تلقى خط
نجدة الطفل رقم 16000، التابع للمجلس القومى للطفولة والأمومة شكاوى من عدد من
المواطنين بقرية أبوعزيز التابعة لمركز مطاى بالمنيا، تتهم حزب الحرية
والعدالة بتنظيم قافلة طبية لختان الإناث بالقرية، مطالبين المسؤولين بالتدخل لوقف
تلك العمليات المخالفة للقانون.
وقال مسؤول
خط نجدة الطفل ل المصرى اليوم إن الخط تلقى عدة شكاوى
من أهالى قرية أبوعزيز تتهم حزب الحرية والعدالة، التابع لجماعة الإخوان المسلمين،
بتنظيم قافلة طبية عقب صلاة الجمعة لختان الإناث مطالبين بالتدخل.
بيبقى عندى احساس كده بالأيام. يعنى اما اصحى على الخبر اللى فى البوست السابق، طبيعى انى اتمسى بالخبر ده. هو انا صراحة شوفته من اول اليوم بس قلت آكل واضرب لى نيسكافيه كده عشان اهدى عشان اما باكتب وانا منفعلة فى ناس بتتخض.
انا والله بس نفسى افهم الإخوان عايزين ايه
يعنى مفروض نفضل لحد امتى الرجالة تلوم الستات انها باردة ومش بتحس عشان مختنة، ويقوم نفس الرجالة دول مختنين بناتهم؟؟؟!!
ماهو طيب فهمونى. ما انتوا – سواء فى الظاهر او الباطن – مش عاجبكوا حوار الختان ده. بتهببوه فى بناتكوا ليه؟؟
حسبى الله ونعم الوكيل
حسبى الله ونعم الوكيل
حسبى الله ونعم الوكيل
طول الوقت من ساعة ما قريت بافكر. نطلع ع المنيا ونتكلم مع الناس؟ ولا نطلع ع الاخوان و ن... ال مش معقول هانتكلم مع الاخوان وانتوا عارفين ده. طيب هو مش الختان دلوقتى حمدا لله بقى ضد القانون؟ نتسند على دى؟ اللى هى ازاى يعنى ما هو هنروح للقسم يعنى؟ هههههههههههههه ويقول لك حاطين الداخلية فى دماغكوا ليه. المهم
اصل انا لو رحت المنيا عن نفسى يعنى احتمال كبير اروح اقول للستات اللى ييجى يلمس بنتك بسكينة المطبخ وختنيه انتى وبس.
عامة دى دعوة عامة كده وهابعت الموضوع لكذا رفيقة ورفيق من المهتمين بالموضوع ونشوف ممكن نتصرف ازاى فى الموضوع ده. ويا ريت اللى يقدر يعمل حاجة مفيدة يبعت لى وانا هانشرها هنا ونحاول نجمع بعض.
2 comments:
بصي منذ موت الطفلة اعتقد اسمها "بدور" في مغاغة - المنيا وناس كتير بتخاف علي بناتها , لكن مازال الكثير من الاهالي يقومون بختان بناتهم عن طريق اطباء غير مشهورين بيقوموا بالذهاب للمنازل للقيام بالعملية و ايضا بعض الدكاترة المسنودين يقومون باجراء عمليات الختان في القري ومن كام شهر شفت امام عيادة في احدي القري زحمة كتير وعرفت انه فيه دكتورة بتقوم بإجراء عملية ختان لبعض البنات , لكن معظم الدكاترة دلوقتي بيخافوا يعملوا العملية ومااقدرش اقول نسبة كام من الاهالي لا يقومون بإجراء عمليات الختان لبناتهم لكن نسبة ملحوظة او كبيرة لحد ما
نشر الموضوع علي الفيس
Post a Comment