خلاص ... مانيش عانس و لا حقود انا عمرى ما كنت اصلا الحكاية كبرت ... و الرفض زاد و الغضب زاد بس السلام مع النفس برضه زاد و بكل سلام و هدوء هاثور ثورتى مش ثورة حناجرو زعيق .. لأ بس خلاص هذه المرحلة تحتاج لثورة ... اذن فهى ثورة ثورة البنفسج! ه
Monday, February 14, 2011
Thursday, February 10, 2011
مطالبٌ الثورة المصرية مِن مَيدان التّحرير
مطالب للاستِجابَةِ الفَورِيَّةِ
1. استقالة رئيس الجمهورية مُحمّد حُسني مُبارك
2. إلغاء العمل بقانون الطوارئ
3. إلغاء جهاز مباحث أمن الدولة
4. إعلان عُمَر سُلَيمان التزامه بعدم الترشح للرياسة في الانتخابات الرئاسية القادمة
5. حل مَجلسي الشعب و الشورى
6. الإفراج عن كل المعتقلين منذ 25 يناير
7. إنهاء حظر التجوّل لعودة الحياة الطبيعية في كل أنحاء البلاد
8. الغاء الحرس الجامعي
9. إحالة المسؤولين عن استخدام العنف ضد المتظاهرين السلميين منذ 25 يناير، والمسؤولين عن أعمال البلطجة المنظمة التي تَلَت 28 يناير للتحقيق
10. اقالة أنس الفقي ووقف التجييش بلهجة التخوين والتهديد في أجهزة الإعلام الحكومية ضد الثورة، ووقف إثارة الكراهية في الشوارع ضد الأجانب
11. تعويض أصحاب المحلات عن خسائرهم أثناء حظر التجول
12. إذاعة المطالب أعلاه في تلفزيون و راديو الحكومة
مَطالبُ الفَترَةِ الانتِقَالِيّة
1. صياغة دستور جديد
2. الحق في إصدار الصحف بلا ترخيص مسبق، و القنوات التلفزيونية و الإذاعة
3. تنفيذ حكم الحد الأدنى للأجور 1200ج – حكم 21606 إداري
4. الحق في تكوين الأحزاب بالإخطار
5. الحق في إنشاء النقابات و الجمعيات بالإخطار
6. تحقيق استقلال حقيقي للصحف القومية و الإذاعة و التلفزيون القوميين بكل ما يتطلبه ذلك من تشريعات و إعادة هيكلة لمؤسسات و هيئات و وزارات
7. إلغاء أداء الخدمة الوطنية في جهاز الشرطة
8. وقف التحكم الامني في الاتصالات والانترنت
مدونون من مصر
Monday, February 7, 2011
Sunday, February 6, 2011
ساعدنا في العثور على زياد بكير
بمناسبة المطالب اللى اتحققت, و النظام اللى خلاص راح. فى شاب زى الفل مفقود من يوم جمعة الغضب و مش عارفين نوصل له خالص
الرسالة بالنص من اخته:
مطلوب معلومات عن أخى زياد محمد بكير الفنان التشكيلى ومصمم الجرافيك بدار الأوبرا المصريه الذى اختفى منذ يوم الجمعه 28 يناير 2011
0168411425 لإعطاء معلومات الرجاء الإتصال بـ
0168411425 لإعطاء معلومات الرجاء الإتصال بـ
ربنا يصبر اهله و يوصله ليهم يا رب
الموقف الحالى
سلامات يا مصريين
بصوا ... هاحكى لكم بعدين عن اللى فات ان شاء الله. اصلى هعيش عمرى كله احكى تقريبا. المهم اللى جاى.
قبل اى كلام, عشان فى عالم غاوية دراما مالهاش تلاتة لازمة ... انا باتكلم بصفتى الشخصية عن رأيى الشخصى و كلامى لا يعبر عن فئة او مجموعة او حركة او اجندة من اى حجم او لون. و كلامى ده اجتهاد شخصى, يا ريت اللى شايف ان فى حاجة غايبة عنى يقول لى و يفهمنى لو سمحتوا.
بقالى يومين بافكر, احنا بنعمل ايه بالضبط؟ ايه اللى لما يحصل هانسيب التحرير؟ - لاون انا مش عايزة اسيبه اصلا, ده انا هافضل عمرى كله ابوس فى الارض دى – المهم ... ايه الخطوات؟
سألت مجموعة من الناس بشكل شخصى بارتاح لهم و باثق فى رأيهم. و قعدت اقرا فى الدستور بتاعنا. بالمناسبة اللينك اهه, و حاولت اشوف اى ريحة اعلام محترم بيتكلم عن الموضوع. اكتشفت ان المزنق فى المحاور دى:
1 الرئيس قفط هو من له صلاحية تعديل الدستور حسب الدستور الحالى
2اى بدائل سواء نائب الرئيس او المحكمة الدستورية العليا او الجيش مالهمش الصلاحية دى
3ده معناه ان اى حكومة ايا كانت من غير رئيس الجمهورية بالدستور الحالى هاتفضل بنفس الدستور لحد سبتمبر
4من غير الغاء قانون الطوارىء و بدون اشراف قضائى على الانتخابات, و بالمنظر اللى شوفناه يوم الاربع, اى انتخابات هاتتعمل وش هاتتزور
5بقاء الرئيس عامل لنا حساسية لانه ممكن جدا اوى خالص يرجع فى كلامه قشطة و يقول لك شعبى محتاجنى غير ان الحقيقة ان الموضوع بقى فيه دم
و عليه, فاحنا قدامنا سيناريو من تلاتة:
السيناريو الاول:
1الرئيس حسنى مبارك بالاسم كده يدى صلاحيات تعديل الدستور للاستاذ عمر سليمان
2الاستقالة او التنحى ايا كان اسمها بقى
3الاستاذ عمر سليمان يلغى قانون الطوارىء و يعدل بالاشراف القضائى على الانتخابات غير التعديلات التانية بتاعت مدة الرئاسة و مراتها
4حل مجلسى الشعب و الشورى
5انتخابات برلمانية جديدة و حكومة جديدة
السيناريو ده معناه اننا خلاص هنفضل على دستورنا و هنقوم ببعض التعديلات فى مواده, و طبعا يوفر لنا استقالة الرئيس
السيناريو التانى
1الرئيس حسنى مبارك يقر بالتعديلات بنفس الترتيب
2 و يحل المجلسين و تقوم الانتخابات و يستمر حتى نهاية ولايته
طبعا هنا فى عدم ثقة فى ان ماتطلعش مظاهرات من اياها و يرجع عشان خاطر شعبه الحبيب الحبوب المهاود
السيناريو التالت ... انسف حمامك القديم
1احنا ثورة يعنى عايزين دستور جديد
2لجنة الحكماء تقوم بالحكم لحد فترة الحكومة الانتقالية ما تخلص
3خلال الفترة دى يبدأ تفصيل دستور من اول و جديد
ده معناه ان فى جهات رسمية زى الوزارات و كده هاتتهنج حبة و ده على انه اوشن موجود لكن اعتقد انه مش قابل للتحقيق بجد نظرا كمان لطبيعة الشعب المصرى الذكورى الابوى اللى لازم يبقى عنده راجل حاكمه يقول له بابا
الفكرة بقى مش فى انهى منهم احسن, الفكرة ان ولا واحد من دول اتاخدت خطوات حقيقية لتنفيذه. الهتاف الرئيسى فى الثورة دى كان ايه؟ الشعب يريد اسقاط النظام ... النظام ليسة موجود. ييجى واحد يقول لى عايزة ايه بعد ماتعين نايب و اباطرة الحزب استقالوا؟
اقول لك ... عايزة حاجة بجد مش كلام
اولا ... عايزة الغاء لقانون الطوارىء عشان انام متطمنة ان النشطاء مش هايتقبض عليهم و نقعد بالتلات ايام مش عارفين هو ولا هى فين. ده احنا كلنا اتصورنا بدل الصورة الف. و مسير الداخلية تنزل, ماهم مش هايجيبوا موظفين من اول و جديد ... و اللى يقول لى ما هو استاذ احمد شفيق تعهد هاقول له "فين وائل غنيم؟" ... اثق فيه ازااااااى؟؟
ثانيا ... عايزة استقالة و محاكمة وزير الاعلام. على الكذب و الافتراء. يعنى كله كوم, و ان الكدب لحد النهاردة شغال كوم تانى. اخرتها الشهداء دول تقول عليهم قابضين؟ دول زى الورد. انا تقول عليا و على اللى زيى بنات مشكوك فى سلوكهم عشان بنبات فى الميدان؟ الستات دى اشرف ستات و قطع لسان اللى يتكلم على ستات مصر. توصل الجرأة للتمثيليات الواضحة و انك تحاول تقوم اهلى عليا و تحاول تكره جيرانى فيا؟ بالكذب؟؟ ازاى اثق فى النظام و الوزير ده ليسة موجود؟ و ايه معناه انه ليسة موجود؟؟
و اه على فكرة, اسامة الشيخ اللى ليسة قايم يفتكر يستقيل النهاردة احب اقول له "مايخيلش علينا" يعنى لو دى حركة عشان تمسكها بعد الفقى احب افكره اننا - رغم انكوا ناسيين ده - اذكى من كده
و اه على فكرة, اسامة الشيخ اللى ليسة قايم يفتكر يستقيل النهاردة احب اقول له "مايخيلش علينا" يعنى لو دى حركة عشان تمسكها بعد الفقى احب افكره اننا - رغم انكوا ناسيين ده - اذكى من كده
ثالثا ... عايزة اعتذار رسمى للشهداء و شكر لاهاليهم و مراسم رسمية لتكريمهم, و اقترح ان يكون ليهم نصب او تمثال فى ميدان التحرير
اهى دى خطوات بجد بقى, و ساعتها "ممكن" "نبدأ" نثق فى اى حد. انا فى التحرير قاعدة فى اأمن مكان فى مصر الحمد لله و ادينا مستنيين "خطوات" مش "كلام و وعود"
و بكرة ان شاء الله قداس الاحد فى الميدان. و زى ما حمونا و احنا بنصلى الجمعة, هانحميهم و هم بيصلوا الاحد ... و الشعب يريد اسقاط النظام
Subscribe to:
Posts (Atom)
