Friday, July 2, 2010

سنأخذ من كل رجل ... قبيييلة



قريتوا الخبر ده؟ انا جيبته من عند نوارة نجم. هى كانت حطاه و معلقة عليه.
المهم
انا قعدت حبة افكر. انا فعلا مهما بان فى ان فى ستات عندهم القدرة على ضرب الرجالة, مش قادرة ابلعها خالص. مش تقديرا للراجل اكتر من الست ... اطلاقا!!
لكن مش قادرة استوعب ان ممكن تكون احد حلول مشكلة العنف ضد المرأة انها هى نفسها تكون عنيفة على الراجل. دى عيشة ايه دى؟
فى فرق بين ان واحدة شايفة ان من حقها لو جوزها اذاها ترد الاهانة بمثلها فى ساعتها – و هنا انا مش هاقدر احجر على حقها الشخصى فى اختيار رد فعلها- و ان تكون الست اصلا من الاول فى تعاملها عنيفة لو اتعرضت لأى نوع من الضغط.
انا مش جاية من بلاد برا و باقول اخيه, بس فعلا مش مستوعبة فكرة ثقافة العنف دى. يعنى بدل ما اقول لست ترفض العنف ضدها رفض تام عشان ماتكبرش ولادها يشوفوا ده, نقوم نقول لها خليكى انتى كمان عنيفة؟
العيال تكبر فى بيت فيها كله بيضرب كله؟ طب دول –رجالة و ستات- هايطلعوا ايه؟ عاملين ازاى؟ فاهمين ايه عن الرجولة و المسئولية و الاسرة و الرحمة و الانوثة؟ هايفهموا المساواة ازاى؟ ان طالما الراجل بيضرب الست كمان تضرب؟ مادام الراجل بيظلم الست كمان تظلم؟ هو ده العدل؟ هى دى المساواة؟
ايه اللى يفرح فى ان فى شريحة من الستات فى مصر – انا مش مصدقة شخصيا النسب و الارقام اللى عايزة تفرض انها ظاهرة- وصلوا لمرحلة انهم بيضربوا اجوازهم؟
على فكرة ... انا عارفة ان فى مستوى اجتماعى معين, التعامل فيه كله بين البنى آدمين و بعض بالضرب. مش قصة رجالة و ستات خالص. و شفت الحاجات دى بعينى. و متهيألى و الله اعلم ان دول اللى بيبنوا عليهم الكلام و الارقام. و هم هنا – على تكرار تحفظى الشخصى على العنف اصلا- القصة عندهم مش قصة ستات و رجالة خالص, هم تعاملهم مع بعض كلهم كده. الولاد بيضربوا بعض و بيضربوا الآباء, و الصحاب بيفتحوا دمغة بعض و يروحوا سوا المستشفى – امال شفت الكلام ده فين- و الراجل يهين الست و هى تقوم مبهدلاه و كله قدامنا و يروحوا سوا عااااادى جدا.
بس من اللى فهمته ان دى ثقافتهم و لغتهم, مش ايمانا منهم بالمساواة و سعيا اليها.
و حتى لو كان كده ... تانى ... هى دى مساواة؟
يعنى انا بعد كده اقول للستات اللى ازواجهم بيتعاملوا معاهم بعنف: "لو عمل كده, اعملى فيه انتى كمان"؟ ده كلام؟ و هو ده يعنى اللى هايجيب حق الست؟
يعنى الرجالة نفسيتهم و امخاخهم فى احيان كتيرة فى البلد دى خربت خلاص. و مابقوش عارفين يعنى ايه رجولة اصلا و لا عارفين يبقوا رجالة قدام نفسهم اساسا – معلهش كلام رخم, بس واقع اليم - , نقوم بكل فكاكة و نباهة نخرب الستات كمان؟
هو مش فاهم ان عمر مالرجولة ما كان معناها انه يستقوى على اللى اضعف منه او اللى محتاج له. و لا معناها اطلاق العنان لاعصابه كل ما يتنرفز و يحبط – زى ما كلنا بيجرى لنا- يقوم طايح فى اسرته. و لا عمر الراجل ماكان بيخوف ولا بيرهب... كتير من الرجالة فعلا – بسبب مجتمع خربان و بسب امهات عايزة الحرق- مش عارفين يوزنوها جوا نفسهم حتى.
نقوم بدل ما نشتغل على اللى بايظ, نبوظ اللى ممكن يكون فيه امل؟
قبل ما حد يقول لى الستات مش ملايكة, انا مش باتكلم فى المجمل, انا باتكلم بالذات فى قضية العنف.
لو الست كانسانة اصلا طبعها عنيفة دى قصة تانية, انما ان احنا نطالب و نسهل ان كل و اى ست بتتعرض للعنف او لأ تتربى على نفس الثقافة و التصرف, ده شىء غريب بجد!!
يمكن فى حاجة مش واخدة بالى منها, بس فعلا بقالى كم ساعة بافكر فى الفكرة, و مش عارفة الاقى اى خير او جانب ايجابى من تشجيع الستات على العنف.

Thursday, July 1, 2010

متعة انك تكون مصرى

Wednesday, June 30, 2010

قولى لها انا جاهزة يا مروة

قريتوا المشكلة دى من موقع مروة رخا؟ شوفتوا الهنا؟ ... المهم



مروة حلها معقول جدا. و انا باقول لك اهه يا مروة قولى للبنت ان انا اول مدونة ناوية على تجريس لو هى حبيت. و انها لو عايزة هاعمل لها ضغطية للموضوع فى موقع بيكيا مصر اللى باشتغل فيه. و مدير التحرير مستنى الحدوتة و نفسه يفضحه.

هى بس اول ما تحب تقول ... و انا ان شاء الله جاهزة

Tuesday, June 29, 2010

فرصة كويسة للمدونين


دعم الصحافة الشعبية في مصر: دعوة للاشتراك في ورش العمل
البيان الصحفي
------------------
أطلقت مؤسسة فريدريش ناومان من أجل الحرية مشروعها الجديد "دعم الصحافة الشعبية في مصر" برعاية مشتركة مع المنظمة المصرية لحقوق الإنسان (EOHR) ، وبدعم من منظمة الحقوق والديمقراطية في كندا.

وأصبحت الصحافة الشعبية (أي نشر أي مواطن مقالات أو تسجيلات الصوت و الفيديو على الإنترنت) أداة مهمة لمواطنين للتعبير عن الذات و تبادل المعلومات بدون رقابة. هذا المشروع يهدف إلى تعزيز هذه الوسيلة الإعلامية الجديدة من خلال تدريب المدونين و الصحفيين على أعلى مستوى وتزويدهم بالمعلومات الفنية المهمة. ويهدف المشروع أيضا إلى تعزيز العلاقة بين الذين يعملون في وسائل الإعلام التقليدية والمدونين
مؤسسة فريدريش ناومان تنظم, بالتعاون مع شركائها في المنطقة, مجموعة من الأنشطة التدريبية, من ضمن هذه الأنشطة ورش عمل لتدريب الصحفيين و المدونين على كل أدوات التدوين و كيفية إنشاء مدونتهم الخاصة. و تعاون أبرز المدونين مع مؤسسة فريدريش ناومان لإصدار كتيب عن التدوين فيه معلومات و نصائح عن كل الموضوعات المتعلقة بالتدوين و الصحافة الشعبية في مصر. في نهاية المشروع, يلتقي مجموعة مختارة من المدونين المصريين بزملائهم في الدول العربية لتبادل الآراء و التجارب المختلفة.
يسعد مؤسسة فريدريش ناومان أن تدعو المدونين و الصحفيين المصريين للتسجيل في ورش العمل. المشتركين في ورش العمل يجب أن يظهروا اهتمام بالتدوين و حركة التدوين المصرية. يجب على المشتركين أن يكون لهم تجربة في التدوين أو العمل في صحافة الإلكترونية أو تجربة في الصحافة التقليدية. ينبغي أيضا أن يكونوا المتقدمين تحت سن ال35. نشجع الصحفيين و المدونين المصريين من خارج القاهرة للتقديم.
.الرجاء إرسال إستمارات التقديم بعد إستيفائها إلى
Sara.Abdel-Ghany@fnst.org
. الموعد النهائي لتلقي الطلبات هو 3 يوليو 2010, الطلبات المرسلة بعد هذا التاريخ لن تؤخذ في الإعتبار.


ورشة العمل
---------------
في إطار مشروع مؤسسة فريدريش ناومان لدعم الصحافة الشعبية في مصر، وبالتعاون مع المنظمة المصرية لحقوق الإنسان وبدعم من منظمة الحقوق والديمقراطية ، تقوم المؤسسة بأربع ورش عمل تهدف إلى تعزيز مهارات الصحافة الشعبية للصحفيين والمدونين في مصر.

ستقوم أول ورشتي عمل بتدريب الصحفيين والمدونين على كل جانب من جوانب التدوين وكل أداة من أدواته. أما ثاني ورشتي عمل ستكونا عن كيفية إنتاج إعلانات الخدمة العامة و هي إعلانات غير هادفة للربح ,هدفها الأول والوحيد المصلحة العامة. الغرض من هذا التدريب هو تعليم المشارك أداة قوية و مبتكرة لتوصيل رسالتهم للجمهور. سوف يكون مدربين ورش العمل من أبرز المدونين و الخبراء في هذا المجال مثل مالك مصطفى ، نورا يونس ، حسام الحملاوي، ادهم الشهابى ، ديما شاهين ، وائل عباس ومروة رخا.


كتيب عن التدوين
--------------------
تقوم المؤسسة بإعداد كتيب عن التدوين بعنوان "عبر و تحرر". يهدف هذا الكتيب إلى تزويد كل مواطن مصري بدليل عملي عن كيفية التدوين بطريقة مبتكرة وآمنة تصل للجمهور المطلوب.

يقم كتابته أبرز المدونين و الخبراء في هذا المجال مثل مالك مصطفى ، نورا يونس ، حسام الحملاوي، ادهم الشهابى ، ديما شاهين ، وائل عباس ومروة رخا. وقد ساهمت المنظمة المصرية أيضا في كتابة فصل عن ارتباط حركة التدوين بحركة الدفاع عن حقوق الإنسان و الديمقراطية في مصر و كتابة فصل آخر عن الجانب القانوني للتدوين.


الإجتماع الإقليمي
----------------------
تقوم المؤسسة بإعداد اجتماع إقليمي في نهاية المشروع لمعرفة مدى إمكانية تطبيقه على المستوى الإقليمي. في هذا الاجتماع, يلتقي مجموعة مختارة من المدونين المصريين بزملائهم في الدول العربية لتبادل الآراء و التجارب المختلفة.

 المصدر: هنا 

اما الادب (البناتى) يعلم البنات الادب

خبر اللهم اجعله خير, سمعت من فترة عن ما يسمى بالادب البناتى. و قعدت يا ربى اقول يعنى انا منهم ولا انا ادب عوانيسى وبعد ما ربنا يصلح لى حالى هابقى ادب ستاتى ولا هايجرى لى ايه! بس عادى ما حطيتش فى دماغى ... اكتر من كده و ربنا بيزيح ... هم بس يبقى يبصوا على بطاقة الانثى و يحددوا بقى (بناتى – عوانيسى – مطلقاتى – ستاتى )
المهم
شفت لقاء ل2 من نجمات المجال ده.
هو بس اولا الاستاذة رحاب وضحت ان الاصل فى الموضوع انه "ادب نسوى" و ان دى حدوتة جديدة, بس انا ماعرفش هم 15 بنت صغيرين يعنى نزلوا كتب؟ 15 دى جات منين؟
مش اشكال ...لحد اما جينا عند الدقيقة 3.35 و هنا الزعل بقى
بنات مين اللى (بيستفزوا) انهى رجالة عشان تتكلم؟ يعنى ايه بقى ؟؟ لا افهم. و المذيعة يا عينى تحاول تقول و عينيها نفسها تقول "هو احنا ناقصين كمان الستات تقول كده" .. يييييييى البنات البنات!!
طب معلهش بقى. مالكاتبة نفسها لابسة احمر نارى , مافى رجالة ممكن تشوف "مستفز" كفاية للمعاكسة؟ و حسب دليل مصطفى حسنى لكيف تكون متحرشا, الكمام كانت ماسكة على الدراع كمان.
و ايه مش لايق على بعضه دى؟ يعنى انتى اللى هاتحددى لايق ازاى؟ انا واحدة بحب البنفسجى بجنان .. و بلبسه مع كل الالوان .. آه, باطقم بنفسجى مع اسود و ابيض و احمر و اصفر و اخضر كمان ... و بيبقى لايق عليا و بابقى مبسوطة ... لو حد مش شايفه لايق من حقه يعاكسنى عشان استفزيته؟
و ايه موضوع الجامعة معروف لها لبس ده؟ فى واحدة ممكن تلبس الجينز و واحد يعتبر ده قمة الفجور. و فى واحد تانى اى واحدة مش محجبة هى دعوة للمس و واحد تانى شايف ان المحجبة لو مش لابسة حجاب صحيح ممكن يبقى استفزازها اكتر من الغير محجبة. و فى انسان شايف ان المنتقبة اللى لابسة عباية مخبياها دى قمة الاثارة و الساسبنس!
ثم ان والله العظيم فى ناس مش مسلمة فى الدنيا ... نعمل فيهم ايه دول؟
احنا مش هانخلص بقى من عقدة الذنب و معاملة الرجالة على انها كائنات لا حول لها و لا قوة دى؟ لا يا ستى ... فى حاجة اسمها ضبط النفس, و احترام الناس, و احترام الاختلافات, و الاذواق.
ماهم بيسافروا فى كل حتة و بيشوف الستات على كل شكل و مش بيستجرى يقول لواحدة كلمة و لا يبرق فى مش عارف ايه بتاعها.
و بمناسبة برا, ايه موضوع التحرش و الاغتصاب بيحصل فى كل حتة ده؟ نظلم بتحصل فى احسن العائلات يعنى؟؟
يعنى لو الستات فى نيبال اما بيركبوا مواصلات الرجالة بيمدوا ايديهم على ركبهم يبقى خلاص المصريين عادى؟
المتحرش مذنب لانه التحرش ذنب, و انا مش مفروض امشى حسب مفهوم اى حد عن الزى المناسب للمكان و الزمان غير نفسى. المجتمع اللى فيه عشرات الملايين من الناس عمره ما هايتفق على حاجة و احنا عارفين كده كويس.
انا اللى مدايقنى فى كل ده انه كلام من بنات. لو رجالة عادى, مانا باسمعه منهم كل يوم, انما اما البنات تقوله يبقى فى حاجة مش تمام.
و اما ييجى من كاتبة اول كتاب ليها عن ظاهرة التحرش يبقى فى ازمة. انا نفسى الموضوع يبقى بعيد عن الشخصنة, انا حطيت الفيديو عشان يبان كلامى رد على مين لانى بارد على الكلام ده بالذات مش الشخص.