عن خلع الحجاب والأسبرين والمستنقعات

اتعلمت من أول ما اتعلمت فى كلية الطب، إن أى شكوى من العيان زيها زى أى مشكلة. بنعالجها بترتيب ثلاثى:

1- سبب المشكلة الأصلى

2- التعامل مع الشكوى المقلقة

3- تفادى تكرارها والتعامل مع تداعياتها

يعنى ماينفعش عيان يبقى ضارب مشوار للعيادة، ودافع كشف، ومستنى دوره، عشان يقول للدكتور إن بقى له أسبوع بصداع مش بيروح، والدكتور يكتب له أسبرين!!

أولاً: فى سبب للصداع هو اللى لازم يتعالج، ومهما العيان بلبع أسبرين الصداع مش هيروح لإنه سببه موجود. إلتهاب أذن، أسنان، كشف نظارة، ضغط عالى… إلخ

ثانياً: لإن الجسم بيتعامل مع الأدوية بطريقة فيها نوع من التعود، يعنى بعد شوية الأسبرين لو كان بيهدى بنسبة 70% لمدة كم ساعة، النسبة والوقت هيقلوا شوية شوية.

ثالثاً: لإن الأسبرين ده بيتغسل فى الكلى وبيبهدل الدنيا، وبيجيب للمعدة بلاوى. مش إكلير هو.

ومن ساعتها - الله يكرمك يا دكتور حسين سويلم - وأنا محفور جوايا بديهيات ال problem solving بطريقة البحث عن أصل المشكلة.

المية من الحنفية مغرقة الأرض؟ مش هنفضل نلم المية من الأرض لآخر العمر. هنرمى حاجة على أول الباب عشان المية ماتبهدلش برا الحمام، ونجرى نقفل محبس المية. ولما المية تقف ممكن نمسح شوية عشان نعرف نلاقى مكان نقف فيه نشوف بقى أنهى بلاعة مسودوة ولا فى إيه.

غير كده المية هتفضل مغرقة الدنيا، وهنبهدل سقف الجيران ونخربها علينا وعلى اللى حوالينا.

لما نلاقى إن نسبة مهولة من إناث هذا البلد التعيس بيلبسوا لبس مفروض فى أصله تقرب من الله، وتحول إلى طقس مجتمعى يُمارس من البعض لفرض حالة عامة على المجتمع تسهل مهمة السيطرة عليهم. ماينفعش الحل إننا نجرى نخطف اللبس من عليهم، ولا نصرخ فى وشهم نقول لهم اقلعوه.

أولاً: مش هيحصل

ثانياً: مش هيحل حاجة

ثالثاً: طبيعة البشر وطبيعة الموقف، إن ده هيجيب نتيجة عكسية.

فممكن مثلاً يبقى فى حملة للتوعية بأصل الحجاب، وليه بيتلبس، بدل ما فى ناس بتتكلم عنه وكإنه الباب الوحيد للجنة لأى ست على ظهر الكوكب.

أصل المشكلة إن الست مالهاش أى إختيار حقيقى فى أى حاجة خاصة بيها. وده تربوياً وقانوناً

• يعنى انتوا عارفين إن الست فى مصر لما بتتجوز، بطاقتها بيبقى مكتوب عليها إسم جوزها وجوزها مش بيتكتب فى بطاقته إسم مراته؟
• طب انتوا عارفين إن الست فى مصر فى لايحة طويلة من القيود القانونية لحرية السفر لما بتتجوز؟ من إسم جوزها فى الباسبور، لحد حقيقة إن أى راجل متجوز ممكن يروح يحط إسم مراته فى قائمة الممنوعين من السفر؟
• طب هل تعرفوا إن القانون المصرى مافيهوش أى مادة تجرم إغتصاب الراجل لمراته؟ يعمل فيها ما بدى له هو حر فيها.
• طب الست المصرية لو اتجوزت أجنبى ماتعرفش تديه الجنسية. بس الراجل المصرى أما بيتجوز أجنبية يديها الجنسية
• بس برضه يديها الجنسية بمزاجه. يعنى لو اتجوز أجنبية ممكن لو عايز يفضل سايبها بورقها الأجنبى ولو طلقها يا ترجع بلدها يا تترحل على بلدها. ملحوظة: أجنبى يعنى غير مصرى، مش بالضرورة أمريكية. يعنى مثلاُ السورية الغلبانة اللى بلدها عاليها واطيها اللى فى بيتجوزوها بخمس آلاف جنيه… برضه أجنبية
• طب انتوا عارفين إن الست فى مصر لاتصلح كضامن فى القسم؟ لازم راجل
• الطلاق الغيابى حتى الآن (فى 2015!!) لسه قانونى فى مصر. يعنى تبقى قاعدة لا بيكى ولا عليكى، ييجى لك راجل غريب بورقة إنك اتطلقتى وانتى مش دريانة. عشان هو حب يطلق
• الست فى مصر لاتملك حق إنها تطلق نفسها. الخيارات عندها يا تطلبها من جوزها وتستنى موافقته، يا تخلع نفسها فى المحكمة بعد ما تستوفى أسباب ترتاح لها المحكمة وتدخل حد يشهد إنه حاول يحل ومانفعش وتتنازل عن كل حقوقها المادية وترجع المهر، يا ترفع قضية إحتمال تكسبها لو كانت عندها أسباب قوية من وجهة نظر المحكمة وطبعاً مع فرضية إنها معاها فلوس محامى. لكن إنها تحب تطلق فتطلق لأ
• برغم إن القانون وقبله الشرع بيدوا الحق للزوجة إنها تكون عارفة إن جوزها اتجوز ست ثانية، وعليه لو عرفت ورفضت الوضع لها الحق فى الطلاق، تقريباً مفيش ولا مأذون ولا حد فى مصر بيفعّل القانون ده، وكل الأطراف بتتجاهله لإنهم شايفينه تجنى على حق الراجل "المطلق" فى إنه يبدل فى الستات. وأصلاً القانون ده له صلاحية معلوماتى إنها سنة، بعد السنة خلاص تخرس بقى.
• لحد النهارده الراجل ممكن "يقتل" مراته أو أخته أو بنته أو أمه لشكه فى سلوكها، وهيطلع براءة. ولو هى عملتها لو شافت جوزها بينام مع واحدة ثانية هتاخذ فيها مؤبد أقلها.
• لحد النهارده مفيش أى تطبيق حقيقى للقانون الهزيل اللى بيجرم العنف ضد المرأة وفقط ف حالة الزوج. أصل القانون إن الست لو جوزها بيضربها لازم تستنى أما يجيب الدم من وشها وتروح بالدم ده للقسم عشان يبيتوها عندهم لما الطبيب الشرعى ييجى ويثبت وجايز حاجة تحصل وجايز لأ. لكن لو بيضربها بشكل مستمر قشطة يعنى مراته وإحنا مانعرفش اللى بينهم. ومفيش حاجة إسمها واحدة تبلغ إن أبوها بيضربها، أو إن أخوها بيضربها. عادى يعنى بيربوها وكده. ما هى كأنثى مولودة أصلاً عندها مرض نقص التربية.
• مفيش أى قانون حقيقى للتصدى لتحرش وإعتداء أساتذة الجامعة وأصحاب الشركات على الطالبات والموظفات. ولحد النهارده دكتور الجامعة مش بيتحاسب لو عاكس طالبة أو عمل أكثر من كده. لازم يكون اغتصبها اغتصاب كامل، عشان هى تقوم زى الشاطرة باللى عليها وجواها للقسم عشان ياخذوا عينات وجايز حاجة تحصل وحاجة لأ. ومفيش أى قانون بيلزم الكليات اللى فيها إمتحانات شفوية بتسجيل الإمتحان صوتى أو فيديو. يعنى سلطة مطلقة على الطالبة وجدعة بقى لو اتكلمت.

صعب أوى يكون ده المستنقع اللى إحنا قاعدين فيه، وبعدين نتكلم كده بصوت عالى "فقط" عن الحجاب ونتخيل أى حاجة إيجابية.

أنا كل ده بكلمكم عن القانون. ماجيبتش سيرة التعاملات العادية من إن العمال لازم يشوفوا راجل عشان يشتغلوا عدل، وإنى دكتورة محترمة عندى 34 سنة بكلم صيانة الغسالة اللى بيرد علىّ شايف إنى بالغت أوى فى رد فعلى لما كررها كذا مرة إنه يقول لى "يا مدام مهند" رغم إنى عرفت نفسى فى أول المكالمة إنى "دكتورة إيمان". وبرضه ماتكلمتش فى يعنى إيه الست فى مصر تكون سمرة أو وزنها زايد. ولا هاتكلم فى إن لحد يومنا هذا كل مظاهر العنف المباشر والغير مباشر ضد المرأة موجودة فى الدراما المصرية على سبيل العادى أو الهزار

ماينفعش كل الطحالب والحشرات والفيران والريحة العضوية اللى من كل حاجة دى، ويكون كل الحل اللى عندنا فقط هو قلع الحجاب، لإنى ساعتها هكون زى الدكتور اللى ساب عيان ضغطه عالى وهو مش دريان وكتب له على أسبرين ثلاث مرات فى اليوم