Monday, December 6, 2010

عن الاتجار بالبشر

يعنى إيه "الاتجار بالبشر"؟

الاتجار بالبشر هو الصورة العصرية للقرن ال21 لما كان بقال عنه "العبودية". و هو عبارة عن شراء الناس غصب عنهم سواء عن طريق القوة أو الخداع, و ذلك لبيعهم و استغلالهم من اجل:

-الجنس و البغاء القسرى
-السخرة في المصانع و المزارع و مواقع البناء
-الرق و العبودية و الخدمة المنزلية
-التبني الدولي الغير مشروع
-زواج الأطفال و الزواج القسرى "حتى لو مش طفلة"
-تجنيد الأطفال
-التسول القسرى
-تجارة الأعضاء البشرية بشكل غير قانوني
-الهدى "انه يهادى بالعبيد يعنى" و العبادة
-الرياضة زى كرة القدم و سباقات ركوب الجمال مثلا

يتم تجريد ضحايا الاتجار بالبشر من ابسط و أهم حقوق الإنسان, و يعامل معاملة السلع و الممتلكات. و يمكن بيع و شراء الضحية الواحدة اكتر من مرة.


الاتجار بالبشر -- بعض الحقائق الرئيسية
-الاتجار بالبشر هي أسرع تجارة غير شرعية نموا
-يقدر دخله السنوي ما بين 5 إلى 9 مليار دولار سنويا
-تؤشر التقديرات انه يتم الاتجار بما بين 700 ألف إلى 2 مليون ست عبر الحدود كل سنة, يعنى اكتر من واحدة في الدقيقة!!!
-80% من ضحايا الاتجار بالبشر ستات و بنات صغيرة
-يتم الاتجار بما يرقب ل1.2 مليون طفل كل سنة
-ضحايا الاتجار بالبشر غالبا ما بيكونوا من الدول الفقيرة, و الأقليات العرقية, و المشردين و الهاربين كاللاجئين
-البلاد الأكثر شراء هي تايلاند و اليابان و إسرائيل و بلجيكا و هولندا و تركيا و ألمانيا و ايطاليا و أمريكا

المصدر: الموقع ده. على فكرة, الموقع ده خاص بمشروع هايل عن مناهضة العنف ضد المرأة.و الصورة من المدونة دى

Thursday, November 25, 2010

اليوم العالمى لمناهضة العنف ضد المرأة ... 25 نوفمبر

Sunday, November 21, 2010

بلبل حيران ... النخلة اطول ولا القطر اوسع؟

من كم يوم فى العيد, و زى اى مواطن مصرى اصيل, رحت السينما. فيلم "بلبل حيران"
رحت الفيلم عشان كنت مكتئبة جدا و مخنوقة, و تقريبا رحت غصم و اقتدار من اختى ... المهم انى ماعنديش مشكلة اروح فيلم لاحمد حلمى, بالعكس, انا بقيت باحترمه جدا.
افلام آسف على الازعاج و كده رضا و الف مبروك افلام حلوة اوى و عجبتنى جدا. عسل اسود خالص نهائى, بس ده مش موضوعنا.
المهم دخلنا الفيلم فى سيتى ستارز, و زى كل سينمات مصر فى العيد, السينما عبارة عن ملاهى و عيال بتزن و بيلعبوا استغماية. كان فى طفلة جنب اختى ما سكتتش 5 دقايق على بعض اما كان فى لحظة كنت هامسكها انط فى كرشها بس اختى قالت لى "دى طفلة صغيرة يا ايمان"


المهم ...
بعد اسم احمد حلمى, الاسماء كانت كده: زينة ... ايمى ... شيرى
you’ve got mail افتكرت ميج ريان فى فيلم
“'Hi! I'm Kimberly!' 'Hi! I'm Janice!' Don't they know you're supposed to have a last name? It's like they're an entire generation of cocktail waitresses!"

نهايته ... الفيلم بدأ بايمى الدكتورة ذات التخصص الفريد: "عظام و علاج طبيعى" ماعرفش عملتها ازاى دى, و بعدين اكتشفنا ان تفاصيل شغلها كدكتورة اغرب و اغرب... دكتورة بتغسل السنان و تحلق و تلبس العيانين" ... هايل هايل!
الفيلم فى المجمل كان ممكن يعجبنى و يضحكنى. و الفكرة العامة انا شخصيا موافقة عليها جدا. فيلم لطيف و خفيف, و اهم حاجة فيه انه مش بطىء. مازهقتش و انا قاعدة يعنى, بس برضه اتنكدت, ليه؟ بعدين
باختصار (الكم سطر دول فيهم حرق لاحداث لو حد بيزعل من كده) احمد حلمى مهندس ديكور طاقق بيدور على شريكة حياته بالمسطرة و المنقلة. احتار بين النقيضين (زينة و شيرى) و انجذب لمميزات كل واحدة اللى كانت بتعالج عيوب التانية.
انجذب لجنان زينة, البنت المستقلة اللى بتاخد كل قراراتها بنفسها (و ساعات كمان قراراته) و مش بتغير عليه. البنت اللى شغلتها هى الحاجة اللى بتحبها (عزف الهرمونيكا) و اللى حياتها كل يوم فيها حاجة جديدة.  البنت اللى بتجرب كل حاجة و عايشة فى الدنيا بتخاطر و تنط (حرفيا, الهواية بتاعتها كل اسبوع هى القفز بالمظلات) الحاجة اللى بتبسطها... انبهر بيها و حس معاها انه "عايش" و "مبسوط"
بس اتخنق من صحابها و الظيطة بتاعتها ... امتى؟ اما قابل شيرى, البنت المصرية الاصيلة, اللى اول مرة يقابلها كانت و هى بتعيط عشان هو كرئيسها فى الشغل انتقد شغلها و ماعجبوش. البنت الاعتمادية, اللى حتى اما بتتوه بتكلمه عالموبايل فى الشغل عشان يقول لها تعمل ايه. و اللى اصلا كان عندها سواق عشان ماتسوقش, و ماتعلمتش سواقة غير لما هو قال لها و علمها. البنت اللى ماتعرفش اصلا تاخد قرار, الغيارة القماصة اللى فى كل خطوة فى خطوبتها مامتها معاها فى الصورة بالكامل. و طبعا هوايتها (الطبيخ) اللى بيه بتسعد الراجل اللى معاها و هو استمتع جدا باحساس انها محتاجاه دايما اللى ارضى غروره تماما ... استمتع معاها  و حس انه "راجل" و "محبوب"
و فى الآخر قال لايمى الكلمة المهمة جدا "اللى نص الناس فى السينما لا سمعوها ولا فهموها" ... قال لها:
"ينفع تسألى حد النخلة اطول ولا القطر اسرع؟ طبعا لأ ... و لو حاولتى تجاوبى مفروض تقولى (البحر اوسع)"

الى واخداه على الفيلم هو تمثيل زينة ... يا ناس الست دى تشتعل اى حاجة غير التمثيل و تريحنا بقى. انا بقيت حاسة و الله فى احيان كتير انها بتمثل علينا مش لينا, بتشتغل نفسها مش بتمثل. و كنت متغاظة جدا لان الدور بتاعها كان خامة حلوة اوى لو بنى آدمة بتعرف تمثل كانت اديته عمق اكتر بكتير.
و كمان الحبة اللى فى الآخر لو كانوا اطول كان بقى احسن, كانوا ممكن يستثمروا التريك بتاعت انهم بيشتغلوه دى احسن من كده و كانت هاتطلع منها كوميديا موقف حلوة كتير
طب انا زعلت ليه بقى؟
حاجتين:
اولا التلطيش ... ايوة. احمد حلمى فى مشهد كان هو و شيرى مستخبيين من زينة, ضربها بالقلم تلات مرات و الناس بتضحك!!!
حد يفهمنى ليه الضرب بيضحكنا! ما هو طول ما المشهد ده عادى, عمرنا ما هنخلص من المصيبة دى
الضرب مش عادى .. مش عادى .. مش عادى
مش ممكن ابدا يعنى!!
النقطة التانية ... سعادة البطل كان كل ما يفسخ خطوبة يقول للبنت "انا راجل ماعنديش مشكلة, لكن انتى ست و لو اتجوزنا و اتطلقنا هاتبقى مطلقة و ده مش لقب سهل ابدا. اهه تبقى مفسوخة احسن ما تبقى مطلقة"
ايه و البنى ده؟ احنا ليسة بنقول العك ده فى افلامنا؟ انتوا عارفين كم بنت صغيرة و مراهقة كانت بتشوف الفيلم ده؟ كم واحدة مخطوبة شافت الناس بتضحك اما احمد حلمى الكول ضرب خطبيته؟ كم ست متنكدة من جوزها شافت حضرته بينكت على لقب مطلقة؟
انا ليسة هاتكلم اكتر فى الموضوع ده عشان انا اصلا عايزة افهم ازاى مؤلف الفيلم كتب الكلام ده و ليه. بس قلت اديكم فكرة

انتوا ايه رأيكم؟ عندى حق ولا مزوداها؟

Friday, October 29, 2010

لو كنتى اتعرضتى لأي محاولة اعتداء او إيذاء أو اغتصاب ... انتى مش لوحدك


 بصوا ... الكلام مترجم من موقع اجنبى, وهاتحسوا بحاجات غريبة كده, زى ان الست كده كائن ذو قيمة و حياتها اهم من *** و كده يعنى. ما تستغربوش. هم هناك بيحاولوا يتعاملوا على ان المغتصبة دى ضحية, مش هى اللى جابته لنفسها و كده


و افتكرى:
-اللى حصل مش غلطتك
-التعافي من التجربة بياخد وقت
-اللى حصل مش غلطتك
-انك تكونى ضعيفة او مش فى كامل وعيك (لاى سبب) مش عذر مقبول إن حد يتعدى عليكى
-اللى حصل مش غلطتك
-الاعتداء الجنسي بكل اشكاله مالوش اى دعوة لا بالحب,ولا الجنس, ولا الرغبة ... الموضوع بيبقى قوة و سيطرة و عنف ... و رغبة في الإهانة
-اللى حصل مش غلطتك
-لأ يعنى لأ ... التجاوب, اللطافة, الاى كلام اللى الرجالة بتقول عليه  ... مش معناه "موافقة"
-و حتى لو كده, ساعات التجاوب و التعاون حتى بيكون اسلم و اأمن اختيار ... حياتك مهمة
-خدى بالك من نفسك نفسيا و جسديا. كان نفسي اقول لك ان في أماكن متخصصة في كده في مصر, بس للأسف انا ماعرفش (جايز فى, يا ريت اللى يعرف يقول). كل اللى اقدر اقوله لك انك لازم تبعدى عن اى انسان ممكن يلومك, و تقربى من اللى بيحبك بجد, و اللى هايقف جنبك و يسندك. و لو عايزة ابقى كلمينى, انا مش متدربة خالص على الموضوع ده احترافيا يعنى, بس اهه ترغى معايا ... انا لا هاقول لحد, و لا هاقول لك تستاهلى عشان انا عارفة ان اللى حصل مش غلطتك


المصدر  :الموقع ده  على فكرة الموقع ده مفيد جدا ... بصوا بصة كده