حكاية نهاية حياة

الهى اشوف فيكو يوم. من كتر كلامكم خليتونى اشوف حلقة من متسلسل حكاية حياة. حرام والله انا مش مسامحاكم.

 مالها شفايف غادة عبد الرازق؟ فى ايه؟ وايه المحن اللى زاد عن كل معدلات الانسانية ده؟ وكده بقى بقيت رقيقة وبوبو مومو سوسو كوكو؟ وفين دكتور الطب النفسى ده اللى مريضة عنده بتناديه باسمه وتشاور له على سريرها عشان يقعد جنبها؟ وانهى دكتورة نفسية دى اللى هتردح بالعين وبالحاجب؟ وسناء شافع فهموه ان الرغبة الجنسية ان الواحد يطلع لسانه زى الكلاب؟و انهى مصحة نفسية دى اللى الأودة فيها سويت 5 نجوم؟ وايه المركبة الفضائية اللى العيلة ساكنة فيها دى؟ مين قال لهم ان كده ديكور يعنى؟ ومين فهمهم ان الشاشة اما تزرق طول الحلقة ده مش عمى للمشاهدين؟ ومين علم المخرج انه لما يصور اتنين قاعدين على سرير من كورنر جايبهم على كورنر تانى والكادر كله كنبة ده اسمه اخراج؟ وبالنسبة للأخ ابو ضفيرة، نعم؟؟ وليه اما كانت بتحكى الحكاية لزفت الطين الدكتور كل شوية تقول "يا هشام يا هشام يا هشام" ما احناعارفين انها بتحكى للمخفى. ثم ان فى واحدة طالعة الرقيقة الهنومة الكميلة الهادية العاقلة الراسية تعصر برتقان بالليل وهى لابسة صديرى بترتر من بتوع الحروب ونص دراعها غوايش؟ وكمان رايحة تشتكى لابنها اللى نايم ان "بابى مزعلنى انا عارفة انه اما بيشرب مش بيقدر يعمل كنترول على تصرفاته؟" ويسكى وشرب وكاسات واخت بتخطف جوز اختها اللى هو ابن خالتها فى مسلسل فى رمضان؟ ومين فهم غادة عبد الرازق ان اللى هى بتعمله بوشها ده تمثيل انها بتعيط؟ وبعدين هى لابسة ايه انشالله ورايحة تقول لاختها ع اللبس العريان؟ وبالنسبة للكاستينج:: محمود الجندى ابو غادة عبد الرازق؟؟؟ والست كانت ماسكة شمسية دانتيلة بكرانيش فى المطرة؟؟ وايه الخوذة الروسى اللى كانت لابساها دى؟ لازمتها ايه يعنى؟؟ وتقول لامها انتى اقذر ام فى الدنيا وبعدين ماقصدش اضربك يا ماما وتعمل قطة؟ وليه الدنيا ضلمة كده؟؟ ليييييييه؟؟ ومنين امها وقعت انكفيت على وشها ومنين مخها اللى ورا وقع؟ اتخبط ازاى طيب؟ ويخرب بيت شفايف غادة عبد الرازق... آخر حاجة وابشع حاجة: هو ليه الموسيقى التصويرية كانت عالية اوى كده ومملة اوى كده ومستمرة طول الحلقة بالمنظر العجيب ده؟؟ 

 ده لا اخراج ولا تمثيل ولا سيناريو ولا حوار واضاءة ولا موسيقى ولا ديكور ولا مكياج ولا ملابس ولا كاستينج ولا اى حاجة 

 حرام عليكو نفسكو. حرام عليكو شبابكو.؟ ازاى بتتفرجوا على ده؟ ليه تعملوا فى روحكم كده؟ وهو ده الفن دلوقتى؟ ده مسلسل غادة عبد الرازق اللى مدفوع فيه قد كده وبتتكلموا عليه كلكو؟ انا مصدومة بجد من المستوى المنحدر والمقرف ومصدومة اكتر ان ده بيتم التعامل معاه على انه حاجة عدلة. مش مصدقة نفسى بجد والله العظيم تلاتة