ايمان تريد اسقاط النظام

فى منكم اللى عارف ان شغلى بخ, بس كتير مش عارف ليه.

اصلا – و من زمان – احترامى لشغلى كان بيمنعنى  انى اتكلم عنه لا فى مدونة ولا فى غيره. فكتير اوى مايعرفوش انا باعمل ايه بالضبط. مايعرفوش انى زيى زى ناس كتير فى البلد دى, اتبهدلت من و انا طالبة من شغلانة للتانية بقالى اهه بتاع 5 سنين و اكتر, لحد ما بعد ايه وصلت آخر السنة اللى فاتت انى عرفت مكانى مفروض يكون فين.

الحدوتة بقى, انى كنت فى مكان خاص, معنى بخدمة الاطفال, و لانه مكان تكلفته عالية, فالمكان مطلوب فيه مجهود كبير فى الادارة و التسويق و كده.

بيدار المكان ده بنظام "اربط الحمار مطرح ما يقول لك صاحبه" اه والله

ازاى؟

اول شىء مهم: تأليه المدير او رئيس القسم

تانى شىء: تقديس العميل اللى بيدفع فلوس

تالت شى:لحس جزم الزمايل عشان لحسن يفهموا انى حاجى على اكل عيشهم

و كل ده عادى. بيحصل يعنى.

المشكلة فين بقى؟ فى لما ييجى اللوم عليا انى "فرى سبيريت" او "راسى مرفوعة"

باحترم مديرتى؟ طبعا. باحترم رئيسة القسم؟ اكيد – و لازم مش بمزاجى. بس مش بقدس حد! و دى المشكلة!!!

المشكلة فى الزميل اللى "ينفسن" اما يشوف حد رافض يطاطى, و بيطالب بحقه, و بيعبر عن نفسه, و كمان ممكن فى احتمال حقه يجى له. و هو اللى بقاله سنين راسه محنية اما خلاص بقى ده شكلها. يعنى حتى لو محدش حيلومه, هو مايعرفش يرفع راسه.

و طبعا المحاولات كتيرة فى "تنتيف ريشى" من تقليل راتب او زيادة الاعمال و المهام بنفس الراتب او توقيف ترقية بناء على "كونفليكت اوف كاريكتير" اللى هو من الآخر انتى مش عاجباهم عشان مش لاحسة جزمهم فمعلهش بقى هندوس عليكى و نوقف ترقيتك دى و نخليكى بنفس المرتب و نزود عليكى شغل تانى – و معلهش بقى!!

المصيبة فى ان  اى حد غيرى كان غالبا حيقبل!!

و ده اللى مخليهم متخيلين ان ده اسلوب ممكن يستمر. و بقاءهم جميعا ك "نظام" يتطلب و يستلزم انى اكون براه. لانى لو اعترضت و طالبت ب "التغيير" هم مش حيستمروا اصلا.

اللى فاضلة فى شغلتها عشان بتسبح ليل و نهار برئيسة القسم – طبعا لازم تنفسن و تكره وجودى اساسا!

اللى حاول و طاطى عشان يمكن ماعرفش امتى يبقى يعرف يعلى, و لقى ان الراس اللى بتوطى مابتعلاش, لازم حيقاوم وجودى تماما.

اللى ادارته مبنية على هو كده و ان كان عاجب و انا "ناوى" ان شاء الله اعوضها لك بعدين, طبعا لازم يرفضنى اما يلاقينى بارفض انى اتنازل عن "حقى" .... "حقى" .... "حقى" !!!

هى الكلمة دى --- هو انا كمان حيبقى لى "حق"؟؟ خبر اسود!!

و حاطالب بيه كمان؟؟ و يا اما آخده يا اما مش عارف ايه؟؟ صلاة النبى. ما داهية لاكون فاكرانى بنى آدمة بقى.

لالالالالا – الكلام ده ما ينفعش, انا اللى زيى لازم "يخرس" و كفاية بقى. مش كفاية ان القسم اللى انا فيه متأثر؟ مش كفاية ان "الحال واقف"؟ مش كفاية ان "الشغل مش ماشى"؟

حق ايه اللى انا بادور عليه ده ان شاء الله!!

حاليا انا فى البيت, و مفيش شغل, و الاطفال واحشنى جدا, و ماعييش فلوس, و مش عارفة انزل الميدان, و متنيلة على عينى --- بس مش متضايقة انى عملت كده, لانه تمن بادفعه لمطالبتى بحقى, و تمن انا سعيدة انى بادفعه.

هو التغيير حييجى ببلاش؟

هو الاختيار من غير تمن؟

انا بطالب بالتغيير --- و مش حاسكت

حمزة نمرة - الميدان

كنا مش حاسين بقيمة -- والأمل موضة قديمة
بس في ثانية افتكرنا -- إن بلادنا دى عظيمة

ارفع راسك انت مصري -- انت واحد من اللي نزلوا الميدان
ارفع راسك انت مصري -- إنت وقفت جنب جارك في اللجان

ارفع راسك انت مصري -- انت رجعت المصري بتاع زمان

....

شايف الدنيا بشكل تاني -- السما صافية, سامع اغاني
واللي اتغير فيا هو-- طعم الحرية في لساني

ارفع راسك انت مصري -- انت واحد من اللي نزلوا الميدان
ارفع راسك انت مصري -- إنت وقفت جنب جارك في اللجان

ارفع راسك انت مصري -- انت رجعت المصري بتاع زمان

....

بيقولوا مصر هرم ونيل -- وبينسوا المصري الأصيل
اللي ساعة الجد دايما -- يقدر يعمل المستحيل

ارفع راسك انت مصري -- انت واحد من اللي نزلوا الميدان
ارفع راسك انت مصري -- إنت وقفت جنب جارك في اللجان

ارفع راسك انت مصري -- انت رجعت المصري بتاع زمان

ارفع راسك فوق انت مصري

مبادرة امسك اوشااااعة

بقالنا فترة طويلة متبهدلين من موضوع الكلام على تويتر اللى مش باين له لا اول من آخر و مش عارفين نصدق مين فين ازاى. و اللى لفت نظرى للموضوع ده من زمان كان مهند فريد.

و اول امبارح فى ورشة عمل عن التدوين و المش عارف ايه, مدون ارمنى اسمه هايك يا عيني كان هيتجنن من  المصداقية الصفر اللى موجودة حاليا.

غير ان بسم الله ما شاء الله عليه المنسق اللى جه من شبكة رصد كان فخور اوى و هو بيقول ان اخبارنا أحيانا تعتمد على الاشاعات لكن إحنا بنحاول نتأكد --- لأ برافو!

النهاردة بقى, و أثناء اللى كان بيحصل في التحرير, و اللى سموه ناس تويتر ب "موقعة الكنكة" لقينا الموضوع كبر, و وصل لان شخص يدعى خالد اندبح في التحرير ... يا سلااااام؟!!

و "قالوا" انه في مستشفى المنيرة, راحت رنيم نزلت مستشفى المنيرة مالقيتش حاجة. و اللى يوقل انه كويس بس مدبوح, و اللى يقول انه بس مطعون, و اللى في احمد ماهر, و اللى في الفرنساوي

اتنرفزنا طبعا. و بعدين طارق شلبي طاح بقى و قال الكلام ده:

فانا لميت كل ده فى فكرة كده. و هى نوع من انواع الرقابة الداخلية مننا فينا على الاخبار اللى بتنتشر على تويتر, عن طريق الاصرار اننا تنعرف المصدر بتاعها, و اللى يطلع بيقول اشاعات نجرسه و نشاور عليه عشان الكل يعرف انه اوشاعتاجى – على رأى احد الاقتراحات على تويتر – و اعتقد دى تكون بداية كويسة.

الهاشتاج احنا عملنا تصويت صغير كده, و كانت الاختيارات رسيت يا اما تويت رومر, يا اما اوشاعتاجى

#twitrumor and #Osha3tagy

و اختارنا تويت رومر - و اللى كان من اقتراح امين اللى عايز جايزة هههههههه -  عشان هينفع عربى و انجليزى و كله

نيجى للخطوات:

دلوقتى مثال: "النور قطع فجأة فى شارع محمد محمود"

يبقى نقل الخبر على تويتر:

1يا اما واحد هناك مصور صورة و حاططها على تويتر

2-يا اما واحد هناك (فى الشارع نفسه مش فى باب اللوق) و بيتويت من الشارع على مسئوليته

3-يا اما واحد كلم اخوه اللى هو عارف انه فى الشارع و قال اخويا بيقول لى كده و يتحمل مسئولية الكلام

و يا ريت مانزعلش من بعض فى الكلام ده. و بلاش حوارات انا اقول اللى انا عايزاه ما تنزلوا تشوفوا بنفسكم يعنى, القصة مش كده. الموضوع ان انتشار العك على تويتر زاد اوى مؤخرا و فى حاجات ماينفعش.

يبقى بعد كده, اللى يقول خبر يقول مصدره عشان المصدر يتحمل مسئوليته. و يا ريت كلنا نشارك فى ده. و محدش يعمل ري تويت لحاجة من غير مصدر عشان هو كده بيساهم فى انتشار اشاعة.

يا رب

مطلوب مصرى -- مش مطلوب زعيم

كانت ممكن تكون هايلة لولا:

1- الكلمات مش دايما واضحة
2- مفيش ستات فى الكليب غير بنتين فى آخر لقطة
3- مرفوض "مطلوب دكر" دى

هو احنا مش هبطل الغلطات دى بقى؟ بعدين هى ليه الفرق اللى من النوع ده, لازم تغنى بنبرة الصوت دى؟ زى ما يكون فى هوا فى التسجيل. ليه مش بيغنوا بصوتهم عادى؟ و ليه بيحصل كتير انه يكون صعب الواحد يفهم بيقولوا ايه؟

و ليه اللى بيغنى فى الكليب مبوز و بيلعب فى مناخيره كل شوية؟

ثم ان والله نفس اللى قلناه فى كليب صوت الحرية برضه اما طلعوا بنت فى آخر الكليب و بنت فى نصه ... يا جماعة والله البلد دى فيها ستات. موجودين فعلا يعنى. و كمان موجودين – و مؤثرين – فى الثورة.

انتوا يعنى مش واخدين بالكم منهم عشان بتغضوا البصر؟ كتر خيركم برضه

غير ان كفاية بقى علينا فكر الزعامة و الريادة و الكبس ع الانفاس ده. احنا عايزين مصرى يستوظف رئيس جمهورية لمدة 4 سنين و احتمال نجدد له العقد بتاعه. بس كده

لا زعيم ولا قائد

ارحمونا بقى من اللى انتوا عاملينه ده. محسسنى ان البلد لو كل حاجة فيها زى ما هى بس عندنا ريس خلاص مش مشكلة. عاملين زى المتطلقة المجنونة اللى ماشية مهروشة فى الشارع هتموت و تجيب اى راجل تروح بيه للجيران. يعنى انا بقالى 4 سنين بكتب للستات ماتبقاش كده, يقوم الشعب كله رجالة و ستات يتعدى؟؟ نصيبة ايه دى يا ربى!!

 

و اكيد مش "دكر" ... ايه التعبير المستفز ده؟؟  ما تقولوا مطلوب بلطجى احسن. اهه ع الاقل بلطجى دلوقتى بقيت كول و بنحب نقولها على نفسنا.

يعنى عنصرية و سماجة كمان؟

يع يعنى!!

الرحمة يا رب من فرق "عايشين دور الاجانب" دول

و آدى لينك الفيديو من الفيسبوك عشان اتشال من اليوتيوب 


https://www.facebook.com/video/video.php?v=237250099636094

مفيش عنوان ... شوفوا للآخر و بس