Friday, June 1, 2012

ليه انتخبوا شفيق؟


فى عز ما كنا فى صدمة من الأرقام اللى رشحت شفيق كنت بافكر فى ايه اللى كان غلط و اتعمل عشان يحصل كده. رحت بذهنى الى كل سيناريو ممكن يحملنا ولو جزء من المسئولية على سبيل نقد القات و محاولة فهم الحقيقة
بعيدا عن الفجوة بين السوشيال ميديا و العالم الواقعى – اللى اتكلم عنها و هراها كلام كل الزملاء من مدونين و نشطاء و كله – فى اسباب اخرى اكيد مش ممكن يكون سب واحد
بدأت افكر فى اشخاص بعينهم ممكن يكونوا فى دايرة معارفى و اعرف انهم على نية او ممكن يفكروا فى انتخاب شفيق. الناس دى ليه عملت كده؟
فى اجابات سهلة و سريعة احنا عارفينها بس مش عايزة اجرى عليها
فى تفسيرات اخرى و هى النزعة فى البقاء مثلا. احنا – كل من آمن بالثورة – ماسابش فرصة تيجى قدامه من غير ما ينتهزها فى انه "يعلِّم" على الناس دى، و كل الخطاب اللى من عينة "يالله يا عبيد" اللى اكيد ماخليتش الناس دى تحس انها مرحب بيها حتى لو فكرت و غيرت رأيها
يعنى فى كتير منهم دلوقتى متأكدين ان نجاح الثورة معناه انهم ﻻ هيعرفوا يشتغلوا وﻻ يبيعوا و يشتروا ول يمشوا فى الشارع من غير ما يكونوا مستهدفين
والناس دى نوعين: نوع بالفعل كده، و مش افترى مننا ولكنها الحقيقة، امثال الوزراء السابقين اللى اسماءهم مرتبطة بشكل مباشر فى مصايب البلد، و كل ضباط الشرطة و امناءها و العاملين فى امن الدولة و غيرهم … دول من غير قانون و حساب حقيقى هيفضلوا هم و اولادهم خراج فى المجتمع كل شوية يبخ سموم و بعدين يلم و يقوى و يألمنا و بعدين ينفتح و نفضل كده … علمونا فى الجراحة " صديد يعنى تفتح و تنضف و تقفل كويس" و بما اننا مش راضيين او مش عارفيسن نعمل كده يبقى مش هنخلص منهم بالشكل اللى يرضينا و اللى يخلى فى اى سلام فى المجتمع.
والنوع التانى هو الصف التانى من الفلول و هم المنتفعين بشكل غير مباشر بفساد البلاد واللى خلاص اتطبعوا بالغلط بشكل خلاهم يخشوا فى صراع نفسى ان بقاءهم مرتبط بأنهم يكافحوا كل محاولات التطهير فى البلد. و دول بقى فى منهم اللى ممكن التعامل معاهم بالراحة و اللين ﻻن فيهم اللى فعلا ممكن ينصلح حاله لو لقى فرصة من غير ما يكون فيها تبكيت مستمر فيه و تفكيره بالماضى الأليم، و فى منهم اللى فعلا مالوش حل هيفضل فاسد يعنى هيفضل فاسد ﻻنه اصلا عنده احساس بالتميز و الانجاز بفساده ده. واحد شايف انه عمل بيزنس من مفيش ايه يعنى مستغل ان عمو فلان وﻻ صاحبه ابن مش عارف مين و ضبطه فى حاجة محتاجها فى شغله ميجراش حاجة يعنى و عمل فلوس و بيت و كيان، هو شايف نفسه اصلا ناجح و احنا كلنا كلاب اساس مالناش اى ﻻزمة و طبعا هيفتح بيته لحملة شفيق و يصرف ع الحملة من جيبه اساسا ﻻنه عنده اسيتعداد يعنمل اى حاجة ماتخليش للهمج اللى ريحتهم وحشة و شوية المقاطيع المرميين فى قهاوى وسط البلد و دول بقى عايعملوا علينا بنى آدمين، احنا اسياد و هنفضل اسياد
كل اللى عايزة اقوله ان قبل ما تحكم على كل اللى بيقولوا انهم ضد الثورة على انهم "فلول" اسألوهم لو قادرين هم ضد ايه و افتحوا لهم باب صغير يتراجعوا منه لو ممكن يتراجعوا، و اتسلحوا بكل امل و اصرار فى وش كل من اللى فاكر انه هيتساب يخرب بلد عيالنا عشان هو يفضل يعيش يومينه فى الهبل اللى شايف نفسه انجزه
بس اتأكدوا الأول ﻻنى متأكدة من مشاهدتى للى حصل بين كل مؤيدين المرشحين ان رغبتنا و جوعنا للإنتماء لكيانات نضيفة خرج من جوانا غل عطل حاجات كتير

Tuesday, May 29, 2012

إلى احمد رجب وامثاله ... ألا تخجلون؟




لم يعد أمامنا غير أحمد شفيق ومحمد مرسي. مرسي؟ كيف اختار مرشحا لم تثق فيه جماعته بالدرجة الأولي فرشحته بديلا للشاطر إذا تعذر ترشيحه. ليس أمامي إلا شفيق، (وكيف اثق فى مرشح كنت انا نفسى من اللى هتفوا ضده قدام مجلس الوزراء وانضرب الثوار واعتصموا لحد ما اتشال؟) وكل الحملات الظالمة ضده هي التي دفعته إلي فوق، فالشعب ذكي ولماح ويعرف المفتري من المفتري عليه،(زى ما طبعا الشعب عارف انه كان مسئول عن الحكومة وقت موقعة الجمل اللى اقل حاجة كان فى اى بلد محترم المسئولين بيستقيلوا و يخرسوا خالص لكن ده بكل بجاحة كمان مترشح لرئاسة الجمهورية) قالوا شفيق سيعيد مشانق العهد البائد، وهل كان في العهد البائد علي كل - سوءاته - مشانق مبالغات (ﻷ خالص كان فى مبانى ﻷمن الدولة ياما اتعذب فيها شباب احسن منك و من امثالك، وكان فيها السجون و المعتقلات اللى اتعذب فيها رجال قالوا ﻷ فى المحلة لما طالبوا بحقوقهم فى اكتر تفاعل شعبى سلمى و هو الإضراب عن العمل وردية معتصمة و وردية بتشتغل عشان الانتاجية ماتقفش، و برضه عذبوهم و منهم كانوا صحابى اللى منهم اللى لسانه فضل واقف و منهم اللى دراعه ماكانش بيتحرك من الكهربة) تراكمت علي رجل قوي، ذكي، ناجح في كل مهمة مارسها (طبعا تاريخه كله نجاح، ويُسأل فى ذلك زملائه دفعته اللى بيحكوا عن سرقته و فساده هوايل)  ولم يبق أمامنا غيره لكي يخلص مصر من خنقتها، فلول؟ وهل كل من خدم الدولة فلول؟ ( ﻷ بس كل من سرق و نهب و سف من مالها و ساعد حبايبه انهم يسفوا منها و باعها بالرخيص عشان يستفيد هو و صحابه ولاد صحابه فلول) نفترض جدلا أنه فلول، ألم يكن خالد بن الوليد من كفار قريش وقتل المسلمين في »أحد« ثم أصبح سيف الله المسلول ( انت بجد قلت كده؟؟ جات لك الجرأة انك تنافق للدرجة دى من الإبتذال؟ اخس على كده)
هل أمامنا في الإعادة من ينقذ مصر غير شفيق ؟
انت مفيش قدامك حاجة يمكن، لكن شباب البلد دى الحر يرفض انه يتملى الإختيارات منك و من امثالك من الشلة اللى نهباها و واكلاها و نرفض انك تستخدم ديننا فزاعة عشان تنافس اللى بيستخدم ديننا دعاية … انتوا الاتنين زى بعض … انتوا الاتنين ﻷ

انا فكرت كتير ايه اللى يخلى واحد يقول كلام من ده. اصل مش ممكن تكون الفلوس بس لان الفلوس مهما كترت ماتفسرش كل النفاق الباين الواضح ده
يمشكلة امثالك انهم "منفسنين" علينا
عارفها الكلمة دى؟
مش طايقين ان "شوية العيال" رافعين راسهم بعند غصب عنك و عن امثالك و رافضين يطاطوا لكيان ماعليش فيه غير اللى وطى و خد على دماغه و سكت
مش مستحملين شكلكوا قدام نفسكوا و انتوا شايفين شباب زى الورد طبق الكلام اللى انتوا كنتوا بتقروه و انتوا مراهقين عن ابطال مش خايفة من الموت عشان بلدها تبقى احسن
هتطق يا عينى انت واللى زيك... احنا برضه غلطانين، احنا كان مفروض نكذب و نقول ان امثالك الهمونا للحرية و اننا اما قرينا كلامك عرفنا اننا ﻻزم نثور. ساعتها كنت طبعا هتطبل للثورة و تبقى اول واحد يشاور و يقول فلول
انا عارفة ان مفيش ضمير احتكم اليه، بس كل اللى نفسي اسأله يعنى وانت فى السن ده لك انت واللى زيك


أﻻ تخجلون؟


Wednesday, May 23, 2012

يسقط الرئيس القادم

اه امال انتوا فاكرين ايه؟
اخترناه و بايعناه ولا ايه؟

اللى بنختاره دلوقتى مش اله ولا قائد عام لمجريات الأمور فى مصر. احنا بنختار رئيس قاعد هم اربع سنين و بعدين هانشوف نختار مين بعديه.
بلاش صناعة الآلهة من دلوقتى ارحمونى

عشان كده انا مش قلقانة ولا متوترة. ايا كان الرئيس القادم مين اصلا لازم يبقى عارف انه خلاص … عصر ال... راح خلاص
حتى لو كان اللى انا مختاراه، برضه لو عمل كده ولا كده مش هنسيبه.

ومحدش يقول لى عجلة و استقرار. الكلام ده انتهينا منه. بلدنا و بلد عيالنا مش هينصلح حالها لو ليها نصيب فى الصلاح لو احنا مستسهلين و تانى عايز واحد ييجى يركب و احنا نلومه على كل و اى حاجة مش عاجبانا... لأ … البلد دى بلدنا و مش هنسيبها لحد تانى بقى. كفايانا السلبية و الاتكال ان الحكومة هى بابا و ماما و نرمى عليها عبىء كل احباط فى حياتنا عشان نريح نفسنا من اننا نبقى مطالبين قدام روحنا اننا نتعب و نحاول مرة و اتنين و عشرين

والنكتة فى الموضوع كمان ان اصلا اساسا يعنى احنا مانعرفش صلاحيات الرئيس ده ايه. يعنى احنا ممكن نكون حاليا فى الساعات دى بنختار ملكة انجلترا و ممكن نكون بنختار امبراطور الالفية...ليسة مانعرفش

قدامنا معركة الدستور، و خناقة مهمة جدا محدش بيتكلم فيها و هى المحليات. المحليات يعنى كل الخدمات اللى الإخوان متبرعين بيها واللى لو اتقدمت للناس صح يبقى انضربوا فى مقتل، المحليات يعنى صفقات الطرق و شركا النظافة اللى تعدى كل قضايا اهدار المال العام و تقف تنافس على المركز الأول، المحليات اللى مخلية تلات اربع الناس مش طايقة نفسها من كل المظاهر السيئة اللى فى الشارع المصرى.
ليسة قدامنا كتير اوى.

وهم تلات سنين بالضبط ان شاء الله... و هنلاقى حملات انتخابية جديدة عشان بنختار رئيس تانى

قولوا من قلبكم ولا يهمكم … يسقط الرئيس القادم

والمجد... كل المجد، لكل شهيد، وكل مصاب، وكل اسير فى السجون
كل بنى آدم اتصاب مرة و نزل تانى
كل اخ فقد اخوه و نزل يكمل بعده
كل ام فقدت ابنها و فضلت تدعى مع الثورة

ادعوا للغلابة، الغلابة اللى شكلهم مش بيعجب وهم عرقانين و تعبانين، وهم بيموتوا حتى.
ادعوا للى بتقولوا عليهم همج عشان مخدوش فرصة يتعلموا يتكلموا و ياكلوا و يتصرفوا زيكم
ادعوا للى بتقولوا عليهم بلطجية اللى لولا واحد فيهم يوم 28 كان زمانى يا مصابة يا ميتة

عشان لولاهم كان زماننا دلوقتى ليسة بنتفرج على لجنة السياسات وهى بتحيى رئيس مصر الجديد جمال مبارك
لولاهم كان زمان اللى فاضل فى البلد سوزان بتقسمه بين حبايبها

عارفة ان اللحظة مش بتلمع، وان الاختيار ساعات شكله بيبقى ماسخ، وان الجو العام بقى محبط جدا … بس ماتنسوش انتوا عملتوا ايه برضه، وكملوا

وان شاء الله هنكمل يعنى، احنا ورانا ايه؟

و الثورة - ان شاء الله و غصب عن الكل - مستمرة



Sunday, May 13, 2012

الحرية لنورا الجيزاوى و بقية المعتقلين السوريين




الحرية لنور الجيزاوى

وبقية المعتقلين السوريين فى سجون بشار الأسد

 

هذه الصورة ضمن حملة التضامن مع المعتقلين السوريين

رابط الحملة على الفيسبوك

 

صفحة الحرية لنور الجيزاوى على الفيسبوك

ليسة جاية فى دماغى النهاردة


من سنتين فى اكتوبر 2010، نظمت دويتش فيله الملتقى الأول للمدونين العرب الألمان و كان فى القاهرة لمدة ثلاث ايام.
النهارة حبيت اهنى المدونين العرب اللى شاركوا اللى اتجوز منهم كتير
كان فى الأول المدون المغربى مصطفى البقالى، اللى اصبح اب لتوأم ما شاء الله الآن ايضا
ثم المدونة الفلسطينية اسماء الغول اللى منتظرة مولودها الآن يعطيها العافية و الصحة يا رب
ثم تزوجت انا فى مارس الماضى
و آخر المنضمين كان المدون الأردنى اسامة رمح اول هذا الشهر

الف مبروك و عقبال ياسين و جمال و طارق

والف شكر لزاهى و ماتياس المنظمين اللى سهلوا علينا التجربة، ووفروا لنا كل المساعدة