Sunday, February 9, 2014

الإمارات وقانون الرضاعة

تحديث 1: فى كلام ان الخبر ده عك من الجارديان وتحوير للحقيقة. انا لسه بحاول اجيب قرار الموضوع

هى الإمارات ازاى عايزة تعمل قانون يفرض الرضاعة الطبيعية؟
يعنى ايه؟
هيتأكدوا ازاى ان القانون متطبق؟
طب واللى لبنها قليل هتجيب لهم دليل ازاى؟
ثم انه اصلا اساسا شرعا مش إلزام ع الست؟
هو احنا عارفين نخلص من قوانين وعادات ظالمة للست عشان يطلعوا قوانين اعجب واظلم؟ 
الرحمة من عندك يا رب

Thursday, January 16, 2014

المستنقع

اه غلطنا
غلطنا اما فى يوم قلنا عايزين نبقى بنى آدمين، وماخوفناش نموت، وقلنا لينا رب كريم
لا اعضاء فى احزاب ولا حركات ولا هباب بس كنا مصدقين ان البنى آدم له كرامة مش هبة من حد
اتربينا على اننا اما نجيب 98 فى المية ونخش طب وهندسة هنبقى احسن حاجة فى الدنيا، اكتشفنا ان لا ال98 دى حاجة واللى احنا فيه ده له علاقة لا بالطب ولا الهندسة، وبعدين واحنا تايهين دورنا حوالين كل ما نلف ناخد قلم
فينا اللى سابه من الشهادة ووقف يخدم على شوية جرابيع فاطرين نفسهم بنى آدمين عشان معاهم فلوس وبيعاملوه وحش عشان هو جرسون فى كافيه شيك
وفينا اللى سابه من الشهادة بعد ما لقى ان تقديره وشهادته دول فى نفس غلاوة واهمية الكريستالات اللى امه جابتها من 30 سنة ورصاهم فى النيش
وفينا اللى نط فى اى مصيبة تطلعه من هنا، واما غرق ولا اتحرق اهله ماعرفوش يلمه حتت من جثته عشان يدفنوه

انا فاهمة ان اى تغيير حقيقى ايا كان اسمه بيبقى دور الشباب، الصغيرين اللى يقدروا يستحملوا، ده دورهم وواجبهم. وفاهمة برضه ان التغيير مش بييجى بسنة ولا اتنين ولا تلاتة
بس اللى مزعلنى اوى انكو متغاظين اوى مننا

ليه الغل ده كله؟
كل ده عشان بنقول عايزين نعيش غيركو؟
عشان مش عاجبانا حياتكو؟
على فكرة ما احنا لو كويسين يبقى انتو ربيتونا كويس، ولو فشلنا يبقى انتو كمان فشلتوا
ليه نفسكو اوى كده نفشل؟
ده حتى بنقرا فى الكتب ان الاب والام هم الوحيدين اللى بيبقى نفسهم ولادهم يبقوا احسن منهم
فى ايه بجد؟
ليه كده؟
ليه الغل والغيظ والشحن ده كله؟

ولو شيلنا كل العواطف على جنب، ده اصلا موقف الضعيف اللى عارف وواثق انه غلط، عايش حياته كلها فى محاولات مستميتة انه يثبت انه صح والتانى حمار

طب لو احنا حمير، وقلنا ان احنا حمير، هاه بقى؟ ده هيبقى حلو؟ انكو مخلفين ومربيين حمير؟

ده احنا نزلنا كل اللى معانا هو اللى فى جيبنا وكنا بنقسمه سوا، كل ما افتكر دلوقتى يعنى كان مفروض لمل طنط اللى اديتنى ساندويتش يوم 29 يناير اقول لها لأ عشان ماترجعش بعدين تقول قاعدين بياكلوا منين؟ ولا ادور عليها فى الشوارع عشان اجيبها تقول انها اديتنى ساندويتش؟

منكادين مننا اوى كده؟
انا مش بحب تشبيهات الستات والرجالة بس الوضع زى اللى جوزوها وهى صغيرة كهل بيضربها ويبهدلها وكل ما تحاول تسيبه انتو ترجعوها له
الاول افتكرت ان الحق والصح بينفع، فقامت مشيت قانونى وقالت تمشى صح، لقيتكو مش بس مش فى صفها ده انتو بتفتروا عليها وعايزينها ترجع
وبعدين بقلة خبرتها وهبلها صدقت ان الجيران ممكن يساعدوها طلعوا اقذر ما يمكن
وبعدين وقفتوا للجيران بس من منطلق دى بتاعتنا واحنا اللى نبهدلها مش حد تانى
ودلوقتى مصممين ترجع لجوزها غصب عن مياتين ابوها
هو اللى هيحصل غالبا انها هتستنى اما تكبر شوية ويبقى معاها فلوس وتعمل اللى هى عايزاه
بس لوحدها
وهتكمل لوحدها
وهتبقى مبسوطة لوحدها
بس بعد ما المرارة تكون اكلت كتير فيها
عشان اهلها نسيوا دورهم الأساسى مفروض يكون ايه

فى ايه مالكو؟
حسبى الله ونعم الوكيل فى كل واحد فيكو

Saturday, December 28, 2013

ثوروا بس بجد

بالنوسبة لحوار "الناس زهقت من الثورة وكفرت بيها": فاكس
اللى كان فاكر ان الثورة هتجيب تغيير فى تلات سنين يبقى محتاج مخه يتفور من اول وجديد ويفهم الدنيا بتمشى ازاى

قشطة اللى نفسه قصير براحته
واللى عايز ياخد استراحة محارب حقه
انا شخصيا عشان مخلفة وبنتى رضيعة لسة مش قادرة اعمل حاجات كتير
ومش ضرورى على فكرة الثورة تعمل حاجة فى اول كم سنة
وطبيعى جدا جدا النظام المستفحل فى البلد يشم نفسه كم مرة ويحاول ينتصر لنفسه، ده السمكة وانت بتصطادها بتفلفص كم مرة. الروح حلوة برضه

لسة لسة
طولوا نفسكو شوية
والثورة مش بس فى الدستور ولا الرئيس، عادى يعنى الدستور بيتعمل غيره والرئيس بيتشال
الثورة فى انكو تربوا عيال ماترضاش تنضرب فى المدرسة عشان المدرس ده حاجة مهمة ولا يمكن يغلط
الثورة انكو تربوا عيالكو مايخبوش عليكم لما حد يعمل فيهم حاجة عشان خايفين انكو تلوموهم عشان هم مهما كانوا غلطوا مش من حق حد يهينهم او ييجى عليهم بالأذى، وعشان مش صح ولا منطقى نلوم الضحية
الثورة انكو تربوا بناتكم محدش ييجى جنبهم الا برضاهم ومايرضوش يتباسوا ويتقفشوا فى الشارع والكورنيش وكل خن عشان خايفين يتسابوا عشان هم بنات ومن غير الولاد يبقوا ولا حاجة
الثورة انكو تربوا ولادكم يبقوا رجالة مسئولة مش اعتماديين استهلاكيين مش عارفين يعملوا حاجة من غير اهاليهم وكل اللى يعرفوه عن الرجولة هو معاكسة اللى رايحة واللى جاية والتقفيش والبوس فى واحدة بالارهاب، وانه راجل لقطة
الثورة انكو تربوا عيالكم يرفضوا قهر المدير فى الشغل عشان هو مدير
الثورة مش على الرئيس بس، النظام اللى لازم يسقط هو اى سلطة متعسفة فى حقوقها وبتستغلها لقهر البشر. الثورة يعنى الأبوين والمدرس والمدير مايفتروش عشان هو كده والسلام
الثورة انكو تحاولوا تنجحوا فى حياتكم عشان مش منطقى ان الناس اللى مقتنعة ان ربنا كرمها فى دماغها يبقوا فشلة مش عارفين يعيشوا وبيعيشوا يموتوا مالهمش لازمة فى الدنيا وماعملوش حاجة
واللى فيكم عنده الظروف والامكانيات انه يفتح بيزنس خاص يعملها عشان مايبقاش ولاد ال**** بس هم اللى ليهم فلوس فى البلد
واللى يعرف فيكم يشترى اسهم فى مصنع السكر ولا شركة الدخان ولا اى حاجة حكومية يشترى عشان هو و ولاده يبقوا من الملاك فى البلد دى. انشالله سهم ولا سهمين

عادى يعنى، ذاكروا واشتغلوا واتجوزوا وخلفوا وعيشوا غصب عن عين مياتين ابوهم، الثورة تبقى فشلت لو كل ثورى قرر يموت بالحيا
تفتكر اللى بيتسجن هيحس انه عمل حاجة لما يطلع يلاقيكم وانتو برا ميتين اكتر منه هو اللى كان جوا؟ هو ده التضامن يعنى؟ لا اشتغلوا وانجحوا واما يخرج ساعدوه يشتغل هو كمان ودبوا انتو الاتنين صوابعكم الاربعين فى عين اتخن تخين

مايبقاش نظركم قصير
لو الواحد له انه يعيش 50 سنة بس، وعنده 30 لسه، فى 20 سنة كمان يثور فيهم
الثورة عقيدة
الثورة اسلوب حياة

ماتخيبوش بقى وخليكم "ثوريين" بجد