Monday, August 1, 2011

و ايه يعنى؟؟ مالكوا؟؟

مستغربين ليه؟


مستغربين ليه ان اللى بيداين عشان يعمل فرح ابنه فشخرة و انعرة فرحان فى اللى ناموا ع الرصيف بيطالب بحقه و حق اخوه؟ غريبة اوى؟
مستغربين من اللى اتعودت كل واحد معدى بالعرض جوا و برا بيتها يتحرش بيها و يهينها و يمد ايده عليها ولا اكتر ولا اقل, تبقى فرحانة فى اللى وقفت لجنة شعبية تفتش اللى داخلين على اخواتها و اهل اخواتها اللى ماتوا؟ مستغربينها اوى؟؟
مستغربين اوى من اللى اكل تهزيق عمر من مديره فى شغلانة لا بتديله مرتب ولا خبرة ولا جاه ولا حاسس بنفسه, اما ما بقاش فى انسان اصلا, و ماشى مطاطى راسه فى الشارع و المواصلات و كل حتة... مستغربين اوى ان ده مش عاجبه ان فى اللى مش ناسى حق اللى مات و هو واقف قدام الرصاص و البطش و الظلم؟
انتوا ناسيين؟
ناسيين احنا مين و جيراننا مين؟ و اهلنا مين؟
اهلنا اتفرجوا على كامب ديفيد و سكتوا ... و احنا هنتفرج على اعلان فلسطين الهزيل فى سبتمبر الجاى
اهلنا دول اللى منهم كتير رضى بالذل للخليج عشان القرش ومش مهم المهانة و مش مهم التهزيق, و مفيش مانع تتحول سمعة المصرى فى كل حتة لنصاب و هلاب و منافق و عبد للدينار


انتوا زعلانين ليه يا عبط؟؟ ده احنا بنطالب بحقنا, و بننضرب عشان حقنا, و بنكافح عشان حقنا.
خسرنا معركة النهاردة؟ و ايه يعنى؟؟ اخرة الدنيا؟ لا والله
مش عايشين؟؟ يبقى مش هنبطل. و صراعنا مستمر للحق و العدل طول ما احنا عايشين.


مبارك مش عايزين يحاكموه؟ مش هنسكت
قتلة الشهداء مش عايزين يحاكموهم؟ مش هنسكت
بيخوفونا و يقبضوا كل شوية على حد مننا؟ مش فاهمين اننا شوفنا الموت و ماخوفناش

ماتبصوا كده لورا
انتوا مستهونين بروحكوا؟؟
ده احنا وقفنا قدام الغاز مامشيناش. وقفنا قدام الرصاص و انضربنا من القناصة ماخوفناش. هجموا علينا بالمدرعات ما خوفناش. قبضوا ع البنات و اتهموهم فى عرضهم ماتهزيناش.
ايه يعنى ضربونا النهاردة؟؟ مش اول و لا آخر الضرب


و افتكروا بقى ... المعركة مش قصيرة, مش كم شهر
النظام ده مسك راس الناس و مناخيرها فى الارض تلاتين سنة. فى كتير فعلا والله خايفين من رفعة الراس.
العسكر دول حكموا البلد من 1952 اما رضعوا الناس ان مالهمش غيرهم, و الا هجوم التيار القريشى حييجى ... ولا انتوا مش عارفين ده؟

اقروا تاريخ ... فى تغيير جذرى عمره حصل فى يومين؟؟ شهرين؟؟ سنتين؟؟
ده بياخد سنين من ناس مؤمنة ايمان حقيقى من القلب ماتهزوش قبضة الظلم ولا يعكر صفوه قبح الفساد.
هى اللحظات دى اللى ماينفعش احنا نتهز فيها ابدا.

عارفين احنا مين؟؟
احنا اللى كرهنا نظام حفظ الحمير فى الجامعة و حسينا اننا كائنات فضائية فى وسط الجموع, و قالوا علينا مافلحناش فى التعليم
احنا اللى رفضنا ضرب الرسايل فى الدارسات العليا, و قالوا علينا عاملين فيها فلاليط و مش فاهمين فى حاجة
احنا اللى كل اما نروح نحاول نشتغل يقولوا علينا مضاريب عشان مش بنقبل الذل للمرتب من واحد كل اللى عنده فى الدنيا لقب مدير
احنا اللى لما بنتجوز مش بنرضى نخضع لهطل الجهاز و القايمة و هو عليه ايه و هى عليها ايه, و لازم اول عيل بعد 9 اشهر من الجواز
احنا اللى رفضنا الشغلانة و السلام و, الجوازة و السلام, و العيشة و السلام
احنا اللى اغلبنا اهاليه مش فاهمة هو عايش بيعمل ايه اصلا
احنا اللى محدش فاهم احنا بنشتغل ايه اساسا
احنا اللى بيسموهم الضايعين ... التايهين ... الحالمين
احنا الاحرار
و حنفضل احرار
و حنخلف احرار
و حنربى احرار
و حنموت احرار

ان شاء الله ... ان شاء الله
ربنا هو الحق ... ربنا هو العدل ... دلوقتى وقت الايمان بالحق و العدل

خسارة معركة مش معناها ابدا خسارة الحرب

و مش ناسيين ... و مش يائسين ... و مش ساكتين ... و مش خايفين

و ... الشعب يريد اسقاط النظام

Friday, July 29, 2011

الامل


الأمل مش عبط
الأمل مش قلة نضج
الأمل هو الإيمان
الإيمان الحقيقى من جوا القلب
إن أكيد ربنا هو الحق – عشان كده الحق حيرجع
و إن أكيد ربنا هو العدل – عشان كده العدل حيتم


خلى عندك إيمان – خلى عندك أمل

Thursday, July 28, 2011

انا اتخنقت



اول حاجة, باعتذر عن النبرة السلبية فى كلامى اللى جاى. بس ربنا اللى عالم انه فعلا غصب عنى.
انا يا جماعة فعلا مخنوقة. مخنوقة من كل حاجة و من كل الناس حتى انا.

من ناحية, كلوا بياكل فى بعضه خلاص. و بعد ما كنا فعلا بنهتف "ايد واحدة ... ايد واحدة" و احنا فعلا مش عارفين مين جنبنا, بقينا احزاب و فرق و تكتلات.

يوم 28 يناير, انا طلعت فى مسيرة كان ابرز من فيها فى الاول الاخوان المسلمين, كنت طالعة من مظاهرة مسجد الاستقامة فى الجيزة, و شفت منهم كل خير و وطنية. من ان ولا واحد فيهم نطق اصلا و قال انه اخوان, بالعكس, المرة الوحيدة اللى سمعت كلمة اخوان كانت فى لحظة واحدة اما كبيرهم كان واقف وسط الغاز قدام جامعة القاهرة و هو باصص ورا بيصرخ "يالله يا اخوان, ماتخافوش!"
 ...
فجأة الاخوان اللى كانوا فى منتهى الاحترام فى الميدان مع الكل, و كنت بدافع عنهم لو لقيت حد بيشكك فى نواياهم. هم نفسهم الاخوان اللى هببوا اللى هببوه ساعة الاستفتاء, و نيلوا الدنيا ع الآخر ...
و اقعد انا بقى اسمع من كل واحد من اللى عندهم هرش الاسلام, كلام مهبب من عينة اسلمة مصر و احتلال مصر الفكرى و ايران و السعودية هيموتونا كلنا.
و دلوقتى الاخوان مع السلفيين مع باقى اللى بيسموا روحهم اسلاميين, بقى عندهم حالة من "هوس الانتخابات" زى ما يكونوا كاشفين الغيب او "حد" ضامن لهم مكسب محدد و ده اللى مخليهم بهذا الاصرار العنيف ان الانتخابات بأى شكل تتعمل و خلاص.

....

و من ناحية تانية اعضاء الاحزاب بقوا مشغولين بالشغل العجيب الغير مفهوم, و كل واحد فيهم له خيمة فى الميدان, و كل واحد فيهم بيحاول يعمل اى حاجة عشان يضمن له كرسى فى البرلمان.
و حزب الوسط اما لقى انه لعبة احنا مالناش دعوة بحد و بتوع وسطية مش نافعة, اشتروا رضا الاخوان – اللى هم اصلا منهم – و اتهموا الناس فى شرفهم و خونوهم و فلوس و هبل من ده.

....

و النشطاء مجهولى النسب بقى – اللى هم يعنى مش اعضاء فى حاجة دول – قربوا ياكلوا بعض على تويتر.
من مش عارف مين بيشتم مين, و مين بيتشرط على مين, و مين بينفسن على مين.
و اللى راحوا عملوا موضوع تويت باك, و اللى مش عاجبهم فقلبوها خناقة
و اللى قرروا ان الاخوان خط احمر مايتشتموش, فبرضه اللى مش عاجبهم اعترضوا, و برضو شتموا فى بعض
....
و مع الوقت, و صعوبة الموقف, و وضوح ان عصام شرف مالوش لازمة و ان القرارات بتيجى من عند المجلس فبقى واضح اننا لازم نطالب المجلس, تضامن الناس بقى اقل بكتير. مش ناقصة كمان ناكل فى بعض!
....
و جروب الاسلاميين يقرروا يتشرطوا انهم عشان ييجوا الميدان من غير مشاكل يبقى مفيش كلام على المجلس و مفيش شتيمة فينا. ماشى الشتيمة مفهومة – بس انا مش فاهمة يعنى, هانطالب مين بايه لما مش هنطالب المجلس العسكرى؟؟
و معلهش اللى انا فاهماه ان الاعتصام تانى اهم مطلب له بعد حق الشهداء و القصاص, هو لا للمحاكمات العسكرية للمدنيين. يعنى ايه بقى؟ نطالب بمنع المحاكمات العسكرية لمين؟؟ وزارة الزراعة؟؟ و يعنى ايه يتشرط على الناس يقولوا ايه دى اصلا؟
انا افهم ان المطالب اللى عليها خلاف ماتتعملش يوم الجمعة اللى مطلوب فيه الوحدة. ماشى
انما بس افهم, اما مش هنطالب المجلس هانطالب مين؟؟ والله ما فاهمة فهمونى.

....

و المجلس ده كمان. الله يسامحكوا واحد واحد على اللى عملتوه ده
انتوا في ايه؟؟ هو انتوا مش عارفين قيمتكوا عند الناس؟؟ ده احنا كان املنا فيكوا بعد اللى حصل فينا. يوم ما صرخنا و طلعنا من هدومنا و انطلقنا فى الشوارع قدام الرصاص و الغاز و كله, كنا بنهتف انتوا فين!
انتوا ناسيين زمان اما كانت العيال الصغيرة تحلم تبقى ضباط؟؟ انتوا كنتوا حاجة و املة كبيرة اوى. و البدلة كان ليها هيبيتها و احترامها.
خيبتوا املنا الله يسامحكوا
ولا عارفين تطلعوا فى التليفزيون تقولوا كلام يطمن الناس
ولا عارفين تفهموا الناس فعلا محتاجة ايه
ولا فاهمين اصلا اللى حصل ده حصل ليه من الاساس.

و ابسط دليل:
بذمتكوا فى فى الدنيا كلها منطق يقول, ان الشعب اللى كان اصلا بيطلع نكت على روحه انه سلبى و مش عايز حاجة, يطلع الطالعة دى و يصرخ من مصارينه فى يوم عيد الشرطة اعتراضا على انتهاك الكرامة و التعذيب و قلة القيمة ... تقوم الشرطة العسكرية عاملة نفس الموضوع و اكتر؟؟؟
لأ و كمان محاكمات عسكرية ... خبر اسود!!
ده احنا قلعنا هدومنا و صرخنا و خسرنا اشغالنا و عملنا اللى عملناه عشان كرامتنا ترجع لنا, تقوموا انتوا تعملوا كده؟؟
و كمان تكذبوا فى الاعلام؟ و تخونونا؟؟ و تطلعوا اشاعات على ناس مننا؟
عايزين تفقدوا مصداقيتكوا؟ حصل
عايزين تفقدوا هيبيتكوا؟ حصل
الفساد كان فى كل البلد و احنا عارفين. بس خرق النظام اما ييجى من اهل النظام يبقى عك
تانى
خرق النظام اما ييجى من اهل النظام يبقى عك
افهموا بقى. افهموا بقى. انتوا مفروض حاجة كبيرة ماتهزقوش روحكوا كده.
و اشتروا الناس, عشان مفيش اهم ولا ابقى من الناس. و الناس اللى بتتكلم. المخروسين حيفضلوا مخروسين. افتكروا ان تلاتين سنة عدوا, و فى الآخر اللى عمله نظام مبارك ادى لأيه؟؟

و بعدين سؤال معلهش. انتوا بتزعلوا اننا بنعامل الجيش ككتلة واحدة. ماشى
انا على قد فهمى ان كل النيلة السودة جاية لنا من ناحية الشرطة العسكرية, ايه بقى؟؟
هى الشرطة العسكرية دى فوق المساءلة؟؟ مالهمش كبير يعنى فى البلد؟؟ مفيش حد يحاسبهم على اللى بيهببوه ده؟؟
كبير الشرطة العسكرية فى البلد دى مين يا مجلس؟؟؟
.....

و اهالى الكنب و الشلت و محبى التشاؤم:
ارحموا امى – ارحموا البلد – ارحموا نفسكوا
نفسى اعرف و افهم هو انتوا هاتنبسطوا اما البلد تبوظ؟؟ هاتفرحوا اما تخرب بس عشان تطلعوا صح؟؟
متربصين لمين؟ لولادكوا؟ لأهاليكوا؟ لبلدكوا؟؟
للدرجة دى فقدتوا الامل؟ للدرجة خيبة الامل عندكوا كلت روحكوا؟؟ ميتين ... انتوا اتحولتوا لميتين
طيب ايه؟ مفيش امل؟ مفيش اصلاح؟ بايطة بايظة؟ نروح نموت؟؟
عايزين ايه؟؟؟ عايزين بس نرجع للبهدلة اللى فاتت عشان ترتاحوا انكوا حتتبهدلوا و خلاص؟؟
انا مش باتكلم على اللى كانوا كاسبانين من الوضع اللى فات عشان منطقى انهم يتصيدوا للى بيحصل و يتمنوا فشله
انا باتكلم على اللى اتبهدلوا و جاعوا و اتشردوا و مالقوش شغل و اتهاااانوا
على اللى انداس عليهم فى طوابير العيش
على اللى استلفوا عشان يجوزوا عيالهم
على اللى عيوا من المية البايظة و الاكل المسرطن
على اللى بقى اكبر احلامهم يسافروا يتهزقوا و يبقوا عبيد للقرش
فى ناس فى بلدكوا بتحاول. زعلانين منهم اوى كده ليه؟؟ بتتمنوا لهم الفشل و متربصين ليهم ليه؟؟
يا ساتر يا رب ... فى نفوس مريضة بالشكل ده؟؟
دلوقتى الوضع منيل .. ماشى
عندكوا حل؟؟ فكرتوا تحاولوا؟؟ حاولتوا تعملوا حاجة؟؟
ولا قاعدين بس للتبكيت و تهبيط الهمم؟؟
الحجة هى الفوضى؟
اصلا بقى عشان تبقوا فاهمين:
الطبيعى و المنطقى و اللى يقلق لو ماكانش حصل, هو الفوضى اللى حاصلة دلوقتى.
ده لو ماكانش حصلت فوضى بعد اللى حصل, كان يبقى معناه انها حاجة مترتبة من جهة و سيناريو جاهز بيتنفذ.

ايييييييييييييييييه؟؟

عايزين ايييييييييييه؟؟ اروح آخد تلاتة اصحابى من الميدان و انتحر و اموتهم عشان ترتاحوا و البلد تخرب؟؟ هاتنبسطوا كده؟؟



انا اتخنقت والله العظيم

....

و آخر حاجة حاقولها:

حسبى الله و نعم الوكيل فى اللى يموت الامل, و اللى يهبط العزيمة, و اللى يحبط الشباب, و اللى يبقى مصدر للسلبية و اليأس و الكلام اللى مالوش لازمة ... بجد حسبى الله و نعم الوكيل فيكوا كلكوا
انا عمرى ما كنت محنوقة كده – قلبى مقبوض و حمل على صدرى


اللى عنده كلمة عدلة مفيدة يقولها – اللى ماعندوش يرحم



الرحمة .... انا اتخنقت!


Sunday, July 24, 2011

يوليو 23 المتنكر فى يناير 25



بصوا ... انا متفائلة. اه والله العظيم متفائلة

صحيح انا متلخبطة جدا دلوقتى و مش فاهمة حاجات كتير بس برضه. و بافكر معاكم و انا باكتب

اللى حصل النهاردة ده و لله الحمد بيفكرنى جدا جدا بيوم 25 يناير بليل. ناس نزلت تطالب بحقها, عدد مش قليل, هجوم عنيف
هوبا – ضرب غاز
هوبااا- عنف زيادة
هوبا كمان – حصار و رصاص
و الله الله – ناس لابسة مدنى عادى "معروفين اعلاميا بالبلطجية" – يمارسوا اقبح اشكال العنف على المتظاهرين السلميين.
و احلى حاجة بقى – فى اعتقالات كمان صلاة النبى
و المستشفى الحكومى الجامعى ترفض تسلم المصابين
و المصاب اللى عرف يخش منهم, اتقبض عليه من سريره
و بنات تتحبس جوا المدرعات و تتكهرب - المعلومات اللى عندى هى حالة واحدة و بادور لها على تأكيد.
و النت كمان بطىء - بس دى حاجة مش عارفة طبعا اتأكد منها

و ايه بقى؟ كذب و افترى فى الاعلام. و حرب اعلامية بنت كلب, و 6 ابريل واخدة فلوس من اسرائيل, و البنات هناك معشمينهم بعرسان, و الشباب بشكل عام اجندات.

و عمرو مصطفى يطلع هو و ازبايدر من روكسى بان 6 ابريل اسرائيليين
و اما هى اسرائيل كخة هى و فلوسها, ليه ناقضتوا الحكم بتاع منع تصدير الغاز لاسرائيل؟؟

نيجى للمهم. اللى نفع فى 25 يناير ايه؟

ان الناس كان بقالها سنين معبية. 30 سنة من مبارك, و 10 سنين من العادلى, غير عم جيمى اللى كان حيورثها, غير عز اللى اشتراها ... الخلاصة ان الناس كانت هاتطق فعلا من الداخلية و من مبارك و من صور العالم ولاد الحرامية دول.

الوضع دلوقتى مختلف. ليه؟
اولا: فى جزء مش قليل من الناس فعلا مش مصدق ان المجلس العسكرى فاسد. و الجزء التانى حيقاوم بشدة انه يصدق لو جيبت له فيديو فيه طنطاوى بيقول لعنان اقتل احمد ماهر و اصحابه, برضه هيقولوا لأ اكيد فى حاجة غلط, و اكيد ماهر ده جاسوس.

الناس فى مصر فيها كتير اصلا عنده نوع من انواع التأليه للكيان العسكرى. عشان تقول له انه مفترى و تطالبه يقف قدامه, محتاج مجهود. ... هى مش مستحيلة, بس محتاجة اننا نركز فيها.
غير ان الحرب الاعلامية المرة دى شرسة و فيها استغلال للى ناس كتيرة اوى خايفة منه ... و هو العمالة الاجنبية الممولة لاحتلال البلد. هو كلام انا و انتوا عارفين انه فاساكونيا, بس نقنع الناس ازاى؟
اللى حصل من 25 ل28 هو حشد و تنوير الناس للى بيحصل. انا فاكرة يوم 27 بليل كنا ماشيين فى وسط البلد 9 بالضبط, 6 ستات و 3 رجالة. و شوية و جرى ورانا العالم اياها اللى عمرها ما بتلبس يونى فورم و دول كانوا اشرس حاجة على فكرة.

انا كمان فاكرة ان ايام ال18 يوم بتوع الاعتصام, كان هوس كل سواق تاكسى اركبه "طب انتوا عايزين مين بدل مبارك؟" و لما اقول له مش مهم ده دلوقتى مش بيعحبه.
هم كده. الناس فيها كتير كده. عايزين حد فوق يقول لهم تيت و عبيد. و لما نقول حتخبط فى الداخلية و فى الجيش, حيخاف كتير منهم من احساس اللافوقية ده. ايه ده؟ يعنى مفيش بابا؟؟
ايوة. مجتمعنا ابوى لو مش واخدين بالكوا. و محتاجين كيان عظيم هلامى يأمر و يطاع.

هنشجع ده ؟؟ لأ طبعا
بس نواجهه, مش نتجاهله

---------
و انسوا بقى حوار اهالى العباسية ده. مفيش اهالى حتنزل على متظاهرين بمولوتوف مهما كانوا ضدهم. ماينضحكش عليكم باللى كانوا عايزين يقولوا يوم 2 فبراير انها ضرب بين معارضى و مؤيدى مبارك. بلاش استكراد
طب استقرار ماشى, انما كمان استكراد؟؟
ده الاهالى كانت بترمى للمتظاهرين المية من الشبابيك. ايه الاهالى اللى عندها سكيزوفرينيا دى؟؟

------

هل عملنا اللى علينا ان الشارع عارف اللى فى التحرير مطالبهم ايه؟
هل وصل لهم ان لافتات التحرير لم تذكر المجلس العسكرى الا فى المطالبات بمنع المحاكمات العسكرية؟
هل الناس عرفت ان الاعتصام بقاله فترة و مفيش اى مطلب تمت الاستجابة له؟
لو عارفين يعرفوا اكتر, محتاجين نرجع كتير. انا بافكر معاكوا بصوت عالى حاليا
-------------


فين الامل؟
اولا: الحق معانا. احنا عايزين ايه؟ نفتكر طيب بنعمل كده ليه
-محاكمة قتلة الثوار
-محاكمة مبارك
-محاكمة الفاسدين
-و لا للمحاكمات العسكرية
-و تطهير الداخلية و القضاء
قلنا, جعرنا, اعتصمنا, بيتنا فى الشارع. حد عمل اى حاجة؟ غيروا كم وزير زى بعض و اللى كان عدل شالوه!!!!
حلو اوى
هنقوم تانى. و نتلم تانى. و نقاوم تانى و نطالب بالحق تانى. بس محتاجين حاجتين:
1الناس محتاجة تفهم اكتر و دى مسئولية علينا و واجب كمان لو فاهمين ان احنا فاهمين اى حاجة
2و احنا محتاجين نفهم ان دى مش شغلانة كم يوم و حتخلص بسرعة فيجى لنا احباط اما يبقى مفيش نتيجة مرضية سريعة.


نرتب اوراقنا عشان نعرف نقوم تانى و نقوم صح.
التحرك على الميدان دلوقتى مهم جدا. و التواجد (السلمى) فى الميدان مهم جدا جدا. الميدان الخميس اللى فات انا كنت فيه, و ماكنتش مبسوطة خالص من الوضع ف الميدان, ماكانش مطمئن نهائى. و كتير حاسين ان فى حصان طروادة بيتجهز له فى الميدان.
-يا ريت لو تقدر تكون فى الميدان تكون هناك. الوضع فعلا يستلزم ده
-اللى مش هيكون فى الميدان يتكلم مع الناس
ما قدمناش حاجة تانية.


افتكروا بقى:
التحرك فى مجموعات من 4 او 5 على الاقل
نكون جاهزين اننا نبقى خفاف, شنطة خفيفة كروس, جزمة خفيفة. البطاقة فى الجيب الورانى,و الموبايل فى الجيب الورانى التانى و الشاشة للجسم عشان لو وقعت ماتتكسرش الشاشة زى ما حصل لى
الفلوس ماتكونش كتير, الحمد لله مفيش احتياج ليها اوى.
و يبقى معاك في الشنطة رباط شاش
و لو لا قدر الله بقى فى حاجة لجرى, افتركوا تجروا ع الجناب بتاعت الشوارع عشان لو فى قناصة
و مش هاقول لكم على الغاز بقى ... احنا عملنا منه دماغ خلاص هههههههه

--------

الهاشتاج بقى: بلاش الفرقة دى
#Jan25
#Egypt 
#Tahrir or Alex or Suiz, etc
---------

عمرو غربية اتقبض عليه من الشرطة العسكرية – ربنا معاه. و ربنا ينتقم من اللى قبض عليه



فى امل يا جماعة – الحكاية صعبة مش سهلة بس فى امل – مع بعض هنقدر و هنكمل ان شاء الله
شوية نشاط فى الشارع
حبة ايجابية فى التعامل
و يا ريت يا ريت يا ريت --- بلاش احباط

طول ما احنا عايشين, و طول ما معانا الحق. ان شاء الله الأمل معانا