العيب برضه ...

كمالة الكلام عن السفالة وقلة الأدب على الانترنت.

عايزة اخص الكلام عن الستات فى بوست كده...

شخصية عامة اعلامية اتكلموا عنها وعن انها كانت بتعمل وبتسوى زمان – مش حهنيكوا واقول لكم مين واتقال عليها ايه عشان مش ده الهدف – المهم خاضوا فى شرفها بالأوى.

لقيت بقى ناس بتحزق وتضرب وتعور وعيييييييييييييب. كتر خيرهم طبعا. بس اسمعوا بقى بيقولوا ليه؟

"دى ست متجوزة"

ايوة يعنى الانسة سمعتها سبيل طيب؟

يعنى هى ايه الفرق فى انها متجوزة وبالتالى سمعتها خط احمر؟

فكروا كده شوية ...

ايوة

آه

عشان الراجل اللى هى متجوزاه!! هى اصلا فى الأساس ست مالهاش اى تلاتين لازمة. واصلا مش متجوزة يعنى ربنا معاها بقى فى المرض والابتلاء اللى هى فيه. انما اما تتجوز بقى خلاص، بقى فى راجل محسوبة عليه وبقى شرفها من شرف الراجل اللى هى متجوزاه ...

ربنا يشفى عشان ربنا ماقالش كده

نيجى لشخصية عامة اخرى برضك كده مسكوها اكمنها – يا حرام – مش متجوزة فهى وهى عضو برلمان يعنى، بيصوروها ماشية تدور على واحد من الأعضاء عشان تتجوزه.

تحسوا ان دايرة التطور الطبيعية وقفت عند العالم دى.

وكأن عندهم هى اترشحت فى البرلمان اصلا عشان تلاقى عريس فى البرلمان فى وسط ما هم بيتكلموا عن الامبوبة والصحة والاموات والمصابين وكله

برضه ربنا يشفى

خلينا فى عضوات البرلمان.

اللى تتكلم فى شىء مفيد يقولوا لها شوفى لك حاجة تطبخيها يا خالتشى ومالكيش فيه

على فكرة التعليقات دى قريتها تعليقا على العضوة الوحيدة اللى قامت قدام الأغلبية البرلمانية الإخوانية ورئيس الوزراء وطالبت بتحقيق عن تمويل الإخوان المسلمين، ودى كانت محجبة ولابسة الزى الرسمى عادى

وبرضه العضوة الواحدة اللى قامت بدورها قانونا و طالبيت بطلب احاطة عشان اللى بيحصل للأقباط من تهجير ... فى الوقت اللى الاعلام مصهين ومحدش عايز يخش عش الدبابير ده

نيجى للى مش ببتكلم، تفتكروا بيسيبوها فى حالها؟

برضه صور وتريقة ونجيب لكم سربتاية شاى ولا ايه وقرف من النوع ده

يعنى هو فى الآخر تريقة وخلاص.

من الآخر نوعية من الناس – ستات ورجالة – مش بالعين ان فى اصلا ستات فى البرلمان. قال يعنى من كترهم.

وشغالين نفسنة وحقد وحاجة توجع القلب.

ما تشوفوا لكم حاجة مفيدة تعملوها وانتوا ساكتين.

ولو مفيش حاجة مفيدة تعملوها – زيى كده – على الأقل سيبوا اللى بيحاولوا يعملوا. ارحمونا بقى من كره النجاح اللى انتوا فيه.

على فكرة بجد احنا محتاجين نشجع كل واى حد عايز يشتغل فى البلد دى عشان احنا محتاجين شغل كتير.

الرحمة حلوة بقى