Sunday, May 1, 2011

أنا... من الثوار!



بالأمس, و أنا داخل عربة مترو الأنفاق, كنت مستمتعة جدا بموسيقى البيانو في اذناى, و اقرأ رواية فخر و إجحاف – كتابي المفضل – في إحدى اللحظات الجميلة التي اشتاق اليها.

و من حين لآخر ارفع عيناى لأمارس هوايتي في التقاط صور ذهنية للناس. فهي واقفة تمرق الموبايل تنتظر سماع صوته و تتساءل " هو نسيني ولا إيه النهاردة؟". و هو يتطلع إلى النافذة و يتفادى ساعة يده و يفكر فيمن تنتظره بالمنزل و يدعو "على الله ما تقلبهاش خناقة بقى ع التأخير". و هم يستمعون إلى موسيقى مزعجة جدا من الموبايل و يتبادلون نكات احمد الله أنى لا اسمعها, لتتلاقى عيناى مع احدهم فيعطيني نظرة الواثق بسماجة كان من الممكن احتمالها لولا أنى كنت في صحبة – مستر دارسى – فرجعت لقراءة كتابي بعد أن أرسلت له رسالة " النبي تتلهى"!


رجعت للقراءة و كنت في غاية اندماجي مع حوار جين اوستين العبقري, حتى بدأ طفل يبدو في السابعة من عمره يعكر علىّ صفو اللحظة. كان يصعد على الكراسي و يترنح على ما يثبت في سقف المترو ليمسك به الواقفين و يتدلى منه بوزنه كله – الغير خفيف – و أنا أحاول جاهدة تجاهل الأمر. حتى بدأ أخوه الأكبر – و الأثقل – فعل نفس الشيء!

لم استطع المقاومة
ذهبت إليهما بابتسامة موجهة حديثي للأخ الأكبر:
"ازيك؟ أنا إيمان"
اعطانى نظرة "دى مالها دى؟" دون اى كلام
"اسمك إيه؟"
"عبد الله"
"هو مش المترو ده بتاعنا كلنا؟"
نظر اليّ بابتسامة خفيفة و قال: "آه"
"طيب الحاجات دى عشان الكبار يمسكوا فيها, لما انتوا تتمرجحوا عليها حتبوظ " و أنا على نفس الابتسامة
ابتسم الاثنان إلىّ, و قال الأخ الأكبر: "حاضر"
.
.
.

عدت إلى الكرسي, و فتحت كتابي, فلم تمر لحظات حتى جاءني عبد الله بسؤال:
"هو حضرتك من الثوار؟"
ابتسمت ابتسامة واسعة و ضحكت و قلت له: "نعم؟"
"روحتي التحرير؟"
"آه" – والله بكل فخر – "و أنت؟"
"أنا كنت عايز انزل بس بابا خاف عليا و مارضاش" ثم لمعت عيناه و هو يقول "بس روحنا المليونية بعد كده"
ثم تركني أكمل كتابي, و لولا حرصي ألا أزعج الأب و الأم كنت استمررت في الحوار.
.
.
.
حتى جاء الأخ الأصغر:
"عارفة جارنا, كان عند الجامعة الأمريكية و ضربوا من فوقها رصاص" ... ثم سألنى : "كنتى فين وقتها؟"
"في شارع القصر العيني" ..." انت اسمك إيه؟"
"احمد"
" انتوا جابين بكرة؟"
"هو حضرتك رايحة بكرة؟"
"آه, بكرة في مليونية عشان بكرة عيد العمال إن شاء الله"
و ضحك و قال لى: "بس هى مش حتبوظ على فكرة لو لعبت فيها, دى بتستحمل"
"يا سلام؟" متحديا خبثه المرح
فضحك و جرى إلى والده
.
.
.
جاء مرة أخرى و معه قلم هذه المرة:
" ممكن تديني الفيسبوك بتاعك؟"
بعد ضحك كثير, قلت له:
"أنت عندك فيسبوك يا احمد؟"
مبتسما و سعيدا: "آه"
"طيب اكتب لك على إيه؟ معاك ورقة؟"
"لا عادى, ممكن على ايدى أو على البنطلون"
"بنطلون إيه يا احمد بس... استني"
قصصت من طرف الجريدة التي كانت في حقيبتي و كتبت له اسمي بالعربية و الانجليزية و أعطيته الورقة:
"أنت تكتب اسمي في جوجل, هيطلع لك الفيسبوك بتاعي و مدونتي و كله" ... "عارف جوجل؟"
"آه طبعا!!!"
"انت عندك كم سنة؟
"8"
نظرت له بكل فرحة و أمل
.
.
.
.
وصلنا للمحطة و سلمت عليهما و ذهبت, ثم استدرت الوراء: "ماتنسوش بكرة"
رد عبد الله "إن شاء الله" و هو رافع يده بعلامة النصر!



كم جميلة هي هذه الثورة
و كم فخورة أنا اننى ... من الثوار!



تمت



يادى الميدان اللى حضن الفكرة و صهرها

يادى الميدان اللى فتن الخلق وسحرها

مليونية عيد العمال -- عشان كل المصريين




اشوفكوا هناك ان شاء الله

اليوم ده مهم, عشان هو شكلنا اما بطلنا نروح الميدان المواضيع ماعت و باظت




هبل بقى, هبل حلو اوى

ثم ان فى حكم محكمة بالحد الادنى للأجور على فكرة و كل طلبنا يتنفذ. و للى بيقولوا "حيجيبوا يا عينى منين؟" احب اقول لهم لو فى كل حتة اخدوا نص مرتب المدير بس, حيعرفوا يجيبوا. مش لازم حد اقسى دلوقتى حالا, بس يا ريت يعنى حبة دم و اعادة لتوزيع ميزانية المرتبات فى كل جهة, حتلاقوا منجم لكل حاجة مش بس حد ادنى للأجور ان شاء الله

يوم من احلى ايام حياتى



امبارح خرجت مع صحابى عشان اعرف انهم عاملين لى حفلة عشان جايزة البوبس للمدونات اللى الحمد لله اخدتها. و توالت المفاجئات طول اليوم.
من اول آسر مطر اللى جه اسكندرية, و تارت التفاح مع ايس كريم الفايليا و توبينج الكراميل الوهمية, و صحبة احلى ناس و اجمل صحاب.
و بعدين لقيت حبيبة قلبى نهى عطا عاملة لى احلى مفاجأة
هى ماتتقالش, تتشاف:


 دى صورة التارت بالعند فى دايم هههههههههههههههههه


 ده و انا بافتحها و ليسة مش عارفة فيها ايه


و ده و انا باعيط اول ما شوفتها
طلعت ايه؟؟


نهى عملت لى جايزة فعلا بالازاز ... تخليوا؟


و فى ستين الف داهية البوبس اللى مش حيكرموا جوايز القراء. انا عايزة ايه اكتر من كده؟
ربنا يخليكى ليا يا نهى, مش عارفة اشكرك ازاى
و شكرا لكل حبايبى اللى جم, و شكرا لكل اللى صوتوا لى واحد واحد, و كل اللى بذلوا معايا مجهود كل يوم, و شكرا للمدونة و للمسابقة اللى وريتنى – فى لحظة كنت فعلا محتاجة اشوف ده – ان ربنا انعم عليا بنعمة احلى صحاب فى الدنيا

انا بجد فرحانة
الحمد لله

بمناسبة عيد العمال -- اوبريت الجيل الصاعد. ايوة اللى هم احنا على فكرة برضه

عاش الجــيل الصاعد ... عاش
جيل من شعب مجاهد .... عاش
عاش يبني ويجاهد   عاش بكفاحه الخالد
راجل واحد مبدأ واحد
عاش جيل ثورتنا عاش


عاش الجندي يوم  ما حطم شوكة الاستعمار
كان عنوان النصر الثوري في كل بلد أحرار
وسـمعناه بيقولها قوية باسم مبادئ أمة أبيّة
أنا خط هجوم ودفاع  أنا رمز سلام وصراع
أفدي بالروح وأعيش في النصر بطل وشجاع
حيوا معايا  قولوا معايا
عاش الجندي العربي عاش


نجاة الصغيرة:

عاش الزارع يوم الشمس ما حست بيها عنيه
فرشت نورها وكبر الزرع  وهو مداري عليه
وسمعناه بيقولها قوية - أرض ولادي ورجعت لياّ
حرمونا سنين وســــنين  وافتكروا الناس نايمين
وطلعنا عليهم يوم خلصنا حقوق ملايين

حيوا معايا  قولوا معايا
عاش فلاح الثورة عاش


عبد الحليم:

عاش الفن حضارة لأمة يبنيها الفنان
يروي حياتها في غنوة في كلمة
في صورة بروح وإيمان
وســمعناه بيقولها قوية - مجد بلادي عهد عليا
قلبي وروحي ملك لفني والإتنين لبلادي هدية
حيوا معايا  قولوا معايا
عاش الفن رسالة عاش


فايزة أحمد:

عاش العامل يوم  ما  فكر يبني لبلده دار
فيها مداخن طالع  منها  لهب النور والنار

وسمعناه بيقولها قوية - ده إنتاجي وصنع إيديا
حققنا بعون الله للشعب دعاه ومناه
والخير زاد منا وفاض والفايض صدرناه
قولوا معايا  حيوا معايا
عاش عاش العامل عاش


شادية:

عاش الطالب يوم ما طلب العلم كتاب وسلاح
عرف العلم وســـــيلة تحقق غــــاية كل نجاح
وســـمعناه بيقولها قوية - في الإعدادي وفي الكلية
العلم ســـــــلاح جبار بيحول ليلنا نهار
يسعى للنور بالنور ويواجه النار بالنار

حيوا معايا  قولوا معايا
عاش الجيل الصاعد عاش


عبد الوهاب:

عاش الشعب العربي كله شعب سلام وأمان
عاش الوعي العربي كله ثورة في كل مكان

عاش الشعب العربي كله شعب سلام وأمان
عاش الوعي العربي كله ثورة في كل مكان

عاش الشعب العربي كله شعب سلام وأمان
عاش الوعي العربي كله ثورة في كل مكان

ثورة مـــارد للحرية - هب ونادى بالقومية
ردينا عليك يا جمال وإيدينا ف إيديك يا جمال
وطلعنا معاك يا جمال   -  نبني وياك يا جمال
حيوا معايا قولوا معايا
عاش عبد الناصر عاش