Sunday, April 17, 2011

و انتصر تحالف قوى الشعب


 
انتصرنااااااااااا

الحمد لله, مدونة ثورة البنفسج نالت لقب افضل مدونة عربية لهذا العام فى مسابقة البوبس العالمية بالتصويت.


هو مهما حاولت اشكر الجميع مش هدى حد حقه. معروف طبعا انها جائزة القراء و حصلت عليها باصواتكم.  

خاصة انها كانت اصعب هذا العام بالسماح لكل واحد ان يصوت مرة كل 24 ساعة. و حتى لو البوبس مش شايفة ان ده شىء يستحق التكريم و التقدير, فمش مشكلة, اصواتكم هى التقدير اللى اتمناه و فرحانة بيه.

و شكر خاص لكل المنافسين, و كانت فرصة سعيدة انى اعرف فؤاد و طباشير و حبر و مامفاكينش. و شرف ليا انى اتنافس مع الصحفى و المدون اسعد ذبيان. و تحياتى الخاصة جدا لوائل خليل و الصديق مصطفى البقالى.
و شكرا اسماء الغول لايام المنافسة اللذيذة   

شكرا لكل اللى استحملوا الحملة الانتخابية بتاعتى هههههههههههههه

و احب انوه ان هذا النصر المبين كان نتاج تحالف قوى الشعب المختلفة. على فكرة والله احنا لو حطينا مرشح فى دماغنا حيكتسح – و اللى باقول لهم الكلام ده هم عارفين نفسهم ههههههههههه – بس احنا نلاقى اللى يستحق.

اشكر شباب تويتر شكر خاااااص, لانهم استحملوا زن السنين فعلا

و شكرا لشباب الفيسبوك اللى كنت بطاردهم فى الشات الصغير و فى الرسايل ههههههههههههه

شكرا لمنسقى الحملة مينو و ميكا --- انتوا بنات جامدة
و مسئولى غرفة المراقبة و الاحصاء كومى و فوزان
شكرا احمد رجب من اسوان و ماهينور من اسكندرية وبترا من مالطة و خالد سلامة و جوليا من امريكا و كيم من دول الشرق الاقصى و نادية من المانيا و غيرهم.


بالنسبة للاحتفال, شباب اسكندرية عرفوا خلاص و حددوا هانعمل ايه, مطلوب من شباب القاهرة انهم يعملوا كده.


Thursday, April 14, 2011

كانت حتتفتح دماغى النهاردة


رايحة اشترى الجرنال من محطة مترو حلون,الست تقولى:جنيه و ربع
قلت لها الجرنال مكتوب عليه جنيه
تقولى انا بجيبه بجنيه من واحد بيجيبه م الموزع
قلت لها خلاص هاتيه م الموزع
هو بيجيبهولى من التحرير. منين من التحرير؟ من الميدان. منين من الميدان. ماعرفش بيجيبه منين . طب يا ستى ماتكدبيش بقى, ما تسعى فى رزقك زى كل بياعين الجرايد و تجيبيه من الموزع و بيعيه بتمنه
الناس:دى غلبانة و بترضع عيل,حرام عليكى يعنى ع الربع جنيه
ارد يا جماعة انا على مبدأ انى اجيب الحاجة بتمنها
ماحنا بقالنا 30 سنة بنتسرق جاية دلوقتى تتكلمى؟
شوية و واحد مسكلى طوبة و هى كده و ان كان عاجبك
شاب جاى واخد موقفى اتخانقوا سوا و طلع من تحت الارض 2 جيش,والبياعين اتلموا عليا
عيل بتاع 15 سنة بيدينى ربع جنيه.ابسمت له و قلت انت فاكر انى باتكلم ف الربع جنيه؟
قال لى امال ايه؟ قلت له فى مبدأ انى اشترى الحاجة بتمنها




على فكرة محطة مترو حلوان عبارة عن كارثة فعلا و بقالى فترة باعدى عليها وواخدة بالى و انا شخصيا ساكتة. و بحمل نفسى المسئولية انى حتى باتكلم دلوقتى لما انا كنت مضرورة, رغم انه وضغ غلط شايفاه من الاول

محطة مترو حلوان كارثة

Sunday, April 10, 2011

آسر عبد الغنى عندكوا ليه يا جيش؟؟


 تحديث بقى عشان البوست مكتوب من بدرى بس على ما طلع بعد حوارات تسجيل المخلوع: آسر و 10 تانيين طلعوا النهاردة بعد الظهر, و ليسة فى تلاتين جوا. 

آسر طالع حالته الصحية سيئة و جسمه مليان رضوض و كدمات و حاليا فى المستشفى للفحص و الاشعات و كده
واللى عمل كده كان قبل احتجازهم و ضربهم جامد جدا بشكل غبى.

الكلام ده عرفته من سارة اخت آسر, و  ماعرفش تفاصيل عن التلاتين الموجودين حاليا محتجزين. هم فى البتاعة اللى فى العاشر دى. لو حد يعرف حاجة يقول لو سمحتم.

و تانى ... حسبى الله و نعم الوكيل


هو فى ايه؟؟؟ فى ايه نفسى افهم؟؟

يعنى الحرامية متسابين و بيقولوا لازم ورق و ادلة و سكتنا. قتالين القتلة مش ممسوكين و بيقولوا لنا تحقيقات و شهود و رفع ادلة و اتنيلنا سكتنا.

كمان بتحبسوا الشباب؟؟ فى ايه بيحصل نفسى افهم؟؟

امبارح السبت الفجر, و الجيش بسم الله ما شاء الله عامل خطة تحالف الشرطة العسكرية و الامن المركزى و اللى هم لابسين الوان زى فيلم سكوات اللى عند سيتى ستارز دول "فى ناس بتقول عليهم 777 بس انا ماعرفش فى الحاجات دى"

المهم ا نفى 41 شاب زى الورد اتقبض عليهم بعد حظر التجول من الميدان بتهمة خرق حظر التجول

ييجى واحد يسألنى و ايش عارفك انه بعديه؟ اقولك الشهود و المقبوض عليهم و تفاصيل الموضوع كلها بتؤكد على كده. ثم ان اصلا الاعتصام السلمى ده حق دستورى قانونى تكفله كل المواثيق الدولية لحقوق الانسان كشكل حضارى لتعبير المواطنين عن اعتراضهم على امر من الامور فى بلادهم.

41 شاب من طلبة الجامعات المصرية المحترمة و غيرها مقبوض عليهم و معرضين لمحاكمات عسكرية فى الايام اللى احنا فيها دى.

انا عرفت التفاصيل منين؟ من اخت واحد فيهم "آسر عبد الغنى", عرفت من سارة اخته التفاصيل. و طبعا مش قادرة انسى كلامها "آسر من شباب الثورة, و اخد كذا رصاصة يوم 28, و ليسة مخفش من اللى حصل له, يقوم يتعامل معاملة المجرمين؟"

يعنى الحرامية متسابين و المسئولين فى الداخلية عن قتل الناس يوم 28 متسابين, و المتورطين فى فتح السجون و الانفلات الامنى و ترويع الناس متسابين, و مجرمين موقعة الجمال متسابين, او بيدوروا لهم على ادلة تدينهم عشان لازم ادلة و ورق ... و فى ناس وقت, شباب زى الورد ممكن يتشدوا على محاكمات عسكرية فى ساعات؟
صفوت الشريف ماتاخدش فى محاكمة عسكرية ليه بالخيانة العظمى؟

جمال مبارك؟ زكريا عزمى؟ يوسف والى –اللى محدش يعرف عنه حاجة- و غيرهم, ليه دول ماتاخدوش من بيوتهم بمحاكمات عسكرية او حتى حبس فورى على ذمة التحقيقات و خلاص؟

ليه سهل اوى كده ان الشباب الحلو يتاخد و فى ساعة يتحبس على ذمة التحقيق؟ و صعب و طويل اوى يتشاور بس على اباطرة الظلم لسنين فى البلد؟

و للعلم, للى مش فاهمين ليه الناس مصممة ان فى تباطؤ من الجيش, القرارات الفورية اللى بتتنفذ فى مفيش دى هى اللى مخلية الناس مصدقة و عارفة ان الجيش لما بيعوز يجيب حد بأى فيلم بقى بيجيبه




آسر عندكم ليه يا جيش؟؟؟

حسبى الله و نعم الوكيل

Thursday, April 7, 2011

الفكرة دى عجبانى


سلامات. بتصوتوا لى ولا لأ؟

الفكرة دى لمحمد قاسم عجبانى اوى و متحمسة لها. لو حد متحمس هو كمان, يا ريت يبعت له ايميل