Sunday, May 16, 2010

جمهوريةالقلب ... الرحمة يا رب


جمهورية قلبي - محمد اسكندر

كلّ ما قلبي عم ينبض و بعزّي
بتبقي ملكة و ما بقبل تنهزّي
شغلي و سهري و تعبي عشانك
عندي فيهن لذّة

نحنا ما عنّا بنات تتوظّف بشهادتها
عنّا البنت بتدلّل كلّ شي بيجي لخدمتها

شغلك قلبي و عاطفتي و حناني
مش رح تفضي لَ أيّ شي تاني
بيكفّي إنّك رئيسة جمهوريّة قلبي

شيلي الفكرة من بالك أحلالك
ليش بتجيبي المشاكل لحالك
تَ نفرض بقبل تشتغلي
شو منعمل بجمالك

بكرا المدير بيعشق و بيتحرّك إحساسو
و طبيعي إنّي إنزل هدّ الشّركة عَ راسو

شغلك قلبي و عاطفتي و حناني
مش رح تفضي لَ أيّ شي تاني
بيكفّي إنّك رئيسة جمهوريّة قلبي

حقوق المرأة عَ عيني و عَ راسي
بس يا ريتك بتراعي إحساسي
وجودك حدّي بيقوّيني
و هيدا شي أساسي

شو هالوظيفة اللّي بدّا تفرّقنا بيني و بينك
....
بي المصاري بحرقها كرامة عينك

شغلك قلبي و عاطفتي و حناني
مش رح تفضي لَ أيّ شي تاني
بيكفّي إنّك رئيسة جمهوريّة قلبي

طيب ... انا مش هاتنرفز, ولا هاكسر الدنيا, و لا هاتدايق. غاية ما هنالك هاجيب طوبة ادينى بيها على دماغى عشان ارتاح خالص بقى من المناظر دى.
ده مين ده كمان ان شاء الله؟؟ احنا ناقصين؟
لأ و ايه؟ جمهورية قلبه! قلبه جمهورية!! هى الذات بينفع تتضخم للدرجة دى؟ ماهو اللى يقول كده اكيد عنده تضخم فى الذات لدرجة انها طابقة على مراوحه و ضاغطة على خلايا مخه.
اللى زى دول مرضى و علاجهم واجب على كل مواطن.
و حسبى الله و نعم الوكيل فى كل ست بتخلف و تربى ابنها يطلع يقول الكلام ده. اصل البلاوى دى بتبقى ام ربت ابنها على انه فلتة بشرية لن تتكرر و عالم الستات ده موجود فى الدنيا لخدمة و مراعاة هذه الفلتة الكونية المتمثلة فى شخص سعادة جنابه.
كفاية عليها انها تكون رئيسة جمهورية قلبه صحيح ... هى حاتنهب ولا ايه؟!
عارفين بقى المقلب فين؟ ان دول اما بيتجوزوا ستات مش وراهم حاجة غيرهم بيتخنقوا منها, و يشتكوا انها فوق دماغه على طول, و انها معتمدة عليه فى كل حاجة!!
و كمان الباشا غيور, خايف لجمال مراته الفتاك يفتن مديرها فيعاكسها و هى نظرا لانها قليلة الحيلة الحل الوحيد ان هو يروح يكسر الشركة على دماغه ... لأ شنب!!!
طب انا عايزة اكسر حاجة بجد ... ايه ده؟؟ الرجالة دى مش هاتخلص بقى؟ و الستات هاتفضل تخلف رجالة يمرعوهم كده لحد امتى ؟
سؤال تانى ... هى دى الرجولة؟ انك تحطها فى شكل حياة انت بالنسبة لها المية و الهوا؟ مالهاش حد ولا حاجة و لا منفذ ولا ملاذ غيرك؟
الرجولة انك تبقى جنبها مش فوق دماغها و كابس على نفسها!
الرجولة انك تسندها مش تتبناها ... هى عندها اب و ام, موجودين او لأ, كويسين او لأ مش قضيتك, انت زوج مش بديل للأب!
الرحمة يا رب!


Sunday, May 9, 2010

برافو يا ريم

قاعدة انا فى ما يشبه الغيبوبة بسبب الحر العجيب اللى احنا فيه ده فجالى تليفون من ريم.
ريم خريجة الاقتصاد و العلوم السياسة, عندها 21 سنة, زهقت و قرفت من انها مضطرة كل ما تركب مواصلات انها تستحمل غلاسة ده و تمسيح ده و قلة ادب ده.
ريم امبارح كانت راكبة السى تى آيه, و كانت نايمة, لحد ما حسيت بحاجة بتتحرك على كتفها فصحيت من النوم. و رغم انها فهمت اللى حصل لكن قالت لنفسها يمكن بيتهيألى, فضلت صاحية و حصل نفس الموقف تانى.
خفيف الظل اللى كان وراها كان بيمد ايده عشان يمسك فى دراعها (رغم انى مش فاهمة ان ممكن يكون فى اى نوع من المتعة فى كده بس ماشى) و تكراره كان لانه شايفها ساكتة.
فى اللحظة دى ريم افتكرت كل ايد اتجرأت و اتمدت عليها. و لسبب ما قررت انها المرة دى مش هاتسكت "ماهو مش معقول يعنى كل واحد فاكر انه ممكن يعمل اللى هو عايزه و احنا ساكتين. لازم اكون ايجابية اكتر من كده"
راحت للسواق و سألته اذا كان فى قسم بوليس قريب, سألها ليه فقالت له. السواق وقف الباص, و راح للأخ اللطيف ده. طبعا اخينا انكر فى الاول و بعدين قال لها "لا ده كان من غير قصدى!!"
اصل الدراعات دى بتلعب كده مع نفسها!
الاوتوبيس وقف و عسكرى المرور مستنى الدورية تيجى عشان يشوفوا هايعملوا ايه فى الحكاية دى.
على ما حد جه, ريم سمعت احلى كلام من ركاب الاوتوبيس
"يا عم احنا ورانا اشغال و مصالح"
"اوعى تقول انا آسف لحسن تثبت التهمة عليك"
و اللى بيتريق ... و اللى بيستخف ... و اللى بيلقح كلام ... آه والله, دول مصريين!!

المهم ... راحت ريم القسم و هى حاسة انها بتجيب لنفسها حقها. قعدت قدام الضابط اللى سألها:
هاه يا ستى ... ابه بقى اللى حصل؟
حكيت ريم اللى حصل. و شافت ملامح وش الضابط و عينيه و حتى لغة الجسد بتاعته كلها بتقول "البت دى عبيطة ولا ايه؟"
استخفاف بيها و بشكوتها
استهانة باللى حصل لها
و فى الآخر قال لها – من ضمن اللى قاله لها- "دى حاجة بسيطة"!!!
طبعا البنت فى اللحظة دى بعد ماكان احساسها بالحق و اعتمادها على انها رايحة القسم مقوينها, رد فعل الضابط هزها!!
فى القسم اتقال لها كلام من عينة:
"مش هتاخدى لا حق ولا باطل"
"لو عملتى محضر, هاتتبهدلى كعب داير بين القسم و النيابة"
"ده مش بعيد يتبلى عليكى بتهمة هناك و تلاقى نفسك انتى اللى مدانةّّ"
و فى الآخر –عشان ترتاح هى- اتقال لها انه هايبات ليلة فى القسم عشان يتربى و اهه يبقى اتعلم الدرس.
اول حاجة عايزة اقولها هى برافو عليكى يا ريم, انا فخورة بيكى جدا, و فرحانة بيكى اوى. و ربنا يحميكى و يكتر اللى زيك فى البلد دى, عشان لما الستات اللى زيك يزيدوا, هو ده اللى هايضبط الدنيا ان شاء الله!
و اهه برضه ... ريم باللى عملته ده,الكائن ده هايبات له ليلة فى القسم عشان يتعلم يفكر الف مرة قبل ما يمد ايده على ست.
تانى حاجة بقى: حسبى الله و نعم الوكيل فى كل من له ايد فى ان بنت تتبهدل فى مواصلات و هو مشارك فى ده. سواء اللى بيمد ايده, او اللى بيشوف ده و يسكت. او اللى يلوم البنت و يقوم المتحرش عليها و يحسسها هى بالذنب و الخوف, او اللى يشجع اى متحرش على فعله ده و له بتبسيطه حتى!!
و اخيرا سؤال للسادة الافاضل رجال الامن:
هى الست ... لأ... المواطن اللى يتاخد حقه منه و يخاف على نفسه, يروح فين فى البلد دى؟
يعنى انا اما واحد يمد ايده على و اروح القسم, مش المفروض القسم ده هو الحماية و الامان و البتنجان ده؟
يعنى ايه يعنى الضابط اما يسمع الكلام ده يقول لها دى حاجة بسيطة؟؟
ايه دى اللى حاجة بسيطة يا حاضابط؟ عايزها تستنى اما يغتصبها عشان تروح القسم؟ ايه و النبى ده؟؟ و محدش يقول لى عادى و انتى فاكرة الاقسام ايه و الكلام ده. عشان البديل بقى ان الواحدة تمشى بمطوة و اللى يقرب منها تديله بيها. و يبقى حد يكلمها بقى!!
ده ايه البلاوى دى!!
انا كلمت مركز النديم و الاستادة مها يوسف المحامية مشكورة اتحمست جدا و مفروض بكرة ان شاء الله هانعرف ايه الجديد اللى ممكن يتعمل.
و بالمناسبة ... الاخوة فى لبنان عندهم "سلوى" برضه زهقت من القرف ده خالص. فى بنى آدمين اتلحسوا باين!
للمرة التانية ... برافو عليكى يا ريم
و هاسيبكم مع سلوى بقى عشان يمكن نخلص من الهم الازلى ده




Tuesday, March 9, 2010

انا مش كابتشينو ... انا ايمان

اول مرة اروح جمعية من جمعيات حقوق المرأة كان من كذا سنة و كان عرض لفيلم و بعدين مناقشة. اول كلمة اتوجهت لى كانت:

"يعنى مؤمنة بحقوق المرأة و محجبة؟"
انا: آه ... و ليه لأ؟
الحجاب ده ضد حرية المرأة
بس انا محجبة بمزاجى و بيتى مش كل اللى فيه محجبات
مفيش ست ابدا خاتتحجب بمزاجها, انتى مضحوك عليكى
-------- 

من وقتها بقيت "المحجبة":
 
فى مناقشة عن اوضاع الحريات فى مصر,كنت باقول رأيى الشخصى,طلع لى واحد بسؤال
لا ... بس انتى كده مش ليبرالية بقى . انتى على كده يسارية سلطوية. عشان بتحطى مصلحة "الجماعة فوق الفرض"
------

بعدها غرفت انى "يسارية سلطوية ذات ميول ليبرالية"

--------

بتحصل كتير انى كل ما اقول حاجة يترد عليا "آه آه مانتوا الدكاترة لازم تعملوا كده"

"دكتورة"

--------

فى تعليق على المدونة,واحد كتب ما معناه انى مفيش حاجة اسمها الست زى الراجل و ان "الست" لازم تعرف حدودها, و كرر لى ان الست المستقلة دى بيطلع لها شنب و ان "انتوا يا فيمينيست" اخرتكوا زيفت ان شاء الله.

و مرة فى الشغل زميلى بصبح عليه ... لقيته بيرد "صباح الخير يا ست الفيمينيست"

و زودوا عندكم "فيمينيست"
----------

يعنى بقدرة قادر, انا بقيت عاملة زى كوباية الكابتشينو ... طويلة ولا قصيرة,بنكهة ايه.بكافيين ولا لأ, برغوة ,بكريمة, فى مج او كوباية بلاستيك.

لأ!!

انا مش ست مسلمة محجبة يسارية سلطوية ليبرالية اشتراكية دكتورة مدونة فيمينيست سمراء قصيرة و شعنونة ... انا كل الحاجات دى و اكتر ... انا بنى آدمة ... و اسمى ايمان!

Wednesday, February 24, 2010

الست دى حبيبتى حبيبتى حبيبتى

 بجد ... نفسى ييجى اليوم اللى اقعد معاها كده نضرب لنا شوية نيسكافيه و نرغى. بس مش اكتر
الدنيا كلها زى ما قلتلكم قبل كده, الحكاية كلها ... حكاية شغف

Tuesday, February 23, 2010

بلوا الشربات ... و قولوا يا رب

الحمد لله ... قدر و لطف ... و فى الآخر خلصت على خير

شوفنا احنا كم يوم سود من 15 فبراير بعد ما مجلس الدولة  قرر يمنع تفعيل القرار السابق بتعيين المرأة كقاضية بالمحاكم التابعة للمجلس
الدنيا قامت بقى ... صراحة كان فى موقف مشرف لنائبات المجلسين (الشعب و الشورى) و دكتورة فرخندة حسن (رئيس المجلس القومى للمرأة) بدل ما تسكت بقى و تقول الكلام المتوقع عشان تهدى الدنيا , بالعكس , كانت صريحة ان رغم انه لاسباب كتيرة المجلس القومى ما يقدرش يشارك فى الوقفة الاحتجاجية - على غرابة ده - لكنها شجعت اللى وقفوا و مدحت موقفهم

و الحمد لله ... بعد خمس ايام بس- يوم 20 فبراير-, اتعمل اجتماع طارىء للمجلس الخاص ( ده حاجة اعلى فى السلطة كده و متكونة من اقدم 7 قضاة و مفروض يعنى كلامها ماشى على الكل) عشان يناقشوا الموضوع ده على اساس اعلان القرار بعد يومين

ربنا كبير بقى
الكل قام
و فى نفس اليوم ده ... السيدة سوزان مبارك  قالت كلمة فى خطاب لها و وجهت فيها رسالة مباشرة لكل ست للمطالبة بحقوقها الدستورية فى المواطنة. فى موقف يحسب لها. و فى موقف اعتبره البعض زى قرصة ودن كده 

المهم استنينا يوم 22 ده و مش عارفين بقى هانعمل ايه, و الحمد لله , خدنا حقنا بعد ما شوفنا كم يوم مالهمش لازمة

عشان محدش يقول انى مش باكتب غير عن الحاجات المنيلة بس. اهه ده يوم حلو , و مناسبة تستحق الاحتفال. و ساعتها افتكرت فى 2003 لما اسم دكتورة تهانى الجبالى اتكتب فى التاريخ كأول قاضية مصرية. و الفرحة الحقيقية اللى حستها اليوم ده. و فضل بعدها يزيد عدد القاضيات فى مختلف المحاكم المصرية
النهاردة يوم حلو الحمد لله ... و لازم نبل الشربات


رغم ان فى كلام ان نادى مش عارف ايه بتاع القضاة ناوى يرفع قضية على رئيس المجلس لكن على مين. الاقتراع اصلا كان على امر غير دستورى . و مش من حق حد يحرم مواطن من حقه الوظيفى. الكلام ده أ.ب. مواطنة

نيجى بقى للكلام المهم ... كم نقطة كده سمعناهم فى الفترة اللى فاتت. و مش من بس الناس, لأة من المستشارين الكبار. غير كتر الكلام فى الفقه و الدين اللى لازم يتحجج بيه البعض عشان ياخد حق من حقوق الست بتجاهل تام لكل و اى رجل دين يقول ان الأمر ده لا يعارض الدين فى شىء

اول حاجة: ان طالما الست مش بتأدى الخدمة العسكرية يبقى مش من حقها تكون قاضية
يا سلام؟ و هو كل قاضى ادى الخدمة العسكرية؟ مفيش ولا واحد كان وحيد ولا والده متوفى ولا قصير ولا نظره ضعيف ولا وزنه كتير ولا فضل احتياطى لحد ما اخد اعفاء؟
اللى يقول كده يحلف بقى ان مية فى المية من قضاة مصر الرجال ادوا الخدمة العسكرية
بعدين ما اصلا فى بنات كتير حاولوا فى انهم يخشوا الجيش محدش راضى
ثم ايه علاقة الخدمة العسكرية بانها تترقى فى شغلها زيها زى زميلها؟ ما لو كده يبقى كل الستات فى كل المجالات مش من حقهم يترقوا. يعنى الدكتورة عمرها ماتكون مديرة مستشفى او رئيسة قسم لانها ما دخلتش الجيش ... و المدرسة عمرها ماتكون ناظرة مدرسة لانها ما تعرفش الانضبط بتاع الجيش. و اى منصب قيادى يبقى رجالى صرف عشان (جزء ) من الرجالة بيخشوا الجيش
ده حاجة حلوة اوى

ثانيا: ان التدرج الوظيفى فى المهنة دى مطلوب فيه انها تتنقل من محافظة للتانية و ممكن تكون الظروف قاسية شوية عشان قلة الامكانيات و طبعا عيب بقى انها تبقى ست و تبات فى نفس السكن اللى بيبات فيه الرجالة و مش معقول هانعمل لها سكن مخصوص
ييجوا يشوفونا فى مستشفى الدمرداش من و احنا اطباء امتياز فى قسم الاطفال و مفيش مكان للامتياز اصلا و كنا بناخد نوبادجياتنا المسائية و نبات مع العيانين رجالة و ستات
حجج فارغة و تلاكيك
اللى عايزة تتعب و تكون كفىء ادوها فرصتها. و لو تقييمها الدورى كموظفة بين انها مقصرة لأى سبب عاقبوها حسب اللوايح ان شالله ترفدوها. محدش بيطلب معاملة خاصة للستات عشان ستات. ادوها الفرصة كاملة من غير اى اعتبارات خاصة

ثالثا بقى افتكاسة جامدة اوى : بدل ما تهروا نفسكم كلام على النخبة من الستات,شوفوا الفقيرة و الجاهلة و ساعدوها
طب ادونى عقلكوا انتوا ... لما خريجة الجامعة اللى بتشتغل فى القانون و وصلت لأعلى المراكز و متنورة و مية فل و اربعتاشر مش عارفة تاخد حقها الدستورى فى التوظيف فى اجهزة الدولة ... بالذمة كده , الجاهلة الفقيرة اللى عايشة بالعافية هاتعرف؟
 اما رجال القانون بييجوا على حق زميلاتهم اللى فى اعلى الدرجات الوظيفية. و لما يكون الستات دول متاخد منهم حقهم , فى ست فى البلد دى ممكن بقى تحلم بأى حق ولا بتنجان؟
على رأى دكتورة فرخندة
ده احنا مفروض بنروح لهم يجيبوا لنا حقوقنا, يقوموا هم ياخدوها؟

و مش هاخش انا بقى فى مهاترات فقهية. هاديكم الروابط دى و تقروها بمزاجكم


 آخر حاجة بقى ... الست اللى اتخلقت عشان تقعد فى البيت و تبقى زوجة و ام و الكلام ده كله اللى مش عارفة هانخلص منه امتى و ازاى - ساعات باحس ان الحل الوحيد قنبلة نووية تشيلنا خالص كلنا و بعد مية سنة كده تبقى تطلع ناس جديدة على نضافة- المهم

ليه بنخلط بين الامور الفردية الاحكام العامة؟ ليه كل راجل بيعمم شكل الست اللى عايزها كزوجة على انه النموذج الوحيد المقبول للمرأة؟
مش معنى ان انت بشكل شخصى مش عايز مراتك تبقى كده , انك تفرضه على ستات الدنيا
لاحظ هنا انى باحفظ لك حقك الكامل فى ان يكون لك رأى و انك تعبر عنه و انك كمان اما تيجى تتجوز , تتجوز انسانة مناسبة لك و للى انت مقتنع به. كل اللى باطلبه منك , انك ماتعمموش على الستات كلهم
واحدة دخلت كلية الحقوق ... و ذاكرت و اجتهدت و تعبت ... و اشتغلت فى المجال اللى نفسها تخدم و تفيد فيه ... و ربنا موفقها و بنتجح و بتترقى ... ايه اللى يزعلك انت فى كده؟
لو على الجواز و الخلفة و حق البيت , محدش قال لك لازم تتجوزها ... و هى لانها مؤمنة باللى بتعمله و عارفة انه له تمن, مستعدة تدفع التمن ده من انها تواجه مقاومة من المجتمع و احتمال انها ما تتجوزش و مش بعيد تبقى عانس حقود زيى و تيجى تقعد جنبى عشان نرغى احنا الاتنين طول الليل على مدى انهيارنا من الحزن ان مفيش راجل عايز يتجوزنا يا حرام عشان احنا ناس مؤمنين بمادىء معينة و بنطبقها

هاتلاقى ستات كتير مقتنعين بكلامك و شايفينه صح
و فى الآخر حقكم تعيشوا مرتاحين انتم الاتنين ... بس سيبوا بقية الناس فى حالها بقى
بلاش الوقوف فى طريق احلام البشر. خصوصا الاحلام اللى مش بتتعارض اطلاقا مع حياتك و يومك


ده غير ان فى كلام تانى خالص بقى على ان الدفعتين اللى اغلب الكلام عليهم (2008 و 2009) دول اغلب الاوائل فيهم بنات ... هيهيهيهيهيهي... عشان كده شاطوا. مش مصدقين نفسهم يا عينى
مش قادرين يتخيلوا ان جه اليوم اللى صفوة جيل المحامين فيه اغلبهم ستات ... متغاظين بجد
بس احسن
و ليسة ... المصرية هاتفضل تتعلم و تعلم و تتعب و تحاول و تدفع التمن و تقع و تقوم ان شاء الله مهما حاولتم
و احنا كده من زمان اصلا ... فاكرين لطيفة و لطيفة؟ حاجة مش جديدة علينا يعنى
و ربنا معانا جميعا