Sunday, August 12, 2012

التوزيعة غلط


احنا يمكن نكون دولة بتعانى من التضخم والمديونية العالية وكده، بس احنا مش دولة فقيرة فعلا. شيلوا الدعم عن السجاير و البنزين ال92 وما اغلى وحطوه فى الدقيق والسكر والسولار
ماتقفلوش مصانع الخمور بس الدولة ماتديهاش جنيه ولا حتى فى سعر النقل، وادعموا مصانع الاسمنت والطوب و مواد البناء
اوقفوا بكل قوة استيلاء محلات الحلويات على لبن الأطفال المدعم لان طعمه احلى ورخيص، وبيعوه ليهم بسعره الطبيعى حتى لو سعر الحلويات غلى ... و زودوا انتاجيته وتوزيعه للأطفال اللى محتاجينه
ساهموا فى تقليل الضرائب عن الفنادق اللى بتشغل عمالة جديدة كل سنة من الشباب حديثى التخرج والامهات المعيلات ودوى الاحتياجات الخاصة مقابل انهم ماياخدوش مرتبات كبيرة و فى نفس الوقت استقاقهم لأولوية الدعم
رجعوا بطاقة التموين بمفهومها الحقيقى اللى لازم فيها المواطب يكون مثبوت انه محتاجها
الدعم فى مصر فعلا مش قليل، بس متوزع غلط
كم مركز شباب فى مصر فاضى مافيهوش حد وتلاقيه طول الليل مافيهوش لمبة مش منورة؟ وتلاقيهم مدعمين لانهم بيقدموا خدمة
مثال جيد على كلامى هو ان عمليات التجميل لا تخضع لأى مشروع م مشاريع التكافل او التأمين الصحى لان الانسان ممكن يعيش من غيرها و لو عايزها يبقى مش من حقه يطالب الحكومة بتحمل جزء من تكلفتها ... قيس على كده على شىء بنستهلكه
احنا كلنا للأسف اتعودنا على مستوى من الفساد ومش عايزين نغيره و هو اننا تخيلنا ان الرفاهية الصورية اللى ماصة دمنا دى ضرورية و كمان واجب على الحكومة توفيرها
وده مش معناه ان الحكومة من حقها تحاسبنا على استهلاك الكهربة بتاعنا لانها و ببساطة تجاهلت نواقيس الخطر اللى بقالها قد كده صوتها عالى. كم واحد عارف ان مشكلة المولدات دى بقالها سنين وليسة هاتزيد؟
ليه مايكونش فى مشروع يشجع الشباب اللى ليسة متجوز مثلا انه يشتغل فى محافظات مصر المختلفة مقابل توفير سكن معقول؟ منها هايوزعوا الحمل على القاهرة فى الاستهلاك عامة سوا كهربة او مياة، ومنها هايفروا حياة افضل للمواطنين اللى ليسة خفاف و يقدروا يتحركوا، ومنها هايزودوا انتاجية محافظات كتير، ومنها كمان هايساعدوا على توزيع سكانى افضل
تانى ... خير مصر مش قليل، بس خيرها - حتى فى ناسها - متوزع غلط

Saturday, August 11, 2012

عن فضيحة توفيق عكاشة


سلامات
معلهش ع الغيبة، الحر والجواز ورمضان والسياسة يعملوا اكتر من كده
ولولا الشديد الأوى ماكنتش كتبت فى الأيام المفترجة العجيبة دى

فى فيديون انتشر اوى ع "فضيحة" للكيان اللى بينادوه بتوفيق عكاشة. المفروض الفضيحة فى الموضوع هو جزء خاص بالأراضى الفلسطينية المحتلة و عن قناعاته الموالية للكيان الاسرائيلى و عن تقبله بصدر رحب لفكرة انه يكون ضيف فى برناج اسرئيلى عادى.
بعيدا عن ان لو جيبتولى مين مش هصدق ان ده بجد و ان هو انضحك عليه فعلا، و ان الراجل ده عمره ما هيطلع فى برنامج و يبقى مضحوك عليه، مش عشان هو نابغة زمانه لكن لاننا عارفين – بس بنحب ننسى – ان كل البرامج دى اصلا بتبقى مترتبة و الضيف بيبقى عارف كويس انه جاى يتعمل فيه مقلب و كل واحد بقى بيحب يختار نفسه هيطلع ايه.
سيبكوا من الهبل ده ثوانى
اللى هاممنى واللى فارق معايا فعلا هو هذا الإصرار على المزج بين اليهودية كديانة من الأديان السماوية و الصهيونية كفكر سياسى استعمارى عنصرى.
اما يقول ان اليهود لهم حق فى الأرض فده ماعتقدش انه 100% خطأ، لكن اما يقول "اسرائيل" يبقى غلط... كل عبيد الله على الأرض لهم الحق، والقدس بالذات هى بالعفل ارض كل الديانات، من غير دخول فى تفاصيل تاريخية كتير عشان هيتمسك لى على كل تفصيلة فى الكلام ويطلع الف قطة فاطسة غلط.
تانى عشان مانتوهش فى الكلام... اليهودية لا هى تهمة، ولا سبة، ولا هم اعدائنا، ولا اى شىء، بالعكس على فكرة بقى، اليهودية كديانة اقرب فى كتير منها للإسلام عن المسيحية ودى معلومة انا عارفة انها مش بعيدة عن الكل
العدو هو الإسرائيلى الصهيونى
ماتسمحش بانك تشارك فى الاضطهاد الدينى ضد عبد من عبيد الله المنتمين لديانة سماوية بجريمة اعلامية بيساهم فيها كل من يريد ترسيخ ان مفيش يهود غير اللى فى اسرائيل
لان هو ده هدفهم، احنا لو رفضنا الاعتراف باليهود فى وسطينا يبقى فعلا مالهمش مكان بقى غير اسرائيل ... مش كده ولا ايه؟

Sunday, June 24, 2012

والعمل؟


الحكاية وببساطة ان فى ناس ماعندهاش اى مانع حقيقى انهم يرشحوا جزمة قديمة بس مايبقاش رئيس مصر من الإخوان مش عشان اى حاجة عن سياساتهم ﻻنهم مايعرفوش حاجة عن سياساتهم، ولكن لرفضهم القاطع له ﻻنهم شايفينه تهديد لحياتهم وسلامهم و قدرتهم على انهم يعيشوا حياتهم زى ما هى. وفى ناس ماعندهاش لحظة شك فى انها تدعم شبشب بصباع وﻻ انها تتعامل مع فكرة ان شفيق يكون رئيس مصر ﻻنه بالنسبة لهم مش بس هزيمة شخصية لهم وتهديد لهم ولشخصهم ولأمانهم وامان عيالهم وفرصتهم فى ان يكون عندهم شبه حياة .... انا بقى وناس زيى معضلتهم ان الجوز مش رؤساء، الجوز غلط ... تايهين وحاسين بالغربة فى بلدنا وبقينا بنتابع اخبار الانتخابات وﻻ كأنها انتخابات الجابون من كتر ما خلاص الأطراف كلهم بقوا مش احنا ... وعمالة اتفرج على دول ودول و مش عارفة اعمل ايه... با ناس والله العظيم ﻻ مرسى خيار ثورى ﻻن مرسى من اوائل من باعوا الثورة، وﻻ شفيق هيبقى على مدنية الدولة ﻻنه اولا الدولة عمرها ماكانت مدنية ولإنه اصلا من مصلحته ان الدولة ماتكونش مدنية

Tuesday, June 12, 2012

بداية الحل ... من عندِك


عارفة ان فى يوم زى النهاردة كتير هايتكلموا عن التحرش و اصله و فصله، وانا نفسى اتكلمت عن ده قبل كده فى يوم سابق للتدوين عن القضية
انا اللى حابة اتكلم عنه النهاردة هو ردود افعال الستات اللى بتتعرض لتحرش
ﻻنى بصراحة شايفة انها بتساعد اساسا على انتشار الظاهرة اكتر واكتر
طبعا مفيش داعى اننا نقول اننا مجتمع بيلوم الضحية ﻻننا عارفين ده كويس، وان لحد دلوقتى المجتمع بمرضاه مابيصدقوا يلاقوا فضيحة عشان يمسكوا فى العنصر النسائى اللى فيها و يبهدلوها وينسوا تماما انها كانت فى الفضيحة دى مع راجل برضه
بس ماشى
دلوقتى انا اتربيت فى دنيا – زى كل البنات – ان البنت المتربية المحترمة ماتردش على اى معاكسة خالص، والنصاحة والثبات الانفعالى هم انى اعمل وﻻ كأنى سمعت حاجة
وبعدين فى الجامعة عرفت ان البنت المتربية المحترمة لو سمعت لفظ كده وﻻ كده ﻻزم تعمل مش واخدة بالها عشان لو خديت رد فعل يبقى هى بقى تعرف الكلمات دى منين و ايش افهمها الكلام ده اصلا؟
يعنى م الآخر المتربية المحترمة دى كائن غلبان عيبط شكله حلو مغلوب على أمره معتدَى عليه للأبد


فى سنة 2010 كنت بدأت أغضب جدا من الموضوع لدرجة انه بقى صعب عليا انى اعمل مش واخدة بالى ... لحد ما بقيت باتعمد انى "اطارد" المتحرش بعينى، ابص عينى فى عينه و بصتى اللى هو "نعم؟، عايز ايه؟" كتير منهم كان بيعمل لى اللى هو "نعم انتى؟" وكأنه هيخش خناقة عشان اخاف انا، لكن هو كان بيعمل كده عشان اصلا خايف ومتلخبط من رد فعلى وبيعوض بكده عشان يخلَّص الموقف لصالحه، و فى اللى كان بيضحك و يمشى عشان يدارى احراجه
بعد كده بقيت باطلع صوت .. حسب الموقف
يعنى لو استظرف و قال حاجة و هو ماشى جنبى، ارجع له خطوتين وابص فى عينه واقول له "نعم؟" بجعير كده... اللى يقول لى ماقولتش حاجة، واللى يقول لى خلاص ويبتسم، نسبة قليلة منهم كانوا بيتأسفوا طبعا، والنسبة الأغلب كانت بتقول لى "حد جه جنبك؟ انتى مجنونة وﻻ ايه؟" ﻻن ده خط الدفاع الأخير بقى طالما مش مكسوفة و مش مقهورة و مش هاممنى يبقى انا لا متربية وﻻ محترمة .. يبقى أنا أكيد مجنونة
الأول كنت باسكت ﻻن كمان فى المرحلة دى غالبا الناس بتكون اتدخلت، لكن بعد كده بقيت ارد و اقول له "آه مجنونة ماتعاكسش بقى عشان المجانين كتروا فى الشارع" 
 اللى ﻻزم اقول له ان الناس ف المرحلة دى عمرهم ما بيتدخلوا ضد الست ... لكن ده موضوع ليسة جاية لكم فيه


بعد كده بدأت – ومن قبل الثورة والله- المرحلة الجديدة … مرحلة سلمية سلمية هههههههههههه
الراجل اللى بيهدى بعربيته جنبى و ليسة هيعاكس، مش بيلاقى غير انى باوطى ادور على طوبة فى الارض ارميها عليه... اه والله
لحد دلوقتى انا ماعملتهاش فعلا ﻻنهم بيخافوا و بيجروا ههههههههههههههه
اللى بلاقيه قدامى بقى …....... طوب رمل طين اى حاجة
مرة كنت واقفة وورايا عربية فاكهة قمت ماسكة برتقانة، والراجل جرى بسرعة، و الفكهانى بقى يقول لى جدعة
ومرة تانية مسكت زلط كتير صغير و حدفته ع العربية وهو بيجرى بيها وكان فى كناس فى الشارع بقى ماسك المقشة وهوش بيها كده عليه انه يمشى ههههههههههه
خليه بقى يروح ﻻمه وﻻ مراته يشرح لهم ايه اللى بهدله و بهدل عربيته كده
والموضوع بعد كده تطور الى كمان مساعدة الستات فى الشارع. لو لقيت بنت بتتعاكس و مش عارفة تعمل ايه، ازغر للى بيعاكسها. هو فى اللحظة دى بيتأكد انى مجنونة فعلا..بس الميزة ان الناس فى مصر بيخافوا من المجانين
ليسة من اسبوع، كنت باجيب حاجات للبيت والساعة كانت بعد 11 بالليل، طبعا فلتات الزمن هاتقول ايه اللى منزلنى 11 بالليل و استاهل اللى يجرى لى عشان هم ورثوا الشارع و بقى بتاعهم لوحدهم تقريبا
انا كنت هجيب حاجات من المحل اللى ورا بيتنا على طول … المهم اخدت بالى من بنتين واقفين كل واحدة حاطة مناخيرها فى كتف التانية و مش عارفين يروحوا فين و شابين فى عربية ماسكينهم آخر سفالة بقى، يادوب شافونى قدّموا ناحيتى سنة عشان يجوا لى .. قالوا يمكن المحجبة يبقى فيها الرجا الليلة دى
ليسة باوطى اجيب الطوبة كانوا جريوا بالعربية … صراحة الطوبة كانت كبيرة اوى ههههههههههه
…
اللى عايزة اقوله ان جزء مش هين من اسباب انتشار الظاهرة دى هو ان الستات بتسكت
فى اغلب الاحيان كمان البنت مجرد ما تبدى جدية رفضها للى بيحصل مش بتستنى تعمل حاجة،والناس حواليها بيكونوا على طول معاها و فى صفها
و على فكرة مهما كانت عاملة فى روحها ايه
يعنى حتى لو فى بيقولوا المجتمع بيلوم البنت على لبسها، هتلاقيهم بيساعدوها تنط فى تاكسى وﻻ حاجة عشان يخلصوها و يخلصوا منها، طبعا ده مش صح بس برضه مش معنى انهم مش عاجبهم لبسها – وده مش من حقهم – انهم هايقولوا تستاهل التحرش
الفكرة كمان ان فى كده حاجة -غلط-فى دماغ الناس انهم يخافوا يتدخلوا ﻻتطلع تعرفه
صحيح هو مش معنى انه يعرفها انه من حقه يتحرش بيها، بس دى ليسة مرحلة متأخرة ع الناس
الى اقصده ان كتير بيبقوا شايفين اللى بيحصل و متغاظين بس خايفين تكون واحدة مبسوطة انها بتتعاكس،وﻻ دى طبيعة عملها وﻻ أى تفسير فى دماغ الناس التعبانة بقى، فأهم شىء محتاجين نبقى فاكرينه انك مش مفروض تخافى الناس هاتقول عليكى ايه ﻻنهم فى اغلب الاحيان – وطبعا مش كلها – بيبقوا هيطقوا من اللى بيعاكس (اللى فى دماغهم صايع عايش على فلوس امه و فلتان) اكتر ما هم هايطقوا منك (عشان بنت ماشية لوحدها فى الشارع والله اعلم ﻻبسة ايه) اه بجد
سيبك من كل ده
احساسك اما بتاخدى رد فعل بيبقى مختلف تماما
اولا الاحساس بالمهانة بيروح تماما و بتبقى زى اللى كان فى خناقة 
ثانيا ردود أفعال الرجالة اللى بيرتبكوا من ان ست واجهتهم و بصيت فى عينيهم فى اغلبها يفطس من الضحك 
 ثالثا بعد شوية الرجالة هاتبدأ تحفظ ان الشارع بقى مليان ستات "مجانين" من اللى بيرفضوا يتعاكسوا دول و هتبقى انتى جزء من كسر الدايرة بدل مانتى جزء غير مباشر من اسباب انتشارها
و على ما تيجى بنتك هاتكون الحكاية اختفلت، وهايكون ان شاء الله رجع الشارع ﻻيسمح بالسلوك ده
وهيكون ابنك فهم ان ده اصلا منافى للرجولة و يتكسف يعرف اشكال من اللى بتعمل كده

صدقينى … البداية من عندِك انتى

Friday, June 8, 2012

الوفد مازالت تستعبطنا


                                 رئيس اتحاد الملحدين يؤيد شفيق                         

    أيد كريم عامر- رئيس اتحاد الملحدين المصريين والمسجون السابق بتهمة سب الإسلام - الفريق شفيق في انتخابات الإعادة وأكد أنه الوحيد القادر على التصدي للإخوان الظلاميين.
     وأضاف عامر على صفحته الشخصية صورة لبطاقة التصويت البريدي في السفارة المصرية في بولندا ويظهر فيها تصويته لشفيق وكتب فيها:" صوتى لشفيق حتى أمنع تحويل مصر إلى دولة إرهابية متخلفة على يد الإخوان المجرمين، وساهمت بصوتى فى محاولة مضنية لمنع تحويل مصر إلى أفغانستان جديدة على يد الإخوان المجرمين صوتى لـشفيق".

اقرأ المقال الأصلي علي بوابة الوفد الاليكترونية الوفد - رئيس اتحاد الملحدين يؤيد شفيق



رئيس اتحاد الملحدين العرب مرة واحدة؟؟
وبيطلع للعيال فى الكوايبس ولا ﻷ؟ مش يقولوا كمان انه مراسل جهنم وعنده ودان سودة طويلة

قبل ما حد يعمل فيها اللى جاب التايهة و يقول انى بدافع عن كريم عامر، انا اصلا مش مع ترشيح شفيق ﻷى سبب بس ف الآخر هو حر... انا اللى هيجننى صياغة الخبر
كأنه “شوفوا الملحدين الوحشين اللى هيطلعوا لنا فى الأحلام بالليل هاينتخبوا شفيق، انتخبوا انتوا مرسى بقى عشان تبقوا مسلمين حلوين”
ايه القرف ده؟
ايه الخبر يعنى فى ان كريم وﻻ غيره هينتخبوا اى حد؟ ما هو معروف طبعا ان اى حد واخد مواقف من الاتجاه الدينى بتعصب - من وجهة نظرى انا تعصب - هينتخب شفيق ﻻن بالنسبة له مرسى و الاخوان كارثة اكبر من كارثة وجود شفيق رئيس للجمهورية.
كتير من اللى بيتقال عليهم مثقفين و متنورين و فنانين و كلام من ده هينتخبوا شفيق للسبب ده
معروفة يعنى
عايزة ايه الوفد بالنوع الرخيص ده من الاخبار غير بس شوية زيطة وخلاص؟
هو احنا طول ما عندنا الاعلام ده حالنا هيفضل كده … قرف