفس الطيارة تانى يوم.
فانا فى وسط العياط و جر الشنط و الكلام مع الكابتن و المدير كلمت الاوتيل عشان اوصل لحد من المنظمين عشان يعمل لنا زى الراجل ده و يعيد الحجز تانى يوم, و الاوتيل وصلنى بمراد. و اللى فاكراه انى طلبت مساعدته فى الوصول للملكية و محاولة مساعدتنا و انه قال لى ما معناه انه مفيش حاجة يقدر يعملها... انا فعلا مش فاكرة هو قال ايه نصا
المهم كل اللى عرفته فى الوقت ده ان الامل الوحيد هو رحلات مصر للطيران بس هاتبقى غالية و انا و ياسمين ماكانش عندنا مشكلة فى سبيل كسب الوقت عشان كان لازم نرجع مصر.
حوالى 8 و نص - ياسمين بتقول كانت الساعة 9 - كلمتنا سارة من المركز الثقافى قالت لنا ان الاوتيل ادانا ليلة هدية منه عشان احنا نبات فيها و انها بتتصرف فى رحلة 8 بليل تانى يوم.
طبعا انا كان فى دماغى انى افضل فى المطار. بس ماكانش فى لا انترنت ولا اتصالات عشان الرومينج عندى ماكانش شغال. و كنت محتاجة اوصل لناس تساعدنا.
روحنا الاوتيل احنا الاربعة. و انا دخلت الاودة لقيت مافيهاش انترنت, قعدت على الارض فى الطرقة باشوف حل فى المشكلة دى.
على 12 بليل كده وصلنى ان شيماء عاملة اجتماع معانا و بتدور عليا ضرورى. نزلت لها قلت ان شاء الله تكون لقيت حل للمشكلة.
نزلت لشيماء لقيتها بتزعق لى و زعلانة ازاى انا اكلم مراد اقول له يتصرف مع الملكية و انفعل عليه و اقفل فى وشه السكة!
انا اخدت لى بتاع كم ثانية عشان اجمع انها بتتكلم فى حد زعلان و انها نزلتنى و انا باشوف حل فى النيلة اللى انا فيها, و يا ريتها بتساعدنى.
لأ و ايه... تقول لى: "انا اللى بساعدك, مش انتى اللى بتساعدينى"... (!!!)
و بعدين تقول لى: "انا بساعدك تبنى نفسك".... صراحة ماكانش عندى لا حيل ولا وقت انى افهم واحدة بتقول لدكتورة عندها تلاتين سنة انها بتساعدها تبنى نفسها, و كان عندى مشكلة اهم.
كل اللى قدرت عليه قلت لها طب معلهش و هابقى اشوف مراد بكرة. تقول لى اعتذارك مش هايتقبل!!

طلعت لقيت ياسمين بتقول لى ان شيماء قعدت تزعق لهم على اللى انا عملته!!!!!
فى اللحظة دى انا اتأكدت من اللى كنت شاكة فيه, و هو ان الناس دى محدش منهم هايساعدنا فى اى شىء. و بعت رسايل السنين بقى على كل وسائل السوشيال ميديا – اللى هم جايبننى يساعدونى فيها – انى هنا فى الاردن فى مشكلة.
نمت لى كم ساعة و صحيت انا و ياسمين نشوف هنعمل ايه.

اللى كنت متأكدة منه انى مش هاستنى مساعدة المركز الثقافى عشان فعلا مش هيعملوا حاجة. و انى ماينفعش استنى لطيارة 8 بليل عشان اكتشف ان اليوم راح و الله اعلم هانبات فين و نعمل ايه.

من 8 الصبح و "لينا" من الاردن و هى انسانة فى منتهى النبل و الاخلاق فى الدنيا, ماتعرفنيش غير من الفيسبوك بتساعدنا. لينا سابت شغلها و فضلت معايا بالتليفون و مع مكاتب السياحة. بالعافية لقيت لنا تذكرتين بيزنيس فى 8 بليل. قلنا لها مش مشكلة. الحمد لله كان معانا فلوس تكمل.

اثناء ما لينا كانت بتحجز, كان اتفتح لى بيتين فى الاردن و ناس كتير عرضت عليا انها تساعدنى فى الحجز. و واحدة صاحبتى فى مصر كلمت صديقة صحفية اردنية تساعدنا. الصحفية هى دينا اللى كانت فى منتهى الجدعنة معانا و قالت لنا نيجى عندها و هى تودينا المطار.

المهم لينا حجزت بس انا غرامتى كان لازم ادفعها قبل 12 الظهر و اقرب مكتب ملكية كان فى الدوار السابع بعيد شوية عن الاوتيل. لمينا حاجتنا انا و ياسمين و اخدنا الشنط.و ياسمين قالت لى ناخد الشنط تحت معانا.
و لينا سابت شغلها و جات لحد الاوتيل عشان تاخدنا للمكتب. 

واحنا تحت, لقيت واحدة اسمها "ربى" من المركز الثقافى بتنادينى و معاها شيماء.
و فى وسط اللوبى بتاع الاوتيل قدام كل زمايلنا و العاملين بالاوتيل و قدام لينا نفسها, ربى فضلت تزعق لى على انى عندى آتيتيود بروبليم و بتقول انا السوشيال ميديا عملت لى مشاكل كتير و بنفكر نلغيها زى ماتكون بتهددنى !!!
و بعدين تقول لى "انتى بتكذبى, الكاميرات ما فى حدا دخل بالغرف." و انتى و انتى و زعيق و تهزيق و شيماء بتتفرج.
و فى النص تقول لى "ازاى تقولى لمراد يوقف الطيارة؟" قلت لها و انا باضحك: "انا قلت كده؟" جه مراد يقول نفس الكلام و انى قفلت فى وشه و انى قلت له يوقف الطيارة.
حاولت افهمه انه اذا فعلا انا قلت كده, فده دليل على انى كنت منهارة يعنى. و انا مش فاكرة انى قفلت فى وشك دى, ممكن تكون المكالمة قطعت, و ممكن يكون الكابتن ولا حد ندهنى, على اساس ان الموقف مشدود و التصرف سريع. اللى انا واثقة فيه انى ماقفلتش فى وشه قافشة و مقموصة لان انا مافييش الحركة دى اصلا. مش باعملها خالص - مع انها والله ياما اتعملت فيا-
انا كنت فعلا باضحك عشان مش مستوعبة ان حد يزعل من الكلمة دى, يعنى باين انى فى مشكلة و باطلب منه يعمل اى حاجة. هاطلب منه بجد يعنى يوقف الطيارة ازاى؟؟ و باقول له :"فى فرق بين واحدة شايفاك غلطان و بتزعق لك, و واحدة فى مشكلة و بتعيط و بتستنجد بيك"
و ربى دى تقول لى
don't be sarcastic
and don't argue
 و هى بتعمل لى بصباعها و بتزعق

ياسمين بتحاول تفهم ربى ان ميعادنا بعيد الساعة 12 و الا هاتروح علينا الطيارة تانى – الساعة كانت وصلت 11- و دى مفيش... تقول لها" انا كمان عندى شغل"!!! يا ست بنقول هايروح عليا الميعاد
و فى النص كمان وصلة ذل و من عشان الناس اللى – اشتغلت بالليل لحل مشكلتنا – و الاوتيل اللى ادانا اودة. و ف الآخر تعمل لى بصباعها و تقول لى
you handle your own and your cover the expenses
حاولت افهمها من الاول انى الحمد لله مش مستنية من امهم مليم اصلا بس مفيش
خرجت من الاوتيل انا و ياسمين و لينا بشنطنا شبه مطرودين – او مش شبه بقى – عشان نلحق المكتب
و انا مش مصدقة اللى حصل لا انا ولا ياسمين

اللى فعلا ادهشنى هو شيماء المصرية, اللى شافتنى بيتزعق لى و بيتم التعامل معايا كده و ساكتة. و كمان شايفانا ماشيين بشنطنا ... لا عرضت علينا المساعدة, ولا سألتنا اذا كنا محتاجين فلوس – حتى و لو بشكل شخصى مصريين فى بعض يعنى و الكلام ده – ولا سألت طب هاتقعدوا فين ولا هاتعملوا ايه ولا اى حاجة ... ياكش نتحرق

و اللى جننى فعلا ان لو انا يعنى النيلة السودة و عاملة مشاكل... طب ذنب ياسمين فى ده كله ايه؟؟
كل الموضوع ان كل الاماكن اللى ممكن تتاح كانت بيزنس. و هم كل ده تلاكيك عشان مايلبسوش تمن اربع تذاكر( و ده طبعا تكهن شخصى منى مش حد اللى قاله). مع انهم لو كانوا اتكلموا زى الناس المحترمين كنا اتفاهمنا. و بما انها غلطتنا و احنا اللى فاتتنا الطيارة كنا هاندفع الغرامة,  بس ساعدونا ماتسيبوناش.

المهم انا و ياسمين و لينا اخدنا تاكسى – مارضاش ياخد الفلوس اما فهم اننا مصريات و فى مشكلة و ان لينا معانا بتساعدنا – و رحنا مكتب الملكية و اكدنا الحجز و دفعنا, و اتحايلنا على لينا ترجع شغلها بعد ما كانت مصممة نروح له معاها عشان تغدينا.
شوية و دينا الصحفية جات لنا و اخدتنا البيت عندها و هى و جوزها كانوا فى منتهى الذوق و اللطف و قمة حسن الضيافة معانا. و دينا فضلت تحكى لى ان سادين ده فندق مش كويس اصلا, وانه مش اوتيل يقعد فيه بنات, و المنطقة مش حلوة. و انهم استرخصوا فينا جامد. و هاتتجنن و تعرف اسم ربى بالكامل.
و احنا ماشيين للمطار انا و ياسمين, دينا كلمت لنا التاكسى و حاسبته, و كمان صممت تدينا فلوس رغم انه كان معانا... عشان برضه نتطمن ان اللى شوفناه ده مش هو الاردنيين خالص. و لكن ده حظنا الاغبر فى التعامل مع المركز الثقافى البريطانى فى الاردن.




انا بقى و ياسمين عايزين حقنا فى البهدلة اللى شوفناها دى. و اى حد عنده اى معلومات او اى حاجة تساعدنى يا ريت يقول لى.

و الحمد لله على البنى آدمين الجدعان, و على السوشيال ميديا اللى بجد
و شكرا لينا و غادة و دعاء و دينا ... بجد انتوا اجدع ناس فى الدنيا

ما حدث بالأردن ... الجزء الاول


فى اى حادث بيطلبوا من الشهود انهم يسجلوا شهادتهم بعد الحادث على طول عشان الدقة و عشان تكون كل التفاصيل فى دماغهم. بس انا اخترت انى استنى يومين عشان اهدى و مايكونش كلامى انفعالى و يبقى مركز على الحقايق الثابتة. و انا هحكى التجربة كلها حتة حتة عشان يبقى كله باين بقى. و طالبة من اى حد يقدر يساعدنى اجيب حقى فى الموضوع ده المساندة.

القصة بدأت لما قدمت على اعلان من منظمة آنا ليند انها بتعمل مشروع فى الدول العربية عشان يكون فى نوادى مناظرات و المرحلة الاولى هاتكون فى مصر. و المرحلة الاولى هدفها مصر و الاردن و تونس بشباب ممثل عن مجتمعات العمل المدنى فى الثلاث بلاد, و انا قدمت فى حاجة اسمها:
Social Media Task Force
اللى كلها على بعضها بتضم 15 شاب و شابة من الثلاث بلاد. و تم اختيارى, بس اما كلمونى كان انهم نقلوا الموضوع كله للأردن. و اللى كلمتنى كانت من مكتب آنا ليند من مكتبة الاسكندرية و كانوا عايزين ردى خلال ساعة و كان يوم سبت و السفر السبت اللى بعديه. رديت اعتذرت لانى ماضمنش ظروفى و ماقدرش اوعد بسفر و ارجع فيه و يكون الناس اعتمدت عليا و كده. جيت يوم الاربع ظروفى نفعت فقلت ابعت يمكن حد يكون اعتذر و اهه برضه عشان اكون عملت اللى عليا للآخر من حيث الالتزام و احترامهم. ردوا عليا انهم فعلا محتاجيننى و خلال يوم الخميس كانت كل حاجة اتضبطت, و اللى بعت لى تذكرة الطيران كان المركز الثقافى الاردنى اللى عرفت بعد كده انه هايتولى التنظيم كله.

و انا رايحة ماكانش فى اى مشكلة الحمد لله. رحنا اوتيل اسمه سادين فى الجاردنز فى منطقة عجيبة اسها الخلدة. طبعا انا طالعة مع آنا ليند فمجا شفى بالى ادور وراهم على الاوتيل و هو ايه و اكتفيت بانه اربع نجوم و قلت كويس... و دى اول غلطة ليا
لما ودونى اودتى باسأل الراجل اللى جه معايا يورينى الاودة شنطتى فين,قال لى" ماتصبرى شوية".... انا صراحة مافهمتش!!!
الاوتيل مش نضيف بالمرة و الصور اللى انا واخداها تحكم بنفسها - بس بحاول احل مشكلة فى الموبايل عشان احطها هنا - , و المكان كله بيطل على منور عجيب كده و الاود لحد الدور التالت مجروحة على سطوح عمارات, لدرجة انى طلبت اودة عالية عشان مابقاش مجروحة و مش مهم الفيو. ده غير ان الانترنت على طول بيتقطع لدرجة انى ماكنتش عارفة اشوف شغلى... المهم

يوم ما وصلنا بليل اتعشينا فى الاوتيل و طلعنا ننام و انا ماصدقت عشان كنت مطبقة عشان الطيارة كانت بدرى اول.


من كتر تعبى كنت نايمة زى القتيلة مش حاسة بحاجة, و شوية و انا نايمة اسمع صوت كده. قمت من السرير ببص لقيت باب اودتى بيتفتح بس عشان السلسلة كانت محطوطة  الباب ماتفتحش للآخر, بس حد بيحاول يزق الباب, و انا صحيت من صوت الخبط فيها و صوته و هو بيقول "هاوس كيبينج"
قمت لبست بسرعة عشان الحق انزل الشغل بتاع اليوم و انا بحاول استوعب ان الهاوس كيبينج فتحوا الاودة عليا!!
اول يوم شغل قالوا لنا ندفع تمن العشا اللى كلناه عشان مش من ضمن الميزانية, و لولا انهم كانوا مديننا "بوكيت مونى" كنت عملت مشكلة, بس قلت خلاص. و مفروض حسب كلام المنظمين انها مش غلطة المركز الثقافى و انما هى غلطة سوء تفاهم حصل بين المنظمين نفسهم

احنا جايين سوشيال ميديا, فضلنا اليوم كله زى ما نكون بناخد كورس سوفت سكيلز من تنظيم الوقت و مهارات البريزينتيشان و الكلام ده. مفيش مشكلة فى الكلام ده طبعا بس الموضوع فى اساسه اننا جايين نشتغل سوشيال ميديا و مالناش دعوة بنوادى المناظرات. يومها فى الآخر سألنا "احنا دورنا هايكون ايه؟" انا شخصيا مالقيتش اجابة مرضية. و مع الكلام مع الناس فى موضوع دخول الناس عليا الاودة ده, قلت يمكن يمكن خبطوا تلات مرات و قالوا "هاوس كيبينج" زى التقاليد ما بتقول و انا من نومى ماسمعتش ففتحوا الباب عشان ينضفوا الاودة... بس اللى كان حيجننى:" لو هو فعلا كده, كان لازمته يحاول يزق الباب لما فتح و لقاه مقفول بالسلسلة؟؟"



اليوم ده كله قضيناه تقريبا من غير انترنت!! ... و كنا كل ما نفتح صفحة نلاقى رسالة بمعنى ان الاوتيل مادفعش الفاتورة!! .. اه والله. بس على حسب كلام الاوتيل دى غلطة من اورانج.

اليوم ده بليل كان عندى شغل و كنت عايزة اتصل بناس فى مصر ضرورى. مفيش بقى انترنت خالص و الاودة مش نضيفة... انا جيت على تلاتة الصبح و ادركت ان اللى بيحصل ده مش نافع, و ان اللى انا فيه ده هبل, و كلمت واحدة من منظمات مكتبة الاسكندرية عشان اقل لها انى عايزة ارجع مصر. بقيت حاسة انى مخطوفة فعلا. ايه الهبل ده؟؟

و دى تانى غلطة ليا: انى مارجعتش فعلا مصر اما فهمت ان الحكاية بايظة
عدى اول يوم ....