Monday, March 7, 2011

اتقوا الله .... و ماتعرفونيش


دى الداخلية اللى عايزينها تنزل تحمينا. و امن الدولة اللى زعلانين اننا عايزين نحله.

بصوا من الآخر, اللى هيحامى للناس دى بعد الفيديو ده يعتبر نفسه مايعرفنيش, عشان انا مش عايزة اعرفه.

و محدش يقول لى فى و فى. لو كان اللى موجودين حتى النص كانوا قدروا يمنعوا تفشى الكلام ده. حسبى الله و نعم الوكيل فيهم و فى اى واحد يدافع عنهم او يحميهم من الحساب.

و محدش يقول لى حرية الرأى و التعبير و الديموقراطية, على رأى مروة رخا, علمناهم الشحاتة!! حرية الرأى عمر ما كان معناها حرية محاباة قاتل بيعذب الناس و يمتهن انسانيتهم. مش عشان انت مانضربتش بالقلم يبقى خلاص, و مش عشان انتى ليكى قريب ضابط بيجيب لك رخصتك عالبيت و يبعت معاكى عسكرى يوم الفيش و التشبيه و الباسبور يبقى الداخلية بقيت حلوة.
الديموقراطية متبرية منكم باللى مش عايزين وائل الكومى و امثاله مايتحاسبوش. و حقوق الانسان بتقول لكم انها مش بتنقى الناس على اساس ان اللى مش بيتأذى بس هو اللى له حق.

الداخلية لازم تتحاسب على اللى عملته, و الا يبقى مفيش لا عدل ولا حق ولا اى حاجة عدلة . نفسى افهم ازاى ممكن تحسوا بالامان فى وجود قتالين قتلة بسلاح ميرى قتلوا قبل كده؟ انتوا بتفكروا ازاى؟ حتى مش خايفين منهم يعنى؟؟ فى ايه مخكوا راح فين؟؟

اتقوا الله ... و سيبونا نكمل اللى بدأناه



Sunday, March 6, 2011

من داخل مبنى مباحث امن الدولة


سلامات يا مصريين

امبارح كان من اسعد أيام حياتنا فعلا. ألف مبروك للكل

امبارح تم الحمد لله سقوط مبنى مباحث امن الدولة بمدينة نصر – عاصمة جهنم بالشرق الأوسط – و هحط لكم لينك الصور و الفيديو لما دخلت القاهرة اليوم. 

اليوم ده كنت ايحة انا و محمد المصرى و ليليان وجدى نجيب اكل لبقية الناس, و يادوب رجعنا كان الاقتحام بدأ, اديت اكياس الاكل لست ماعرفهاش قدامى و زعقت لها و انا بجرى بنمرة موبايلى عشان تخليه معاها. و احنا جوا كلمتنى و اخدت نمرة امينة زكى صاحبتنا عشان تاخده منها, قبل ما تمشى اديت الاكل لست تانية اللى اديته لراجل تانى. الراجل ده بقى بيكلم امينة يقول لها "ايوة يا مدام, انا معايا الاكل اللى انتى جايباه لبنتك اللى فى امن الدولة" هههههههههههههه
النهاردة الضهر, لقيت الست اللى اديتها الاكل بتطمن عليا انا و صحابى. يا جماعة البلد بجد بقيت حلوة اوى, انا حقيقى فرحانة فرحة مش طبيعية. الحمد لله يا رب يا كبير يا كريم اوى.



و على فكرة, انا باقترح ان المكان ده يتحول الى بيت شباب للشباب و المدونين و النشطاء. و يبقى مركز لمؤتمرات حقوق الانسان و حرية الرأى و التعبير كلها. نياهاع هاع هاع هاع


ده لينك البوم الصور

و ده لينك الفيديو:




تحديث: شكرا طارق عمرو


الله يخرب بيوتكم

Saturday, March 5, 2011

نداء استغاثة

 ليسة جايلى الايميل ده و انا بمرره هنا يمكن يساعد



أيها الزملاء جاءتنا الان استغاثة من سجن القطه بالمرج عن قيام أفراد من الشرطة بالسجن بقتل المواطن هانى سيد محمد أحمد من شمال سيناء والموجود بعنبر ب الدور الثالث غرفة 17 كما تم اصابه ثلاثة أخرين نعرف منهم أسم واحد هو منصور حسين ناصر حسين
وذلك بدون أى سبب مطلقا
والسجناء الان متحفظين على الجثث ولكنهم فى حاله من الذعر والرعب من هجوم الشرطة بالسجن وقتلهم فرجاء توصيل الرسالة لمن يستطيع نجدتهم وأنا أحاول الاتصال بالجيش حاليا وأكتب هذه
المعلومات على كافة الصفحات التى من الممكن أن تساعد المساجين فى سجن القطة
Shereen Talaat
Film Maker
Egypt
0020121797689
0020123600721

Friday, March 4, 2011

مش عايزة الداخلية دى ... و عندى اسبابى


سلامات
انا ايمان, 29 سنة, خريجة طب عين شمس. من سكان مدينة نصر فى الاصل و عيلتى مافيهاش ولا ضابط شرطة ولا اعرف ضباط جيش
هحكى لكم حكايات


1
الزمان: يوم من الايام العادية جدا
المكان: قسم مدينة نصر اول
اللى حصل: رحت اعمل فيش و تشبيه. و اللى كان بيعمله, كانت ايده كلها على ايدى و كوعه فى صدرى. العسكرى اللى كان واقف كان شايف و بيضحك, و الضابط قاعد على كرسى قدام ترابيزة برا الاودة اصلا. و انا داخلة شايفة العسكرى من عالباب باصص فين. و انا خارجة سامعاه قال ايه.
فكرت اشتكى, بس هكلم مين؟ هاشتكى القسم للقسم؟ و هم وشوشهم كلهم كده؟ و طريقتهم و بوزهم؟


2
الزمان: يوم فى خامسة طب الساعة 11 و 40 دقيقة بليل
المكان: شارع الاوتوستراد قدام قسم مدينة نصر اول
اللى حصل: كنت راجعة من درس فى ميدان سانت فاطيما بميكروباص و اما عدينا على القسم وقفونا عشان حياخدوا الميكروباص, و لما التباع قال له يا باشا ليسة طالعين من شوية معاكو, شخط فيه بطريقة عجيبة و قال له بس ياله. الميكروباص كان فيه راجل قدام جنب السواق و ست كبيرة و انا. الست الكبيرة بتقول له "يابنى سيبنا الدنيا ليل و عايزين نروح" ولا رد اصلا. و نزلنا الشارع و الساعة داخلة على نص الليل عشان اشوف حاجة اركبها اروح.
برضه فكرت اشتكى, و برضه قلت لنفسى هاشتكى لمين


3
الزمان: اواخر 2009
المكان: قسم مدينة نصر اول و المرة دى معاه قسم التجمع
اللى حصل: كانت عندى مشكلة كبيرة فى شغلى و فيها فساد و معايا ورق غير انهم واكلين عليا فلوس و كنت عايزة اثبت الورق اللى معايا فى القسم و كمان عشان كانوا فى الشغل بيهددونى. فى مدينة نصر قال لى مش اختصاصى و فى التجمع ماعرفتش افهم منه اى حاجة. قضيت اليوم كله بين الاقسام. معاملة زيفت و بقيت قاعدة مقاومة شعورى بالخوف اللى مش عارفة مصدره غير انى عايزة امشى من المكان ده. كنت متخيلة انى لما ابقى فى مشكلة و تهديد و ناس بتفترى عليا و على غيرى اما اروح القسم هحس انى فى امان و ان الحق هيرجع. خصوصا انى المرة دى جاية بورق يثبت اللى باقوله, و الورق ده بيثبت فساد و شهادات طالعة غلط
روحت البيت و انا حزينة و كارهة الدنيا  ... و سلمت الشغل الورق بعد ما اخدت صور منه و لحد النهاردة موجودين فى اودتى اترفج عليهم. و لحد النهاردة على علاقة بناس من اللى اخدوا الشهادات الغلط و اتحرموا من الفرص اللى كانت ممكن تجى لهم بالشهادات الصح



4
الزمان: يوم تانى مالوش اى معنى
المكان: فى بيتنا فى مدينة نصر
اللى حصل: مشكلة مع حد من الجيران. كلمت النجدة مرتين فى ساعة و صوتى باين عليه ان فى مشكلة, و قلت له انى لوحدى انا و اخواتى البنات و ماما "يمكن يفهموا" ... ماجوش اصلا!!




----------

انا عمرى ما حسيت بالامان غير بعد ما اختفت الشرطة من الشارع. مدينة نصر بقيت حلوة و امان و الناس بشوشة و رافعين راسهم و نضيفة ... بايديهم. و اما بيكون فى مشكلة مع بلطجى "اللى غالبا بيطلع داخلية" بنعرف نتصرف معاه الحمد لله

انا رافضة تماما رجوع بنى آدم قسم مدينة نصر ده غير اما اضمن ان عمر ما ده هيحصل تانى. عارفين ازاى؟
اما ثقافة الاعتذار للمواطن تكون موجودة – تطبيق: اعتذار المسئولين عن اذى الناس يوم 28
اما الفاسد يتحاسب و يتعاقب, و المجرم يروح فى ستين داهية
اما يمسك القسم واحد من براهم, عشان هم لحد دلوقتى حاميها حراميها و رافضين يعترفوا باى غلط. انا عارفة ان هايبقى فى مرحلة ليسة فى غلط, بس عايزة واحد يمسكهم من براهم ابقى عارفة ان لو ليا حق و رحت قلت له على الاقل حيهتم.

عايزة اللى يمسكهم يخليهم يفهموا ان مفيش واحد منهم يستجرى يبص على جسمى حتة حتة عشان انا ست داخلة القسم من غير راجل. فتكون النتيجة ان جسمى يبقى سبيل فى الشارع كل واحد ينقى منه اللى عاجبه و يفصصه عشان كل واحد ماشى فى الشارع عارف انى ماليش دية و انى مش هعرف اعمل حاجة و ان مفيش سلطة هاتعاقبه.
عايزة واحد يفهمهم كلمة "نجدة" معناها ايه, و ان اما بنى آدمة تستنجد بيهم عشان جارها مخوفها شغلتهم انهم يشوفوا الموضوع ايه, و برضه يفهم الناس ان ازعاج السلطات دى مش حاجة هينة و ليها عقاب شديد.

و من غير الحاجات دى ... مش عايزة داخلية, عشان دول مش بس مش هايكونوا مش امان, دول اكبر مصدر خطر