Showing posts with label التحرش. Show all posts
Showing posts with label التحرش. Show all posts

Wednesday, August 26, 2015

هل أنتِ فى علاقة مؤذية لكِ؟

لأن أول خطوات حل أى مشكلة هو التعرف عليها والإعتراف بوجودها، فلابد لكل إمرأة أن تعلم ما هى العلاقة ال “مؤذية” لها. أى العلاقة التى يتم التحرش بها فيها وإيذاءها بشكل مستمر ومنتظم.
فالإيذاء لا يقتصر فقط على التحرش والعنف الجسدى كما يظن البعض. بل إن الإيذاء النفسى أحياناَ كثيرة يكون أعمق فى تأثيره.
لا توجد علاقة سوية يكون فيها طرف خائفاَ من طرف آخر أغلب الوقت. العنف المنزلى هو كل أشكال العلاقات التى يقع فيها طرف معين تحت السيطرة الكاملة لطرف آخر.
ولا يعد الحب تفسيراَ للرغبة فى السيطرة على شخص آخر. فعادة ما يتلاعب الشخص المؤذى على أوتار الحب والخوف والذنب والخجل والعار حتى يتمكن من سيطرته الكاملة. لأنهم على دراية بأن هذه هى الوسائل الممكن من خلالها السيطرة الكاملة على شخصٍ ما.
الأمور أيضاَ قد تصل إلى حد التهديد. التهديد بالعنف، التهديد بالحرمان من الأطفال، أو التهديد بالهجر. لأن أغلب ضحايا الإيذاء النفسى قد أقروا أن المفتاح الأول الذى سمح لهذا هو استسلامهم لعنصر الإرهاب والتخويف، الذى لغى عقولهم تماماَ وجعلهم فى حالة غياب عقل كامل.
يبدو الكلام صعب الحدوث، أو غير منتشر. الحقيقة عكس ذلك. ومن أجل معرفة ما إذا كنتِ فى علاقة مؤذية أم لا، جربى الإجابة على تلك الأسئلة:
  1. هل تشعرين بالخوف دائماَ؟
  2. هل تتجنبين مواضيع معينة تجنباَ لعصبيته ورد فعله الحاد؟
  3. هل تشعرين أنك مخطئة أياَ كان ما تفعلين؟
  4. هل تشعرين بأنك فى بعض المواقف مسئولة عما حدث؟ “انتى اللى جيبتيه لنفسك”
  5. هل ينجح فى إقناعك برأيه كل مرة وعندك شعور بالفشل فى التعبير عن نفسك؟
  6. هل تشعرين بالعجز وفقدان الأمل؟
  7. هل يهينك ويعلو صوته عليكِ دائماَ؟
  8. هل هو دائم انتقادك ولومك؟
  9. هل تتسبب معاملته لكِ أمام عائلتك وأصدقاءك فى إحراجك؟
  10. هل يتجاهلك ويسفه آرائك وإنجازاتك؟
  11. هل يهددك دائماَ؟ بأنه قد يذيكِ؟ أو يؤذى أطفالك؟ أو يؤذى نفسه؟ أو يهجرك؟
  12. هل يحملك مسئولية معاملته السيئة لكِ؟
  13. هل يجبرك على الجنس؟ ويكون عنيف معك؟
  14. هل يتعامل معكِ كشىء أو كجزء من ممتلكاته؟ “انتى بتاعتى”
  15. هل هو مهووس بالتحكم فيكِ وفى أشيائِك؟
  16. هل يراقبك؟ أو يراقب تليفونك؟ أو يراقب حسابك فى البنك؟
  17. هل يسيطر على أموالك وممتلكاتك؟
  18. هل يمنعك من زيارة العائلة والأصدقاء؟
  19. هل دائم إتهامك بالكذب والتشكيك والتخوين فيكِ؟
  20. هل يُشعرك دائمأَ بالإختناق وأنكِ مراقبة؟
ويعد الإعتداء الجنسى شكل من أشكال الإعنداء الجسدى. وهو يعتبر أى حالة اضطر فيها الشخص على المشاركة فى نشاط جنسى غير مرغوب فيه، أو تحت ضغط أو تهديد، أو مهين.
الجنس لابد أن يُمارس بتراضى الطرفين، وغير ذلك – حتى بين الزوجين – يعتبر جنس قسرى. وهناك مواقف تٌعتبر جنسى قسرى حتى مع الموافقة اللفظية وهى:
  1. إن كان الشخص تحت السن القانونى، أى تحت 18 عام
  2. إن كان الشخص ليس فى كامل وعيه، كبعد شرب الكحوليات أو المخدرات إلخ
  3. إن كان الشخص تحت أى سلطة للشخص الآخر. من لديهم السلطة مثل رئيس العمل، والمشرف، والمدرب، والمدرس، وأستاذ الجامعة، والطبيب، والمعالج،و من يعملون بالمناصب القيادية والحساسة، والشخصيات العامة والمشاهير ممن يمكن أن يصيبوا بعض الأشخاص بالرهبة والخوف من عواقب الرفض
وهناك حالات تتم الإستهانة بها ولا يعتبرها الكثيرون إعتداء جنسى، وهم فى ذلك مخطئين، مثل:
  1. حوادث الإعتداء الجسدى البسيطة مقارنة بغيرها مما قد نشاهد فى التليفزيون أو نقرأ أو نسمع عنه. فليس هناك شكل “أفضل” أو “أسوأ” للإعتداء. كما إنه تقترح الإحصاءات أن أغلب الحالات التى تعرضت لأشكال من العنف اعتبرتها بسيطة ولم تأخذ رد فعل مناسب، تطورت الأمور سريعاَ وتعرضوا لما هو أخطر على حياتهم.
  2. حوادث الإعتداء لمرة أو مرتين
  3. إن توقف الإعتداء بعد أن أصبح الشخص سلبى وتوقف عن المطالبة بحقه أو التحدث بحرية.
  4. الإعتداء اللفظى والعاطفى، فكثير من النساء يتعرضن له ويصبن بحالة من الخوف من الشكوى وتختلط عليهم الأمور ويستمرين فى الشعور بالتهديد المستمر. وتصف الكثير من النساء ما تعيشه قائلة: “ماشية على قشر بيض” تجنباَ لغضبه وردة فعله العنيفة.
وعكس ما يُقال كثيراَ، فإن الأمر ليس فقدان فى التحكم فى الأعصاب، وإنما هو إختيار متعمد من شخص بهدف التحكم فى شخص آخر.
وهناك تكتيكات مختلفة يستخدمها الشخص المؤذى لتحقيق ذلك:
  1. الهيمنة: حيث يهتم الرجل هنا بالهيمنة الكاملة على كافة أمور شريكته وعلى الأطفال، ويأخذ جميع القرارات الخاصة بها بدلاَ منها، ويتوقع بل ويطالبها بالمثول الكامل لأوامره.
  2. الذل والإمتهان: يعتمد هنا الرجل على التقليل من شأن المرأة حتى تفقد الثقة فى نفسها تماماَ مما يسهل عليه عملية السيطرة عليها. السباب، الإهانة علانية، والإحراج المستمر هى وسائل هذا الرجل فى التقليل من شأنك حتى تصدقى أنكِ لا تستحقى أبداَ أفضل من هذا.
  3. العزلة والإنفراد بكِ: حتى يتأكد من إحكام قبضته عليكِ، سيحرمك من الإتصال بأهلك وأصدقاءك، لينفرد تماماَ بكِ، ويحد من فرص وجود أحد بحياتك قد يساعدك أو يشجعك أو حتى يذكرك بنفسك.
  4. التهديد: عادةَ ما يستخدم هذه الطريقة ويهددك بإستمرار بإيذاءك أنت أو أطفالك، أو نفسه. مثل هؤلاء الأشخاص يستخدمون صيغة التهديد كثيراَ فى كلامهم للتأكيد أن أفعالك لها عواقب غير سيئة وأنه أفضل لكِ أن تنصاعى له تماما.
  5. الإرهاب والتخويف: عن طريق الإيحاء دائماَ بقدرته على الإيذاء. سواء بنظرات معينة، أو حركات جسدية، أو تحطيم الأشياء، أو إيذاء الحيوانات الأليفة. فقط لتخويفك حتى تستلمى لقبضته
  6. الإنكار واللوم: نادراَ ما نجد شخص من هذا النوع ممن يتحملون مسئولية أفعالهم. نساء كثيرات ممن تحملن هذه المعاملة قالت أنه حين تمت مواجهة الرجال بأفعالهم كثير منهم أنكرها مستطرداَ أن المرأة تبالغ كثيراَ فى الأمر – مش للدرجة دى ماكنتش بموتك كل يوم يعنى -. وأنه وإن اعترف أحدهم بهذا سيحمل المسئولية لإضطراب ما فى طفلوته، أو علاقته بأحد أبويه، أو بأنه عصبى إلى حد المرض. مثل الأعذار تنجح أحياناَ مع بعض النساء.
الشخص المسىء المؤذى فى معاملته ليس ضحية ولا معذور، هو شخص اختار بكامل إرادته أن تكون هذه هى معاملته لشريكة حياته.
أغلب من مررن بهذا التجارب أقررن أن مثل هؤلاء الرجال لا يتوقفن عند حد معين، وأنه – ولو بعد حين – تطورت الأمور إلى الخطورة على حياتهن وحياة أطفالهن

هذا المقال تم نشره على موقع معلومة

Saturday, June 15, 2013

لا تعاكسها ولا تلمسها




لأ صاحب مبدأ صراحة
واللى يغيظ اكتر اللى يقول "طب كويس اهه تقدم، واما يقول له كلمتين احسن مايمد ايديه برضه" على اساس اننا مدينين بحاجة للأشكال الضالة دى ومضطرين ناخدهم واحدة واحدة
االعنف اللفظى عنف برضه، والتحرش بكلمة برضه تحرش - حمادة هلال ستايل - ودى حاجاة عيب نتكلم فيها والله
احنا مش بس بنرجع ورا، احنا بنخترع مستويات جديدة للتدنى

Tuesday, June 12, 2012

بداية الحل ... من عندِك


عارفة ان فى يوم زى النهاردة كتير هايتكلموا عن التحرش و اصله و فصله، وانا نفسى اتكلمت عن ده قبل كده فى يوم سابق للتدوين عن القضية
انا اللى حابة اتكلم عنه النهاردة هو ردود افعال الستات اللى بتتعرض لتحرش
ﻻنى بصراحة شايفة انها بتساعد اساسا على انتشار الظاهرة اكتر واكتر
طبعا مفيش داعى اننا نقول اننا مجتمع بيلوم الضحية ﻻننا عارفين ده كويس، وان لحد دلوقتى المجتمع بمرضاه مابيصدقوا يلاقوا فضيحة عشان يمسكوا فى العنصر النسائى اللى فيها و يبهدلوها وينسوا تماما انها كانت فى الفضيحة دى مع راجل برضه
بس ماشى
دلوقتى انا اتربيت فى دنيا – زى كل البنات – ان البنت المتربية المحترمة ماتردش على اى معاكسة خالص، والنصاحة والثبات الانفعالى هم انى اعمل وﻻ كأنى سمعت حاجة
وبعدين فى الجامعة عرفت ان البنت المتربية المحترمة لو سمعت لفظ كده وﻻ كده ﻻزم تعمل مش واخدة بالها عشان لو خديت رد فعل يبقى هى بقى تعرف الكلمات دى منين و ايش افهمها الكلام ده اصلا؟
يعنى م الآخر المتربية المحترمة دى كائن غلبان عيبط شكله حلو مغلوب على أمره معتدَى عليه للأبد


فى سنة 2010 كنت بدأت أغضب جدا من الموضوع لدرجة انه بقى صعب عليا انى اعمل مش واخدة بالى ... لحد ما بقيت باتعمد انى "اطارد" المتحرش بعينى، ابص عينى فى عينه و بصتى اللى هو "نعم؟، عايز ايه؟" كتير منهم كان بيعمل لى اللى هو "نعم انتى؟" وكأنه هيخش خناقة عشان اخاف انا، لكن هو كان بيعمل كده عشان اصلا خايف ومتلخبط من رد فعلى وبيعوض بكده عشان يخلَّص الموقف لصالحه، و فى اللى كان بيضحك و يمشى عشان يدارى احراجه
بعد كده بقيت باطلع صوت .. حسب الموقف
يعنى لو استظرف و قال حاجة و هو ماشى جنبى، ارجع له خطوتين وابص فى عينه واقول له "نعم؟" بجعير كده... اللى يقول لى ماقولتش حاجة، واللى يقول لى خلاص ويبتسم، نسبة قليلة منهم كانوا بيتأسفوا طبعا، والنسبة الأغلب كانت بتقول لى "حد جه جنبك؟ انتى مجنونة وﻻ ايه؟" ﻻن ده خط الدفاع الأخير بقى طالما مش مكسوفة و مش مقهورة و مش هاممنى يبقى انا لا متربية وﻻ محترمة .. يبقى أنا أكيد مجنونة
الأول كنت باسكت ﻻن كمان فى المرحلة دى غالبا الناس بتكون اتدخلت، لكن بعد كده بقيت ارد و اقول له "آه مجنونة ماتعاكسش بقى عشان المجانين كتروا فى الشارع" 
 اللى ﻻزم اقول له ان الناس ف المرحلة دى عمرهم ما بيتدخلوا ضد الست ... لكن ده موضوع ليسة جاية لكم فيه


بعد كده بدأت – ومن قبل الثورة والله- المرحلة الجديدة … مرحلة سلمية سلمية هههههههههههه
الراجل اللى بيهدى بعربيته جنبى و ليسة هيعاكس، مش بيلاقى غير انى باوطى ادور على طوبة فى الارض ارميها عليه... اه والله
لحد دلوقتى انا ماعملتهاش فعلا ﻻنهم بيخافوا و بيجروا ههههههههههههههه
اللى بلاقيه قدامى بقى …....... طوب رمل طين اى حاجة
مرة كنت واقفة وورايا عربية فاكهة قمت ماسكة برتقانة، والراجل جرى بسرعة، و الفكهانى بقى يقول لى جدعة
ومرة تانية مسكت زلط كتير صغير و حدفته ع العربية وهو بيجرى بيها وكان فى كناس فى الشارع بقى ماسك المقشة وهوش بيها كده عليه انه يمشى ههههههههههه
خليه بقى يروح ﻻمه وﻻ مراته يشرح لهم ايه اللى بهدله و بهدل عربيته كده
والموضوع بعد كده تطور الى كمان مساعدة الستات فى الشارع. لو لقيت بنت بتتعاكس و مش عارفة تعمل ايه، ازغر للى بيعاكسها. هو فى اللحظة دى بيتأكد انى مجنونة فعلا..بس الميزة ان الناس فى مصر بيخافوا من المجانين
ليسة من اسبوع، كنت باجيب حاجات للبيت والساعة كانت بعد 11 بالليل، طبعا فلتات الزمن هاتقول ايه اللى منزلنى 11 بالليل و استاهل اللى يجرى لى عشان هم ورثوا الشارع و بقى بتاعهم لوحدهم تقريبا
انا كنت هجيب حاجات من المحل اللى ورا بيتنا على طول … المهم اخدت بالى من بنتين واقفين كل واحدة حاطة مناخيرها فى كتف التانية و مش عارفين يروحوا فين و شابين فى عربية ماسكينهم آخر سفالة بقى، يادوب شافونى قدّموا ناحيتى سنة عشان يجوا لى .. قالوا يمكن المحجبة يبقى فيها الرجا الليلة دى
ليسة باوطى اجيب الطوبة كانوا جريوا بالعربية … صراحة الطوبة كانت كبيرة اوى ههههههههههه
…
اللى عايزة اقوله ان جزء مش هين من اسباب انتشار الظاهرة دى هو ان الستات بتسكت
فى اغلب الاحيان كمان البنت مجرد ما تبدى جدية رفضها للى بيحصل مش بتستنى تعمل حاجة،والناس حواليها بيكونوا على طول معاها و فى صفها
و على فكرة مهما كانت عاملة فى روحها ايه
يعنى حتى لو فى بيقولوا المجتمع بيلوم البنت على لبسها، هتلاقيهم بيساعدوها تنط فى تاكسى وﻻ حاجة عشان يخلصوها و يخلصوا منها، طبعا ده مش صح بس برضه مش معنى انهم مش عاجبهم لبسها – وده مش من حقهم – انهم هايقولوا تستاهل التحرش
الفكرة كمان ان فى كده حاجة -غلط-فى دماغ الناس انهم يخافوا يتدخلوا ﻻتطلع تعرفه
صحيح هو مش معنى انه يعرفها انه من حقه يتحرش بيها، بس دى ليسة مرحلة متأخرة ع الناس
الى اقصده ان كتير بيبقوا شايفين اللى بيحصل و متغاظين بس خايفين تكون واحدة مبسوطة انها بتتعاكس،وﻻ دى طبيعة عملها وﻻ أى تفسير فى دماغ الناس التعبانة بقى، فأهم شىء محتاجين نبقى فاكرينه انك مش مفروض تخافى الناس هاتقول عليكى ايه ﻻنهم فى اغلب الاحيان – وطبعا مش كلها – بيبقوا هيطقوا من اللى بيعاكس (اللى فى دماغهم صايع عايش على فلوس امه و فلتان) اكتر ما هم هايطقوا منك (عشان بنت ماشية لوحدها فى الشارع والله اعلم ﻻبسة ايه) اه بجد
سيبك من كل ده
احساسك اما بتاخدى رد فعل بيبقى مختلف تماما
اولا الاحساس بالمهانة بيروح تماما و بتبقى زى اللى كان فى خناقة 
ثانيا ردود أفعال الرجالة اللى بيرتبكوا من ان ست واجهتهم و بصيت فى عينيهم فى اغلبها يفطس من الضحك 
 ثالثا بعد شوية الرجالة هاتبدأ تحفظ ان الشارع بقى مليان ستات "مجانين" من اللى بيرفضوا يتعاكسوا دول و هتبقى انتى جزء من كسر الدايرة بدل مانتى جزء غير مباشر من اسباب انتشارها
و على ما تيجى بنتك هاتكون الحكاية اختفلت، وهايكون ان شاء الله رجع الشارع ﻻيسمح بالسلوك ده
وهيكون ابنك فهم ان ده اصلا منافى للرجولة و يتكسف يعرف اشكال من اللى بتعمل كده

صدقينى … البداية من عندِك انتى

Sunday, December 25, 2011

معالم العدو


طوال الأسبوع الماضي, شاهدنا نحن المصريون – و شاهد العالم اجمع – مختلف مقاطع الفيديو, و الصور الفوتوغرافية للمهازل التي ارتكبتها عصابات المجلس العسكري من انتهاكات تفوق قدرتى, أنا التي ادعى قدرتى على الكتابة, في وصفها.

و لهذا لم أحاول التعليق على اى فيديو أو صورة. و لكن أود أن أسجل موقفين:

الأول اننى لا أستطيع النوم بسبب صرخات عزة هلال التي حاولت أن تحمى فتاة التحرير, فكان جزاءها منظر أراه كلما أغمض عيناى, و كأنها تطاردني لسبب لا اعلمه حتى الآن.

و الثاني هو فيديو بداية الاعتداء على الطبيبة فريدة الحصى و التي حاول الناشط نور ايمن نور الدفاع عنها, فما كان لهما ألا و أن تعرضا لضرب مبرح أكثر ضراوة.





لم يلفت نظري في الفيديو العساكر و الضباط, ولا فريدة التي تعرضت لواحدة مما أظن أنها أبشع تجارب حياتها, ولا لنور الذي أكن له كل الإحترام, و لكن لفت نظري رجل عجوز, يبدو في عقده الخامس. نظر هذا الرجل إلى المنظر, ثم أدار وجهه, و استكمل سيره... و كأن شيئا لم يكن!!

لا ألوم هذا الرجل على عدم الاشتباك, فكبر سنه أوضح من هذا.
و لكنى تألمت, بل و تأثرت, لانطباع وجهه و هو يديره عما يحدث من انتهاك سافر لحرمة الجسد, و امتهان حقيقى لكرامة الإنسان.

مثل هذا الرجل ليسوا بالقلة القليلة في مصرنا الحبيبة, خاصة في هذا الجيل.
لقد كبرنا في بلاد تعتبر الدفاع عن حقوق الإنسان تدخلا سافرا في أمور الغير, سواء بشكل شخصي في جار تحركه آهات جارته التي تتعرض لضرب زوجها كل ليلة, او بشكل اعم حين تحاول منظمات حقوق الإنسان المحلية أو الدولية أن تباشر عملها في محاولة الحفاظ على حقوق الإنسان.

قبل بضعة أعوام, وقت احتدام الجدل عن التصدي لظاهرة التحرش الجنسي في الشارع المصري, ظهر من كانوا يدافعون عن تجاهلهم بقولهم "وإحنا مالنا ما يمكن عاجبها"
و مع بداية عملي في مناهضة العنف المنزلي واجهتني إشكالية كبيرة في أن العديدين اعتبروا محاولاتي في مجرد الحديث عن هذا الأمر تدخل فيما لا يعنيني.

لقد كبرنا في بلاد تحاول ترسيخ مبادئ الأنانية الاجتماعية. و بدا هذا واضحا في اعتبار اى تظاهرة شعبية من اى فئة في المجتمع بال"فئوية". فالأقباط فئة للمسلمين, و الأطباء فئة للمواطنين, و العمال فئة للمستهلكين.
يحاولون أن يجبرونا للعيش بمبدأ "من ليس مثلنا فليس مننا" و "طالما مش عند باب بيتي يبقى مش مشكلتي"
بل و يلوم كل معتنق لهذه العقيدة المسمومة كل من لا يتصرف خلالها.
فتجد من يلوم نور على حماية فريدة استنادا على "و انت تعرف منين هي مين ولا كانت هناك بتعمل إيه" و كأن كونها إنسانا ليس وحده كافيا لأن تكون أهلا للكرامة.

كنت بدأت قبل الأحداث الأخيرة, و بعدها بقليل, محاولة الحوار مع من يختلفون مع الثورة, تحقيقا لمبدأ الحوار و تقبل الآخر.
لكن بعد أن رأيت هذا الرجل, فقد تأكدت و لله الحمد أن من يلومنا على ما نحن فيه الآن هم بالفعل أعداء سلامة هذا المجتمع.

فهم من أعطوا الفرصة للمتحرشين أن يتطاولوا...
و هم من أعطوا الرجال الحجة في إيذاء زوجاتهم, و أخواتهم, و بناتهم, بل و أمهاتهم في بعض الأحيان...
و هم من أتاحوا المجال للموظف المرتشي...
و هم من أفسحوا كل الطريق لمرض الفساد المتفشي في مجتمعنا.

اليوم تحددت أكثر الىّ معالم عدوى ... و أستطيع أن أقول... انه و لله الحمد ... الثورة مستمرة

Friday, November 18, 2011

سميرة





بصوا ... انا مش عارفة انطق اصلا

انا ماعرفش اى عذر ولا منطق فى عدم مساندة البنت دى. عيب نقول كلام من عينة الفضيحة و الكلام ده.... عيب اوى!

هو الشرف و الصح و الحلو انها تسكت عن اللى اتعمل فيها؟

عايز تفهمنى ان انت لو حد انتهك عرضك هاتسكت؟ بجد؟ هتحط جزمة فى بقك و تخرس؟

و لو انت يا سيدى فعلا مش قادر و غصب عنك خالص برضه مش هاقول فيك كلام مش كويس ... بس البنت اللى زى الفل دى ربنا مقويها و بتحاول اهى بكل اللى تقدر عليه... ايه بقى؟

بذمتكوا مش فخورين بيها و بموقفها؟ مش بتفكروا دلوقتى لو انتوا مكانها هاتقدروا تقفوا و تقولوا كده بجد ولا لأ؟

ده انا من كم يوم بس اتهزقت فى بلد غريبة و شايفة ده قمة الاهانة يعنى و كاتبة بدل البوست تلاتة فى مدونتى و لحد دلوقتى ماعملتش حاجة فعلا تذكر.

البنت دى ماينفعش نسيبها ... ربنا يحاسبنا جميعا والله.

سيبكوا من السياسة, و من الانتخابات, و من التليفزيون و التوك شوز... البنى آدمة دى لازم نسادها

حقها علينا على فكرة مش تعطف مننا
كل واحد فينا ربنا هايديله عمر, هايشوفها فيه... عشان سكتنا.
الدنيا دوارة... و مسيرك تحتاج المساعدة زيها.... و لو ماساعدتهاش دلوقتى, مش هاتلاقى اللى يساعدك و يساعد ولادك.
اوعى تفتكر انك احسن منها, او انك لو عيشت فى حالك و ما عملتش مشاكل مش هاتشوف مصيرها.
الاهانة اللى شافتها لو ماقومناش عليها, هانشوفها كلنا
ربنا كبير اوى... هانشوفها فى نفسنا, فى ولادنا, فى بلادنا.
مش هاينفع نسكت... مش هاينفع!!



مش مهم هاترشح مين, ولا مش عايز اصلا
مش مهم نازل بكرة ولا خايف من الاخوان
مش مهم احلامك و طموحاتك... حياتى و حياتك و حياة ولادنا كلنا فى خطر لو سكتنا على اللى حصل للبنت دى
مش شعارات... فعلا مش هاينفع
ولادنا حايتهانوا و هانسكت و ان كان عاجبنا


انا عارفة ان فى كتير خايفين على مستقبلهم يضيع مع كل دوامة السياسة دى. و فى كتير تايهين مع الاحداث و خايفين اعمرهم يتسرق و يلاقوا نفسهم قعدوا يلفوا حوالين نفسهم من غير اى حاجة ما تتعمل. والله عارفة و حاسة بيكوا.
ما انا معكوكة فيها زيكوا بالضبط
على فكرة انا مش طالبة جامعة ليسة بتجرب الدنيا و تستكشف فى رحلة البحث عن ذاتها
انا عارفة ان العمر غالى, و ان جيلنا فيه جزء كبير خايف يضيع مع كل اللى حاصل ده. و عارفة ان فى بال كل واحد فينا السؤال بيرن "يا ترى بفايدة؟"
فاهمة والله و مقدرة

ملعون ابو السياسة
محروق الاعلام
ياكش تولع اليفط و البانرات و المنصات
كل ده بيروح و بييجى ... الا ده
علمونا فى بلادنا ... كله الا الشرف!!

----
و قبل اى حد ما ينط بتفكيره, المساعدة دى لها عشرميت شكل. يعنى لو لأى سبب مش بتنزل مسيرات محدش قال ان كل حاجة المسيرات. و ماتسألنيش انا اعمل ايه, خش على الصفحة بتاعتها على الفيسبوك و تواصل معاها و شوف هى محتاجة ايه انت تقدر تعمله و اعمله لها.
مش كل حاجة فى الدنيا يا مظاهرات يا فلوس.


و انا ليكوا عليا كل ما اعرف حاجة هاقول لكم على طول ان شاء الله. 

بس اعملوا حاجة. مش هاينفع نسكت فى دى

Monday, June 20, 2011

التحرش من البيت ... اول الحدوتة


-->


ازيك يا ايفا
اصل ايفا حبيبتى ربنا يخليها لى فكرتنى فى وسط اليوم الامور ده انى ماينفعش اعيش دور المخنوقة النهاردة بالذات.


من ساعة ما عرفت موضوع يوم التحرش وانا بفكر اكتب فى اليوم ده مخصوص بوست واحد ازاى, مش هاينفع ... ده موضوع ممكن اعمل له مدونة لوحده!


نيجى لأصل الحدوتة ...


بيسألونى كتير اشمعنى يعنى حوار "العنف – الاسرى – ضد المرأة" ده اللى واجعة دماغك بيه وشايفاه هو يعنى الضمان الوحيد لحياة افضل للناس جميعا مش الستات بس.


هحكى لكم قصدى. الموضوع وما فيه, انى شايفة ان مناهضة العنف داخل المنزل ضد المرأة هى السبيل الوحيد الممكن واقعيا لتجنب اى وكل مشكلة بتتعرض لها المرأة فى مجتمعنا, و للناس فى المجتمع ده.


نيجى عند مشكلة التحرش, و اشرح لكم تطبيق عملى حالا


دلوقتى اصلا العنف ده يعنى ايه؟ العنف ده هو كل اذى ممكن انسان يسببه لانسان. يعنى مش بس الضرب المبرح واللمس والسباب وكده. لأ, الامتهان عنف, السيطرة الخانقة عنف, المراقبة والتصنت عنف, السيطرة على الاموال عنوة عنف ... كل واى شكل معاملة غصب عن الشخص او استغلالا لضعفه وعدم قدرته على الرد عنف!


التحرش بقى يعنى ايه؟
التحرش هو التعرض من الآخر ... ايا كان شكله
يعنى اى نوع من انواع التصرفات اللى يتحط فى خانة ما هو عكس "سيبها فى حالها" هو تحرش. سواء كان كلام او لمس او نظرات او اى شىء من ذلك.


ايه العلاقة؟


المأساة الحقيقية عندنا فى مصر – واعتقد فى باقى الدول العربية – هى اننا مجتمع مستبيح للمرأة. يعنى عادى اوى ان بنت تتهزأ, منطقى جدا ان بنت تتكسر مقاديفها, مش غريب اطلاقا ان تتهز ثقتها فى نفسها.


جاوبونى كده:


- ينفع البنت اللى اتربيت فى بيت بتتلطش فيه "التلطيش العادى ده" فى الرايحة و فى الجاية, انها فعلا تغضب لو واحد فى الميكروباص مد ايده على فخدها؟
هى بتدايق, بس رد فعل الاول الطبيعى عندها بيكون سكوت, مش انفجار لانتهاك حرمة جسدها. و ده بيولد عند اللى عمل فيها كده نوع من انواع انه "العادى" مش اشكال.


-ينفع بنت اتشتمت اما اتردمت شتيمة من ابوها و اخوها و عمها على انها "ست" و لازم ماتجريش ولا ماتقعدش كده ولا ماتلبسش كده ... انها تصوت و تلم الناس على واحد قرر انه يعلق بصوت مسموع على صدرها؟
برضه هتدايق, لكن اللى بيحصل انها فى الاساس متعودة ان فى حد بيبص على تفاصيل جسمها اولا, و انه مش شىء غريب خالص انها تسمع الفاظ بذيئة ثانيا.


- هل متوقع من واحد اتربى فى بيت الست فيه امه اللى بتتشتم عشان نسيت تجيب الملح, و اخته اللى بتاخد قلم على وشها عشان ردت رد "مش عاجب باباها" و هى "بنت" و طبعا "البنت لازم تكون مؤدبة" ... ينفع ده بذمتكم من جواه فعلا يحترم الستات؟
لو هو ربنا رايد له خير, ممكن لو حاول و قرا و فهم, احتمال يتغير. بس الغالب انه هايبقى من جواه "مستهين" بالمرأة, و لو احسن من كده, هايبقى بيتعامل كويس بس الاصل عنده ان المرأة اقل. و الاحسن اوى يعنى, اللى هاتلاقيه بيصارع نفسه فى ده طول الوقت.
و طبعا هنا ماقصدش ان كل الرجالة لازم يبقوا حاجة من دول




الفكرة فى مجتمعنا فعلا هى ان المرأة "شىء" مش انسان. و قبل ما تقولوا لى بطلى كلام جمعيات حقوق المرأة ده فكروا فى الكلمة لمدة عشر ثوانى.




ما هو لو الراجل فعلا متربى على ان الست بنى آدم زيه, مستحيل "يقدر" يجيب عينه ناحيتها. اللى بيعمل كده بيبقى مستبيح الشىء ده, مستهون بيه و مستضعفه, مستقل بيه و شايف انه – عشان راجل – فهو من حقه يطلع بنظره خارج مجال البصر العادى و يبص على صدر واحدة معدية فى الشارع, و من حقه انه "يبقى له رأى" فيه.




كل ما راجل بيعمل عملة من العمايل دى, اوتوماتيك باتخيل امه فى البيت!
- اللى بيبص عليا من تحت و انا نازلة من الميكروباص اكيد امه ست اتعودت تتحنى فى بيتها عشان الدنيا تمشى.
- اللى بيبص لواحدة من فوق لتحت و يقول اى كلمة و هو بيضحك, ده امه ياما قبلت ان ابوه يتريق على جسمها و يدايقها و هى ساكتة.
 - كل واحد بيقف لى بعربيته و يقول لى تعالى, عينى على طول بتتصور ابوه و هو قاعد بياكل و امه بتخدم عليه و هو بيشخط فيها و يهينها, و يضرب اخته عشان غرفت الطبق مليان و اتدلق منه حبة.
- كل سواق ميكروباص بيقعد يعلق على كل ست هو معدى جنبها, و كل ست ركبت بعد ما تنزل, باعرف على طول ان امه و اخته و مراته و بنته اتبهدلوا شتيمة ... و سكتوا و قبلوا.




دى بقى النقطة ...


"سكتوا ... و قبلوا"




* انتى ممكن تكونى ماخترتيش اهلك و لا البيت اللى اتربيتى فيه, بس تقدرى تختارى بيتك و التربية اللى هتربيها لعيالك
* انتى ممكن تكونى مش هاتعرفى تغيرى تربية رجالة بالكوم فى البلد, لكن تقدرى تكبرى ابنك فى بيت الست فيه بنى آدم له احترامه
* انتى جايز ما تقدريش تغيرى صورة المرأة فى ذهن كل الرجالة, لكن تقدرى تربى بنتك "محترمة" من جواها و هى هتجبر الكل يحترمها.




لو كل ست فينا فكرت فى الموضوع انها فى ايديها تربى راجل واحد و ست واحدة – لو يعنى خلفت اتنين – على كده, صدقونى هتتحل!


بس عشان تعرفى تعملى كده لازم من الاول تشغلى مخك و انتى بتتجوزى.
اللى يعاملك وحش مايستاهلكيش
اللى يهينك لا يمكن يكون بيحبك, "الراجل" – مش اى كائن آخر – اما بيحب بيبقى عايز الست تبقى هانم. اصلها بالعقل كده, اما هى تبقى هانم, يبقى هى متجوزة مين؟
اما بتقبلى الاهانة قدام عيالك بتكسريهم ... ايوة ... افهمى بقى!


تانى


اما بتقبلى الاهانة قدام عيالك بتكسريهم!


غير كده هنفضل نعانى و نصرخ و نصوت بعلو حسنا "والله بنى آدمين" و محدش حيدرى بينا.