مؤمنة بتمكين المرأة؟ يبقى مكنى صاحبتك أولى

"أول خطوات الحل، هو الإعتراف بالمشكلة وطلب المساعدة"

عارفينها وحافظينها، بس أغلب الستات لا بيعملوها لنفسهم ولا لبعض. رغم إن كل دايرة ستات سواء زميلات شغل أو قريبات أو جارات ممكن يكونوا السبب الرئيسى والمباشر إن مستوى حياة الستات دى يبقى أحسن كثير.

إزاى؟

من بداية حملى فى أواخر 2012 وأنا بدأت مرحلة من حياتى بقيت أحياناً جسدياً غير قادرة على تلبية إحتياجاتى البسيطة الهامة. زى إنى لازم آكل ومش قادرة أقوم أطبخ مثلاً

كان عندى جارة وقتها جارة ألمانية وجارة ثانية مكسيكية أمريكية، والإثنين بقم أول خط دفاع عندى فى إحتياجاتى كست حامل. فى ليلة كنت تعبانة أوى وواحدة فيهم سمعتنى وأنا فى وصلة قىء طويلة شوية وجابت الثانية وجولى.

المكسيكية عملت لى عصير كده فيه كم حاجة على بعض كان جامد أوى طلعت مامتها علمته لها لتعب مشابه. والألمانية حلفت على ما أتقايا ثانى إلا وهى ماسكة راسى :)

الألمانية عندها طفلين، كنت آخذهم منها يعملوا الواجب عندى وألعب معاهم على ما هى تكون اشتغلت شوية عشان كانت بتشتغل من البيت.

سيبكم من جو النفاق الإجتماعى اللى بيعمل ضغط فوق الضغط مش حل

• صاحبتك الحامل لو عندها طفل، هيبقى حلم لها إنك تقعدى بطفلها ساعة عشان هى تنام
• لما صاحبتك تولد، هى لا مستنية هدية ولا مستنية حلويات. هى محتاجة الغسيل اللى فى الغسالة يتنشر، المواعين تتغسل، وطبعاً لو بترضع محتاجة عصاير
• ولو مصممة تهاديها اشترى لها حفاضات. فكك من الجو التقليدى. الحفاضات غالية ومهما كانت جايبة اللى هتجيبيه هينفع.
• ولو بتعرفى. خلصى شغل واشترى فراخ وخضار وروحى لها اطبخى لها. هى محتاجة أكل كويس عشان صحتها وعشان الرضاعة. وشيلتى من عليها حمل.
• ولو معاكى فلوس يعنى وعايزة توجبى أوى، اتفقى مع عاملة منزل تعرفيها وحاسبيها للشهر الأول تروح لها كل يوم تقوم بأعمال البيت وتروح.
• صاحبتك اللى عندها بيبى مكن يكون حدث يومها إنها هتحمى البيبى لوحدها. روحى ساعديها
• لو عندها طفلين، غالباً الكبير زهقان وعايز يلعب وهى مش قادرة. عدى عليهم العبى معاه شوية
• ولو أكبر هيبقى محتاج مساعدة فى الواجب
• ولو مش فاضية طول اليوم، تعالى على ميعاد النوم وخذى البيبى فى العربية وامشى بيه على سرعة هادية هيروح فى النوم. البيبيهات بيحبوا الحركة دى
• اتفقى لها مع كوافيرة تيجى لها البيت ترجعها للى هى ترتاح تشوفه. فاكرين كنا بنبقى مخنوقين من نفسنا إزاى؟

وغير كده كثير. وأما ترجع الشغل هتبقى محتاجة مساعدة عشان ترجع. وعشان مخها يرجع لفورمة الشغل هتحتاج وقت ومساعدة.

ومش بس الجواز والخلفة يعنى. صاحبتك اللى عايشة لوحدها لما تعيى ممكن تكون محتاجة أكل، تنظيف، فلوس لو معاكى، شغل لو تعرفى

جارتك عندها إمتحان ومحتاجة تذاكر؟ شوفيها محتاجة إيه واعمليه

مش جو صعبانيات ولا أبو الرجالة والجو ده، بس الحقيقة إن محدش بيحس بتحديات حياة الست.

من كثلا ما قلنا نكتة إن الست بسبع رجلين وثلاثاشر إيد تقريباً صدقناها وبقينا بنتوقعها من نفنسا ومن بعض

وعكس المتعارف عليه، مش كل اللى محتاجاه الست هو الرغى والعياط فى التليفون. ساعات آه ده بيكون مهم، بس أغلب الأحيان أصلاً مفيش وقت لده.

الغالبية من الأهل - اللى بيحبونا - بيتعاملوا مع تفاصيل حياتنا على إنها كلها ممكن الإستغناء عنها

مفيش وقت تذاكرى؟ بطلى شغل

مفيش وقت تشتغلى؟ اقعدى فى البيت

محتاجة حد يساعدك فى كل اللى وراكى؟ ماينفعش كل ده يتعمل فى نفس الوقت

واللى يحاول يعرض فلوس كإن ده الحل

واللى يحاول يساعد يقوم يقول يزور وهو مش قريب أوى فده معناه إن البيت لازم يتنظف ويتحضر له حاجة نضايفه بيها ونلبس لبس معين ممكن يكون مش مريح … تفاصيل، تفاصيل كثير

تفاصيل كثير انتو عارفينها

خلونا نساعد بعض ونريح بعض

عشان نقدر نعمل اللى إحنا عايزينه

هو ده التمكين على فكرة